མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ3པའི་ཚེས5ཉིན་གྱི་ཕྱི་དྲོར། རྒྱལ་ཡོངས་སྲིད་གྲོས་སྐབས་བཅུ་བཞི་པའི་གྲོས་ཚོགས་ཐེངས་བཞི་པར་ཞུགས་པའི་མཚོ་སྔོན་དུ་སྡོད་པའི་རྒྱལ་ཡོངས་སྲིད་གྲོས་ཀྱི་ཨུ་ཡོན་རྣམས་སོ་སོའི་ལས་རིགས་ཁག་གི་ཚན་ཆུང་གྲོས་ཚོགས་ལ་ཞུགས་ཏེ། སྲིད་གྲོས་རྒྱུན་ལས་ཨུ་ཡོན་ལྷན་ཁང་གི་བྱ་བའི་སྙན་ཞུ་དང་གྲོས་གཞིའི་ལས་དོན་གནས་ཚུལ་གྱི་སྙན་ཞུར་གྲོས་ཞིབ་ནན་མོ་བྱས། ཨུ་ཡོན་མགོན་པོ་བཀྲ་ཤིས་དང་ཝང་ཅན་ཅུན། རྡོ་རྗེ་རབ་བརྟན། པད་གོ ལིའུ་ཐུང་ཏེ། ཝང་ཞོན། གསེར་ཁྲི·ཆོས་ཀྱི་བློ་གྲོས་རྒྱ་མཚོ། མ་ཡུའེ་ཞང་སོགས་ཀྱིས་གཏམ་བཤད།
ཨུ་ཡོན་མགོན་པོ་བཀྲ་ཤིས་ཀྱིས་བཤད་རྒྱུར། ད་ལོ་ནི“ལོ་ལྔའི་འཆར་འགོད་བཅོ་ལྔ་པ”འགོ་རྩོམ་པའི་ལོ་ཡིན་པ་དང་། རྒྱལ་ཡོངས་ཀྱི་ཚོགས་འདུ་གཉིས་སྔ་མཐུད་ཕྱི་སྤེལ་གྱི་སྒོ་ནས་འཚོགས་པར་དོན་སྙིང་གལ་ཆེན་ལྡན་ལ་ཀུན་གྱིས་དོ་སྣང་ཆེན་པོ་བྱེད་ཀྱིན་ཡོད། ཀྲུའུ་ཞི་ཝང་ཧུའུ་ཉིང་གིས་གྱིས་ཕུལ་བའི་རྒྱུན་ལས་ཨུ་ཡོན་ལྷན་ཁང་གི་བྱ་བའི་སྙན་ཞུ་དང་ཀྲུའུ་ཞི་གཞོན་པ་ཧོ་པའོ་ཞང་གིས་ཕུལ་བའི་གྲོས་གཞིའི་ལས་དོན་གནས་ཚུལ་སྐོར་གྱི་སྙན་ཞུ་ནི། ཏང་དང་རྒྱལ་ཁབ་ཀྱི་བྱ་གཞག་འཕེལ་རྒྱས་ཀྱི་ཁྱོན་ཡོངས་དང་དམ་པོར་དམིགས་པ་དང་། མི་དམངས་སྲིད་གྲོས་ཀྱི་ངོ་བོ་དང་ངེས་གནས་ཁོང་དུ་ཆུད་པ། མཐུན་སྒྲིལ་དང་དམངས་གཙོ་ཡི་བརྗོད་དོན་ཆེན་པོ་གཉིས་འབུར་དུ་ཐོན་པ། “གོང་བུར་འགྲིལ་དགོས་པ་བཞི” འགན་འཁྲི་སྒྲུབ་པའི་ཕྱོགས་གང་ཅིའི་བརྒྱུད་རིམ་ཧྲིལ་པོར་ཁྱབ་པ། ཞིབ་ཅིང་ཕྲ་བའི་གྲངས་ཀ་དང་དཔེ་གཞི། གྲུབ་འབྲས་བཅས་ལ་བརྟེན་ནས་འདས་ཟིན་པའི་ལོ་གཅིག་གི་འགན་འཁྲི་སྒྲུབ་པའི་ཕན་འབྲས་ལ་ཕྱིར་མིག་བལྟས་ནས་སྤྱི་བསྡོམས་བྱས་པ། འགན་འཁྲི་གསར་པ་འཁུར་བ་དང་བྱ་སྤྱོད་གསར་པ་སྤྱད་དེ་ད་ལོའི་ལས་དོན་ལ་བཀོད་སྒྲིག་བྱས་པ་བཅས་ནི། ཆབ་སྲིད་ལ་མཐོང་ཆེན་བྱེད་ཚད་མཐོ་བ་དང་འགན་འཁྲི་སྒྲུབ་པར་མཐོང་ཆེན་བྱེད་ཚད་ཆེ་བ། མཐུན་སྒྲིལ་ལ་སྐུལ་འདེད་གཏོང་བར་བརྩེ་བ་ལྡན་པ། རང་ངོས་སྟོབས་ལྡན་དུ་གཏོང་ཤུགས་ཆེ་བ་བཅས་ཀྱི་སྙན་ཞུ་ཡག་པོ་ཞིག་རེད། ལས་དོན་ཁག་སྔར་ལས་བདེན་འཚོལ་དངོས་གཉེར་དང་སྔར་ལས་ཁྱད་ཆོས་ལྡན་པ། སྔར་ལས་གསོན་ཤུགས་ལྡན་པ་བཅས་ཀྱི་སྟེང་ནས་མི་དམངས་སྲིད་གྲོས་ཀྱི་མངོན་གསལ་དོད་པའི་ཆབ་སྲིད་ལེགས་ཆ་དང་ཆེད་དོན་གྲོས་མོལ་སྒྲིག་གཞིའི་ཐུན་མོང་མ་ཡིན་པའི་འགན་ནུས་མངོན་ཐུབ་ཡོད་ཅིང་། སྲིད་གྲོས་ཨུ་ཡོན་གྱིས་རྒྱལ་ཁབ་ཀྱི་ཆེད་དུ་འགན་འཁྲི་སྒྲུབ་པ་དང་དམངས་ཀྱི་ཆེད་དུ་འགན་འཁྲི་སྒྲུབ་པའི་ལས་འགན་གྱི་བརྩེ་སེམས་ཕྱོགས་ཀུན་ནས་མངོན་ཡོད་པར་བརྟེན། “ལོ་ལྔའི་འཆར་འགོད་བཅོ་ལྔ་པ”འགོ་ཡག་པོ་རྩོམ་པར་ཐུན་མོང་གི་ངོས་འཛིན་མང་པོ་རྒྱ་ཁྱབ་ཏུ་བསྡུ་ངེས་པར་བརྟེན། ང་རང་ངོས་ནས་ཡོངས་སུ་མོས་མཐུན་ཡོད་ཟེར།
ཨུ་ཡོན་ཝང་ཅན་ཅུན་གྱིས་བཤད་རྒྱུར། ཀྲུའུ་ཞི་ཝང་ཧུའུ་ཉིང་གིས་ཕུལ་བའི་སྲིད་གྲོས་རྒྱུན་ལས་ཨུ་ཡོན་ལྷན་ཁང་གི་བྱ་བའི་སྙན་ཞུ་ནི་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་ཕྱོགས་ཡོངས་ནས་ལག་བསྟར་བྱེད་པ་དང་། ཀྲུང་གུང་གི་ཚོགས་ཆེན་ཐེངས་ཉི་ཤུ་པ་དང་སྐབས་ཉི་ཤུ་པའི་ཚང་འཛོམས་གྲོས་ཚོགས་རིམ་བྱུང་གི་དགོངས་དོན་དོན་འཁྱོལ་ནན་ཏན་བྱེད་པ། ཏང་གི་འགོ་ཁྲིད་དང་འཐབ་ཕྱོགས་གཅིག་གྱུར། གྲོས་མོལ་དམངས་གཙོ་བཅས་ཟུང་འབྲེལ་དམ་ཟབ་བྱེད་པ་རྒྱུན་འཁྱོངས་བྱེད་པ། སྲིད་གྲོས་ཀྱི་ངོ་བོ་དང་ངེས་གནས་ཁོང་དུ་ཆུད་པར་བྱེད་པ། ལྟེ་བར་དམིགས་ཏེ་ཁྱོན་ཡོངས་ལ་ཞབས་འདེགས་ཞུ་བ། ཆེད་དོན་གྲོས་མོལ་སྒྲིག་གཞིའི་ནུས་པ་འདོན་སྤེལ་བཅས་བྱས་ནས། “ལོ་ལྔའི་འཆར་འགོད་བཅོ་ལྔ་པའི”འགོ་ཡག་པོ་རྩོམ་པ་མངོན་འགྱུར་ཡོང་ཆེད་མི་སེམས་དང་ཐུན་མོང་གི་ངོས་འཛིན། བློ་གྲོས། སྟོབས་ཤུགས་བཅས་གཅིག་སྡུད་བྱས་ཏེ། སྐྱོད་ལམ་གསར་པའི་སྟེང་གི་མི་དམངས