མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
དེ་རིང(ཚེས5ཉིན)སྔ་དྲོར། སྐབས་བཅུ་བཞི་པའི་རྒྱལ་ཡོངས་མི་དམངས་འཐུས་ཚོགས་ཀྱི་གྲོས་ཚོགས་ཐེངས་བཞི་པ་པེ་ཅིང་དུ་ཚོགས་འགོ་ཚུགས་པ་དང་། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་གིས་སྲིད་གཞུང་གི་ལས་དོན་སྙན་ཞུ་གནང་ཡོད།
《རྒྱལ་དམངས་དཔལ་འབྱོར་དང་སྤྱི་ཚོགས་གོང་འཕེལ་གྱི་ལོ་ལྔ་ཚན་གྱི་འཆར་འགོད་བཅོ་ལྔ་པ་གཏན་འབེབས་བྱ་རྒྱུའི་སྐོར་གྱི་ཀྲུང་གུང་ཀྲུང་དབྱང་གི་གྲོས་འཆར》གཞིར་བཟུང་། རྒྱལ་སྲིད་སྤྱི་ཁྱབ་ཁང་གིས《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་དམངས་དཔལ་འབྱོར་དང་སྤྱི་ཚོགས་གོང་འཕེལ་གྱི་ལོ་ལྔ་ཚན་གྱི་འཆར་འགོད་བཅོ་ལྔ་པའི་རྩ་གནད(འཆར་ཟིན)》བཟོ་འགོད་བྱས་ཏེ་ཚོགས་ཆེན་ལ་ཞིབ་བཤེར་བྱ་རྒྱུར་ཕུལ་ཡོད།
དམིགས་འབེན་དང་དམིགས་ཚད་གཙོ་བོ།
ཏང་ཀྲུང་དབྱང་གི《གྲོས་འཆར》ནང་ཁ་གསལ་བཟོས་པའི་དམིགས་འབེན་གཙོ་བོ་ལག་བསྟར་དོན་འཁྱོལ་བྱེད་པ་དང་། 《རྩ་གནད(འཆར་ཟིན)》ནང་དམིགས་ཚད་གཙོ་བོ་ཁག20ཞིབ་ཕྲའི་ངང་བཏོན་ཡོད།
དཔལ་འབྱོར་གོང་འཕེལ་ཐད། འཕར་སྣོན་དང་གྲུབ་གཞི ལས་ཆོད་བཅས་ལ་དམིགས་ནས་དམིགས་ཚད་ཁག་གསུམ་བཏོན་ཡོད་ཅིང་། དེའི་ནང་རྒྱལ་ཁབ་ཕྱི་ནང་གི་དུས་བབ་དང་ཕྱོགས་ཁག་གི་རྒྱུ་རྐྱེན་ལ་ཕྱོགས་བསྡུས་བསམ་གཞིགས་དང་དགོས་མཁོ་དང་བྱེད་ཐུབ་བཟོ་གཉིས་ཀར་དོ་སྣང་བྱེད་པ། རྒྱལ་ནང་གི་ཐོན་སྐྱེད་སྤྱིའི་རིན་ཐང་འཕར་ཚད་ལུགས་མཐུན་གྱི་བར་ཁམས་ནང་རྒྱུན་འཁྱོངས་ཐུབ་རྒྱུ་དང་ལོ་འཁོར་ཁག་གི་གནས་ཚུལ་ལ་གཞིགས་ནས་བཏོན་ཡོད་ཅིང་། 2035ལོར་སླེབས་སྐབས་མི་རེའི་ཆ་སྙོམས་ཀྱི་རྒྱལ་ནང་ཐོན་སྐྱེད་སྤྱིའི་རིན་ཐང་དེ2020ལོ་ལས་ལྡབ་གཅིག་འཕར་ནས་དར་རྒྱས་འབྲིང་གྲས་རྒྱལ་ཁབ་ཀྱི་ཆུ་ཚད་དུ་སླེབས་པར་རྨང་གཞི་འདིང་དགོས་པ་བཏོན་ཡོད།
