མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
——མཚོ་སྔོན་ཞིང་ཆེན་གྱི་རྒྱལ་ཡོངས་དམངས་འཐུས་ཚོགས་ཆེན་གྱི་འཐུས་མི་རྒྱལ་ཡོངས་དམངས་འཐུས་ཚོགས་ཆེན་སྐབས་བཅུ་བཞི་པའི་གྲོས་ཚོགས་ཐེངས་བཞི་པའི་དབུ་ཚུགས་མཛད་སྒོར་ཞུགས་པའི་ཟུར་བྲིས།
མཚོ་སྔོན་གསར་འགྱུར་དྲ་བ·ཆུ་མགོའི་གསར་འགྱུར་འཕྲིན་སྟེགས་ནས་སྤེལ་བའི་འཕྲིན། དཔྱིད་རླུང་དལ་གྱིས་ལྡང་པའི་འཛིན་མའི་གཞིར། རྣམ་པ་གསར་པའི་ལེའུ་ཡོངས་སུ་བརྩམས།
ཟླ3པའི་པེ་ཅིང་ལ་དཔྱིད་ཀྱི་ཁ་བ་བབས་ཤིང་། ག་ས་གང་དུ་འབད་འབུངས་ལ་བྲལ་བའི་གསོན་ཤུགས་ཀྱི་རྣམ་པས་ཡོངས་སུ་བརྟས། མཚོ་སྔོན་མི་རིགས་ཁག་གི་མང་ཚོགས་ཀྱི་ཡིད་ཆེས་དང་རེ་བ་ཕྲག་ཏུ་ཁུར་བའི་མཚོ་སྔོན་ཞིང་ཆེན་གྱི་རྒྱལ་ཡོངས་དམངས་འཐུས་ཚོགས་ཆེན་གྱི་འཐུས་མི་རྣམས་སེམས་ཤུགས་ཀྱིས་ཁེངས་ཤིང་། བློ་སྤོབས་ཀྱིས་བརྟས་ཏེ་མི་དམངས་ཚོགས་ཁང་ཆེན་མོར་བསྐྱོད་དེ། རྒྱལ་ཡོངས་ས་གནས་ཁག་གི་འཐུས་མི་རྣམས་དང་ལྷན་དུ་འཛོམས་ནས་མཉམ་དུ་རྒྱལ་ཡོངས་དམངས་འཐུས་ཚོགས་ཆེན་སྐབས་བཅུ་བཞི་བའི་གྲོས་ཚོགས་ཐེངས་བཞི་བ་དབུ་ཚུགས་པའི་མཛད་སྒོར་ཞུགས་ལ། ཁྲིམས་བཞིན་དུ་བླ་ན་མེད་པའི་འགན་འཁྲི་ཁུར་དུ་བླངས་ནས་མཉམ་དུ་འཕེལ་རྒྱས་ཀྱི་འཆར་ཇུས་ཆེན་མོར་གྲོས་སྡུར་བྱས་ནས་མ་འོང་རིས་ལྗོངས་མཉམ་དུ་འགོད་པར་བྲལ།
མི་དམངས་ཚོགས་ཁང་ཆེན་མོའི་ཤར་སྒོའི་མདུན་དུ། དར་དམར་ལྷབ་ལྷབ་ཏུ་བསྐྱོད་ཅིང་། རྒྱལ་རྟགས་ལ་འོད་ཆེམ་ཆེམ་འཕྲོ། འཐུས་མི་རྣམས་གོམ་ཁ་བརྟན་པོ་སྤོས་ནས་ཐེམ་སྐས་ལ་སྙེག་ཅིང་། གཞི་རིམ་དུ་རྟོག་ཞིབ་ཟབ་མོ་བྱས་པའི་གྲུབ་འབྲས་དང་། མཐོ་སྒང་གི་བུ་དང་བུ་མོའི་སེམས་འདུན་དང་རེ་སྙེག་བཅས་བསྣམས་ཏེ། ཡིད་ཆེས་ཆེན་པོ་དང་བཅས་དཔྱིད་ཀྱི་རྒྱས་སྟོན་ཆེན་པོ་འདིར་ཞུགས། རྒྱལ་ཡོངས་དམངས་