མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ9པའི་ཚེས26ཉིན། 2026ལོའི་མཚོ་སྔོན་ཞིང་ཆེན་ན་ཆུང་གཞོན་ནུའི(སློབ་མ)མདའ་རྩལ་འགྲན་སྡུར་དེ་ཟི་ལིང་གྲོང་ཁྱེར་ཧོང་ཀྲུང་ཆུས་མདོ་བ་རྒྱལ་ཁབ་མཐོ་སྒང་ལུས་རྩལ་སྦྱོང་བརྡར་རྟེན་གཞི་རུ་དངོས་སུ་འགོ་བརྩམས། ཐེངས་འདིའི་འགྲན་སྡུར་ནི་ཞིང་ཆེན་ལུས་རྩལ་ཅུས་ཀྱིས་གཙོ་སྒྲུབ་བྱས་ཤིང་། མདོ་བ་རྒྱལ་ཁབ་མཐོ་སྒང་ལུས་རྩལ་སྦྱོང་བརྡར་རྟེན་གཞི་དང་ཞིང་ཆེན་ལུས་རྩལ་འགུལ་སྐྱོད་སློབ་གྲྭ་སོགས་ལས་ཁུངས་ཀྱིས་འགན་སྒྲུབ་བྱས་པ་དང་། ཁྱོན་བསྡོམས་ཞིང་ཆེན་ཡོངས་ཀྱི་རུ་ཁག11དང་ན་གཞོན་ལུས་རྩལ་པ135འགྲན་སྡུར་ཁྲོད་ཞུགས།
འགྲན་སྡུར་ཁྲོད་གུག་ལྡོག་འཁྱོག་གཞི་དང་དེང་རབས་སྲོལ་རྒྱུན་མདའ་གཞི་རིགས་གཉིས་བཀོད་སྒྲིག་བྱས་ཡོད་ལ། སྐྱེས་པ་དང་སྐྱེས་མའི་མི་སྒེར་དང་ཚོགས་པའི་ཨང་རྩོད་འགྲན་སྡུར་སྤེལ། འགྲན་ཞུགས་པའི་ལོ་ཚོད་ལོ14ནས17བར་ཡིན་ལ། ལྡོག་འཁྱོག་གཞི་མདའ་འཕེན་བར་ཐག་ནི་སྨི30དང་། སྲོལ་རྒྱུན་མདའ་འཕེན་བར་ཐག་ནི་སྨི25ཡིན། འགྲན་ཞུགས་པ་རེ་རེས་མདའ36འཕངས་ཏེ། འགྲན་སྡུར་གྱི་སྒྲིག་སྲོལ་ལྟར་མི་སྒེར་དང་ཚོགས་པའི་ཨང་རིམ་དགར།
ཐེངས་འདིར་སྤེལ་བའི་འགྲན་སྡུར་ནི། མདའ་འཕེལ་ལུས་རྩལ་སློབ་གླིང་དུ་བསྐྱོད་པའི་བྱེད་སྒོར་སྐུལ་འདེད་གཏོང་བ་དང་། ན་ཆུང་གཞོན་ནུའི་སློབ་ཕྱིའི་ལུས་རྩལ་དང་འཚོ་བ་ཕུན་སུམ་ཚོགས་པར་གཏོང་བ། སྲོལ་རྒྱུན་མདའ་འཕེན་ལུས་རྩལ་རིག་གནས་རྒྱུན་འཛིན་བྱེད་པ། མདའ་འཕེན་ལུས་རྩལ་གྱི་འཇོན་མི་གསོ་སྐྱོང་བྱེད་པ། རྒྱ་ཆེའི་ན་ཆུང་གཞོན་ནུ་རྣམས་ཀྱི་སྣེ་ཁྲིད་དེ་ལུས་ཕུང་སྦྱོང་བརྡར་དང་སྙིང་སྟོབས་ཆེར་བསྐྱེད་ཀྱི་གཤིས་ཀ་གསོ་སྐྱོང་བྱེད་ཆེད་ཡིན། འགྲན་སྡུར་སྟེང་། ན་ཆུང་འགྲན་ཞུགས་པ་ཚོས་གཞུ་འཐེན་པ་དང་འབེན་ལ་དམིགས་པ། མདའ་འཕེན་པ་བཅས་ཀྱི་རྣམ་པ་ཚད་ལྡན་ཡིན་ཞིང་། འགྲན་སྡུར་གྱི་སྒྲིག་ལམ་བརྩི་སྲུང་བྱས་ཏེ། བརྩོན་པ་ལྷུར་ལེན་གྱི་ལུས་རྩལ་སྙིང་སྟོབས་མངོན། འགྲན་སྡུར་ལས་འགྲན་ཞུགས་པའི་མི་གྲངས་ལྟར་ཨང་རིམ་དགར་ཞིང་། བྱ་དགའ་ཐོབ་པའི་མི་སྒེར་ལ་བྱ་དགའི་དཔང་ཡིག་སྤྲད་པ་དང་། བྱ་དགའ་ཐོབ་པའི་ཚོགས་པར་བྱ་དགའི་རྟགས་མ་སྤྲད་པ་མ་ཟད། ཕུལ་བྱུང་རྩལ་ཁྲིད་པ་དཔྱད་འདེམས་བྱས།
