ཞིང་ཆེན་ཡོངས་ཀྱིས་གློག་འཕྲིན་དྲ་རྒྱའི་མགོ་སྐོར་དང་རྒྱལ་ཁོངས་བརྒལ་བའི་རྒྱན་འཇོག་བྱ་བར་རྡུང་རྡེག་དང་བཅོས་སྐྱོང་བྱེད་པའི་བརྙན་རིས་གྲོས་ཚོགས་བསྡུས།

ཟླ3པའི་ཚེས4ཉིན། ཞིང་ཆེན་ཡོངས་ཀྱིས་གློག་འཕྲིན་དྲ་རྒྱའི་མགོ་སྐོར་དང་རྒྱལ་ཁོངས་བརྒལ་བའི་རྒྱན་འཇོག་བྱ་བར་རྡུང་རྡེག་དང་བཅོས་སྐྱོང་བྱེད་པའི་བརྙན་རིས་གྲོས་ཚོགས་ཟི་ལིང་དུ་བསྡུས། གྲོས་ཚོགས་ལས་འབྲེལ་ཡོད་ཚོགས་འདུའི་དགོངས་དོན་སློབ་སྦྱོང་དང་བརྒྱུད་སྒྲོག་བྱས་ཤིང་། བྱ་བའི་ཕན་འབྲས་སྤྱི་སྡོམ་བྱས་པ་དང་། གནས་བབ་ལ་དབྱེ་ཞིབ་བྱས་ཏེ། གཙོ་གནད་ལས་འགན་ལ་ཞིབ་འཇུག་བཀོད་སྒྲིག་བྱས། ཧྲིན་ཀྲང་གཞོན་པ། ཞིང་ཆེན་སྤྱི་བདེ་ཐིན་གྱི་ཐིན་ཀྲང་ལིས་ཧོང་ཡ་གྲོས་ཚོགས་ལ་ཞུགས་པར་མ་ཟད་གཏམ་བཤད།

ཚོགས་འདུ་ལས། གློག་འཕྲིན་དྲ་རྒྱའི་མགོ་སྐོར་བྱ་བར་རྡུང་རྡེག་དང་བཅོས་སྐྱོང་བྱེད་པར་སྐུལ་འདེད་གཏིང་ཟབ་གཏོང་བ་དང་། མཐོ་གནོན་ནན་རྡེག་རྒྱུན་འཁྱོངས་བྱས་ཏེ། མང་ཚོགས་ཀྱིས་ཚུར་སྣང་དྲག་པོ་བྱེད་པའི་གློག་འཕྲིན་དྲ་རྒྱའི་མགོ་སྐོར་གྱི་ཁྲིམས་འགལ་ཉེས་སྤྱོད་བྱ་འགུལ་ལ་དམིགས་ནས་རྡུང་རྡེག་ནན་མོ་གཏོང་དགོས། བྱ་བའི་སྔོན་གྱི་སྔོན་འགོག་དང་། བྱ་བ་སྒྲུབ་སྐབས་ཀྱི་ཉེན་བརྡ། བྱ་བའི་རྗེས་ཀྱི་ཐག་གཅོད་བཅས་ལ་ཤུགས་སྣོན་པ་དང་། ཉེན་བརྡའི་ཆ་འཕྲིན་ལྟ་ཞིབ་ཚད་ལེན་གྱི་སྔོན་མཐོང་ནུས་པ་དང་ཉེན་བརྡའི་འགོག་སྲུང་ཆུ་ཚད་ཇེ་མཐོར་གཏོང་དགོས། མ་ལག་ལྡན་པའི་བཅོས་སྐྱོང་རྒྱུན་འཁྱོངས་བྱེད་པ་དང་། ནུས་ཤུགས་ཡོད་རྒུས་འགོ་ཁུངས་ཀྱི་ལྟ་སྐུལ་དོ་དམ་འགོག་ཟོན་ལ་ཤུགས་སྣོན་དགོས། རྩ་བ་སྲ་བརྟན་དང་རྨང་གཞིར་ཤུགས་སྣོན་པ་རྒྱུན་འཁྱོངས་དང་། སྤུས་གསར་སྤྱི་བདེའི་འཐབ་རྩོད་ནུས་པ་མགྱོགས་མྱུར་ངང་ཇེ་མཐོར་གཏོང་དགོས། རྒྱལ་ཁོངས་བརྒལ་བའི་རྒྱན་འཇོག་བྱ་བར་བསྟུད་མར་རྡུང་རྡེག་དང་བཅོས་སྐྱོང་ཟབ་སྤེལ་བྱས་ཏེ། རྡུང་རྡེག་དང་འགོག་སྲུང་ཟུང་འབྲེལ་དང་། སྔོན་འགོག་གཙོ་བོར་འཛིན་པ། ཕྱོགས་བསྡུས་བཅོས་སྐྱོང་བཅས་ཀྱི་རྩ་དོན་ལ་གཞིགས་ནས། ནུས་ཤུགས་ཡོད་རྒུས་རྡུང་རྡེག་དང་བཅོས་སྐྱོང་གི་བྱེད་ཐབས་སྣ་ཚོགས་དོན་ཐོག་ཏུ་འཁྱོལ་བ་དམ་འཛིན་ཡག་པོ་བྱེད་དགོས། གྱོད་གཞིར་རྡུང་རྡེག་གཏོང་བ་ཟབ་སྤེལ་དང་། བྱ་བ་ཆུང་ས་དང་སྔ་མོ་ནས་སྔོན་འགོག་བྱེད་པ་རྒྱུན་འཁྱོངས་བྱས་ཏེ། བརྒྱུད་རིམ་ཧྲིལ་བོས་རྒྱལ་ཁོངས་བརྒལ་བའི་རྒྱན་འཇོག་ཉེས་སྤྱོད་ཀྱི་སྐྱེ་ཁམས་མུ་ཕྲེང་ལ་རྡུང་རྡེག་གཏོང་དགོས།  དོ་དམ་ཚོད་འཛིན་གྱི་བྱེད་ཐབས་ལ་ཤུགས་སྣོན་པ་དང་། རྒྱན་འཇོག་དང་འབྲེལ་བའི་དངུལ་རྩའི་མུ་ཕྲེང་བཅོས་སྐྱོང་ཟབ་སྤེལ་བྱེད་དགོས། འགོ་ཁུངས་ཀྱི་འགོག་ཟོན་ལ་ཤུགས་སྣོན་པ་དང་། གཙོ་གནད་རྒྱུ་རྐྱེན་ལ་དོ་དམ་ལེགས་པོ་བྱས་ནས། ནུས་ཤུགས་ཡོད་རྒུས་ཉེས་སྤྱོད་བར་སྟོང་ཇེ་ཆུང་དུ་གཏོང་དགོས་པ་བཅས་ཀྱི་བླང་བྱ་བཏོན།