འཐུས་ཚོགས་ཆེན་ཀྱི་འཐུས་མི་རིན་ཆེན་བཀྲ་ཤིས་ཀྱིས་མིག་མདངས་ལ་གཡོ་བ་མེད་ཅིང་། རེ་བས་ཁེངས་ཏེ་འདི་སྐད། འདས་པའི་ལོ་གཅིག་ནང་དུ། ཕ་ཡུལ་ལ་གནམ་ས་བླ་འོག་བརྗེ་བ་ལྟ་བུའི་འཕེལ་རྒྱས་བྱུང་བ་དང་། སྐྱེ་ཁམས་ཀྱི་འཕེལ་ཕྱོགས་རྒྱུད་ཆད་མེད་པར་ཇེ་ལེགས་ཡིན་ལ། དམངས་ཚིས་རྒྱུན་ཆད་མེད་པར་ཇེ་ལེགས་སུ་ཕྱིན། ད་ལོར་ཚོགས་འདུའི་སྟེང་། ངས་མུ་མཐུད་དུ་གཞི་རིམ་གྱི་རེ་བ་ཚོགས་ཆེན་གཉིས་ཀྱི་སྟེང་འཁྱེར་ཏེ། རང་འགན་ཁུར་དུ་འཁྱེར་ནས་ཕ་ཡུལ་གྱི་སྤུས་ཚད་མཐོ་བའི་འཕེལ་རྒྱས་ལ་སྟོབས་ཤུགས་སྔར་ལས་མང་པོ་འབུལ་རྒྱུ་ཡིན་ཟེར།
སྔ་དྲོའི་ཆུ་ཚོད9ཡི་སྟེང་དུ། ཚོགས་འདུའི་ཡོལ་བ་དངོས་སུ་ཕྱེས་ཤིང་། དཔའ་སྤོབས་དང་ངར་ཤུགས་ཀྱིས་བརྟས་པའི་རྒྱལ་གླུ་དཀྲོལ་བ་དང་བསྟུན་ནས་ཚོགས་ཞུགས་འཐུས་མི་རྣམས་ཡར་ལངས་ཏེ། མཉམ་དུ་གཟི་བརྗིད་དང་གཟབ་ནན་ཀྱིས་བསྐོས་པའི་འགན་འཁྲིའི་ལས་ལ་ཕྱོགས། གྲོས་ཚོགས་ཀྱི་གྲོས་རིམ་གཞིར་བཟུང་རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆིང་གིས་སྲིད་གཞུང་གི་བྱ་བའི་སྙན་ཞུ་ཕུལ།
ཁོང་གིས་འདི་སྐད། “ལོ་ཧྲིལ་པོའི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་དམིགས་ཚད་གཙོ་བོའི་ལས་འགན་བདེ་བླག་ངང་གྲུབ་པ་དང་། ‘ལོ་ལྔའི་འཆར་འགོད་བཅུ་བཞི་པ’ཕུན་སུམ་ཚོགས་པོའི་ངང་མཇུག་འགྲིལ་ནས་ཀྲུང་གོའི་ལུགས་ཀྱི་དེང་རབས་ཅན་ཀྱི་གོམ་སྟབས་གསར་པ་བརྟན་པོ་སྤོས”།
“ཆར་རླུང་གདོང་གིས་བསུས་པས། ང་ཚོའི་འདོད་བློ་སྔར་བས་བརྟན་པོ་དང་གོམ་སྟབས་སྔར་བས་བརྟན་པོར་གྱུར། ལེགས་ཆ་བེད་སྤྱོད་གང་ལེགས་དང་འོས་འཚམ་གང་ལེགས་ཀྱིས་འགྲན་སློང་ལ་ཁ་གཏད་གཅོག་ཐུབ་ཚེ། རང་རྒྱལ་གྱི་འཕེལ་རྒྱས་མདུན་ལམ་སྔར་བས་ཡངས་པོ་ཡོང་ངེས”“བློ་མཐུན་ཞི་ཅིན་ཕིང་སྲོག་ཤིང་བྱས་པའི་ཏང་ཀྲུང་དབྱང་གི་མགོ་ཁྲིད་སྟོབས་ལྡན་འོག