གསར་གཏོད་ལ་སྐུལ་འདེད་གཏོང་བའི་ཐད། གསར་གཏོད་མ་འཇོག་དང་དེའི་ཕན་འབྲས་ལ་དམིགས་ནས་དམིགས་ཚད་ཁག3བཏོན་ཡོད། དེའི་ནང་ཞིབ་འཇུག་གསར་སྤེལ་ཐད་མ་དངུལ་གཏོང་ཚད་འཕར་བའི་འཕེལ་ཕྱོགས་དང་ཁེ་ལས་ཀྱི་མ་དངུལ་གཏོང་བའི་ནུས་པར་བསམ་གཞིགས་གང་ལེགས་བྱས་ཏེ། སྤྱི་ཚོགས་ཡོངས་ཀྱི་ཞིབ་འཇུག་གསར་སྤེལ་གྱི་གྲོན་དངུལ་གཏོང་ཚད་ཆ་སྙོམས་ལོ་རེར7%ཡན་སྤོར་བ་དེ་ལོ་ལྔ་ཚན་གྱི་འཆར་འགོད་བཅུ་བཞི་པའི་དམིགས་ཚད་དང་གཅིག་མཐུན་ཡོང་བ་བྱས་ནས་ཞིབ་འཇུག་གསར་སྤེལ་གྱི་མ་དངུལ་གཏོང་ཚད་ཉུང་དུ་མི་འགྲོ་བའི་འགན་ལེན་བྱ་དགོས་པ་བཏོན་ཡོད།
དམངས་འཚོའི་བདེ་རྩའི་ཐད། མི་དམངས་མང་ཚོགས་ཀྱི་ཁ་ཚ་དགོས་གཏུགས་དང་། དཀའ་ངལ་ཆེ་བ། སེམས་ཁྲལ་ཆེ་བ། རེ་སྒུག་ཆེ་བ་བཅས་ཀྱི་གནད་དོན་དེ་བས་ལེགས་པའི་སྒོ་ནས་ཐག་གཅོད་བྱ་ཆེད། དམིགས་སའི་རང་བཞིན་ལྡན་པའི་སྒོ་ནས་ལས་ཞུགས་དང་། ཡོང་འབབ། སློབ་གསོ། སྨན་བཅོས། བདེ་ཐང་། དེ་བཞིན“རྒན་བྱིས་གཉིས”སོགས་ཀྱི་དམིགས་ཚད་ཁག7བཏོན་ཡོད།
སྦགས་མེད་ཐཱན་ཉུང་ཐད། ཐཱན་ཉུང་གཏོང་དང་སྦགས་བཙོག་ཉུང་གཏོང་དང་། འབྱུང་ཁམས་ཁོར་ཡུག་སྲུང་སྐྱོང་སོགས་ལ་དམིགས་ནས་དམིགས་ཚད་ཁག5བཏོན་ཡོད། དེའི་ནང་རྒྱལ་ཁབ་ཀྱི་རང་བརྟེན་ལེགས་སྐྱེས་འབུལ་བའི་དམིགས་ཚད་གཞིར་བཟུང་། རྒྱལ་ནང་གི་ཐོན་སྐྱེད་སྤྱིའི་རིན་ཐང་གི་སྡེ་ཚན་རེའི་དབྱང་གཉིས་ཐཱན་འགྱུར་འབུད་ཚད་རིམ་རྩིས་བྱས་ན17%གཅོག་རྒྱུ་དང་། གཙོ་གནད་ཁྱབ་ཁོངས་ཀྱི་སྦགས་མེད་ཐཱན་ཉུང་རིགས་སྒྱུར་ལ་མུ་མཐུད་སྐུལ་འདེད་གཏོང་རྒྱུ་བཏོན་ཡོད།
བདེ་འཇགས་འགན་སྲུང་ཐད། འབྲུ་རིགས་དང་ནུས་རྒྱུའི་ཐོན་སྐྱེད་ནུས་པར་དམིགས་ནས་དམིགས་ཚད་ཁག་2བཏོན་ཡོད་ཅིང་། རྒྱལ་ཁབ་བདེ་འཇགས་ཀྱི་རྨང་གཞིའི་འགན་སྲུང་གལ་ཆེན་ནུས་ཤུགས་ཡོད་རྒུས་བརྟན་དུ་གཏོང་རྒྱུ་བཅས་ཡིན་པ་རེད།
འཐབ་ཇུས་ཀྱི་ལས་འགན་གལ་ཆེན།
《རྩ་གནད(འཆར་ཟིན)》ཁྲོད་ཁྱབ་ཁོངས་དབྱེ་ནས་ལོ་ལྔ་ཚན་གྱི་འཆར་འགོད་བཅོ་ལྔ་པའི་གོང་འཕེལ་གྱི་འཐབ་ཇུས་གལ་ཆེན་ལ་རྒྱས་བཤད་བྱས་ཏེ་ཕྱོགས་བཞི་འབུར་དུ་ཐོན་པར་བྱེད་པ།
སྤུས་མཐོའི་གོང་འཕེལ་ལ་སྐུལ་འདེད་གཏོང་རྒྱུ་དེ་འབུར་དུ་ཐོན་པར་བྱེད་པ།
སྤུས་གསར་ཐོན་སྐྱེད་ནུས་ཤུགས་གོང་འཕེལ་གཏོང་རྒྱུ་ནི་སྤུས་མཐོའི་གོང་འཕེལ་གྱི་ནང་གནས་བླང་བྱ་ཡིན།《རྩ་གནད(འཆར་ཟིན)》ཁྲོད་ཚན་རྩལ་གསར་གཏོད་ཀྱི་སྣེ་ཁྲིད་ནུས་པ་ནན་བཤད་བྱས་ཤིང་། དངོས་ཚན་དཔལ་འབྱོར་གྱི་རྨང་གཞི་སྲ་བརྟན་དང་སྟོབས་ཆེར་གཏོང་བར་དམིགས་ནས། སྔོན་ཐོན་བཟོ་སྐྲུན་ལས་རིགས་རྐང་འཛིན་བྱེད་པའི་དེང་རབས་ཅན་གྱི་ཐོན་ལས་མ་ལག་བསྐྲུན་དགོས། ཆུ་ཚད་མཐོ་བའི་ཚན་རྩལ་རང་ཚུགས་རང་སྟོབས་རང་སྤེལ་ལ་དམིགས་ཏེ། ཐོག་མའི་གསར་གཏོད་དང་འགག་རྩའི་ལྟེ་བའི་ལག་རྩལ་གྱི་འགག་སྒྲོལ་ལ་ཤུགས་སྣོན་བརྒྱབ་ཐོག གྲངས་འཛིན་ཀྲུང་གོ་འཛུགས་སྐྲུན་ལ་སྐུལ་འདེད་གཏིང་ཟབ་གཏོང་བ་དང་། གྲངས་འཛིན་དཔལ་འབྱོར་གྱི་ལྟེ་བའི་ཐོན་ལས་ཀྱི་འཕར་ཐང་གིས་རྒྱལ་ནང་ཐོན་སྐྱེད་སྤྱིའི་རིན་ཐང་ནང་བཟུང་བའི་བསྡུར་ཚད12.5%ཟིན་ཡོད། མཛེས་སྡུག་ལྡན་པའི་ཀྲུང་གོ་འཛུགས་སྐྲུན་བྱེད་པར་དམིགས་པ་དང་། རྒྱུན་མཐུད་ངང་སྦགས་བཙོག་འགོག་བཅོས་འགག་སྒྲོལ་དང་འབྱུང་ཁམས་མ་ལག་ལེགས་འགྱུར་ལ་སྐུལ་འདེད་གཏིང་ཟབ་བཏང་སྟེ། སྦགས་མེད་ཀྱི་ཐོན་སྐྱེད་དང་འཚོ་བ་སྐྱེལ་སྟངས་མགྱོགས་མྱུར་ཆགས་པར་བྱས་ནས་ཐཱན་རྩེ་གྲངས་ལ་སླེབས་པའི་དམིགས་འབེན་དུས་བཀག་ལྟར་མངོན་འགྱུར་ཡོང་བ་བྱེད་པར་འགན་ལེན་བྱ་དགོས།
རྒྱལ་ནང་གི་འཁོར་རྒྱུག་ཆེན་པོ་སྟོབས་ཆེར་གཏོང་རྒྱུ་དེ་འབུར་དུ་ཐོན་པར་བྱེད་པ།
