མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཉེ་ལམ། མཚོ་བྱང་བོད་རིགས་རང་སྐྱོང་ཁུལ་མེ་ཟོན་རོགས་སྐྱོབ་ཡན་ལག་རུ་ཁག་གིས་ཁུལ་གྱི་དམག་ཁོངས་ནས་ཕྱིར་ལོག་པའི་དམག་མིའི་ལས་དོན་ཅུས་དང་། ཁུལ་སྤྱི་ཁྱབ་བཟོ་ཚོགས། ཁུལ་བུད་མེད་མཉམ་འབྲེལ་ལྷན་ཚོགས། གུང་གཞོན་ཚོགས་པ་ཁུལ་ཨུ་ཡོན་ལྷན་ཁང་། ཁུལ་སྦྲག་སྲིད་དོ་དམ་ཅུས་སོགས་ལས་ཁུངས་མང་པོ་དང་མཉམ་འབྲེལ་བྱས་ཏེ། “ཏང་འཛུགས་ཀྱི་སྣེ་ཁྲིད་དང་མཉམ་ཤུགས་ལ་བརྟེན་ནས་མི་རིགས་མཐུན་སྒྲིལ་གྱི་ལེའུ་གསར་པ་རྩོམ”ཞེས་པའི་བརྗོད་དོན་མཉམ་སྐྲུན་བྱེད་སྒོ་སྤེལ། ལས་ཁུངས་སོ་སོའི་ལས་བྱེད་པ་དང་ལས་བཟོ་པ་མཉམ་གཅིག་ཏུ་འཛོམས་ཏེ། སྣ་མང་ཕུན་སུམ་ཚོགས་པའི་བྱེད་སྒོའི་རྣམ་པར་བརྟེན་ནས། མི་རིགས་མཐུན་སྒྲིལ་དང་དུས་བདེའི་འགོག་སྲུང་འཛིང་རགས་མཉམ་དུ་བསྐྲུན་རྒྱུའི་སྐོར་ནས་གླེང་མོལ་བྱས།
ད་ཐེངས་ཀྱི་ཐུན་མོང་འཛུགས་སྐྲུན་བྱེད་སྒོའི་ནང་དོན་ལ་ཤེས་བྱའི་རང་བཞིན་དང་སྤྲོ་སྣང་རང་བཞིན། ཉེར་སྤྱོད་རང་བཞིན་བཅས་ལྡན་པ་དང་། མེ་ཟོན་ཤེས་བྱའི་འགྲན་བསྡུར་དང་འཕྲལ་བསྟུན་རྩལ་ནུས་དངོས་སྦྱོང་། ཚོགས་པའི་སྤྲོ་སྣང་མཉམ་འགུལ། བཅའ་ཁྲིམས་ཁྲིམས་སྲོལ་སྲིད་ཇུས་སྒྲོག་འགྲེལ། མེ་ཟོན་སྒྲིག་ཆས་ལྟ་སྦྱོང་ཉམས་ལེན། མེ་ཟོན་བདེ་འཇགས་ཚན་རིག་ཁྱབ་གདལ་དྲིལ་སྒྲོག་སོགས་ཀྱི་ནང་དོན་མང་པོ་བརྒྱུད་རིམ་ལྡན་པའི་སྒོ་ནས་བཀོད་སྒྲིག་བྱས་ཏེ། ཕྱོགས་ཡོངས་དང་ཟུར་མང་པོའི་ངོས་ནས་ལས་ཁུངས་སོ་སོའི་སྤེལ་རེས་མཉམ་ལས་ལས་སྟེགས་བསྐྲུན།
བྱེད་སྒོ་སྤེལ་ཡུལ་གྱི་རྣམ་པ་འཁྲུག་ཆ་དོད་ཅིང་གོ་རིམ་ལྡན་པ་ཞིག་རེད། གཞུང་ལུགས་སློབ་སྦྱོང་དང་ཤེས་བྱའི་འགྲན་བསྡུར་གྱི་གོ་རིམ་ཁྲོད་མི་སྣ་ཡོངས་ཀྱིས་གཞུང་ལུགས་དང་སྲིད་ཇུས། དེ་བཞིན་མེ་ཟོན་བདེ་འཇགས་ཀྱི་རྒྱུན་ཤེས་བཅས་ལ་ཞིབ་འཇུག་སློབ་སྦྱོང་ནན་ཏན་བྱས་ནས། འབད་པས་དྲི་བར་ལན་བཏབ་ཡོད། དངོས་སྦྱོང་དང་སྒྲིག་ཆས་ལྟ་སྐོར་གྱི་ལས་རིམ་ཁྲོད་དུ། ཚང་མས་རིགས་སོ་སོའི་མེ་ཟོན་རོགས་སྐྱོབ་སྒྲིག་ཆས་ལ་ཐག་ཉེ་ས་ནས་ལག་ལེན་བྱས་ཏེ། རྨང་གཞིའི་མེ་ཟོན་དང་མེ་གསོད་པ། འཕྲལ་བསྟུན་སྲོག་ཉེན་ལས་ཐར་བའི་རྩལ་ནུས་སློབ་སྦྱོང་བཅས་ཁོང་དུ་ཆུད་པར་བྱས་ནས། རང་ངོས་ཀྱི་མེ་ཟོན་བདེ་འཇགས་འདུ་ཤེས་དང་འཕྲལ་བསྟུན་ཐག་གཅོད་ནུས་པ་མངོན་སུམ་ཇེ་ཆེར་སོང་ཡོད། སྤྲོ་སྣང་མཉམ་འགུལ་གྱི་ལས་རིམ་ཁྲོད་དུ། ལས་ཁུངས་སོ་སོའི་རུ་མིས་མཐུན་སྒྲིལ་རོགས་རེས་དང་མ་གྲོས་གཅིག་མཐུན་ངང་གཞོགས་འདེགས་བྱས་ནས། ཕན་ཚུན་རོགས་རེས་དང་མཉམ་དུ་ཡར་བརྩོན། དཔའ་ངར་ཆེན་པོས་སྔོན་ཐོན་བརྩོན་ལེན་བཅས་བྱེད་པའི་བསམ་པའི་ཉམས་འགྱུར་བཟང་པོ་གང་ལེགས་སྒོས་མངོན་ཡོད།