ཚོགས་འདུ་ལས་ནན་གྱིས་བསྟན་དོན། རྩ་འཛུགས་འགོ་ཁྲིད་ལ་ཤུགས་སྣོན་པ་དང་། ཏང་སྲིད་གཅིག་འདོམས་དང་ལས་རིགས་དོ་དམ། སྤྱི་ཚོགས་མཐུན་སྦྱོར་བཅས་ཀྱི་མུ་ཕྲེང་ཧྲིལ་བོ་མཉམ་འཛུགས་མཉམ་བཅོས་མ་ལག་ཧུར་ཐག་གིས་བསྐྲུན་དགོས། མཉམ་ལས་གཞོགས་འདེགས་ལ་ཤུགས་སྣོན་པ་དང་། ཕྱོགས་ཡོངས་ནས་ས་ཁོངས་ཀྱི་འགན་འཁྲི་དང་ལས་རིགས་དོ་དམ་གྱི་འགན་འཁྲི་དོན་འཁྱོལ་བྱེད་པ། རྡུང་རྡེག་འགོག་ཟོན་བྱ་བར་མཉམ་འབྲེལ་སྒོས་སྐུལ་འདེད་བཏང་སྟེ། ལས་འགན་སོ་སོ་དོན་ཐོག་ཏུ་འཁྱོལ་བ་དང་ཕན་འབྲས་ཐོན་པར་ཁག་ཐེག་བྱེད་དགོས། དྲིལ་སྒྲོག་འགོག་ཟོན་ལ་ཤུགས་སྣོན་པ་དང་། དྲིལ་སྒྲོག་གི་ཐེག་གནས་ཕུན་སུམ་ཚོགས་པར་གཏོང་བ་དང་དྲིལ་སྒྲོག་བྱེད་ཐབས་གསར་གཏོད་བྱས་ནས། དྲ་ཐོག་དང་ཡུལ་དངོས་ནས་ཤུགས་འདོན་པ་དང་། ནུས་ཤུགས་ཡོད་རྒུས་སྤྱི་ཚོགས་ཡོངས་ཀྱིས་རྒྱན་འཇོག་དང་མགོ་སྐོར་ལ་འགོག་ཟོན་བྱེད་པའི་སྣང་ཚུལ་ལེགས་པོ་ཞིག་བསྐྲུན་དགོས།