ཕྱི་རོལ་གྱི་ཁོར་ཡུག་རྙོག་འཛིང་ཆེ་ཞིང་ཛ་དྲག་པའི་གནས་ཚུལ་འོག ནང་མཁོ་རྒྱ་སྐྱེད་གཏོང་བའི་འཐབ་ཇུས་ཀྱི་གཞི་གནས་འདི་ངེས་པར་དུ་མཐའ་འཁྱོངས་བྱ་དགོས། 《རྩ་གནད(འཆར་ཟིན)》ཁྲོད་རྒྱལ་ནང་འཁོར་རྒྱུག་ཆེན་པོའི་ནང་གནས་ཀྱི་སྒུལ་ཤུགས་དང་བློས་འགེལ་ཆོག་པའི་རང་བཞིན་ཆེ་རུ་གཏོང་རྒྱུར་དམིགས་ནས། དམངས་འཚོར་ཕན་འདོགས་པ་དང་འཛད་སྤྱོད་ལ་སྐུལ་འདེད། དངོས་པོར་མ་འཇོག་དང་ཤེས་ལྡན་མི་སྣར་མ་འཇོག་བཅས་ཟུང་འབྲེལ་དམ་ཟབ་བྱ་རྒྱུ་མཐའ་འཁྱོངས་བྱས་ཏེ་འཛད་སྤྱོད་ཆེར་སྐྱེད་ལ་རྒྱབ་སྐྱོར་བྱས་ནས། གྲོང་མིའི་འཛད་སྤྱོད་བྱེད་ཚད་མངོན་གསལ་དོད་པོས་མཐོ་རུ་གཏོང་རྒྱུར་སྐུལ་འདེད་དང་ཕན་ནུས་ལྡན་པའི་མ་འཇོག་རྒྱ་ཆེར་གཏོང་བ་བཅས་བྱ་དགོས། རང་རྒྱལ་གྱི་གཞི་ཁྱོན་ཧ་ཅང་ཆེ་བའི་ཁྲོམ་རའི་ཁེ་སྤོགས་གང་ལེགས་འདོན་སྤེལ་བྱེད་པར་དམིགས་ནས། རྒྱལ་ཡོངས་ཀྱི་གཅིག་གྱུར་ཁྲོམ་ར་ཆེན་པོ་འཛུགས་སྐྲུན་བྱེད་པར་སྐུལ་འདེད་གཏིང་ཟབ་གཏོང་བ་དང་། ས་གནས་སྲུང་སྐྱོང་དང་ཁྲོམ་ར་ལོགས་དབྱེའི་རིགས་མེད་པར་བཟོ་དགོས། སྤུས་མཐོའི་གོང་འཕེལ་གྱི་སྒུལ་ཤུགས་ཆེ་རུ་གཏོང་རྒྱུར་དམིགས་ནས། རིགས་ཁག་གི་གཉེར་སྐྱོང་བྱེད་པོའི་གསོན་ཤུགས་གང་ལེགས་འཕེལ་བར་བྱས་ཏེ་རྒྱུ་རྐྱེན་གཙོ་བོ་ཁྲོམ་ར་ཅན་དུ་འགྱུར་བའི་བཀོད་སྒྲིག་སྒྲིག་སྲོལ་དང་ལམ་སྲོལ་མགྱོགས་མྱུར་འཐུས་སྒོ་ཚང་དུ་གཏོང་དགོས། རྒྱལ་ནང་དང་རྒྱལ་སྤྱིའི་འཁོར་རྒྱུག་གཉིས་ཤར་གཏོང་ཐུབ་རྒྱུར་དམིགས་ནས། གོ་ལ་ཧྲིལ་པོའི་རྒྱུ་རྐྱེན་གཙོ་བོ་དང་ཁྲོམ་རའི་ཐོན་ཁུངས་ལ་གཅིག་གྱུར་གྱིས་འཆར་འགོད་དང་བེད་སྤྱོད་ཡག་པོ་བྱ་དགོས།
མི་དམངས་ཡོངས་ཀྱི་ཐུན་མོང་ཕྱུག་འགྱུར་ལ་སྐུལ་འདེད་གཏོང་རྒྱུ་དེ་འབུར་དུ་ཐོན་པར་བྱེད་པ།