རྒྱལ་ཡོངས་གོང་འོག་ཀུན་གྱིས་མཐུན་སྒྲིལ་འབད་འཐབ་བྱས་ན། ‘ལོ་ལྔའི་འཆར་འགོད་བཅོ་ལྔ་པའི’བརྗིད་ཉམས་ལྡན་པའི་འཆར་གཞི་དེ་མཛེས་སྡུག་ལྡན་པའི་དོན་དངོས་སུ་འགྱུར་ཐུབ་ངེས། ”ཞེས་གསུངས།
གཏམ་བཟང་གིས་མི་སེམས་ལ་སྐུལ་མ་ཐེབས་པ་དང་། དམིགས་འབེན་གསར་པས་མི་རྣམས་འབད་བརྩོན་ངང་མདུན་དུ་སྐྱོད་པར་སྐུལ་མ་ཐེབས་པ་རེད། སྙན་ཞུ་ལ་ཚོགས་ར་ཡོངས་ནས་སྤྲོ་སེམས་འཁོལ་བའི་ངང་ནས་ཐལ་མོའི་རྡེབ། ཐལ་མོ་རྡེབ་སྒྲ་དེ་ནི་འདས་ཟིན་པའི་གྲུབ་འབྲས་ལ་ཁས་ལེན་བྱས་པ་ཞིག་ཡིན་ལ་མཛེས་སྡུག་ལྡན་པའི་འབྱུང་འགྱུར་ལ་ཡིད་ཆེས་བརྟན་པོ་བྱས་པ་ཞིག་དེ་བས་ཀྱང་རེད།
སྙན་ཞུ་ལ་ཉན་དུས་འཐུས་མི་ཚོས་བློ་རྩེ་གཅིག་སྒྲིམ་དང་ཟིན་ཐོ་ནན་ཏན་བཀོད་པ་དང་། སྙན་ཞུའི་དགོངས་དོན་དེ་མཚོ་སྔོན་གྱི“ཆེས་ཤོས་གསུམ”གྱི་ཞིང་ཆེན་གནས་ཚུལ་ངེས་གནས་དང“དེ་བས་གལ་ཆེན་གསུམ”གྱི་འཐབ་ཇུས་གནས་བབ་དང་ཟུང་འབྲེལ་དམ་ཟབ་བྱས་ཏེ་ཇི་ལྟར་བྱས་ན་རྒྱལ་ཁབ་ཀྱི་འཐབ་ཇུས་བཀོད་སྒྲིག་དེ་དེང་རབས་ཅན་གྱི་མཚོ་སྔོན་གསར་པ་འཛུགས་སྐྲུན་ལ་སྐུལ་འདེད་གཏོང་བའི་ཞིབ་ཕྲའི་བྱ་སྤྱོད་དུ་བསྒྱུར་ཐུབ་པར་བསམ་གཞིག་བཏང་ཡོད་པ་རེད། ཚང་མས་མགྲིན་གཅིག་ཏུ་སྙན་ཞུའི་ལངས་གནས་མཐོ་ཞིང་ནང་དོན་དངོས་སྒྲུབ་ཡིན་པས། མཚོ་སྔོན་གྱི་འཕེལ་རྒྱས་དང་ཚད་མཐོའི་མཐུན་པ་དང་སླད་ཕྱིན་གྱི་ལས་དོན་ལ་ཁ་ཕྱོགས་གསལ་སྟོན་དང་གཞིར་འཛིན་ས་མཁོ་འདོན་བྱས་ཡོད་པར་ངོས་འཛིན་བྱེད་ཀྱི་ཡོད།
མགོ་ཚུགས་ཚོགས་འདུ་མཇུག་འགྲིལ་རྗེས་འཐུས་མི་ཚོ་ཚོགས་ར་ནས་ཐོན་རྗེས། མྱོང་ཚོར་ལྷུག་གླེང་དང་འགན་འཁྲི་མཉམ་དུ་འཁུར་བར་སྐུལ་མ་ཐེབས་ནས་སྒུལ་ཤུགས་ཀྱིས་ཁེངས་ཡོད།
