མཚོ་སྔོན་མཚོ་བྱང་མེ་ཟོན་གྱིས་དུས་ཆེན་སྔོན་གྱི་མེ་ཟོན་བདེ་འཇགས་བྱ་བར་ཆེད་དོན་ཞིབ་བཤེར་བྱས།

ཉེ་ལམ། མཚོ་བྱང་བོད་རིགས་རང་སྐྱོང་ཁུལ་མེ་ཟོན་རོགས་སྐྱོབ་རུ་ཁུག་གིས་ཁུལ་ཡོངས་ཀྱི་མེ་ཟོན་རོགས་སྐྱོབ་སྟོབས་ཤུགས་རྩ་འཛུགས་བྱས་ཏེ་དུས་ཆེན་སྔོན་གྱི་མེ་ཟོན་བདེ་འཇགས་བྱ་བར་ཆེད་དོན་ཞིབ་བཤེར་བྱས་ལ། གཟབ་ནན་ཞིབ་ཚགས་ཀྱི་སྒོ་ནས་མེ་སྐྱོན་འགལ་རྐྱེན་ཞིབ་བཤེར་བཅོས་སྐྱོང་དང་དུས་ཆེན་གྱི་བདེ་འཇགས་འགོག་ར་ཇེ་བརྟན་དུ་བཏང་།

ཞིབ་བཤེར་ཚན་ཆུང་ཁུལ་ཁོངས་ཀྱི་སྣུམ་སྣོན་ས་ཚུགས་དང་། རླངས་སྣོན་ས་ཚུགས་སོགས་འབར་འགད་སླ་བའི་ཡུལ་དངོས་སུ་སོང་སྟེ། མེ་ཟོན་སྒྲིག་བཀོད་སྒྲིག་ཆས་སྡེབ་སྒྲིག་འཁོར་སྐྱོད་དང་། མེ་འགོག་དང་འགད་གཏོར་འགོག་པའི་བྱེད་ཐབས་དངོས་འབེབས་བྱས་མིན། བདེ་འཇགས་ལས་རིམ་ལག་བསྟར་བྱས་མིན། ལས་བཟོ་བས་འཕྲལ་བསྟུན་ཐག་གཅོད་ནུས་པ་བྱང་ཆུབ་མིན་སོགས་ཀྱི་གནས་ཚུལ་གཙོར་བཟུང་ནས་ཞིབ་བཤེར་བྱས། སྲང་ལམ་འགྲམ་རྒྱུད་ཀྱི་ཚོང་ཁང་སོགས་ཚོགས་ར་ཆུང་ཁུལ་དུ་ཞིབ་བཤེར་མི་སྣས་མེ་གསོད་སྒྲིག་ཆས་སྡེབ་སྒྲིག་དང་། བདེ་འཇགས་ཁ་འགྲེམ་ཆ་རྐྱེན། རླངས་གློག་སྐུད་ལམ་བཀོད་སྒྲིག་དང་འབར་རླངས་བེད་སྤྱོད་དོ་དམ་སོགས་ཀྱི་གནས་ཚུལ་གཙོར་བཟུང་ནས་ཞིབ་བཤེར་བྱས་ཤིང་། ཤེས་རྟོགས་བྱུང་བའི་གནད་དོན་ཡོད་ཚེ་དུས་ཐོག་ཏུ་བཅོས་བསྒྱུར་བསམ་ཚུལ་བཏོན་ཞིང་། དུས་ཐོག་ཏུ་དངོས་འབེབས་ལྟ་སྐུལ་བྱས་ནས། ཉེན་ཁའི་ཁྲོད་དུ་ཚོང་གཉེར་བ་བཀག་འགོག་ནན་མོ་བྱས།

མཛོད་ཁང་དང་། རྒན་གསོ་ལས་ཁུངས། སྨན་ཁང་། སློབ་གྲྭ་སོགས་ལས་ཁུངས་གཙོ་བོར་ཁ་གཏད་ནས། མེ་ཟོན་སྒྲིག་ཆས་འཁོར་སྐྱོད་དང་། ཁ་འགྲེམ་རྒྱུ་ལམ་དང་བདེ་འཇགས་འབུད་སྒོ་ཤར་གཏོང་ཐུབ་མིན། མེ་བཀོལ་གློག་བཀོལ་དོ་དམ། ལས་རེས་ལས་སྲུང་དང་འཕྲལ་བསྟུན་ཐག་གཅོད་གྲ་སྒྲིག་སོགས་ཀྱི་གནས་ཚུལ་གཙོར་བཟུང་ནས་ཞིབ་བཤེར་བྱས་ཤིང་། ཉིན་རྒྱུན་གྱི་མེ་ཟོན་སྐོར་ཞིབ་ཞིབ་བཤེར་གྱི་ཟིན་ཐོ་དང་གསོ་སྦྱོང་འཁྲབ་སྦྱོང་གི་ཡིག་ཚགས་སོགས་ལ་ཞིབ་ལྟ་བྱས་ལ། ལས་ཁུངས་སོ་སོས་མེ་ཟོན་བདེ་འཇགས་ཀྱི་འགན་འཁྲི་གཙོ་བོ་ལག་བསྟར་ནན་མོ་བྱེད་དགོས་པའི་བླང་བྱ་བཏོན། དེ་ལས་གཞན། ཞིབ་བཤེར་ཚན་ཆུང་གིས་ད་དུང་ཡུལ་སྐོར་ལྗོངས་ཁུལ་དང་། གསོལ་མགྲོན་ཁང་། ཚོང་ཁང་དང་ཚོང་ར་ཆེན་མོ། ཟ་འཐུང་རོལ་རྩེད་ཁང་སོགས་མི་སྣ་འདུ་འཛི་ཆེ་བའི་ས་ཁུལ་དུ་ཞིབ་བཤེར་བྱེད་པར་ཤུགས་བསྣན་ཏེ། ཁ་འགྲེམ་རྒྱུ་ལམ་དང་བདེ་འཇགས་འབུད་སྒོ། མེ་ཟོན་སྒྲིག་བཀོད་ཆ་ཚང་ཡིན་མིན། མེ་བཀོལ་གློག་བཀོལ་གྱི་བདེ་འཇགས་དང་གློག་སྒུལ་འཕྲུལ་རྟ་སྒྲིག་འགལ་གྱི་བཞག་ཡོད་མེད་དང་གློག་གསོག་པ་སོགས་ཐད་ཀྱི་འབུར་ཐོན་གནད་དོན་གཙོར་བཟུང་ནས་ཞིབ་བཤེར་བྱས་ལ། ལས་ཁུངས་ཀྱིས་དུས་ཆེན་གྱི་འཕྲལ་བསྟུན་སྔོན་ཇུས་དང་དོན་དངོས་ཟུང་འབྲེལ་བྱེད་པ་འཐུས་ཚང་དུ་གཏོང་བ་དང་། མགྲོན་ཁུངས་མང་བའི་དུས་སྐབས་ཀྱི་སྐོར་ཞིབ་ལས་སྲུང་ལ་ཤུགས་སྣོན་པར་མཛུབ་སྟོན་བྱས།