ཀྲུང་གོའི་རྣམ་པའི་དེང་རབས་ཅན་ནི་མི་དམངས་ཡོངས་ཐུན་མོང་ཕྱུག་འགྱུར་གྱི་དེང་རབས་ཅན་ཡིན། 《རྩ་གནད(འཆར་ཟིན)》ཁྲོད་བུ་བཙའ་མཛའ་མཐུན་ཅན་གྱི་སྤྱི་ཚོགས་འཛུགས་སྐྱོང་བྱ་རྒྱུར་དམིགས་ནས་མི་འབོར་གྱི་ཞབས་ཞུའི་མ་ལག་འཐུས་སྒོ་ཚང་དུ་གཏོང་རྒྱུ་དང་། མི་དམངས་ཀྱི་བློ་ཡིད་ཚིམ་པའི་སློབ་གསོ་ལེགས་པར་གཉེར་ནས་ངལ་རྩོལ་ལོ་ཚད་དང་མི་འབོར་ལ་ཆ་སྙོམས་སུ་སློབ་གསོ་ཐོབ་པའི་ལོ་ཚད་ལོ11.7བར་མཐོ་རུ་གཏོང་རྒྱུ། བདེ་ཐང་གི་ཀྲུང་གོ་དང་ལུས་རྩལ་རྒྱལ་ཁབ་སྟོབས་ཆེན་འཛུགས་སྐྲུན་གང་མགྱོགས་བྱས་ནས་མི་རེའི་ཆ་སྙོམས་ཀྱི་སྔོན་དཔག་ཚེ་ཚད་ལོ80བར་མཐོ་རུ་གཏོང་རྒྱུ། མི་འབོར་རྒན་རྒོན་ཅན་དུ་འགྱུར་བར་ཁ་གཏད་གང་ལེགས་བཅག་ནས་རྒན་གསོ་ལས་ཁུངས་ཀྱི་ནད་གཡོག་རྣམ་པའི་ཉལ་ཁྲིའི་བསྡུར་ཚད73%བར་མཐོ་རུ་གཏོང་རྒྱུ། སྤུས་ཚད་མཐོ་བའི་ལས་ཞུགས་གང་ལེགས་ཡོང་བར་སྐུལ་འདེད་དང་། ཡོང་འབབ་བགོ་བཤའི་ལམ་ལུགས་འཐུས་ཚང་། སྤྱི་ཚོགས་འགན་སྲུང་མ་ལག་འཐུས་ཚང་བཅས་སུ་གཏོང་དགོས། ས་ཁོངས་ཀྱི་ཧེ་བག་དང་གྲོང་ཁྱེར་དང་གྲོང་གསེབ་ཀྱི་ཧེ་བག་ཆུང་དུ་གཏོང་རྒྱུར་དམིགས་ནས་ཞིང་ལས་དང་གྲོང་གསེབ་དེང་རབས་ཅན་དུ་འགྱུར་མགྱོགས་སུ་གཏོང་བ་དང་དབུལ་སྒྲོལ་འགག་གཏོར་གྱི་གྲུབ་འབྲས་རྒྱུན་མཐུད་སྲ་བརྟན་དང་རྒྱ་ཆེར་གཏོང་བ་དང་། ཐོན་སྐྱེད་ནུས་ཤུགས་ཀྱི་བཀོད་པ་གལ་ཆེན་ལེགས་སུ་བཏང་ནས་མི་རྩ་བར་འཛིན་པའི་གྲོང་ཁྱེར་དང་གྲོང་རྡལ་ཅན་གསར་པར་སྐུལ་འདེད་གཏིང་ཟབ་གཏོང་དགོས། མི་དམངས་ཀྱི་བསམ་པའི་འཚོ་བ་ཐུན་མོང་ཐོག་ཕྱུག་པོར་འགྱུར་བར་སྐུལ་འདེད་གཏོང་བར་དམིགས་ནས་སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་དར་སྤེལ་དང་ལག་ལེན་བསྟར་བ་དང་། རིག་གནས་བྱ་གཞག་དར་རྒྱས་ཤུགས་ཆེན་གཏོང་བ་དང་རིག་གནས་ཐོན་ལས་གོང་འཕེལ་མགྱོགས་སུ་གཏོང་བ། ཀྲུང་ཧྭའི་ཤེས་རིག་ཁྱབ་སྤེལ་ནུས་པ་དང་ཤུགས་རྐྱེན་ཐེབས་ཤུགས་ཆེ་རུ་གཏོང་བ་བཅས་བྱ་དགོས།
གོང་འཕེལ་དང་བདེ་འཇགས་ལ་གཅིག་གྱུར་འཆར་འགོད་བྱ་རྒྱུ་དེ་འབུར་དུ་ཐོན་པར་བྱེད་པ།
བདེ་འཇགས་ནི་གོང་འཕེལ་གྱི་སྔོན་འགྲོའི་ཆ་རྐྱེན་དང་། གོང་འཕེལ་ནི་བདེ་འཇགས་ཀྱི་འགན་སྲུང་ཡིན།《རྩ་གནད(འཆར་ཟིན)》ཁྲོད་སྤྱི་ཡོངས་ཀྱི་རྒྱལ་ཁབ་བདེ་འཇགས་ལྟ་བ་ལག་ལེན་བསྟར་བ་དང་། རྒྱལ་སྤྱིའི་བདེ་འཇགས་མ་ལག་དང་ནུས་པ་དེང་རབས་ཅན་དུ་འགྱུར་བར་བྱེད་ཐབས་མང་པོ་བཏོན་ཡོད། འབྲུ་རིགས་དང་ནུས་རྒྱུའི་ཐོན་ཁུངས་སོགས་མཁོ་སྤྲོད་འགན་སྲུང་བྱེད་ནུས་ཆེ་རུ་བཏང་སྟེ་འབྲུ་རིགས་ཀྱི་ཕྱོགས་བསྡུས་ཐོན་སྐྱེད་ནུས་ཤུགས་རྒྱ་མ་དུང་ཕྱུར་ཁྲི1.45ཡས་མས་ཟིན་པ་དང་། ནུས་ཁུངས་ཀྱི་ཕྱོགས་བསྡུས་ཐོན་སྐྱེད་ནུས་ཤུགས་ཚད་ལྡན་རྡོ་སོལ་ཏུན་དུང་ཕྱུར58ཟིན་པ། ས་ཁང་བདག་ཁོངས་དང་ས་གནས་སྲིད་གཞུང་གི་བུ་ལོན། ས་གནས་ཀྱི་དངུལ་རྩའི་ལས་ཁུངས་འབྲིང་ཆུང་སོགས་ཀྱི་ཉེན་ཁ་གོ་རིམ་ལྡན་པའི་སྒོ་ནས་སེལ་བར་གཅིག་གྱུར་འཆར་འགོད་བྱ་དགོས། སྤྱི་པའི་བདེ་འཇགས་བཅོས་སྐྱོང་གི་ཆུ་ཚད་མཐོར་འདེགས་དང་སྤྱི་ཚོགས་ཀྱི་བདེ་འཇགས་བརྟན་ལྷིང་ལ་ནུས་ལྡན་ངང་སྲུང་སྐྱོང་བྱ་དགོས།
ལས་གྲྭའི་རྣམ་གྲངས་གལ་ཆེན།
ལོ་ལྔ་ཚན་གྱི་འཆར་འགོད་བཅོ་ལྔ་པའི་དམིགས་འབེན་ལས་འགན་དོན་ཐོག་ཏུ་འཁྱོལ་རྒྱུར་སྐུལ་འདེད་གཏོང་བར་དམིགས་ནས། འཐབ་ཇུས་ཀྱི་རང་བཞིན་དང་། སྣེ་ཁྲིད་རང་བཞིན། རྒྱུན་མཐུད་རང་བཞིན་བཅས་ལ་གཅིག་གྱུར་འཆར་འགོད་ཀྱིས་བསམ་གཞིགས་བྱས་ཏེ། 《རྩ་གནད་(འཆར་ཟིན)》ནང་ཕྱོགས6ཐད་ཀྱི་ལས་གྲྭའི་རྣམ་གྲངས་གལ་ཆེན109བཏོན་ཡོད་པ་སྟེ།
སྤུས་གསར་ཐོན་སྐྱེད་ནུས་ཤུགས་གོང་འཕེལ་ལ་སྣེ་ཁྲིད་བྱེད་པའི་ཐད། ཐོན་ལས་ཀྱི་རