ཞི་ཅིན་ཕིང་གིས་ཆུ་ཚད་སྔར་ལས་མཐོ་བའི་བདེ་འཇགས་ཀྲུང་གོ་འཛུགས་སྐྲུན་བྱེད་པའི་སྐོར་ནས་མཛུབ་སྟོན་གལ་ཆེན་གནང་།

ཉེ་ལམ། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུའི་ཀྲུའུ་ཞི་ཞི་ཅིན་ཕིང་གིས་ཆུ་ཚད་སྔར་ལས་མཐོ་བའི་བདེ་འཇགས་ཀྲུང་གོ་འཛུགས་སྐྲུན་བྱེད་པའི་སྐོར་ནས་མཛུབ་སྟོན་གལ་ཆེན་གནང་སྟེ། ཏང་གི་ཚོགས་ཆེན་བཅོ་བརྒྱད་པའི་ཚུན་དུ།  བདེ་འཇགས་ཀྲུང་གོའི་འཛུགས་སྐྲུན་ཐད་གྲུབ་འབྲས་མངོན་གསལ་ཐོབ་ཡོད། མི་དམངས་བདེ་སྡོད་ལས་བརྩོན་བྱུང་བ་དང་། སྤྱི་ཚོགས་བདེ་འཇགས་ཀྱི་རྣམ་པ་བཟང་པོ་སྔར་ལས་སྲ་བརྟན་དུ་གྱུར་ནས། རང་རྒྱལ་འཛམ་གླིང་སྟེང་ཆེས་བདེ་འཇགས་ཡིན་པའི་རྒྱལ་ཁབ་ཀྱི་གྲས་སུ་ཚུད་ཡོད་ཅེས་བསྟན།

ཞི་ཅིན་ཕིང་གིས་འཐབ་ལམ་གསར་པའི་སྟེང་། དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་སྟོན་དུ་འཛིན་པ་དང་། བློ་བརྟན་འགྱུར་མེད་ཀྱིས་རྒྱལ་ཁབ་ཀྱི་སྤྱི་ཡོངས་བདེ་འཇགས་ལྟ་བ་ལག་བསྟར་བྱེད་པ། ཏང་གིས་ཕྱོགས་ཡོངས་ནས་འགོ་ཁྲིད་བྱ་རྒྱར་རྒྱུན་འཁྱོངས་དང་ཤུགས་སྣོན་པ། འཕེལ་རྒྱས་དང་བདེ་འཇགས་གཅིག་གྱུར་འཆར་འགོད་བྱེད་པ།  ཆད་འགོག་མཉམ་བསྟར་དང་རྩ་ལག་མཉམ་བཅོས་བྱེད་པར་དོ་སྣང་བྱེད་པ། ཁྲིམས་སྐྱོང་འདེགས་སྐྱོར་དང་ཚན་རྩལ་ནུས་སྐྱེད་ལ་ཤུགས་སྣོན་པ། རྒྱལ་ཁབ་བདེ་འཇགས་མ་ལག་དང་ནུས་པའི་འཛུགས་སྐྱོང་ལ་ཤུགས་སྣོན་པ། སྤྱི་པའི་བདེ་འཇགས་བཅོས་སྐྱོང་ཆུ་ཚད་ཇེ་མཐོར་གཏོང་བ། སྤྱི་ཚོགས་བཅོས་སྐྱོང་མ་ལག་འཐུས་ཚང་དུ་གཏོང་བ་དང་། ཉེན་ཁ་སྣ་ཚོགས་སྔོན་འགོག་དང་སེལ་ཐབས་བྱེད་པ། རྒྱལ་ཁབ་སྔར་ལས་བདེ་འཇགས་ཡིན་པ་དང་། སྤྱི་ཚོགས་སྔར་ལས་གོ་རིམ་ལྡན་པ། བཅོས་སྐྱོང་སྔར་ལས་ཕན་འབྲས་ལྡན་པ། མི་དམངས་སྔར་ལས་བློ་ཡིད་ཚིམ་པ་བཅས་ཡོང་བའི་ཐད་མུ་མཐུད་དུ་ཤུགས་བསྣན་ནས། ཆུ་ཚད་སྔར་ལས་མཐོ་བའི་བདེ་འཇགས་ཀྲུང་གོའི་འཛུགས་སྐྲུན་ལ་བརྟེན་ནས་ཀྲུང་གོའི་ལུགས་ཀྱི་དེང་རབས་ཅན་བརྟན་པོའི་ངང་རྒྱང་རིང་དུ་སྐྱོད་པར་འགན་སྲུང་བྱེད་དགོས་ཞེས་ནན་གྱིས་བསྟན།

