མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ད་ལོའི་རྒྱལ་ཡོངས་ཚོགས་ཆེན་གཉིས་ཀྱི་སྲིད་གཞུང་བྱ་བའི་སྙན་ཞུ་ལས་ཕྱོགས་ཡོངས་ལྗང་མདོག་ཚུལ་སྒྱུར་ལ་མགྱོགས་མྱུར་སྒོས་སྐུལ་འདེད་གཏོང་བ་དང་། ཐཱན་རྩེར་སོན་དང་ཐཱན་སྙོམས་སྦྱོར་སྣེ་ཁྲིད་དུ་བྱེད་ལ། ཐཱན་ཉུང་དང་བཙོག་འཕྲི། ལྗང་སྐྱེད། འཕར་སྣོན་བཅས་ལ་མཐུན་སྦྱོར་སྒོས་སྐུལ་འདེད་བཏང་སྟེ། ལྗང་མདོག་འཕེལ་རྒྱས་ཀྱི་སྒུལ་ནུས་ཇེ་དྲག་ཏུ་གཏོང་དགོས་པ་བཏོན་ཡོད།
མཚོ་སྔོན་གྱིས་ཀྲུང་ཧྭའི་ཆུ་མཛོད་ལ་སྲུང་སྐྱོབ་དང་། རྒྱལ་ཁབ་སྐྱེ་ཁམས་བདེ་འཇགས་ཀྱི་འགོག་ར་བརྟན་པོར་སྲུང་བའི་ལས་འགན་གལ་ཆེན་ཕྲག་ཏུ་བླངས་ཡོད་པས། སྐྱེ་ཁམས་འཐབ་ཇུས་ཀྱི་གོ་གནས་དམིགས་བསལ་ཡིན་པར་མ་ཟད་གལ་ཆེན་ཞིག་ཀྱང་རེད། མིག་སྔར། ངེས་པར་དུ་སྐྱེ་ཁམས་དཔལ་ཡོན་གྱི་ལམ་ལུགས་བཅོས་སྒྱུར་བསྟུད་མར་ཟབ་སྤེལ་བྱེད་པ་དང་། སྐྱེ་ཁམས་བཅོས་སྐྱོང་གི་མ་ལག་འཐུས་ཚང་དུ་གཏོང་དགོས། ཚད་གཞི་སྔར་ལས་མཐོན་པོས་སྐྱེ་ཁམས་དཔལ་ཡོན་གྱི་མཐོ་ས་བསྐྲུན་པར་སྐུལ་འདེད་གཏོང་བ་དང་། སྐྱེ་ཁམས་དགེ་མཚན་དེ་སྐྱེ་ཁམས་སྒུལ་ནུས་སུ་ལེགས་པོར་བསྒྱུར་རྒྱུ་དེ་རང་ཞིང་གི་རྒྱལ་ཡོངས་དམངས་ཆེན་འཐུས་མི་དང་མཚོ་སྔོན་དུ་སྡོད་པའི་རྒྱལ་ཡོངས་སྲིད་གྲོས་ཨུ་ཡོན་གྱིས་ཚ་ཚ་འུར་འུར་ངང་གྲོས་བསྡུར་བྱེད་པའི་བརྗོད་བྱར་གྱུར་ཡོད།
འཐུས་མི་ཡོན་ཧུང་ཝེ་ཡིས་བསྟན་དོན། རྒྱལ་ཁབ་ཀྱི་སྐྱེ་ཁམས་དཔལ་ཡོན་འཛུགས་སྐྲུན་གྱི་མཐོ་ས་བསྐྲུན་པ་ནི་ཁེ་ལས་ཀྱིས་རྒྱལ་ཁབ་ཀྱི་འབྲུ་རིགས་བདེ་འཇགས་དང་ནུས་ཁུངས་ཐོན་ཁུངས་བདེ་འཇགས་ཀྱི་ལས་འགན་ལག་བསྟར་བྱེད་པའི་འགན་འཁྲི་ཡིན་པར་མ་ཟད། དུས་རབས་གསར་བས་ཁེ་ལས་ཚུལ་སྒྱུར་འཕེལ་རྒྱས་ལ་བསྩལ་བའི་ལོ་རྒྱུས་ཀྱི་གོ་སྐབས་གལ་ཆེན་ཞིག་ཀྱང་ཡིན། ཁེ་ལས་ཀྱིས་ལག་རྩལ་གསར་གཏོད་སྒུལ་ཤུགས་སུ་བྱེད་པ་དང་། ལྗང་མདོག་དོ་དམ་འདེགས་སྐྱོར་དུ་བྱས་ཏེ། ཀྲུང་གོའི་ཆུ་མཛོད་ལ་སྲུང་སྐྱོབ་ལེགས་པོ་བྱེད་པ་དང་། རི་སྔོ་ཆུ་དྭངས་ལ་སྲུང་སྐྱོབ་ལེགས་པོ་བྱེད་པ། རབ་མཛེས་མཚོ་སྔོན་ལ་སྲུང་སྐྱོབ་ལེགས་པོ་བཅས་བྱེད་དགོས། ཁྲིམས་སྐྱོང་རྩ་བ་སེམས་ལ་རག་ལས་པ་དང་དོན་འཁྱོལ་བྱེད་པ་འགུལ་སྐྱོད་ལ་རག་ལས་པས། སྐྱེ་ཁམས་ཁོར་སྲུང་གི་འདུ་ཤེས་དེ་ཁེ་ལས་ཀྱི་ངོ་བོར་འདྲེས་པར་བྱེད་པ་དང་། སྐྱེ་ཁམས་གཙོར་འཛིན་དེ་ཐོག་མཐའ་བར་གསུམ་དུ་ཁྱབ་པར་བྱས་ནས། ཁེ་ལས་དེ་ལྗང་མདོག་རིན་ཐང་གསར་སྐྲུན་མཁན་དུ་འགྱུར་བར་བྱེད་དགོས། ཁེ་ལས་སོ་སོས་ཐོན་ཁུངས་ཕྱོགས་བསྡུས་བེད་སྤྱོད་དང་སྐྱེ་ཁམས་ཁོར་ཡུག་སྲུང་སྐྱོབ། ཆུ་དང་ནུས་ཁུངས་གྲོན་ཆུང་། གཏེར་ཁུལ་ཞིག་གསོ་བཅོས་སྐྱོང་སོགས་ཚེ་སྲོག་གི་འཁོར་རྒྱུན་ཧྲིལ་བོར་འདྲེས་པར་བྱེད་པ་དང་། ཁོར་སྲུང་གི་ཚད་གཞི་ནན་མོ་དེ་འཆར་འགོད་དང་ཇུས་ཆོད། ལག་བསྟར། གདེང་འཇོག་སོགས་ཀྱི་ལས་རིམ་སོ་སོར་འདྲེས་པར་བྱས་ནས། ཐོན་ལས་ཕྲེང་སྦྲེལ་ཧྲིལ་བོར་ཁེབས་པའི་ཁོར་ཡུག་འགན་འཁྲི་མ་ལག་འཛུགས་པ་དང་། ལས་གཞི་སོ་སོས་སྐྱེ་ཁམས་ཀྱི་ཉམས་སད་ཐེག་པར་ཁག་ཐེག་བྱེད་དགོས། ལག་རྩལ་གསར་གཏོད་འབུར་དུ་ཐོན་པར་བྱེད་པ་དང་། ནུས་པ་ཡོད་རྒུས་སྐྱེ་ཁམས་ཁོར་སྲུང་དང་ཐོན་ཁུངས་གསར་སྤེལ་གྱི་འགལ་བ་སེལ་ཐབས་བྱེད་པ། ཕྱོགས་ཡོངས་ནས་དག་གཙང་ནུས་ཁུངས་ཀྱིས་ཚབ་བྱེད་པ་དང་ལྗང་མདོག་ཅན་གྱི་བསྒྱུར་སྐྲུན་བྱས་ཏེ། ཐོན་ལས་རྩེ་རིམ་ཅན་དང་། རིག་ནུས་ཅན། ལྗང་མདོག་ཅན་བཅས་ཀྱི་ཕྱོགས་སུ་གོམ་པ་སྤོ་དགོས། གཞི་ཁྱོན་ཆེན་པོས་སྔོན་ཐོན་ལག་རྩལ་སྒྲིག་བཀོད་བེད་སྤྱོད་བྱེད་པ་དང་། སྐྱེ་ཁམས་ཁོར་སྲུང་གི་ཚད་གཞི་ནན་མོ་ལག་བསྟར་བྱེད་པ། ཚན་རིག་གི་ཚོད་འཛིན་སྙོམས་སྦྱོར་བྱེད་ཚད་ལ་དོ་སྣང་བྱེད་པ། བེད་ཡོད་ཐོན་ཁུངས་ཀྱི་ཕྱོགས་བསྡུས་དཔྱད་འཇོག་དང་བེད་སྤྱོད་ལ་ཤུགས་སྣོན་པ་བཅས་བྱས་ནས། ཐོན་ཁུངས་གསར་སྤེལ་དེ་ས་གནས་ཀྱི་དཔལ་འབྱོར་འཕར་སྣོན་ལ་སྐུལ་འདེད་གཏོང་བ་དང་། སྐྱེ་ཁམས་ཁོར་ཡུག་ལ་སྲུང་སྐྱོབ་ཞིག་གསོ་བྱེད་པ། ས་གནས་མང་ཚོགས་ཕྱུག་པོར་བསྒྱུར་བ་བཅས་ཀྱི་དཔེ་མཚོན་ལས་གཞིར་འགྱུར་བར་བྱས་ཏེ། མི་དང་རང་བྱུང་ཁམས་འཆམ་མཐུན་མཉམ་གནས་ཀྱི་དེང་རབས་ཅན་འཛུགས་སྐྲུན་གྱི་སྒྲིག་གཞི་གསར་བ་ཆགས་པར་སྐུལ་འདེད་གཏོང་ཆེད་ཁེ་ལས་ཀྱི་སྟོབས་ཤུགས་འབུལ་དགོས་ཟེར།
འཐུས་མི་ཅང་ཀྲི་ཀང་གིས་བཤད་རྒྱུར། ད་ལོའི་སྲིད་གཞུང་བྱ་བའི་སྙན་ཞུས་མཚོ་སྔོན་གྱི་སྐྱེ་ཁམས་དཔལ་ཡོན་གྱི་མཐོ་ས་འཛུགས་སྐྲུན་ཐད་རྩ་བའི་གཞི་འཛིན་ས་འདོན་སྤྲོད་བྱས་པར་མ་ཟད། མཚོ་ཆུ་བཅོས་སྐྱོང་བྱ་བར་ཁ་ཕྱོགས་གསལ་སྟོན་བྱས་ཡོད། མཚོ་སྔོན་ནི་ཀྲུང་ཧྭའི་ཆུ་མཛོད་ཡིན་པའི་ཆ་ནས། མཚོ་ཆུ་ནི་སྐྱེ་ཁམས་བདེ་འཇགས་འགོག་རའི་ལྟེ་བའི་ཐེག་གནས་ཡིན་པས། ཆུ་རྒྱུན་རེ་རེ་དང་མཚོ་མོ་རེ་རེར་སྲུང་སྐྱོབ་ལེགས་པོ་བྱ་རྒྱུ་ནི་སྐྱེ་ཁམས་དཔལ་ཡོན་འཛུགས་སྐྲུན་ལ་སྲུང་སྐྱོབ་བྱེད་པའི་རྩ་བའི་རྨང་གཞི་ཡིན། ཉེ་བའི་ལོ་འགའི་རིང་། མཚོ་སྔོན་གྱི་མ་ལག་ལྡན་པའི་བཅོས་སྐྱོང་གི་འདུ་ཤེས་རྒྱུན་འཁྱོངས་བྱས་པ་དང་། མཚོ་དཔོན་དང་ཆུ་དཔོན་ལམ་ལུགས་ཟབ་སྤེལ་བྱས་པས། ཞིང་ཆེན་ཡོངས་ཀྱི་མཚོ་ཆུའི་འགན་འཁྲི་ཕྱོགས་ཡོངས་ལ་ཁེབས་པ་དང་། རི་ཆུ་ནགས་ཞིང་མཚོ་རྩྭ་བྱེ་ཐང་འཁྱགས་རོམ་བཅས་གཞི་གཅིག་ཅན་ལ་བཅོས་སྐྱོང་སྲུང་སྐྱོབ་བྱེད་པར་སྐུལ་འདེད་བཏང་ཞིང་། འབྲི་ཆུ་དང་རྨ་ཆུའི་ཆུ་ལག