མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ་མཆོད་དང་རྒྱལ་སྟོན་གཉིས་ཀྱི་དུས་ཆེན་སྐབས་སུ། ཞིང་ཆེན་ཏང་ཨུའི་ཧྲུའུ་ཅི་ལུའོ་ཏུང་ཁྲོན་གྱིས་ཞིང་ཆེན་རིམ་པའི་བློ་མཐུན་རྒན་པ་སངས་རྒྱས་སྐྱབས་དང་། པད་མ། ཝང་ཅན་ཅོན། རྡོ་རྗེ་རབ་བརྟན་བཅས་ལ་ཁ་པར་སྦྲེལ་ནས་འཚམས་འདྲི་བྱས་ཤིང་། ཁོ་ཚོས་མཚོ་སྔོན་གྱི་དཔལ་འབྱོར་སྤྱི་ཚོགས་ཀྱི་འཕེལ་རྒྱས་ཐད་བྱས་རྗེས་བཞག་པར་སྙིང་ཐག་པ་ནས་བཀའ་དྲིན་ཞུས་པ་དང་། ཁོ་ཚོའི་བསམ་འཆར་དང་གྲོས་གཞིར་ནན་ཏན་གྱིས་ཉན་པ་མ་ཟད། ལྷག་བསམ་རྣམ་དག་གིས་དུས་ཆེན་ལ་འཚམས་འདྲི་དང་སྨོན་འདུན་ཞུས།
ལུའོ་ཏུང་ཁྲོན་གྱིས་བློ་མཐུན་རྒན་པ་རྣམས་དང་བརྩེ་བས་གླེང་མོལ་བྱས་ཤིང་། ཐུགས་ཁུར་ཟབ་མོས་ཁོ་ཚོའི་དུས་རྒྱུན་གྱི་འཚོ་བ་དང་གཟུགས་པོ་བདེ་ཐང་གི་གནས་ཚུལ་དྲིས་ལ། ཞིང་ཆེན་ཏང་ཨུའི་བྱ་བ་དང་ལོ་ལྔའི་འཆར་འགོད་བཅོ་ལྔ་པའི་མཚོ་སྔོན་འཕེལ་རྒྱས་ཀྱི་བསམ་འཆར་དང་གྲོས་གཞི་ནན་ཏན་གྱིས་བསྡུ་ལེན་བྱས། ལུའོ་ཏུང་ཁྲོན་གྱིས་བཤད་རྒྱུར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་གྱི་བྱ་བར་ཐུགས་ཁུར་ཆེན་པོ་དང་ཚད་མཐོན་པོས་གཙིགས་ཆེན་གནང་བཞིན་ཡོད་ལ། ཏང་གི་ཚོགས་ཆེན་བཅོ་བརྒྱད་པ་ནས་བཟུང་། མཚོ་སྔོན་དུ་རྟོག་ཞིབ་ཐེངས་གསུམ་ལ་ཕེབས་ཤིང་། རྒྱལ་ཡོངས་མི་དམངས་འཐུས་མིའི་ཚོགས་ཆེན་གྱི་མཚོ་སྔོན་འཐུས་ཚབ་ཚོགས་པའི་གྲོས་ཞིབ་ཁྲོད་ཐེངས་གཉིས་ལ་ཞུགས་ནས། ཏང་དང་རྒྱལ་ཁབ་ལས་དོན་གྱི་ཁྱོན་ཡོངས་ཀྱི་མཐོ་ཚད་ནས་འགྲེང་སྟེ། མཚོ་སྔོན་ལ་དགེ་མཚན་ཆེས་ཆེ་བ་གསུམ་གྱི་ཞིང་ཆེན་གྱི་ངེས་གནས་དང་། སྔར་ལས་གལ་ཆེ་བ་གསུམ་གྱི་ཐབས་ཇུས་གོ་གནས་བསྩལ་ཞིང་། སྐྱེ་ཁམས་དཔལ་ཡོན་གྱི་མཐོ་ས་བསྐྲུན་པ་དང་། ཐོན་ལས་གནས་བཞི་འཛུགས་སྐྲུན་གྱི་རླབས་ཆེན་འཆར་འགོད་གནང་བ་རེད། དེང་སྐབས། མཚོ་སྔོན་ནི་བྱ་གཞག་ཆེན་པོ་སྒྲུབ་བཞིན་ཡོད་པ་དང་། རྒྱལ་ཡོངས་འཕེལ་རྒྱས་ཀྱི་ཁྱོན་ཡོངས་ལ་བྱས་རྗེས་སྔར་ལས་ཆེ་བ་འཇོག་བཞིན་པའི་གལ་འགངས་ཆེ་བའི་དུས་སྐབས་སུ་གནས་ཡོད། ང་ཚོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་གྱི་བྱ་བར་གནང་བའི་མཛུབ་སྟོན་གལ་ཆེན་གྱི་དགོངས་དོན་ལ་སློབ་སྦྱོང་དང་ལག་བསྟར་བྱས་ཏེ། མངག་བཅོལ་ཡིད་ལ་དམ་པོར་བཟུང་ཞིང་། དྲིན་གཟོའི་མདུན་སྐྱོད་བྱས་ཏེ། ཞིང་ཆེན་ཏང་ཨུའི་སྐབས་རིམ་བྱུང་གིས་བཞག་པའི་རྨང་གཞི་བརྟན་པོའི་སྟེང་། འཆར་འགོད་མཐའ་གཅིག་ཏུ་དོན་འཁྱོལ་དང་། སྐབས་རེ་རེ་མཐུད་དེ་སྒྲུབ་ལ། ཐོག་མཐའ་བར་གསུམ་དུ་དོན་འཁྱོལ་དམ་འཛིན་བྱས་ནས། ཞིང་ཆེན་ཡོངས་ཀྱི་རིགས་སོ་སོའི་མང་ཚོགས་ལ་སྔར་བས་བདེ་སྐྱིད་དང་མཛེས་སྡུག་ལྡན་པའི་འཚོ་བ་རོལ་དུ་འཇུག་དགོས།
ལུའོ་ཏུང་ཁྲོན་གྱིས་བཤད་རྒྱུར། བློ་མཐུན་རྒན་པ་ནི་མཚོ་སྔོན་གྱི་ལས་དོན་འཕེལ་རྒྱས་ཀྱི་འཛུགས་སྐྲུན་པ་དང་། ཟབ་ཞུགས་པ། བདེན་དཔང་པ་བཅས་ཡིན་ཞིང་། ཏང་དང་རྒྱལ་ཁབ་ཀྱི་རིན་བྲལ་ནོར་བུ་ཡིན། མཚོ་སྔོན་གྱི་ལས་དོན་སོ་སོས་བླངས་པའི་གྲུབ་འབྲས་ནི། བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གི་འགོ་ཁྲིད་བརྟན་པོའི་གྲུབ་འབྲས་ཡིན་ལ། ཞིང་ཆེན་ཡོངས་ཀྱི་མི་དམངས་ཀྱིས་མཐུན་སྒྲིལ་འབད་འཐབ་བྱས་པའི་གྲུབ་འབྲས་ཡིན། བློ་མཐུན་རྒན་པ་རྣམས་ཀྱིས་བཞག་པའི་རྨང་གཞི་བརྟན་པོ་དང་། བྱས་རྗེས་ཆེན་པོ་བཞག་པར་ཁ་འབྲལ་ཐབས་མེད། བློ་མཐུན་རྒན་པ་རྣམས་ཀྱིས་སྔོན་ཆད་ལྟར་ཞིང་ཆེན་ཡོངས་ཀྱི་ལས་དོན་སོ་སོའི་འཕེལ་རྒྱས་ལ་ཐུགས་ཁུར་བྱས་ནས། སྲོལ་རྒྱུན་བཟང་པོ་དར་སྤེལ་དང་། བསམ་འཆར་རྩ་ཆེན་མང་དུ་འདོན་པ། བསམ་འཆར་འབུལ་བ་བྱས་ནས། མུ་མཐུད་དུ་སྤྲོ་སེམས་མ་ཉམས་པར། ང་ཚོས་ལས་དོན་སོ་སོ་སྔར་བས་ལེགས་པར་བསྒྲུབ་པར་རོགས་རམ་བྱེད་རྒྱུའི་རེ་བ་ཡོད། འབྲེལ་ཡོད་སྡེ་ཁག་གིས་བརྩེ་བ་བསྣམས་ཤིང་། འགན་འཁྲི་འཁུར་ནས། སེམས་དང་བརྩེ་བས་བློ་མཐུན་རྒན་པའི་ཞབས་ཞུ་འགན་སྲུང་གི་བྱ་བ་ལེགས་པར་བསྒྲུབ་དགོས་ཏེ། ཁོ་ཚོས་བློ་བདེ་བག་ཕེབས་ངང་འཚོ་བ་རོལ་བ་དང་། ཚེ་མཇུག་སྐྱིད་ལ་རོལ་དུ་འཇུག་དགོས།
