མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ9པའི་ཚེས24ཉིན། མཚོ་སྔོན་ཞིང་ཆེན་གྱི2026ལོའི་ལོ་འཁོར་གྱི་བདེན་པའི་རྒྱབ་ལངས་དཔའ་བོ་དཔེ་ལེགས་ཀྱི“བརྩེ་སེམས་ཕུལ་ཏེ་རོགས་སྐྱོབ་བྱེད་པའི་བཟོ་སྐྲུན”ལས་གཞིས་དཀའ་ངལ་ཡོད་པའི་ཁྱིམ་ཚང་ལ་རོགས་སྐྱོར་དང་དེའི་བུ་ཕྲུག་ལ་སློབ་ཞུགས་རོགས་དངུལ་སྟེར་བའི་མཛད་སྒོ་ཟི་ལིང་དུ་སྤེལ། 2026ལོར་ཞིང་ཆེན་བདེན་པའི་རྒྱབ་ལངས་ཐེབས་རྩ་ལྷན་ཚོགས་ཀྱིས་དཀའ་ངལ་ཡོད་པའི་ཁྱིམ་ཚང38དང་བུ་ཕྲུག13ལ་རོགས་སྐྱོར་བྱས་ནས། རོགས་སྐྱོར་དང་སློབ་རོགས་མ་དངུལ་སྒོར་འབུམ་བཞི་དང་ཁྲི་བརྒྱད་སྟོང་གསུམ་བྱིན་པ་དང་། མཛད་སྒོ་སྤེལ་ཡུལ་དུ་བདེན་པའི་རྒྱབ་ལངས་ཀྱི་དཔའ་བོ་དཔེ་ལེགས་མི་སྣ12དང་དེའི་ཁྱིམ་མིའི་འཐུས་མིར་རོགས་སྐྱོར་དང་སློབ་རོགས་མ་དངུལ་སྒོར་ཁྲི་དགུ་དང་སྟོང་ལྔ་བྱིན།
བདེན་པའི་རྒྱབ་ལངས་དཔའ་བོ་དཔེ་ལེགས་ཀྱི“བརྩེ་སེམས་ཕུལ་ཏེ་རོགས་སྐྱོབ་བྱེད་པའི་བཟོ་སྐྲུན”ནི། ཞིང་ཆེན་བདེན་པའི་རྒྱབ་ལངས་ཐེབས་རྩ་ལྷན་ཚོགས་ཀྱི་སྤྱི་ཕན་དགེ་སྒྲུབ་ལས་གཞི་གཙོ་བོ་ཞིག་ཡིན་ལ། མཚོ་སྔོན་ཞིང་ཆེན་གྱིས་བདེན་པའི་རྒྱབ་ལངས་ཚོགས་སྤྱིར་རྒྱུན་རྣམ་ཅན་གྱི་སྒོ་ནས་གཅེས་སྐྱོང་དང་རོགས་སྐྱོར་བྱེད་པའི་དམངས་འཚོའི་ལས་གཞི་གལ་ཆེན་ཞིག་ཀྱང་ཡིན། 2020ལོར་ལས་གཞི་འདི་སྤེལ་བ་ནས་བཟུང་། ལས་གཞི་འདིས་དཔའ་བོ་དཔེ་ལེགས་ཀྱི་འཚོ་བའི་དཀའ་ངལ་དང་བུ་ཕྲུག་གི་སློབ་ཞུགས། ནད་གཞི་ཚབས་ཆེན་སྐྱོབ་བཅོས་བཅས་གཙོ་གནད་ཁྱབ་ཁོངས་ཆེན་པོ་གསུམ་ལ་དམིགས་ཏེ། གནད་འཁེལ་ཅན་དང་རྒྱུན་རྣམ་ཅན། ཡུན་ཕན་ཅན་བཅས་ཀྱི་རོགས་སྐྱོབ་རོགས་སྐྱོར་རྒྱུན་མཐུད་ངང་སྤེལ་ཡོད། མིག་སྔའི་བར་ཁྱོན་བསྡོམས་བདེན་པའི་རྒྱབ་ལངས་ཀྱི་དཔའ་བོ་དཔེ་ལེགས་མི་ཐེངས264ལ་རོགས་སྐྱོར་རོགས་སྐྱོབ་བྱས་པ་དང་། རོགས་སྐྱོར་རོགས་སྐྱོབ་མ་དངུལ་སྒོར་ས་ཡ་གཉིས་དང་འབུམ་དྲུག་སྟོང་གསུམ་བྱིན་ནས། བདེན་པའི་རྒྱབ་ལངས་ཀྱི་དཔའ་བོ་དཔེ་ལེགས་ཁྱིམ་ཚང་གི་དཀའ་ངལ་དངོས་ཐག་གཅོད་དོན་ལྡན་བྱས་ཡོད།