རྫ་ཆུ་བཅས་ཞིང་ཆེན་བརྒལ་བའི་བཅད་ངོས་ཀྱི་ཆུ་སྤུས་སྔར་བཞིན་རིགས་གཉིས་པའི་ཡན་སྲུང་འཛིན་བྱས་པ་དང་། ལོ་རེར་སྨད་རྒྱུད་དུ་འགོ་ཁུངས་ཀྱི་ཆུ་སྨི་རྒྱ་དཔངས་གྲུ་བཞི་མ་ཐེར་ཆེན་དྲུག་ནས་ཐེར་ཆེན་དགུ་བར་གཏོང་སྤྲོད་བྱས་ཏེ། གཙང་ཆུ་དྭངས་མོ་ཤར་དུ་བཞུར་ཐུབ་པ་མངོན་འགྱུར་བྱུང་། འཇུ་ལག་ཆུ་བོ་ཙོང་ཆུར་འདྲེན་པའི་བཟོ་སྐྲུན་ཕྱོགས་ཡོངས་ནས་ལག་བསྟར་བྱས་པར་བརྟེན། ཆུའི་ཐོན་ཁུངས་ལེགས་བཅོས་སྙོམས་སྒྲིག་མངོན་འགྱུར་བྱས་པ་དང་། སྐྱེ་ཁམས་སྲུང་སྐྱོབ་དང་ཐོན་ལས་འཕེལ་རྒྱས་ཐད་འདེགས་སྐྱོར་ནུས་ལྡན་འདོན་སྤྲོད་བྱས། ང་ཚོས་མཚོ་སྔོན་བཅོས་སྐྱོང་འཐབ་ཇུས་དང་ཆུ་ནི་ཇུས་ཆེན་ཡིན་པའི་འདུ་ཤེས་བསྟུད་མར་ལག་བསྟར་བྱེད་པ་དང་། མཚོ་ཆུའི་སྐྱེ་ཁམས་སླར་གསོ་དང་སྲུང་སྐྱོབ་དམ་འཛིན་ནན་མོ་བྱས་ཏེ། ཀྲུང་ཧྭའི་ཆུ་མཛོད་ཀྱི་བདེ་འཇགས་འགོག་ར་བརྟན་པོར་བསྐྲུན་པ་དང་། སྐྱེ་ཁམས་དཔལ་ཡོན་གྱི་མཐོ་ས་བསྐྲུན་པ་དེ་སྐས་རིམ་གསར་བར་འཕར་བར་སྐུལ་འདེད་གཏོང་དགོས། མཚོ་ཆུའི་དོ་དམ་རྨང་གཞི་ཅུང་ཞན་པ་དང་བཞུར་རྒྱུན་ཧྲིལ་བོའི་མ་ལག་གི་བཅོས་སྐྱོང་ནུས་པ་མཐོར་འདེགས་གཏོང་དགོས་པ་སོགས་ཀྱི་གནད་ལ་དམིགས་ནས། རྒྱལ་ཁབ་ཀྱིས་མཚོ་སྔོན་གྱི་སྐྱེ་ཁམས་ཁོར་ཡུག་སྲུང་སྐྱོབ་ཐད་ཀྱི་སྲིད་ཇུས་དང་མ་དངུལ་གྱི་རྒྱབ་སྐྱོར་ལ་ཤུགས་སྣོན་པ་དང་། བར་སྣང་ཆུ་དང་བཟོ་སྐྲུན་གཞི་གཅིག་ཅན་གྱི་ལྟ་ཞིབ་ཚད་ལེན་མ་ལག་འཐུས་ཚང་དུ་བཏང་སྟེ། རྨ་ཆུའི་སྟོད་རྒྱུད་དང་ཙོང་ཆུའི་འབབ་རྒྱུད་ཀྱི་ཕྱོགས་བསྡུས་བཅོས་སྐྱོང་ལ་སྐུལ་འདེད་གཏོང་བ་དང་། སྐྱེ་ཁམས་ཐོན་རྫས་ཀྱི་རིན་ཐང་མངོན་འགྱུར་རྐྱེན་སྲོལ་འཐུས་ཚང་དུ་གཏོང་དགོས་ཟེར།
ཨུ་ཡོན་ཀྲའོ་ཧེ་ཞིན་གྱིས་བལྟས་ན། ཉེ་བའི་ལོ་འགའི་རིང་། མཚོ་སྔོན་གྱིས“རི་སྔོ་ཆུ་དྭངས་གསེར་དངུལ་རི་ལས་ལྷག”པའི་འདུ་ཤེས་རྒྱུན་ཆད་མེད་པར་ལག་བསྟར་གཏིང་ཟབ་བྱས་ཏེ། རི་ཆུ་ནགས་ཞིང་མཚེའུ། རྩྭ་ཐང་། བྱེ་འཁྱགས་བཅས་གཞི་གཅིག་ཅན་གྱི་སྲུང་སྐྱོབ་དང་མ་ལག་བཅོས་སྐྱོང་གཅིག་གྱུར་འཆར་འགོད་བྱས་པ་དང་། གཙོ་གནད་སྐྱེ་ཁམས་བཟོ་སྐྲུན་ལག་བསྟར་གཏིང་ཟབ་བྱས་ཏེ། སྐྱེ་ཁམས་ཁོར་ཡུག་གི་སྤུས་ཚད་རྒྱུན་མཐུད་སྒོས་ཇེ་ལེགས་སུ་ཕྱིན་པ་དང་། སྐྱེ་དངོས་སྣ་མང་རང་བཞིན་སྲུང་སྐྱོང་གི་ཕན་འབྲས་མངོན་གསལ་ཡིན་པ། སྐྱེ་ཁམས་མ་ལག་གི་ཞབས་ཞུའི་བྱེད་ནུས་བརྟན་པོའི་ངང་མཐོ་རུ་ཕྱིན་ནས། རྒྱལ་ཁབ་ཀྱི་སྐྱེ་ཁམས་བདེ་འཇགས་སྲུང་སྐྱོང་དང་གོ་ལ་ཧྲིལ་པོའི་ནམ་ཟླའི་འགྱུར་ལྡོག་ལ་ཁ་གཏད་འཇལ་བའི་ཐད་བྱས་རྗེས་ཧུར་ཐག་འཇོག་དགོས། ཁོས་སྐྱེ་ཁམས་སྲུང་སྐྱོབ་སླར་གསོ་དང་། ལྟ་ཞིབ་ཚད་ལེན་དང་དཔྱད་འཇོག ཚན་རྩལ་འགག་སྒྲོལ་གཏོང་ཤུགས་སྔར་ལས་ཆེ་རུ་གཏོང་བ་དང་། མ་དངུལ་དང་ཐོན་ཁུངས་འགན་སྲུང་བྱེད་ཤུགས་ཆེ་རུ་གཏོང་བ། སྐྱེ་ཁམས་སླར་གསོའི་བཅོས་སྐྱོང་ནུས་ཕྱོད་མཐོ་རུ་གཏོང་བ། སྐྱེ་ཁམས་ཁོར་ཡུག་ལྟ་ཞིབ་ཚད་ལེན་གྱི་དཔྱད་འཇོག་མ་ལག་འཐུས་ཚང་དུ་གཏོང་བ། ཚན་རྩལ་ཞིབ་འཇུག་གསར་སྤེལ་གྱི་གསར་གཏོད་ལ་སྐུལ་འདེད་གཏོང་བ་བཅས་བྱས་ནས། སྐྱེ་ཁམས་དཔལ་ཡོན་འཛུགས་སྐྱོང་བྱེད་པར་འདེགས་སྐྱོར་བརྟན་པོ་འདོན་སྤྲོད་བྱ་དགོས། མཚོ་སྔོན་ཞིང་ཆེན་གྱིས་སྐྱེ་ཁམས་དཔལ་ཡོན་གྱི་གསར་གཏོད་སྟེགས་བུ་འཛུགས་སྐྱོང་ཇེ་མགྱོགས་སུ་གཏོང་བར་རྒྱབ་སྐྱོར་དང་། སྐྱེ་ཁམས་ཐོན་རྫས་རིན་ཐང་མངོན་འགྱུར་རྐྱེན་སྲོལ་ཚོད་ལྟའི་བྱ་བར་སྐུལ་འདེད་ཧུར་ཐག་གཏོང་བ། སྐྱེ་ཁམས་སྲུང་སྐྱོབ་དང་དཔལ་འབྱོར་འཕེལ་རྒྱས་ཀྱི་མཐུན་སྦྱོར་ཐབས་ལམ་འཚོལ་ཞིབ་བྱེད་པ། ལྗང་མདོག་ཐཱན་ཉུང་ཚུལ་སྒྱུར་ལ་སྐུལ་འདེད་གཏོང་བ། ས་ཁོངས་རྒྱུན་མཐུད་ངང་འཕེལ་རྒྱས་གཏོང་བའི་དམིགས་འབེན་མངོན་འགྱུར་བྱེད་པར་རོགས་རམ་བཅས་བྱ་དགོས། མཚོ་སྔོན་ཞིང་ཆེན་གྱི་སྐྱེ་ཁམས་དཔལ་ཡོན་འཛུགས་སྐྱོང་གི་ཡུན་ཕན་རྐྱེན་སྲོལ་ཁྱོན་ཡོངས་ནས་བསྐྲུན་ཆེད། སྲིད་ཇུས་མཁོ་སྤྲོད་དང་ལམ་ལུགས་འགན་ལེན་གྱི་རིམ་ངོས་མ་ལག་ནས་ཤུགས་བསྣན་ཏེ། སྐྱེ་ཁམས་ཁ་གསབ་རྐྱེན་སྲོལ་གྱི་འཆར་འགོད་དང་ལག་བསྟར་ལ་སྔར་བས་ཤུགས་སྣོན་པ་དང་། སྐྱེ་ཁམས་སྲུང་སྐྱོབ་ཀྱིས་ས་གནས་མང་ཚོགས་ཀྱི་ཁྲིམས་མཐུན་ཁེ་དབང་དང་འཕེལ་རྒྱས་ཀྱི་དགོས་མཁོར་སྲུང་སྐྱོང་ནན་མོ་བྱེད་དགོས། དེ་དང་ཆབས་ཅིག སྲིད་ཇུས་ཀྱི་གསེག་ཤུགས་ཆེ་རུ་གཏོང་བ་དང་། ས་ཁོངས་ཀྱི་ཁྱད་ཆོས་དང་སྐྱེ་ཁམས་ནུས་པའི་ངེས་གནས་དང་ཟུང་འབྲེལ་བྱས་ནས། ཁྱད་པར་ཅན་གྱི་རྒྱབ་སྐྱོར་བྱེད་ཐབས་གཏན་འབེབས་བྱས་ཏེ། སྐྱེ་ཁམས་སྲུང་སྐྱོབ་དང་དཔལ་འབྱོར་སྤྱི་ཚོགས་མཐུན་སྦྱོར་ངང་འཕེལ་རྒྱས་གཏོང་བའི་སྲིད་ཇུས་ཀྱི་ཁོར་ཡུག་ཆགས་པར་སྐུལ་འདེད་གཏོང་དགོས། བྱེད་ཐབས་མང་པོ་མཉམ་སྤྱོད་དང་གནད་འཁེལ་ཇུས་འདོན་བྱས་ཏེ་མཚོ་སྔོན་ཞིང་ཆེན་གྱིས་མི་དང་རང་བྱུང་ཁམས་འཆམ་མཐུན་མཉམ་གནས་ཀྱི་སྐྱེ་ཁམས་དཔལ་ཡོན་གྱི་མཐོ་ས་བསྐྲུན་རྒྱུར་རྒྱབ་སྐྱོར་ནུས་ལྡན་བྱས་ནས། ས་ཁོངས་རྒྱུན་མཐུད་འཕེལ་རྒྱས་དང་རྒྱལ་ཁབ་ཀྱི་སྐྱེ་ཁམས་བདེ་འཇགས་འཐབ་ཇུས་མངོན་འགྱུར་བྱ་ཆེད་བྱས་རྗེས་སྔར་ལས་ཆེན་པོ་འཇོག་དགོས་པའི་གྲོས་གཞི་བཏོན། །
