མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
རྒྱལ་སྟོན་དུས་ཆེན་སླེབས་ལ་ཉེ་བའི་སྐབས་སུ། མཚོ་སྔོན་ཞིང་ཆེན་མེ་ཟོན་རོགས་སྐྱོབ་སྤྱིའི་རུ་ཁག་གིས་གཅིག་གྱུར་བཀོད་སྒྲིག་དང་། གྲོང་ཁྱེར་དང་ཁུལ་སོ་སོའི་མེ་ཟོན་རོགས་སྐྱོབ་ཡན་ལག་རུ་ཁག་གིས་མགྱོགས་མྱུར་ངང་འགུལ་སྐྱོད་སྤེལ་ནས་འབྲེལ་ཡོད་འགན་ནུས་སྡེ་ཁག་དང་མཉམ་འབྲེལ་བྱས་ཏེ་ཟས་རིགས་དང་རོལ་རྩེད། ཚོང་ར། ཡུལ་སྐོར་ལྗོངས་ཁུལ། གསོལ་མགྲོན་ཁང་། སྡོད་དམངས་སྡེ་ཁུལ་སོགས་གནས་ཡུལ་གཙོ་བོར་སོང་ནས་དུས་ཆེན་སྔོན་གྱི་མེ་ཟོན་བདེ་འཇགས་ལ་གཅིག་བསྡུས་ཞིབ་བཤེར་བྱས་ཏེ་སྟོབས་ཤུགས་ཡོད་རྒུས་དུས་ཆེན་སྐབས་ཀྱི་མེ་ཟོན་བདེ་འཇགས་འགོག་ར་བརྟན་སྲུང་བྱས།
ས་ཁུལ་སོ་སོའི་ཞིབ་བཤེར་ཚན་ཆུང་གིས་གནད་དོན་གྱི་ཁྲིད་ཕྱོགས་རྒྱུན་འཁྱོངས་དང་། དུས་ཚོད་བསྣོལ་བ་དང་སྐབས་བསྟུན་འཐེན་བཤེར་ཟུང་འབྲེལ་གྱི་བྱེད་ཐབས་སྤྱད་དེ་སྡོད་དམངས་སྡེ་ཁུལ་དང་ལམ་འགྲམ་ཚོང་ཁང་། གསོལ་མགྲོན་ཁང་། ཐོན་སྐྱེད་ཁེ་ལས་སོགས་ལ་དམིགས་ནས་མེ་ཟོན་བདེ་འཇགས་ཀྱི་གཙོ་གཞིའི་འགན་འཁྲི་དོན་འཁྱོལ་བྱས་ཡོད་མེད་ལ་ཞིབ་དཔྱད་དང་། ཁ་འགྲེམ་བགྲོད་ལམ་དང་མེ་ཟོན་རླངས་འཁོར་བགྲོད་ལམ། མེ་ཟོན་སྒྲིག་བཀོད་ཆ་ཚང་མིན། མེ་ཟོན་ཚོད་འཛིན་ཁང་གི་ཆུ་ཚོད་ཉེར་བཞིའི་ལས་རེས་ལས་སྲུང་ལམ་ལུགས་དོན་འཁྱོལ་གནས་ཚུལ་བཅས་ལ་ཞིབ་བཤེར་བྱས་ཤིང་། མེ་དང་གློག སོལ་རླངས་བཅས་བེད་སྤྱོད་དང་དུ་བ་འབུད་ཁུང་གཙང་སེལ་སོགས་གནས་ཚུལ་ལ་གྲལ་བཤེར་བྱས། དེ་དང་མཉམ་དུ་མེ་ཟོན་ས་ཚིགས་ཆུང་ངུའི་དངོས་འཐབ་ནུས་པ་དང་མེ་འགོག་སྐོར་ཞིབ་ཟིན་ཐོ། འཕྲལ་བསྟུན་སྔོན་ཇུས། ལས་ཞུགས་མི་