བདེ་འཇགས་ཀྲུང་གོའི་འཛུགས་སྐྲུན་བྱ་བའི་ཚོགས་འདུ་ཚེས28ཉིན་པེ་ཅིང་དུ་ཚོགས། ཚོགས་འདུའི་སྟེང་ཞི་ཅིན་ཕིང་གི་མཛུབ་སྟོན་གལ་ཆེན་བརྒྱུད་བསྒྲགས་གནང་། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན། ཀྲུང་དབྱང་ སྲིད་ཁྲིམས་ཨུ་ཡོན་ལྷན་ཁང་གི་ཧྲུའུ་ཅི་ཁྲེན་ཝུན་ཆིང་ཚོགས་འདུར་ཕེབས་ནས་གསུང་བཤད་གནང་། ཁོང་གིས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱིས་བདེ་འཇགས་ཀྲུང་གོའི་འཛུགས་སྐྲུན་ལ་འཆར་གཞི་བཀོད་ཅིང་ཁ་ཕྱོགས་གསལ་སྟོན་གནང་ཡོད། ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་དབུ་ཁྲིད་འོག བདེ་འཇགས་ཀྲུང་གོའི་འཛུགས་སྐྲུན་གྱི་གྲུབ་འབྲས་ལ་འཛམ་གླིང་སྐྱེ་བོ་ཀུན་གྱི་ཁས་ལེན་ཐོབ་ཡོད། བདེ་འཇགས་ནི་ཀྲུང་གོའི་སྲིད་སྐྱོང་གི་མཚོན་རྟགས་མངོན་གསལ་ཞིག་ཏུ་གྱུར་ཡོད་དེ། འདིའི་རྩ་བ་ནི་བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གི་དབུ་ཁྲིད་ལ་རག་ལས་པ་དང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པའི་ཚན་རིག་དང་མཐུན་པའི་ཁྲིད་སྟོན་ལ་རག་ལས། ང་ཚོས་བློ་བརྟན་འགྱུར་མེད་ཀྱིས་སྤྱི་ཡོངས་ཀྱི་རྒྱལ་ཁབ་བདེ་འཇགས་ལྟ་བ་ལག་ལེན་མཐར་ཕྱིན་བྱེད་དགོས་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་དང་ལག་ལེན་མཐར་ཕྱིན་བྱས་ཏེ། ཏང་ཀྲུང་དབྱང་གི་གཅིག་བསྡུས་གཅིག་གྱུར་གྱི་འགོ་ཁྲིད་འོག  ཆད་འགོག་མཉམ་བསྟར་དང་རྩ་ལག་མཉམ་བཅོས། མཉམ་འཛིན་སྤྱི་སྒྲུབ། མཉམ་ཤུགས་ཆགས་པ་བཅས་བྱས་ནས། ཆུ་ཚད་སྔར་ལས་མཐོ་བའི་བདེ་འཇགས་ཀྲུང་གོ་ཧུར་ཐག་གིས་འཛུགས་སྐྲུན་བྱེད་དགོས་ཞེས་བསྟན།

ཀྲུང་གུང་ཀྲུང་དབྱང་ཧྲུའུ་ཅི་ཁྲུའུ་ཡི་ཧྲུའུ་ཅི། སྤྱི་བདེ་པུའུ་ཡི་པུའུ་ཀྲང་ཝང་ཞའོ་ཧུང་གིས་སྤྱི་སྡོམ་གསུང་བཤད་ལས་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་མཐར་ཕྱིན་བྱས་ཏེ། ཐེངས་འདིའི་ཚོགས་འདུའི་བཀོད་སྒྲིག་ལྟར། སྔར་ལས་ལྷག་པ་བཞིའི་དམིགས་འབེན་དམིགས་སུ་བཟུང་ནས། དགོངས་པའི་ཁྲིད་སྟོན་ཐད་ཤུགས་སྣོན་པ་དང་དེ་དོན་འཁྱོལ་དམ་འཛིན་བྱེད་པ། གཙོ་གནད་ལས་འགན་ལ་རྩེ་གཅིག་ཏུ་དམིགས་པ་དང་དེ་དོན་འཁྱོལ་དམ་འཛིན་བྱེད་པ། ཐབས་ཤེས་དང་བྱེད་ཐབས་གསར་གཏོད་བྱེད་པ་དང་དེ་དོན་འཁྱོལ་དམ་འཛིན་བྱེད་པ། གཞི་རིམ་གྱི་རྨང་གཞི་སྲ་བརྟན་དུ་གཏོང་བ་དང་དེ་དོན་འཁྱོལ་ལ་དམ་འཛིན་བྱེད་པ། བྱ་བའི་གྲུབ་ཚུལ་འཐུས་ཚང་དུ་གཏོང་བ་དང་དེ་དོན་འཁྱོལ་དམ་འཛིན་བྱེད་པ་བཅས་བྱས་ནས། བདེ་འཇགས་ཀྲུང་གོའི་འཛུགས་སྐྲུན་གྱི་རྣམ་པ་གསར་པ་རྒྱུན་ཆད་མེད་པར་གཏོད་དགོས།

ཚོགས་འདུའི་སྟེང་།  སྒོ་བྱང་སྤྲད་ནས་བདེ་འཇགས་ཀྲུང་གོའི་འཛུགས་སྐྲུན་གྱི་དཔེ་སྟོན་གྲོང་ཁྱེར60དང་བདེ་འཇགས་ཀྲུང་གོའི་འཛུགས་སྐྲུན་གྱི་དཔེ་སྟོན་རྫོང160ལ་མིང་བཏགས། གཟེངས་བསྟོད་ཐོབ་མཁན་གྱི་ཚབ་འཐུས་མིས་བརྗེ་རེས་གཏམ་བཤད་སྤེལ།

ཀྲང་ཅུན་དང་ཡིང་ཡུང་གཉིས་ཚོགས་འདུར་ཞུགས།