རྒྱལ་ཡོངས་མི་དམངས་འཐུས་མིའི་ཚོགས་ཆེན་གྱི་འཐུས་མི་ཞུས་ཆིང་མིན་གྱིས་སེམས་འགུལ་ཐེབས་པའི་ངང“སྲིད་གཞུང་གི་ལས་དོན་སྙན་ཞུ་དེས་མི་སེམས་ལ་སྐུལ་མ་ཐེབས་པ་དང་། མི་རྣམས་ཡར་རྒྱས་ཡོང་བར་སྐུལ་མ་ཐེབས་ངེས། ནང་སྒོས་སུ་སྐྱེ་ཁམས་ཀྱི་ཤེས་དཔལ་དར་སྤེལ་དང་གནོད་མེད་ཐཱན་ཉུང་གི་དཔལ་འབྱོར་འཕེལ་རྒྱས་ཤུགས་ཆེན་གཏོང་བའི་སྐོར་གྱི་བཀོད་སྒྲིག་ཅིག་ཡིན་པས་ང་ཚོར་འགན་འཁྲི་ལྕི་ཡང་གཟི་བརྗིད་ལྡན་པའི་ཚོར་སྣང་སྦྱིན། ངས་རང་འཁྲིར་གཞི་ཚུགས་ནས་ཐབས་འདོན་ཇུས་འབུལ་ཧུར་ཐག་བྱས་ཏེ་ས་མཐོའི་སྐྱེ་དངོས་དང་རྩྭ་ཤིང་ཁྲི་སྟོང་དང་། རི་ཆུ་ཁྲི་སྟོང་བཅས་སྲུང་སྐྱོང་ཡག་པོ་བྱ་རྒྱུ་ཡིན”ཟེར།
རྒྱལ་ཡོངས་མི་དམངས་འཐུས་མིའི་ཚོགས་ཆེན་གྱི་འཐུས་མི་ཤྭ་བོ་སྒྲོལ་མས“སྙན་ཞུའི་ནང་དམངས་ཕན་གྱི་སྲིད་ཇུས་བཟང་པོ་མང་པོ་ཡོད་ཅིང་། དེ་ལས་སློབ་གསོ་དང་། སྨན་བཅོས། རྒན་གསོ། འབབ་འཕར་སོགས་མང་ཚོགས་ཀྱིས་དོ་ཁུར་དང་། མི་སེར་གྱིས་དཀའ་གནད་དང་སེམས་ཁྲལ་དངོས་དམིགས་སུ་བཟུང་འདུག ངས་ཚོགས་འདུ་གཉིས་ཀྱི་དགོངས་དོན་གཞི་རིམ་དུ་འཁྱེར་ནས་དུད་ཚང་ཁྲི་སྟོང་མང་པོར་བརྒྱུད་སྒྲོག་དང་། ཚང་མ་དང་མཉམ་དུ་འཚོ་བ་སྔར་བས་བདེ་སྐྱིད་ཡོང་ཐུབ་ལ་འབད་བརྩོན་བྱ་རྒྱུ་ཡིན”ཞེས་མྱོང་ཚོར་ཟབ་མོའི་ངང་བཤད།
མགོ་ཚུགས་ཚོགས་འདུ་འཚོགས་པའི་ཉིན་དེར་དཔྱིད་ཀའི་ཁ་བ་ལྷབ་ལྷུབ་ཏུ་བབས་ཤིང་། དངུལ་དཀར་གྱི་ན་བཟའ་བཀླབས་པའི་ཐང་ཆེན་ནི་སྔ་ན་མེད་པའི་དྭངས་གསལ་གྱི་ཉམས་སྣང་ཞིག་མངོན་ལ། འབད་འཐབ་ཀྱི་འགྱུར་ཁུག་རེ་རེ་ཡང་ཁ་བའི་འདབ་མའི་གསེང་ན་སྙན་ཞིང་འཇེབ།རྒྱང་སྐྱོད་ཀྱི་ལམ་བུ་གསར་པར་བསྐྱོད་མགོ་བརྩམས་པའི་དུས་འདིར། དཔའ་ངར་ཆེན་པོས་མདུན་སྐྱོད་བྱེད་པའི་སྟོབས་ཤུགས་ཁྲི་སྟོང་མང་པོ་ངང་ངམ་ཤུགས་ཀྱིས་གཅིག་ཏུ་འདུ་བཞིན་ཡོད་པས། མཚོ་སྔོན་གྱི་འབྱུང་འགྱུར་ལའང་རེ་བས་ཁེངས་ཡོད་དོ།།
