དགའ་བདེ་རྫོང་གིས་ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་འོས་སྦྱོར་ཚོགས་འདུ་བསྡུས།

ཟླ9པའི་ཚེས27ཉིན། རང་བྱུང་གི་བཅུད་དང་སྤྱོད་ལྡན་གྱི་སེམས་ཞེས་པའི2026ལོའི་མཚོ་སྔོན་ཞིང་ཆེན་མགོ་ལོག་བོད་རིགས་རང་སྐྱོང་ཁུལ་དགའ་བདེ་རྫོང་གི་ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་འོས་སྦྱོར་ཚོགས་འདུ་ཟི་ལིང་གྲོང་ཁྱེར་མཁར་བྱང་ཁུལ་གྱི་ཝུའུ་ཡུའེ་ཐང་ཆེན་དུ་བསྡུས། དུས་ཡུན་ཉིན5ཡིན་པའི་བྱེད་སྒོ་དེ་ཟླ་མཆོད་དང་རྒྱལ་སྟོན་གྱི་འཛད་སྤྱོད་དུས་རིམ་དུ་འཁེལ་ཞིང་། ཞིང་ལས་དང་རིག་གནས་ཡུལ་སྐོར་མཉམ་འདྲེས་ཀྱི་རྣམ་པར་བརྟེན་ནས། དགའ་བདེའི་རྫོང་གི་མཐོ་སྒང་ཁྱད་ལྡན་ཐོན་དངོས་དང་རྨ་ཡུལ་རིག་གནས་ཐུན་མོང་ཐོག་ཁྱབ་ཆེར་འོས་སྦྱོར་བྱས།

བྱེད་སྒོ་དེ་ཀྲུང་གུང་དགའ་བདེ་རྫོང་ཏང་ཨུ་དང་། དགའ་བདེ་རྫོང་མི་དམངས་སྲིད་གཞུང་གིས་གཙོ་སྒྲུབ་བྱས་ཞིང་། རྫོང་ཡོངས་ཀྱི་ཞིང་ཕྱུགས་ཁེ་ལས14དང་། གཟུགས་འདས་ཤུལ་བཞག་རིག་གནས་བཟོ་ཁང་གིས་བརྩམས་ཆོས་ཁྱེར་ནས་འགྲེམ་སྟོན་ལ་ཞུགས་ཡོད། འགྲེམ་སྟོན་དངོས་རྫས་ལ་སྐམས་ལུག་ཤ་གསར་བའི་ཐོན་རྫས་དང་། ཤ་སྐམ་སོགས་ལྗང་མདོག་སྐྱེ་ལྡན་ཞིང་ཕྱུགས་ཟས་རིགས། ལག་བཟོས་བོད་སྤོས། ནོར་གྱི་ཁུལ་རྩིད་ཐོན་རྫས་སོགས་གཟུགས་འདས་ཤུལ་བཞག་རིག་གནས་ཀྱི་གསར་བཟོས་ཐོན་རྫས་སོགས་ཡོད། ཡུལ་དངོས་སུ་ཞིམ་ཟས་གསལ་འབྱེད་ཁུལ་དང་། སྐམས་ལུག་ཤ་བཙོས་མ། ལུག་ཤ་བསྲེགས་མ་ཧྲིལ་བོ། སྐམས་ཤའི་ཁུ་བ་སོགས་མཐོ་སྒང་གི་བཅུད་ལྡན་ཟས་རིགས་བཀོད་སྒྲིག་བྱས་ཡོད་པས། གྲོང་མི་མང་པོས་ཟས་ཀྱི་བྲོ་བར་མྱངས་ཤིང་འདེམ་ཉོ་བྱས།

ཉིན་དང་པོར་ཞིང་ཕྱུགས་དང་རིག་གནས་ཡུལ་སྐོར་གྱི་ཆེད་དོན་འོས་སྦྱོར་དང་མགོ་རྩོམ་བྱེད་སྒོ་སྤེལ་ཏེ། བྱེད་སྒོ་སྤེལ་རིང་ཐོན་རྫས་འགྲེམ་འཚོང་དང་རིག་གནས་ཉམས་ལེན་ཁང་མུ་མཐུད་དུ་སྒོ་འབྱེད་རྒྱུ་ཡིན་ཞིང་། དུས་མཉམ་དུ་བོད་ཀྱི་གླུ་གར་འཁྲབ་སྟོན་དང་། གེ་སེར་རིག་གནས་ཤེས་བྱའི་དྲི་བ་དྲིས་ལན། སྐོར་བྲོ་འཁྲབ་པ་སོགས་ཁྱད་ལྡན་ནང་དོན་བཀོད་སྒྲིག་བྱས་ཡོད།