བདེན་པའི་རྒྱབ་ལངས་ཀྱི་དཔའ་བོ་དཔེ་ལེགས་ཀྱི་འཐུས་མི་གསུམ་གྱིས་གཏམ་བཤད་སྐབས། “བདེན་པའི་རྒྱབ་ལངས་ནི་སེམས་གཏིང་གི་གདམ་ག་ཞིག་དང་། སྤྱིར་བཏང་གི་མི་ཚང་མས་ལག་བསྟར་བྱེད་ཐུབ་པའི་དྲང་བདེན་གྱི་འགན་ཁུར་ཞིག་ཡིན”ལ། ད་ཐེངས་ཀྱི་བརྩེ་སེམས་རོགས་སྐྱོར་ལས་ཁྱིམ་ཚང་གི་གནོན་ཤུགས་མངོན་སུམ་ཇེ་ཆུང་དུ་བཏང་བར་མ་ཟད། དཔའ་བོ་དཔེ་ལེགས་དང་དེའི་ཁྱིམ་མིར་ཏང་དང་སྲིད་གཞུང་དང་། སྤྱི་ཚོགས་ལས་རིགས་ཁག་གིས་བདེན་པའི་རྒྱབ་ལངས་ཚོགས་སྤྱིར་དོ་ཁུར་དང་བརྩི་བཀུར་བྱེད་པའི་ཚོར་སྣང་ཟབ་མོ་བྱིན་ཡོད་ཅིང་། མི་སེམས་དྲོད་ལ་བསྐྱིལ་བའི་བསམ་པ་དེས་ཁོ་ཚོར་བདེན་པའི་རྒྱབ་ལངས་ཀྱི་སྟོབས་ཤུགས་མུ་མཐུད་དུ་བརྒྱུད་སྤྲོད་དང་། བདེན་པའི་རྒྱབ་ལངས་ཀྱི་སྙིང་སྟོབས་དར་སྤེལ་གཏོང་རྒྱུར་སྐུལ་མ་ཐེབས་ངེས་ཡིན་ཟེར།
ཞིང་ཆེན་བདེན་པའི་རྒྱབ་ལངས་ཐེབས་རྩ་ལྷན་ཚོགས་ཀྱི་འབྲེལ་ཡོད་འགན་འཁུར་བས་བསྟན་དོན། བདེན་པའི་རྒྱབ་ལངས་ཀྱི་དཔའ་བོ་དཔེ་ལེགས་དང་དེའི་ཁྱིམ་ཚང་ལ་རོགས་སྐྱོར་བྱེད་ཤུགས་མུ་མཐུད་དུ་ཆེ་རུ་གཏོང་བ་དང་། རོགས་སྐྱོར་རོགས་སྐྱོབ་ཀྱི་ཆ་རྐྱེན་གྱི་རེ་ཞུའི་རྒྱུ་ཆར་ཞིབ་བཤེར་ནན་མོ་བྱས་ནས། མ་མཐའི་འཚོ་བའི་འགན་སྲུང་གི་ཁྱིམ་ཚང་དང་། རང་སྲོག་བློས་བཏང་བའི་དཔའ་བོ་དཔེ་ལེགས་ཀྱི་ཁྱིམ་ཚང་། ལོ་རེའི་ཡོང་འབབ་ཅུང་དམའ་བའི་ཁྱིམ་ཚང་བཅས་ལ་གཟིགས་སྐྱོང་བྱ་རྒྱུ་ཡིན་པར་མ་ཟད། ལོ་རེའི་རོགས་སྐྱོབ་གནས་ཚུལ་དང་ཟུང་འབྲེལ་བྱས་ནས་རོགས་སྐྱོར་བྱ་ཡུལ་གདམ་གསེས་བྱ་རྒྱུ་རེད། གནད་འཁེལ་རོགས་སྐྱོར་དང་རྒྱ་སྐྱེད་རོགས་སྐྱོར་ཟུང་འབྲེལ་བྱས་པ་བརྒྱུད། ཁྱབ་རྒྱ་རྒྱུན་མཐུད་ཆེ་རུ་བསྐྱེད་དེ། ཚད་ཡོད་པའི་མ་དངུལ་གྱི་ཕན་འབྲས་ཆེ་ཤོས་འདོན་སྤེལ་ཐུབ་པར་འབད་པ་བྱ་རྒྱུ་ཡིན་ཟེར།