སྣའི་མེ་སྐྱོན་ཐག་གཅོད་ནུས་པ་དང་མི་སྣ་ཁ་འགྲེམ་ཁྲིད་སྟོན་ནུས་པར་འཐེན་བཤེར་བྱས། དེ་མིན་ད་རུང་ཡུལ་དངོས་ནས་བགྲོད་ལམ་བཀག་པ་དང་རོགས་སྐྱོབ་བྱ་ཡུལ་བཀག་པ་སོགས་ཀྱི་གནད་དོན་དག་ཐེར་ལེགས་བཅོས་བྱས་ཤིང་། དུས་ལྟར་དག་ཐེར་ལེགས་བཅོས་བྱེད་མི་ཐུབ་པའི་གནད་དོན་ལ་དམིགས་ནས་དག་ཐེར་ལེགས་བཅོས་ཀྱི་དུས་ཡུན་དང་འགན་ལེན་མི་སྣ་གཏན་འཁེལ་གསལ་བོ་དང་དོ་དམ་བྱེད་ཐབས་ལག་བསྟར་ནན་མོ་བྱས་ཏེ་དུས་ཆེན་སྐབས་ཀྱི་མངོན་མེད་རྐྱེན་ངན་གཙང་སེལ་བྱས།
ཞིང་ཆེན་ཡོངས་ཀྱི་མེ་ཟོན་རོགས་སྐྱོབ་རུ་ཁག་གིས་ཚོང་ར་གཙོ་བོ་དང་ཡུལ་སྐོར་ལྗོངས་ཁུལ་དུ་སྔོན་ལ་འགན་སྒྲུབ་སྟོབས་ཤུགས་བཀོད་སྒྲིག་དང་འཁོར་སྐྱོད་སྐོར་སྲུང་ས་ཚིགས་གཏན་འཁེལ་བྱས་ཏེ་ཉེན་ཁ་མགྱོགས་མྱུར་ངང་ཐག་གཅོད་བྱེད་པར་འགན་སྲུང་བྱས། དེར་མ་ཟད། མེ་ཟོན་རླངས་འཁོར་དང་སྒྲིག་ཆས། རོགས་སྐྱོབ་སྔོན་ཇུས་བཅས་ལ་ཡང་བསྐྱར་ཞིབ་བཤེར་དང་ཡང་བསྐྱར་སྦྱོང་བརྡར་བྱས་ཏེ་གནས་ཚུལ་གསལ་བོར་ཤེས་པ་དང་གྲ་སྒྲིག་ཡག་པོ་བྱེད་པར་ཁག་ཐེག་བྱས། དུས་ཆེན་སྔོན་གྱི་ཞིབ་བཤེར་དང་མཚན་མོར་གཅིག་བསྡུས་སྒོས་ཞིབ་བཤེར་བྱེད་རྒྱུར་སྐུལ་འདེད་གཏོང་བ་དང་མངོན་མེད་རྐྱེན་ངན་དག་ཐེར་ལེགས་བཅོས་བྱེད་རྒྱུ་དམ་འཛིན་བྱེད་པ། དྲིལ་སྒྲོག་ཐབས་ལམ་རྒྱ་བསྐྱེད་དང་མེ་འགོག་སྲོག་སྐྱོབ་ཤེས་བྱ་ཁྱབ་གདལ་གཏོང་བ། སྔོན་འགོག་དང་འགོག་ཟོན་ཟུང་འབྲེལ་བྱེད་རྒྱུ་རྒྱུན་འཁྱོངས་བྱེད་པ། ལས་རེས་ལས་སྲུང་ལམ་ལུགས་དང་དངོས་འཐབ་སྦྱོང་བརྡར་དོན་འཁྱོལ་ནན་མོ་བྱེད་པ། མེ་ཟོན་བདེ་འཇགས་ཉེན་ཁ་ཐག་གཅོད་བཅས་བྱས་ཏེ་མང་ཚོགས་ཀྱི་ཚེ་སྲོག་རྒྱུ་ནོར་བདེ་འཇགས་ལ་སྲུང་སྐྱོབ་བྱས།
