མ་ལེ་ཞི་ཡའི་ཞིང་ཆེན་དང་པུའུ་ཡི་མཉམ་ལས་འཐུས་ཚབ་ཚོགས་པ་མཚོ་སྔོན་དུ་ཕྱིར་འཚམས་འདྲིར་ཡོང་།

ཟླ9པའི་ཚེས18ཉིན་ནས་ཚེས24ཉིན་བར། མ་ལེ་ཞི་ཡའི་ཞིང་ཆེན་དང་པུའུ་ཡི་མཉམ་ལས་འཐུས་ཚབ་ཚོགས་པ་མཚོ་སྔོན་དུ་ཡོང་སྟེ་འཚམས་འདྲི་སྤེལ་རེས་བྱས། ཐེངས་འདིའི་འཚམས་འདྲི་ནི་མཚོ་སྔོན་གྱིས་ཞིང་ཆེན་དང་པུའུ་ཡི་མཉམ་ལས་ལམ་སྲོལ་གཏིང་ཟབ་ཏུ་བཏང་བ་དང་། མ་ལེ་ཞི་ཡ་ཕྱོགས་གཉིས་བར་གྱི་སྤེལ་རེས་གྲུབ་འབྲས་སྲ་བརྟན་དུ་བཏང་བའི་བྱེད་ཐབས་དངོས་ཤིག་ཡིན་ལ། མཚོ་སྔོན་དང་ཨེ་ཤ་ཡའི་ཤར་ལྷོའི་རྒྱལ་ཁབ་ཁག་གི་རིག་གནས་ཡུལ་སྐོར་སྦྲེལ་མཐུད་བྱེད་པ་དང་། དམངས་སེམས་གཅིག་མཐུན་ཡོང་བར་བྱེད་པའི་གསོན་ཉམས་ལྡན་པའི་ལག་ལེན་དངོས་ཤིག་ཡིན། འདིས་རྒྱུན་མཐུད་ངང་མཚོ་སྔོན་དང་མ་ལེ་ཞི་ཡ་གཉིས་ཀྱི་ཕྱོགས་ཡོངས་སྤེལ་རེས་མཉམ་ལས་རྒྱ་བསྐྱེད་པར་རྨང་གཞི་བརྟན་པོ་བཏིང་ཡོད།

ད་ལོའི་ཚུན་ལ། མཚོ་སྔོན་དང་མ་ལེ་ཞི་ཡ་གཉིས་ཀྱིས་ཞིང་ཆེན་དང་པུའུ་ཡི་མཉམ་ལས་སྟེགས་བུ་བརྒྱུད་དེ་ཕྱོགས་གཉིས་ཀར་འབྲེལ་འདྲིས་ཐེངས་མང་བྱས་པ་དང་མཉམ་ལས་ཀྱི་སྦྲེལ་ཐག་མུ་མཐུད་དུ་རྒྱ་བསྐྱེད་བྱས། ཟླ་བཞི་པར། ཞིང་ཆེན་རིག་གནས་དང་ཡུལ་སྐོར་ཐིང་གིས་ཚོགས་པ་སྒྲིག་འཛུགས་བྱས་ཏེ། 2026 ལོའི་མ་ལེ་ཞི་ཡའིMATTA FAIRརྒྱལ་སྤྱིའི་ཡུལ་སྐོར་འགྲེམ་སྟོན་ལ་ཞུགས་པ་དང་། ཟླ་དྲུག་པར། ཡང་བསྐྱར་ཚོགས་པ་མངགས་ནས་ཞིང་ཆེན་དང་པུའུ་ཡི་མཉམ་ལས་སྐོར་ཐེངས་གཉིས་པ་སྤེལ། རྒྱུན་མཐུད་ངང་རིག་གནས་དང་ཡུལ་སྐོར་གྱི་འབྲེལ་མཐུད་ཟབ་སྤེལ་བྱས་ཏེ། ཧུར་ཐག་གིས་མཚོ་སྔོན་གྱི་སྤུས་ལེགས་རིག་གནས་ཡུལ་སྐོར་ཐོན་ཁུངས་དང་ཁྱད་ཆོས་ལྡན་པའི་དམངས་སྲོལ་རིག་གནས། སྐྱེ་ཁམས་ཡུལ་སྐོར་བཅས་ཀྱི་དགེ་མཚན་ངོ་སྤྲོད་བྱས། ཟླ9པའི་ཚེས5ཉིན། ཅི་ལུང་ཕོ་ནས་ཟི་ལིང་བར་གྱི་རྒྱལ་སྤྱིའི་ཐད་འཕུར་མཁའ་ལམ་དངོས་སུ་ཤར་གཏོང་ཐུབ་པ་བྱུང་ཞིང་། ས་གནས་གཉིས་ཀྱི་དཔལ་འབྱོར་ཉོ་ཚོང་སྤེལ་རེས་དང་རིག་གནས་ཡུལ་སྐོར་འབྲེལ་མཐུད། མི་ཚུལ་རིག་གནས་མཉམ་འདྲེས་སྦྱོར་བཅས་ལ་བར་སྣང་གི་སྦྲེལ་ཟམ་གལ་ཆེན་ཞིག་བསྐྲུན་ཡོད།

ཐེངས་འདིའི་འཚམས་འདྲི་ནི་རིག་གནས་དང་ཡུལ་སྐོར་པུའུ་ཡི་ཅི་ལུང་ཕོའི་ཀྲུང་གོའི་རིག་གནས་ལྟེ་གནས་ཀྱིས་རྩ་འཛུགས་བྱས་ཤིང་། ལས་རིགས་ཀྱི་རྐང་འཛིན་པ6གིས་འཚམས་འདྲིའི་འཐུས་ཚབ་ཚོགས་པ་གྲུབ་ཡོད་ལ། ཚོགས་མིའི་ཁོངས་སུ་རིག་གནས་ཡུལ་སྐོར་ཁེ་ལས་ཀྱི་ལས་སྒྲུབ་མི་སྣ་དང་ཆེད་ལས་ཀྱི་ཡུལ་སྐོར་སྣེ་ཤན་པ་སོགས་ལས་ཡུལ་དང་པོའི་མི་སྣ་ཚུད་ཡོད། མཚོ་སྔོན་དུ་སྡོད་པའི་རིང་། འཐུས་ཚབ་ཚོགས་པས་རྨ་ཙོང་རིག་གནས་དང་། དམངས་སྲོལ་རིག་གནས་ཤུལ་བཞག སྐྱེ་ཁམས་སྲུང་སྐྱོབ། ལོ་རྒྱུས་མི་ཚུལ་རིག་གནས་སོགས་ཁྱབ་ཁོངས་གཙོ་བོ་དག་ལ་གཞི་བཙུགས་ནས། ས་ཆ་དངོས་ལ་ལྟ་སྐོར་དང་ཡུལ་དངོས་ལྟ་སྦྱོང་། བཞུགས་མོལ་སྤེལ་རེས། མཉམ་འགུལ་གླེང་མོལ་སོགས་ཀྱི་ཐབས་ལམ་སྤྱད་དེ། རིམ་བཞིན་ནན་ཀོན་སྲང་ལམ་ཞོལ་མ་དང་། ཟི་ལིང་གྲོང་ཁྱེར་གཟུགས་འདས་ཤུལ་བཞག་རྟེན་མཛོད་ཁང་། མཚོ་སྔོན་བོད་ཀྱི་རིག་གནས་རྟེན་མཛོད་ཁང་། ཁམས་ར་འཛམ་གླིང་ས་གཤིས་སྤྱི་གླིང་། རེབ་གོང་སྒྱུ་རྩལ་མཁས་ཅན་ལས་སྒྲུབ་ཁང་། རྒྱ་བཟའ་ཀོང་ཇོའི་ལོ་རྒྱུས་རིག་གནས་མཛེས་ལྗོངས་ཁུལ། མཚོ་སྔོན་པོ་དང་མཚོ་སྔོན་ཞིང་ཆེན་རྟེན་མཛོད་ཁང་སོགས་རིག་གནས་ཡུལ་སྐོར་ས་ཚིགས་གྲགས་ཅན་རྣམས་ལ་རྟོག་ཞིབ་བྱས་པ་དང་། མཚོ་སྔོན་གྱི་ལོ་རྒྱུས་རིག་གནས་གཏིང་ཟབ་པ་དང་ཐུན་མོང་མ་ཡིན་པའི་རིག་གནས་ཤུལ་བཞག་དམངས་སྲོལ་གྱི་མཛེས་སྡུག སྐྱེ་ཁམས་ཐོན་ཁུངས་ཀྱི་དགེ་མཚན་བཅས་ལ་མྱོང་རོལ་བྱས། མཚོ་སྔོན་གྱི་རིག་གནས་ཡུལ་སྐོར་ཐོན་ལས་འཕེལ་རྒྱས་དང་། གཟུགས་འདས་རིག་གནས་ཤུག་བཞག་གི་རྒྱུན་འཛིན་དང་སྲུང་སྐྱོང་། སྐྱེ་ཁམས་ཡུལ་སྐོར་གསར་སྤེལ། རིག་དངོས་བེད་སྤྱོད་ནུས་ལྡན་བྱེད་པ་སོགས་ཀྱི་ཉམས་མྱོང་ལ་རྒྱུས་ལོན་ཞིབ་ཕྲ་བྱས་པ་མ་ཟད། རེབ་གོང་སྒྱུ་རྩལ་མཁས་ཅན་ལས་སྒྲུབ་ཁང་དང་ཟི་ལིང་གྲོང་ཁྱེར་གཟུགས་འདས་ཤུལ་བཞག་རྟེན་མཛོད་ཁང་སོགས་སུ་ཀྲུང་གོ་དང་ཕྱི་རྒྱལ་གྱི་རིག་གནས་སྒྱུ་རྩལ་སྤེལ་རེས་དང་ཞིབ་སློབ་ཡུལ་སྐོར་སོགས་ལས་རིགས་བགྲོ་གླེང་སྤེལ་ཏེ། ཕྱོགས་གཉིས་ཀས་ཕན་ཚུན་ལ་སློབ་སྦྱོང་དང་ཕན་ཚུན་མིག་དཔེར་འཛིན་པའི་གཉིས་རྒྱལ་གྱི་འབྲེལ་འདྲིས་སྟེགས་བུ་བསྐྲུན།