་སྲིད་གྲོས་བྱ་གཞག་སྤུས་ཚད་མཐོ་བའི་སྒོ་ནས་འཕེལ་རྒྱས་འགྲོ་བར་སྐུལ་འདེད་གཏོང་ཐུབ་པའི་སྙན་ཞུ་ལེགས་པོ་ཞིག་ཡིན་པར་བརྟེན། ང་རང་ངོས་ནས་ཡོངས་སུ་མོས་མཐུན་ཡོད། སྙན་ཞུའི་ནང་ལོ་གཅིག་རིང་གི“དོན་ཆེན་བཞིའི”ཆབ་སྲིད་ཀྱི་གནས་བབ་མངོན་པ་དང་། “ཕྱོགས་དྲུག་གི་ལས་དོན”གྱིས་འགན་འཁྲི་འཁུར་བའི་བྱས་རྗེས་མངོན་པ། གསར་དུ་བཀོད་སྒྲིག་བྱས་པའི“ལས་འགན་བཞིའི”གཙོ་གནད་མངོན་གསལ་དོད་པ། གོམ་སྟབས་རྗེས་མའི་འགན་འཁྲི་སྒྲུབ་པར་མཛུབ་སྟོན་གསལ་པོ་མཁོ་འདོན་བཅས་བྱས་ཡོད། རྒྱལ་ཡོངས་སྲིད་གྲོས་ཀྱི་རྒྱུན་ལས་ཨུ་ཡོན་དང་ཆེད་དོན་ཨུ་ཡོན་ལྷན་ཁང་གི་འགན་འཁུར་བ་གཙོ་བོ་ཞིག་ཡིན་པའི་ངོས་ནས། ངས་ཐེངས་འདིའི་གྲོས་ཚོགས་ཀྱི་དགོངས་དོན་ལག་བསྟར་བྱེད་པ་དང་ཟུང་འབྲེལ་བྱས་ཏེ། ལས་ཀའི་དམིགས་ས་དང་ཤུགས་རྒྱག་ས་དེ་ཐབས་བརྒྱ་ཇུས་སྟོང་གིས་ཞིང་ལས་ཀྱི་ཕན་འབྲས་ཆེ་རུ་གཏོང་བ་དང་ཞིང་པའི་ཡོང་འབབ་ཆེ་རུ་གཏོང་བ། གྲོང་གསེབ་ཀྱི་གསོན་ཤུགས་ཆེ་རུ་གཏོང་བ་བཅས་ལ་སྐུལ་འདེད་གཏོང་བའི་སྟེང་བཞག་སྟེ། འབད་བརྩོན་ཆེན་པོས་ཡང་དག་པའི་སྲིད་སྐྱོང་བྱས་རྗེས་ཀྱི་ལྟ་བ་འཛུགས་པ་དང་ལག་བསྟར་བྱས་ནས་རྒྱུགས་ལེན་ཡག་པོ་ཞིག་འབུལ་རྒྱུ་ཡིན་ཟེར།
ཨུ་ཡོན་རྡོ་རྗེ་རབ་རྟན་གྱིས་བཤད་རྒྱུར། སྲིད་གྲོས་རྒྱུན་ལས་ཨུ་ཡོན་ལྷན་ཁང་གི་བྱ་བའི་སྙན་ཞུའི་ནང་དོན་ཆ་ཚང་བ་དང་གཙོ་གནད་འབུར་དུ་ཐོན་པ། གཞི་གྲངས་ཞིབ་ཕྲ་བཅས་ཡིན་པས། དེ་ནི་ཆབ་སྲིད་རང་བཞིན་དང་མཛུབ་སྟོན་རང་བཞིན། ལག་ལེན་རང་བཞིན་བཅས་ཧ་ཅང་ཆེ་བའི་སྙན་ཞུ་ཡག་པོ་ཞིག་རེད། འདས་ཟིན་པའི་ལོ་གཅིག་གི་རིང་ལ། རྒྱལ་ཡོངས་སྲིད་གྲོས་ཀྱི་ལས་དོན་ཁག་ལ་གྲུབ་འབྲས་གསར་པ་ཐོབ་ཡོད། ཏང་གིས་སྲིད་གྲོས་ཀྱི་ལས་དོན་ལ་ཕྱོགས་ཡོངས་ནས་འགོ་ཁྲིད་བྱེད་ཤུགས་སྔར་ལས་ཆེ་རུ་བཏང་བ་དང་། སྲིད་གྲོས་ཀྱི་ཆབ་སྲིད་ལས་ཁུངས་ཀྱི་ཁྱད་ཆོས་སྔར་ལས་གསར་ཤོས་སུ་གྱུར་བ། ཏང་དང་རྒྱལ་ཁབ་ཀྱི་ལྟེ་བའི་ལས་འགན་ལ་དམིགས་ནས་གྲོས་མོལ་སྲིད་གྲོས་བྱས་པར་བརྟེན། སྲིད་གྲོས་ཀྱིས་ཁྱོན་ཡོངས་ལ་ཞབས་འདེགས་ཞུ་བའི་ནུས་པ་སྔར་ལས་མངོན་གསལ་ཅན་དུ་ཕྱིན་ཡོད་ཅིང་། མཐུན་སྒྲིལ་ཆེན་པོ་དང་མཉམ་འབྲེལ་ཆེན་པོ་རྒྱུན་འཁྱོངས་བྱས་པས། སྲིད་གྲོས་ཀྱི་འཐབ་ཕྱོགས་གཅིག་གྱུར་གྱི་ནུས་པ་སྔར་ལས་ཆེ་རུ་ཕྱིན་ཡོད། ད་ལོའི་ལས་དོན་བཀོད་སྒྲིག་བྱེད་སྐབས། ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཚང་འཛོམས་གྲོས་ཚོགས་རིམ་བྱུང་གི་དགོངས་དོན་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མི་དམངས་སྲིད་གྲོས་ལ་བཏོན་པའི་བླང་བྱ་གལ་ཆེན་ལག་ལེན་མཐར་ཕྱིན་ནན་ཏན་བྱས་ཡོད་པས། མི་དམངས་སྲིད་གྲོས་ཀྱི་བྱ་གཞག་རྒྱུན་མཐུད་ངང་གོང་དུ་སྤེལ་བའི་དགོས་མཁོ་དང་ཡོངས་སུ་མཐུན་ཡོད། ང་རང་ངོས་ནས་ཐེངས་འདིའི་སྙན་ཞུར་ཡོངས་སུ་མོས་མཐུན་ཡོད། རྒྱལ་ཡོངས་སྲིད་གྲོས་ཀྱིས་དམངས་གཙོའི་ལྟ་སྐུལ་ལ་ཞིབ་འཇུག་དང་འཚོལ་ཞིབ་བྱ་རྒྱུར་སྔར་ལས་ཤུགས་བསྣན་ཏེ། ལྟ་སྐུལ་གྱི་ཁ་བྱང་འདེམས་པ་དང་ལྟ་སྐུལ་གྱི་རྣམ་པ། གྲུབ་འབྲས་བེད་སྤྱོད་སོགས་གཙོ་གནད་ལས་རིམ་ལ་དམ་པོར་དམིགས་ཏེ། ལམ་ལུགས་དང་ལམ་སྲོལ་རྒྱུན་མཐུད་ངང་འཐུས་ཚང་དུ་གཏོང་བ་དང་། དམངས་གཙོའི་ལྟ་སྐུལ་ལམ་ལུགས་ཅན་དང་ཚད་ལྡན་ཅན། གོ་རིམ་ཅན་བཅས་ཀྱི་ཆུ་ཚད་མངོན་སུམ་ཇེ་མཐོར་གཏོང་དགོས་ཟེར།
ཨུ་ཡོན་པད་གོ་ཡིས་བཤད་རྒྱུར། རྒྱུན་ལས་ཨུ་ཡོན་ལྷན་ཁང་གི་བྱ་བའི་སྙན་ཞུའི་གནས་བབ་མཐོ་བ་དང་དམིགས་འབེན་གསལ་བ། དམིགས་ཡུལ་ཏན་ཏིག་བཅས་ཀྱི་སྒོ་ནས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་དང་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དགོངས་དོན་ལག་བསྟར་བྱས་པ་དང་། མངོན་གསལ་དོད་པའི་གཞི་གྲངས་རབ་དང་རིམ་པ་དང་དམངས་ཕན་དོན་དངོས་རེ་རེ་བཞིན་ལག་བསྟར་བྱས་པ། དོན་དངོས་དང་མཐུན་པ་དང་ཕྱོགས་ཡོངས་ནས་གྲུབ་འབྲས་ལ་སྤྱི་སྡོམ་བྱས་པ། བདེན་སྲུང་གསར་གཏོད་ཀྱིས་ལས་དོན་འཆར་འགོད་བྱས་པ་བཅས་ཀྱི་སྒོ་ནས་མི་དམངས་སྲིད་གྲོས་ཀྱིས་མི་དམངས་ཀྱི་ཐོག་མའི་བསམ་འདུན་གྱི་འགན་འཁྲི་དང་འགན་འཁྲི་འཁུར་བ་མངོན་པར་བྱས་ཡོད། དེ་ནི་ཆབ་སྲིད་ལ་དང་དོད་དང་ལྗིད་ཚད་ཡོད་པ། བརྩེ་སེམས་ཟབ་མོ་ལྡན་པ་བཅས་ཀྱི་སྙན་ཞུ་ཡག་པོ་ཞིག་རེད། ངས་ཡང་དག་པའི་སྲིད་སྐྱོང་བྱས་རྗེས་ཀྱི་ལྟ་བ་འཛུགས་པ་དང་དེ་ལག་བསྟར་བྱ་རྒྱུ་རྒྱུན་འཁྱོངས་དང་། འགན་འཁྲི་སྒྲུབ་པའི་ནུས་པ་ཟམ་མི་ཆད་པར་ཆེ་རུ་གཏོང་བ། འཐབ་ཕྱོགས་གཅིག་གྱུར་གྱིས་མི་སེམས་གཅིག་སྒྲིལ་དང་སྟོབས་ཤུགས་གཅིག་སྡུད་བྱེད་པའི་ཆབ་སྲིད་ཀྱི་ནུས་པ་འདོན་སྤེལ་གང་ལེགས་བྱས་ནས། དུས་རབས་གསར་པའི་འཐབ་ཕྱོགས་གཅིག་གྱུར་གྱི་ལས་དོན་རུ་མི་དང་བྱ་སྤྱོད་རུ་མི། འཐབ་འཛིང་རུ་མི་ལེགས་པོ་བཅས་བྱ་རྒྱུ་ཡིན་ཟེར།
ཨུ་ཡོན་ལིའུ་ཐུང་ཏེ་ཡིས་བཤད་རྒྱུར། སྙན་ཞུས་དངོས་ཐོག་བདེན་འཚོལ་གྱི་སྒོ་ནས་རྒྱལ་ཡོངས་སྲིད་གྲོས་ཀྱི་ལོ་གཅིག་རིང་གི་ལས་ཀའི་ཕན་འབྲས་དང་འགན་འཁྲི་སྒྲུབ་པའི་ཁྱད་ཆོས་གཟེངས་སུ་ཐོན་ས་མཚོན་པར་བྱས་པ་དང་། 2026ལོའི་ལས་འགན་གཙོ་བོ་ཁ་གསལ་བཟོས་ཡོད་པས། དེ་ནི་དར་ཆ་མཐོན་པོར་བསྒྲེངས་པ་དང་ཁྱོན་ཡོངས་ལ་ཞབས་འདེགས་ཞུ་བ། ཐུན་མོང་གི་ངོས་འཛིན་གཅིག་སྒྲིལ། མི་རྣམས་ལ་སྐུལ་མ་གཏོང་བ་བཅས་ཀྱི་སྙན་ཞུ་ཡག་པོ་ཞིག་རེད། སྙན་ཞུའི་ནང་རྒྱུན་ལས་ཨུ་ཡོན་ལྷན་ཁང་གིས་མི་དམངས་སྲིད་གྲོས་ཀྱི་ཆབ་སྲིད་ངོ་བོ་ཁོང་དུ་ཆུད་པ་དང་། ཏང་གིས་སྲིད་གྲོས་ལས་དོན་ལ་ཕྱོགས་ཡོངས་ནས་འགོ་ཁྲིད་བྱ་རྒྱུ་རྒྱུན་འཁྱོངས་བྱ་རྒྱུ་ཐོག་མཐའ་བར་གསུམ་དུ་ལག་ལེན་མཐར་ཕྱིན་བྱས་ནས། ཆབ་སྲིད་ཀྱི་སྣེ་འདོམས་སྔར་ལས་ནུས་ཤུགས་དང་ལྡན་པ། ཏང་དང་རྒྱལ་ཁབ་ཀྱི་ལྟེ་བའི་ལས་འགན་ལ་དམིགས་ནས་འགན་འཁྲི་སྒྲུབ་པ་དང་འགན་གཙང་ལེན་བྱ་རྒྱུ་རྒྱུན་འཁྱོངས་བྱས་ཏེ། གྲོས་མོལ་གྲོས་འདོན་གྱི་གྲུབ་འབྲས་འབོར་