མཚོ་སྔོན་ཞིང་ཆེན་གྱི་མེ་ཟོན་ལས་རིགས་ཀྱི་རྩལ་ནུས་འགྲན་སྡུར་ཆེན་མོ་སྐབས་གསུམ་པ་འགོ་བརྩམས།

ཟླ9པའི་ཚེས22ཉིན། ཞིང་ཆེན་སྤྱི་ཁྱབ་བཟོ་ཚོགས་དང་། ཞིང་ཆེན་མེ་ཟོན་རོགས་སྐྱོབ་སྤྱི་ཁྱབ་རུ་ཁག ཞིང་ཆེན་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཐིང་། ཞིང་ཆེན་འཕྲལ་བསྟུན་དོ་དམ་ཐིང་། གུང་གཞོན་ཚོགས་པ་ཞིང་ཆེན་ཨུ་ཡོན་ལྷན་ཁང་བཅས་ཀྱིས་མཉམ་འབྲེལ་སྒོས་བསྒྲུབས་པའི་མཚོ་སྔོན་ཞིང་ཆེན་གྱི་མེ་ཟོན་ལས་རིགས་ཀྱི་རྩལ་ནུས་འགྲན་སྡུར་ཆེན་མོ་སྐབས་གསུམ་པ་དེ། མཚོ་སྔོན་མི་རིགས་སློབ་ཆེན་དུ་འགོ་བརྩམས་པ་དང་། ཞིང་ཆེན་ཡོངས་ཀྱི་གྲོང་ཁྱེར་དང་ཁུལ་སོ་སོའི་འཐུས་ཚབ་རུ་ཁག་བཅུ་དང་། འགྲན་ཞུགས་པ124འགྲན་སྟེགས་གཅིག་ཏུ་ཞུགས་ཏེ་ཆེད་ལས་རྩལ་ནུས་ངོམ། ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རིན་གཞོན་པ་ཝང་ཅུན་ཀྲེ་བྱེད་སྒོར་ཞུགས།

ཐེངས་འདིའི་འགྲན་སྡུར་ཆེན་མོ་ཉིན་གསུམ་རིང་ཡིན་ལ། མེ་གསོད་རོགས་སྐྱོབ་པ་དང་། མེ་ཟོན་འཕྲིན་གཏོང་བ། འཚོལ་སྐྱོབ་ཁྱིའི་ཁྲིད་སྟོན་པ། མེ་ཟོན་སྒྲིག་ཆས་སྲུང་སྐྱོང་པ། མེ་ཟོན་སྒྲིག་བཀོད་བཀོལ་སྤྱོད་པ་སོགས་ལས་རིགས་སྣ་ལྔ་བཀོད་སྒྲིག་བྱས་ཡོད་ལ། བསྡོམས་པས་འགྲན་སྡུར་རྣམ་གྲངས་བཅུ་བདུན་ཡོད་ཅིང་། འགྲན་ཞུགས་རུ་མིར་རྒྱལ་ཁབ་ཀྱི་ཕྱོགས་བསྡུར་རང་བཞིན་གྱི་མེ་ཟོན་རོགས་སྐྱོབ་རུ་དཔུང་གི་མེ་ཟོན་བཀོད་འཐབ་པ་དང་། སྲིད་གཞུང་དང་ཁེ་ལས་ཀྱི་ཆེད་འགན་མེ་ཟོན་པ། སྤྱི་ཚོགས་རོགས་སྐྱོབ་རྩ་འཛུགས་ཀྱི་ཁོངས་མི་དང་ས་གནས་ལས་ཁུངས་ཀྱི་མེ་ཟོན་ལས་རིགས་ལས་སྒྲུབ་པ་བཅས་ཡོད། འགྲན་སྡུར་གྱི་ཡུལ་དངོས་སུ་ད་དུང་མེ་ཟོན་དྲིལ་སྒྲོག་གི་ཚན་རིག་ཁྱབ་གདལ་དང་སྒྲིག་ཆས་མཉམ་སྤྱོད་ཀྱི་འགྲེམ་སྟོན་ས་ཁོངས་བཀོད་སྒྲིག་བྱས་ཏེ། དམངས་ཡོངས་མཉམ་འབྲེལ་མཉམ་འགུལ་དང་། དམངས་ཡོངས་ཀྱིས་མེ་ཟོན་ལ་དོ་སྣང་དང་། མེ་ཟོན་ནང་ཞུགས་པའི་སྣང་ཚུལ་བཟང་པོ་བསྐྲུན་པ་རེད།

འགོ་རྩོམ་མཛད་སྒོའི་རྗེས་སུ། ཚོགས་ཞུགས་འགོ་ཁྲིད་རྣམས་ཀྱིས་ཡུལ་དངོས་སུ་འབྲེལ་ཡོད་འགྲན་སྡུར་གྱི་རྣམ་གྲངས་ལ་ལྟ་ཞིབ་བྱས་ཤིང་། འགྲན་སྡུར་རྣམ་གྲངས་ཀྱི་མཚམས་སྦྱོར་ལ་ཉན་རྗེས། འགྲན་ཞུགས་པ་ཡོངས་ཀྱིས་དཀའ་ངལ་ཁྱད་བསད་ཀྱི་ངར་ཤུགས་འཕེལ་བར་བྱས་ཏེ། འཐབ་ཕོད་པ་དང་བརྩོན་ཕོད་པའི་འཐབ་འཛིང་གི་སྙིང་སྟོབས་དར་སྤེལ་བཏང་ནས། སྤོབས་པས་སྔོན་བརྩོན་དང་། གྲུབ་འབྲས་འབུར་དུ་ཐོན་པ་ལེན་པར་སྐུལ་མ་བྱས།