ཡུས་ཧྲུའུ་ནོར་གནག་ཐོན་ལས་ཀྱི་ཚན་རྩལ་གྲུབ་འབྲས་འོས་སྦྱོར་བྱེད་སྒོ་བདེ་བླག་ངང་སྤེལ།

ཉེ་ལམ།   མཚོ་སྔོན་ཞིང་ཆེན་ཡུས་ཧྲུའུ་བོད་རིགས་རང་སྐྱོང་ཁུལ་གྱི་ནོར་གནག་ཐོན་ལས་ཀྱི་ཚན་རྩལ་གྲུབ་འབྲས་འོས་སྦྱོར་བྱེད་སྒོ་ཡུས་ཧྲུའུ་གྲོང་ཁྱེར་དུ་སྤེལ།  ཐེངས་འདིའི་བྱེད་སྒོ་ལས་ཚན་རིག་ལ་བརྟེན་ནས་ནོར་གནག་ཐོན་ལས་ལ་བྱེད་ནུས་བསྩོལ་བ་དང་གསར་གཏོད་ལ་བརྟེན་ནས་དཔལ་འབྱོར་འཕེལ་རྒྱས་ལ་སྐུལ་འདེད་གཏོང་ཞེས་པ་བརྗོད་དོན་དུ་བྱས་ཡོད་ལ། ཡུས་ཧྲུའུ་ཁུལ་མི་དམངས་སྲིད་གཞུང་དང་མཚོ་སྔོན་ཞིང་ཆེན་ཚན་རིག་ལག་རྩལ་ཐིང་གིས་མཛུབ་སྟོན་དང་།   ཡུས་ཧྲུའུ་ཁུལ་ཞིང་ཕྱུགས་དང་ཚན་རྩལ་ཅུས་ཀྱིས་གཙོ་སྒྲུབ་བྱས་ཤིང་།   མཚོ་སྔོན་ཞིང་ཆེན་ཐོན་སྐྱེད་ནུས་ཤུགས་སྐུལ་སྤེལ་ལྟེ་གནས་ཚད་ཡོད་ཀུང་ཟི་སོགས་ཀྱིས་འགན་སྒྲུབ་བྱས་པ་རེད།    ཞིང་ཆེན་ཕྱི་ནང་གི་ཚན་རིག་ཞིབ་འཇུག་ཁང་དང་མཐོ་རིམ་སློབ་གྲྭ།  ཐོན་ལས་བདག་གཉེར་གཙོ་གཞི་དེ་བཞིན་སྲིད་གཞུང་སྡེ་ཁག་གི་འཐུས་ཚབ་བཅས་མི60ལྷག་བྱེད་སྒོར་ཞུགས། 

བྱེད་སྒོ་ལས་ཡུས་ཧྲུའུ་ནོར་གནག་ཐོན་ལས་ཚུལ་སྒྱུར་རིམ་སྤོར་ཐད་ཀྱི་ཚན་རིག་ལག་རྩལ་གྱི་དགོས་མཁོར་དམིགས་ནས་ཐོན་སློབ་ཞིབ་གསུམ་དང་བེད་སྤྱོད་གནད་འཁེལ་སྦྲེལ་མཐུད་བྱེད་པའི་སྟེགས་བུ་བསྐྲུན་ཏེ་སྔོན་ཐོན་ཚན་རྩལ་གྲུབ་འབྲས་དོན་འཁྱོལ་ཚུལ་སྒྱུར་ཇེ་མགྱོགས་སུ་བཏང་བ་དང་ཐོན་ལས་ཀྱི་སྤུས་ཚད་མཐོ་བའི་འཕེལ་རྒྱས་ལ་བྱེད་ནུས་བསྩལ།   བྱེད་སྒོའི་ཕྱི་རོལ་དུ་ཚན་རྩལ་གྲུབ་འབྲས་འགྲེམས་སྟོན་ཁུལ་བཀོད་སྒྲིག་བྱས་ནས་ཡིག་རིས་འགྲེམས་པང་དང་དཔེ་མཚོན་དངོས་རྫས་བརྒྱུད་དེ་ནོར་གནག་རྒྱུད་བཟང་རྒྱུད་སྤེལ་དང་སྐྱེ་ཁམས་གསོ་སྤེལ།   ལས་སྣོན་ཞིབ་ཚགས་སོགས་ཐོན་ལས་མུ་ཕྲེང་ཡོངས་ཀྱི་གསར་གཏོད་གྲུབ་འབྲས་གཅིག་བསྡུས་སྒོས་མངོན་པར་བྱས་ནས་ཡུས་ཧྲུའུ་ནོར་གནག་ཐོན་ལས་ཀྱི་ཚན་རྩལ་འཕེལ་རྒྱས་གྲུབ་འབྲས་གསར་པ་ཕྱོགས་ཡོངས་ནས་མངོན་པར་བྱས།

བྱེད་སྒོའི་ཡུལ་དངོས་སུ་སློབ་གྲྭ་དང་ས་གནས་མཉམ་ལས་ཀྱི་གྲོས་མཐུན་ཞིག་ལ་མིང་རྟགས་བཀོད་པར་མ་ཟད།   ནོར་གནག་ཐོན་ལས་ཀྱི་འཐུས་ཚབ་རང་བཞིན་གྱི་ཚན་རྩལ་གྲུབ་འབྲས་བཞི་འོས་སྦྱོར་ཁྱབ་བསྒྲགས་བྱས། ཚན་རིག་ཞིབ་འཇུག་ཚོགས་པ་སོ་སོས་ཡུལ་དངོས་སུ་ལག་རྩལ་དགེ་མཚན་སོགས་འགྲེལ་ཀློག་ཞིབ་ཚགས་བྱས་པ་དང་།  ཐོན་ལས་འཕེལ་རྒྱས་ཀྱི་དཀའ་གནད་དང་འགག་གནད་ལ་གནད་འཁེལ་སྦྲེལ་མཐུད་བྱས་ཏེ་ལག་རྩལ་བཀོལ་སྤྱོད་ཡག་པོ་བྱེད་པའི་བྱེད་ཐབས་ལེགས་པོར་བཏོད།