ཆེན་ཞིག་སྲིད་ཇུས་ཀྱི་བྱེད་ཐབས་དངོས་ལ་བསྒྱུར་བ་དང་། གྲོས་མོལ་སྲིད་གླེང་སྔར་ལས་ཕན་འབྲས་ལྡན་པ། བཅོས་སྒྱུར་གསར་གཏོད་ཀྱི་སྙིང་སྟོབས་ལ་བརྟེན་ནས་རང་ངོས་འཛུགས་སྐྲུན་དམ་འཛིན་ཡག་པོ་བྱ་རྒྱུ་རྒྱུན་འཁྱོངས་དང་། ལམ་ལུགས་ཅན་དང་ཚད་ལྡན་ཅན། གོ་རིམ་ཅན་བཅས་ཀྱི་འཛུགས་སྐྲུན་ལ་མུ་མཐུད་དུ་ཤུགས་བསྣན་ཏེ། ལམ་ལུགས་རྐྱེན་སྲོལ་སྔར་ལས་འཐུས་ཚང་དུ་གཏོང་དགོས་པ་བརྗོད་ཡོད་ཟེར།
ཨུ་ཡོན་ཝང་ཞོན་གྱིས་བཤད་རྒྱུར། རྒྱུན་ལས་ཨུ་ཡོན་ལྷན་ཁང་གི་བྱ་བའི་སྙན་ཞུའི་ནང་ཞིབ་ཚགས་དངོས་གཉེར་དང་དམིགས་རྒྱང་རིང་པོ་འཛིན་པ། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པས་ཀུན་ནས་ཁྱབ་ཡོད། སྙན་ཞུས་འདས་ཟིན་པའི་ལོ་གཅིག་རིང་གི་རྒྱལ་ཡོངས་སྲིད་གྲོས་ཀྱིས“གོང་བུར་འགྲིལ་དགོས་པ་བཞི”ཁྲིད་སྟོན་དུ་འཛིན་པ་དང་། “ལོ་ལྔའི་འཆར་འགོད་བཅོ་ལྔའི”འཆར་འགོད་བཟོ་ལུགས་སོགས“རྒྱལ་དོན་གྱི་ཆེ་ཕྱོགས”དང་འབྲེལ་བའི་འགན་འཁྲི་སྒྲུབ་པའི་གྲུབ་འབྲས་ལ་དམ་པོར་དམིགས་ཏེ། སྲིད་གྲོས་ཀྱི་འབུར་དུ་ཐོན་པའི་ཆབ་སྲིད་ཀྱི་ཁྱད་ཆོས་མཚོན་པ་དང་། ལྟེ་བར་དམིགས་ནས་ཁྱོན་ཡོངས་ལ་ཞབས་འདེགས་ཞུ་བ། སྲིད་གྲོས་ཀྱི་འགན་འཁྲི་འཁུར་བ་བཅས་ཚད་མཐོའི་སྙིང་བསྡུས་བྱས་ཡོད། 2026ལོའི་ལས་དོན་བཀོད་སྒྲིག་དེ་འགོ་རྩོམ་དམིགས་འབེན་དང་དམ་པོར་འབྲེལ་ནས་ཁ་ཕྱོགས་ཁ་གསལ་དང་གཙོ་གནད་མངོན་གསལ་ཡིན་པས།དེ་ནི་དར་ཆ་མཐོན་པོར་བསྒྲེངས་པ་དང་སེམས་ཤུགས་གཅིག་སྒྲིལ་གྱི་སྙན་ཞུ་ཡག་པོ་ཞིག་རེད། རང་ཉིད་མཚོ་སྔོན་ནས་ཡོང་བའི་ཨུ་ཡོན་དང་དམངས་གཙོ་མནའ་འབྲེལ་གྱི་ས་གནས་རྩ་འཛུགས་ཀྱི་འགན་འཁུར་བ་ཞིག་ཡིན་པའི་ངོས་ནས། ངས་རྒྱ་ཆེའི་མནའ་འབྲེལ་གྱི་ཁོངས་མིའི་སྣེ་ཁྲིད་དེ། མཚོ་སྔོན་གྱི་དོན་དངོས་དང་ཟུང་འབྲེལ་དམ་ཟབ་བྱས་ཏེ། མང་ཚོགས་ཀྱི་བློ་གྲོས་དང་ཐབས་ཇུས་བཟང་པོ་རྒྱ་ཁྱབ་ངང་བསྡུ་ལེན་བྱས་ནས། “ལོ་ལྔའི་འཆར་འགོད་བཅོ་ལྔ་པའི”འགོ་ཡག་པོ་ཞིག་རྩོམ་ཆེད་སྟོབས་ཤུགས་ཅི་ཡོད་ལེགས་སྐྱེས་སུ་འབུལ་རྒྱུ་ཡིན་ཟེར།
ཨུ་ཡོན་གསེར་ཁྲི·ཆོས་ཀྱི་བློ་གྲོས་རྒྱ་མཚོས་བཤད་རྒྱུར། སྙན་ཞུས་ན་ནིང་གི་ལས་དོན་ཕྱོགས་ཡོངས་ནས་དོན་ཐོག་ཏུ་འཁྱོལ་བ་ཡོད་པ་དང་དེར་དངོས་ཐོག་བདེན་འཚོལ་གྱི་སྒོ་ནས་སྤྱི་སྡོམ་བྱས་ཡོད་ཅིང་། ད་ལོའི་ལས་དོན་ལ་བཀོད་སྒྲིག་བྱེད་པའི་ངེས་གནས་གནད་ལ་འཁེལ་བ། བསམ་ཕྱོགས་ཁ་གསལ་བཅས་བྱས་ནས། སྲིད་གྲོས་ཀྱིས་ཁྱོན་ཡོངས་ལ་ཞབས་འདེགས་ཞུ་བའི་ཆབ་སྲིད་ཀྱི་འགན་འཁྲི་འཁུར་བ་མངོན་ཡོད་པ་དང་། སྲིད་གྲོས་ཀྱིས་དམངས་དོན་དུ་འགན་འཁྲི་སྒྲུབ་པའི་དམངས་འཚོའི་བརྩེ་སེམས་མཚོན་ཡོད་པར་བརྟེན། དེ་ནི་ངར་ཤུགས་འཕེལ་བ་དང་མི་རྣམས་ཡར་རྒྱས་ལ་སྐུལ་མ་གཏོང་བའི་སྙན་ཞུ་ཡག་པོ་ཞིག་རེད། རང་ཉིད་རྒྱལ་ཡོངས་སྲིད་གྲོས་ཀྱི་ཆོས་ལུགས་ལས་རིགས་ཀྱི་ཨུ་ཡོན་ཞིག་ཡིན་པའི་ངོས་ནས། ཐོག་མཐའ་བར་གསུམ་དུ་འགན་འཁྲི་བློ་ལ་བརྟན་པོར་བཅངས་ནས་རང་ངོས་ཀྱི་དོན་དངོས་དང་ཟུང་འབྲེལ་བྱས་ཏེ་གཞི་རིམ་དུ་ཟབ་ཞུགས་བྱེད་པ་དང་། མི་དམངས་ཀྱི་འབོད་སྒྲར་ཉན་པ། བདེན་གཏམ་འདོན་པ། ཐབས་ཇུས་བཟང་པོ་འདོན་པ། བྱེད་ཐབས་དངོས་འདོན་པ། སྲིད་ཞུགས་སྲིད་གྲོས་ཧུར་ཐག་བཅས་བྱས་ཏེ། ཚད་གཞི་མཐོ་བའི་འགན་འཁྲི་སྒྲུབ་པའི་ཐོག་ནས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་དང་། དངོས་གཉེར་གྱི་གྲུབ་འབྲས་ལ་བརྟེན་ནས་འགན་འཁྲི་འཁུར་ནས། ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་ཆེད་ཤེས་རབ་དང་སྟོབས་ཤུགས་ཅི་ཡོད་ལེགས་སྐྱེས་སུ་འབུལ་རྒྱུ་ཡིན་ཟེར།
ཨུ་ཡོན་མ་ཡུའེ་ཞང་གིས་བཤད་རྒྱུར། འདས་ཟིན་པའི་ལོ་གཅིག་གི་རིང་ལ། ཏང་ཀྲུང་དབྱང་གི་འགོ་ཁྲིད་བརྟན་པོའི་འོག་ཏུ། རྒྱལ་ཡོངས་སྲིད་གྲོས་ཀྱིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་སྟོན་དུ་འཛིན་རྒྱུ་རྒྱུན་འཁྱོངས་དང་། མི་དམངས་སྲིད་གྲོས་ལམ་ལུགས་དང་མི་དམངས་སྲིད་གྲོས་རྩ་འཛུགས་ཀྱི་མངོན་གསལ་དོད་པའི་ཆབ་སྲིད་ཀྱི་ཁྱད་ཆོས་ལ་ངོས་འཛིན་གཏིང་ཟབ་དང་དེ་ཁོང་དུ་ཡང་དག་ཆུད་པར་བྱས་པ། “ལོ་ལྔའི་འཆར་འགོད་བཅུ་བཞི་པ”ཕུན་སུམ་ཚོགས་པའི་ངང་ཡོངས་འགྲུབ་བྱ་རྒྱུར་སྐུལ་འདེད་བཏང་བ་དང་། “ལོ་ལྔའི་འཆར་འགོད་བཅོ་ལྔ་པ”བརྒྱུད་རིམ་ལྡན་པའི་ངང་ཇུས་འགོད་བྱ་རྒྱུ་གཙོ་གནད་དུ་བཟུང་ནས། བསམ་བློའི་ཆབ་སྲིད་ཀྱི་སྣེ་ཁྲིད་ལ་མུ་མཐུད་ཤུགས་བསྣན་པ་དང་། གྲོས་མོལ་སྲིད་གྲོས་གཏིང་ཟབ་བྱེད་པ། ཐུན་མོང་གི་ངོས་འཛིན་རྒྱ་ཁྱབ་ངང་གཅིག་སྡུད་བཅས་བྱས་ཏེ། སྲིད་གྲོས་ཀྱི་ནུས་པ་དང་སྲིད་གྲོས་ཀྱི་ལེགས་ཆ། སྲིད་གྲོས་ཀྱི་བྱ་སྤྱོད་བཅས་ལ་བརྟེན་ནས། རྒྱལ་ཁབ་ཀྱི་དཔལ་འབྱོར་དང་སྤྱི་ཚོགས་ཀྱི་སྤུས་ཚད་མཐོ་བའི་འཕེལ་རྒྱས་ལ་བློ་གྲོས་དང་སྟོབས་ཤུགས་ཅི་ཡོད་ལེགས་སྐྱེས་སུ་ཕུལ་ཡོད། གོམ་སྟབས་རྗེས་མར་ངས་སྙན་ཞུའི་ནང་དོན་བརྒྱུད་སྒྲོག་དང་སློབ་སྦྱོང་ནན་ཏན་བྱས་ནས། ལག་བསྟར་དོན་འཁྱོལ་ལ་དམ་འཛིན་ཡག་པོ་བྱ་རྒྱུ་ཡིན་ཟེར།
ཨུ་ཡོན་རྣམས་ཀྱིས་རང་སོ་སོའི་ཚན་ཆུང་དུ་གཏམ་བཤད། ཚང་མས་འདས་ཟིན་པའི་ལོ་གཅིག་རིང་གི་རྒྱལ་ཡོངས་སྲིད་གྲོས་དང་དེའི་རྒྱུན་ལས་ཨུ་ཡོན་ལྷན་ཁང་གི་ལས་ཀར་ཁས་ལེན་གང་ལེགས་བྱས་པར་མ་ཟད། ཡོངས་སུ་མོས་མཐུན་ཡང་བྱས། གོམ་སྟབས་རྗེས་མར་སྙན་ཞུའི་དགོངས་དོན་ལ་སློབ་སྦྱོང་དང་གོ་བ་ནན་ཏན་ལེན་པ་དང་། ལྟེ་བའི་ལས་འགན་ལ་དམ་པོར་དམིགས་པ། འཕེལ་རྒྱས་ཀྱི་ཁྱོན་ཡོངས་དང་དམངས་འཚོའི་དོ་ཁུར་ལ་དམ་པོར་དམིགས་པ། ཐབས་འདོན་སྲིད་སྐྱོང་དང་ཐུན་མོང་གི་ངོས་འཛིན་རྒྱ་ཁྱབ་ངང་གཅིག་སྡུད་བྱེད་པ། སྔར་ལས་སྤྲོ་སེམས་རབ་ཏུ་འཕེལ་བ་དང་སྔར་ལས་དངོས་སྒྲུབ་ཀྱི་བསམ་སྦྱོར་ལ་བརྟེན་ནས་འགན་འཁྲི་སྒྲུབ་པ་བཅས་བྱས་ཏེ། དཔལ་འབྱོར་དང་སྤྱི་ཚོགས་ཀྱི་སྤུས་ཚད་མཐོ་བའི་འཕེལ་རྒྱས་ལ་བློ་གྲོས་དང་སྟོབས་ཤུགས་ཅི་ཡོད་ལེགས་སྐྱེས་སུ་འབུལ་རྒྱུ་ཡིན་ཟེར།
