མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
(གསར་འགོད་པ། ལྷ་ཆེན་རྒྱལ།)ཟླ9པའི་ཚེས29ཉིན། མཚོ་སྔོན་ཞིང་ཆེན་མི་རིགས་སྐད་ཡིག་ལོ་ཙཱ་མཐུན་ཚོགས་ཀྱིས་གཙོ་སྒྲུབ་བྱས་ཤིང་།མཚོ་སྔོན་ཞིང་ཆེན་མི་དམངས་སྲིད་གཞུང་གྲངས་ཉུང་མི་རིགས་སྐད་ཡིག་ཡིག་སྒྱུར་ཁང་གིས་འགན་སྒྲུབ་དང་། ཡུལ་ཤུལ་བོད་རིགས་རང་སྐྱོང་ཁུལ་མི་རིགས་སྐད་ཡིག་ལས་དོན་ལྟེ་གནས་ཀྱིས་རོགས་སྒྲུབ་བྱས་པའི་མཚོ་སྔོན་ཞིང་ཆེན་གྱི་མི་རིགས་སྐད་ཡིག་ལོ་ཙཱའི་རིག་གཞུང་བགྲོ་གླེང་ཚོགས་འདུ་ཐེངས་བཅུ་བཞི་པ་ཡུལ་ཤུལ་དུ་འཚོགས། མཚོ་སྔོན་ཞིང་ཆེན་མི་རིགས་སྐད་ཡིག་ལོ་ཙཱ་བའི་མཐུན་ཚོགས་ཀྱི་དྲུང་ཆེ་འབྲུག་བྱམས་ཚེ་རིང་གིས་ཚོགས་འདུར་གཙོ་སྐྱོང་གནང་ཞིང་། ཡུལ་ཤུལ་འཐབ་ཕྱོགས་གཅིག་གྱུར་པུའུ་ཡི་པུའུ་ཀྲང་གཞོན་པ། ཁུལ་མི་རིགས་ཆོས་ལུགས་ལས་དོན་ཨུ་ལྷན་གྱི་ཀྲུའུ་རེན་ནོར་བུ་དབང་གྲགས་ཀྱིས་ཤིས་ཚིག་ཕུལ། མཚོ་སྔོན་ཞིང་ཆེན་གྲངས་ཉུང་མི་རིགས་སྐད་ཡིག་ལས་དོན་ལྟེ་གནས་ཀྱི་ཀྲུའུ་རེན། མི་རིགས་སྐད་ཡིག་ལོ་ཙཱ་བའི་མཐུན་ཚོགས་ཀྱི་ཚོགས་གཙོ་གཞོན་པ་ཚེ་རིང་འབུམ་གྱིས་གཏམ་བཤད་གནང་། ཞིང་ཆེན་ཡོངས་ཀྱི་ཏང་སྲིད་ལས་ཁུངས་དང་དོན་ལས་ལས་ཁུངས། ཚན་ཞིབ་སློབ་གླིང་། སྤྱི་ཚོགས་ཚོགས་པ། ལོ་ཙཱ་མཐུན་ཚོགས་ཀྱི་ཁོངས་ཞུགས་ལས་ཁུངས་སོ་སོ་བཅས་ཀྱི་མི་རིགས་སྐད་ཡིག་ལོ་ཙཱ་བ་དང་ལས་སྒོའི་རྐང་འཛིན་པ45ཚོགས་འདུར་ཞུགས་ཏེ། རིགས་པའི་གཞུང་ལུགས་ལ་མཉམ་གྲོས་དང་དཀའ་གནད་གནད་དོན་ལ་མཉམ་ཞིབ། འཕེལ་རྒྱས་ལམ་བུར་མཉམ་ཇུས་བཅས་བྱས་པ་རེད།
རིག་གཞུང་བགྲོ་གླེང་ཚོགས་འདུའི་མགོོ་རྩོམ་མཛད་སྒོ།
ཐེངས་འདུའི་བགྲོ་གླེང་ཚོགས་འདུའི་སྟེང་།“མི་རིགས་སྐད་ཡིག་ལོ་ཙཱའི་ཞབས་ཕྱི་ནུས་པ་ཇེ་ཆེར་བཏང་སྟེ་ཀྲུང་ཧྭ་མི་རིགས་གཅིག་མཐུན་ཚོགས་པ་འཛུགས་སྐྲུན་ལ་རམ་འདེགས”ཞེས་པ་བརྗོད་དོན་གཙོ་བོ་བྱས་ཏེ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མི་རིགས་བྱ་བར་ཤུགས་སྣོན་དང་ལེགས་བཅོས་བྱེད་པའི་སྐོར་གྱི་དགོངས་པ་གལ་ཆེན་སློབ་སྦྱོང་དང་ལག་བསྟར་མཐར་ཕྱིན་བྱེད་པ།《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་བཅའ་ཁྲིམས》སློབ་སྦྱོང་དྲིལ་སྒྲོག་དང་ལག་བསྟར་མཐར་ཕྱིན་བྱས་ཤིང་། མི་རིགས་སོ་སོ་རྒྱ་ཁྱབ་ཏུ་འགྲོ་འོང་དང་། ཕྱོགས་ཡོངས་ནས་སྤེལ་རེས། གཏིང་ཟབ་སྒོས་མཉམ་འདྲེས་བཅས་ཡོང་བར་སྐུལ་སྤེལ་བགྱིས་ཏེ། ཞིང་ཆེན་ཡོངས་ཀྱི་མི་རིགས་སྐད་ཡིག་ལོ་ཙཱའི་བྱ་གཞག་སྤུས་ཚད་མཐོ་བའི་ངང་འཕེལ་རྒྱས་སུ་འགྲོ་བར་སྐུལ་འདེད་བཏང་བ་རེད།
རིག་གཞུང་བགྲོ་གླེང་ཚོགས་འདུའི་ཡུལ་དངོས།
ཚོགས་འདུ་ལས་བསྟན་དོན། མི་རིགས་སྐད་ཡིག་ལོ་ཙཱའི་བྱ་བ་ལེགས་པོར་བསྒྲུབ་རྒྱུ་དེ། ཏང་གི་མི་རིགས་སྲིད་ཇུས་མི་རིགས་ས་ཁུལ་དུ་རྩ་བ་ཚུགས་ནས་རྩེ་མོ་རྒྱས་པར་འབྲེལ་བ་དང་། མི་རིགས་སོ་སོའི་མང་ཚོགས་ཀྱིས་ཏང་དང་རྒྱལ་ཁབ་ལ་མོས་མཐུན་འཕེལ་བར་འབྲེལ་བ་དང་། མི་རིགས་མཐུན་སྒྲིལ་ཡར་ཐོན་བྱ་གཞག་ཁྱོན་ཡོངས་ལ་འབྲེལ་བ་ཡོད་པ་ཞིག་ཡིན་པས། རྒྱ་ཆེའི་མི་རིགས་སྐད་ཡིག་ལོ་ཙཱ་བ་རྣམས་ཀྱིས་ཐེངས་འདིའི་བགྲོ་གླེང་ཚོགས་འདུའི་གོ་སྐབས་དམ་འཛིན་བྱས་ཏེ།《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་བཅའ་ཁྲིམས》ཀྱི་ཁྲིམས་འཛུགས་དགོངས་དོན་ལ་གོ་བ་ཟབ་མོ་ལེན་པ་དང་། འདུ་ཤེས་འཛིན་སྟངས་ཀྱི་བདེ་འཇགས་སྲུང་རགས་བརྟན་པོར་བསྐྲུན་ནས། དུས་རབས་གསར་པའི་བླང་བྱར་དམིགས་པ་གཏད་ནས། ལོ་ཙཱའི་འཇོན་མིའི་དཔུང་ཁག་འཛུགས་སྐྱོང་དང་ཆེད་ལས་ཀྱི་ཞབས་ཕྱིའི་ནུས་པ་ཇེ་ཆེར་བཏང་སྟེ། ལོ་ཙཱའི་བྱ་བས་ཆེ་ཕྱོགས་ལ་ཞབས་ཕྱི་བསྒྲུབ་པའི་ཆབ་སྲིད་འགན་ཁུར་ཕྲག་ཏུ་ལེན་དགོས་པ་བསྟན།
རིག་གཞུང་བགྲོ་གླེང་ཚོགས་འདུའི་ཡུལ་དངོས།
ཚོགས་འདུའི་ཐོག་ཏུ། མཚོ་སྔོན་མི་རིགས་སློབ་གྲྭ་ཆེན་མོའི་དགེ་རྒན་ཆེ་མོ་གཞོན་པ་འཇིགས་བྱེད་སྐྱབས་ལགས་ཀྱིས་ཚོགས་འདུའི་བརྗོད་དོན་གཙོ་བོ་སྐོར་ནས་འཆད་ཁྲིད་གནང་བ་དང་། དཔྱད་རྩོམ་བདམས་ཐོན་བྱུང་མཁན་གྱི་ལོ་ཙཱ་བ11གིས་རང་རང་གི་དཔྱད་རྩོམ་སྒྲོག་འདོན་བྱས། ཚོགས་ཞུགས་འཐུས་མི་རྣམ་པས་བགྲོ་གླེང་གཏིང་ཟབ་པ་བགྱིས་ཏེ། ཕྱོགས་མི་འདྲ་བ་ནས་མི་རིགས་སྐད་ཡིག་ལོ་ཙཱས་མི་རིགས་སོ་སོའི་འགྲོ་ཡོང་དང་མཉམ་འདྲེས། བརྗེ་རེས་བཅས་ལ་སྐུལ་འདེད་དང་མི་རིགས་ས་ཁུལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ཞབས་འདེགས་ཞུ་བའི་ནུས་པ་སྔོག་འདོན་བྱས་པ་དང་། ལོ་ཙཱའི་ལག་ལེན་གྱི་ཉམས་མྱོང་དང་གཞུང་ལུགས་ཞིབ་འཇུག་གི་གྲུབ་འབྲས་སོགས་ཀྱི་སྐོར་ནས་བསམ་ཚུལ་བརྗེ་རེས་བྱས། ཚོགས་འདུ་ཚོགས་ཡུན་དུ། ཚོགས་ཞུགས་མི་སྣ་མཉམ་དུ་ཡུལ་ཤུལ་ཡོམ་འགོག་རྒུད་སྐྱོབ་དྲན་གསོ་ཁང་དང་། ལེབ་ཁོག་ལོ་རྒྱུས་རིག་གནས་གནའ་ཤུལ་སོགས་སུ་ལྟ་སྐོར་དུ་ཕེབས་ཏེ། རླབས་ཆེ་བའི་ཡོམ་འགོག་རྒུད་སྐྱོབ་སྙིང་སྟོབས་དང་མི་རིགས་སོ་སོའི་འགྲོ་འོང་མཉམ་འདྲེས་བརྗེ་རེས་ཀྱི་འདས་མ་ད་གསུམ་ལ་རྒྱུས་ལོན་བྱས།
མཚོ་སྔོན་མི་རིགས་སློབ་གྲྭ་ཆེན་མོའི་དགེ་རྒན་ཆེ་མོ་གཞོན་པ་འཇིགས་བྱེད་སྐྱབས་ཀྱིས་ཚོགས་འདུའི་བརྗོད་དོན་གཙོ་བོ་སྐོར་ནས་འཆད་ཁྲིད་གནང་བཞིན་པའི་ཚུལ།
ཐེངས་འདིའི་བགྲོ་གླེང་ཚོགས་འདུ་ལས་ཞིང་ཆེན་ཡོངས་ཀྱི་མི་རིགས་སྐད་ཡིག་ལོ་ཙཱ་ཁག་གི་བསམ་བློའི་མོས་མཐུན་སྔར་བས་གཅིག་གྱུར་བྱས་པ་དང་། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་གཙོ་ཐིག་ཏུ་བཟུང་ནས་མི་རིགས་སྐད་ཡིག་ལོ་ཙཱའི་བྱ་གཞག་སྤུས་ཚད་མཐོ་བའི་ངང་འཕེལ་རྒྱས་སུ་གཏོང་བའི་ཁ་ཕྱོགས་དང་ཐབས་ལམ་ངེས་གསལ་བྱས་པ་མ་ཟད། ལོ་ཙཱའི་དཔུང་ཁག་གི་མི་རིགས་བྱ་བའི་ཁྱོན་ཡོངས་ལ་ཞབས་འདེགས་ཞུ་བའི་འགན་འཁྲི་ཁུར་སེམས་ཇེ་དྲག་ཏུ་བཏང་བར་མ་ཟད། མི་རིགས་སོ་སོས་མཉམ་འཚོ་མཉམ་སློབ་དང་། མཉམ་སྐྲུན་མཉམ་སྤྱོད། མཉམ་སྒྲུབ་མཉམ་སྐྱིད་ཀྱིས་མི་དམངས་མང་ཚོགས་ཀྱི་སྐད་ཆ་སྣ་མང་རང་བཞིན་གྱི་དགོས་མཁོ་བསྐང་བ་དང་། ཞིང་ཆེན་ཡོངས་ཀྱི་མི་རིགས་མཐུན་སྒྲིལ་ཡར་ཐོན་གྱི་བྱ་བཞག་གི་ཆེ་ཕྱོགས་ལ་ཞབས་ཕྱི་བསྒྲུབ་པ། ཀྲུང་ཧྭ་མི་རིགས་ཐུན་མོང་ཚོགས་པའི་འདུ་ཤེས་བརྟན་པོར་སྐྱེད་པ་བཅས་ལ་སྐད་ཆའི་འདེགས་སྐྱོར་བརྟན་པོར་བཙུགས་ཡོད།
ཚོགས་ཞུགས་མི་སྣའི་མཉམ་པར།