བློ་མཐུན་རྒན་པ་རྣམས་ཀྱིས་མགྲིན་གཅིག་ཏུ་བསྟན་དོན། ཐེངས་འདིའི་ཞིང་ཆེན་ཏང་ཨུའི་འགོ་ཁྲིད་གཙོ་བོའི་ལེགས་སྒྲིག་གིས། སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་ཏང་ཀྲུང་དབྱང་གིས་མཚོ་སྔོན་གྱི་འཕེལ་རྒྱས་ཐད་བཅངས་པའི་བརྩེ་བ་ཟབ་མོ་བླ་ལྷག་ཏུ་མངོན་ཡོད་ལ། མཚོ་སྔོན་གྱི་འགོ་ཁྲིད་ཚན་ཆུང་འཛུགས་པར་ཚད་མཐོའི་གཙིགས་ཆེན་བྱས་ཡོད་པས། བློ་བརྟན་འགྱུར་མེད་ངང་ཏང་ཀྲུང་དབྱང་གི་གཏན་འབེབས་བརྩི་སྲུང་བྱེད་ཅིང་། སེམས་ཤུགས་ཡོད་རྒུས་ཞིང་ཆེན་ཏང་ཨུའི་བྱ་བར་རྒྱབ་སྐྱོར་བྱེད་རྒྱུ་ཡིན། བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གི་འགོ་ཁྲིད་བརྟན་པོའི་འོག བློ་མཐུན་ལུའོ་ཏུང་ཁྲོན་ཚན་གཙོ་ཡིན་པའི་ཞིང་ཆེན་ཏང་ཨུ་ཡིས་ཞིང་ཆེན་ཡོངས་ཀྱི་རྒྱ་ཆེའི་ལས་བྱེད་མང་ཚོགས་ལ་མཐུན་སྒྲིལ་དང་སྣེ་ཁྲིད་བྱས་ཏེ་མུ་མཐུད་དུ་འབད་བརྩོན་དང་། དངོས་སྒྲུབ་སྔོན་བརྩོན་བྱས་ནས། མཚོ་སྔོན་གྱི་ལས་དོན་སོ་སོ་གོང་དུ་སྤེལ་ཞིང་། ཀྲུང་གོའི་ལུགས་ཀྱི་དེང་རབས་ཅན་གྱི་མཚོ་སྔོན་གྱི་ལེའུ་གསར་པ་འབད་པས་འབྲི་བར་ཡིད་ཆེས་བརྟན་པོ་ཡོད།
འཚམས་འདྲི་མཇུག་རྫོགས་རྗེས། ལུའོ་ཏུང་ཁྲོན་ཆེད་དུ་ལས་བྱེད་རྒན་པའི་ཞབས་ཞུ་འགན་སྲུང་ས་ཁུལ་དུ་ཕྱིན་ནས། ཡུལ་དངོས་སུ་སྤྱི་ཡོངས་ཀྱི་བཀོད་སྒྲིག་དང་། ཆ་སྒྲིག་སྒྲིག་བཀོད། ཉིན་རྒྱུན་གྱི་འཁོར་སྐྱོད་སོགས་ཀྱི་གནས་ཚུལ་ལ་ལྟ་ཞིབ་བྱས་ཤིང་། འབྲེལ་ཡོད་སྡེ་ཁག་དང་ལས་སྒྲུབ་མི་སྣས་བྱ་བའི་ཞིབ་ཚགས་ཅན་དང་། ཚད་ལྡན་ཅན་གྱི་ཆུ་ཚད་སྔར་བས་མཐོར་འདེགས་བཏང་ནས། ཞབས་ཞུ་འགན་སྲུང་གི་ཕན་འབྲས་ངེས་པ་དོན་གྱིས་མཐོར་འདེགས་གཏོང་དགོས་པའི་བཅོལ་གདམས་བྱས།
ཞིང་ཆེན་གྱི་འགོ་ཁྲིད་ཀྲུའུ་ཞང་ཧྥིན་དང་། ཚའོ་ཅོན་འཚམས་འདྲིར་ཞུགས།
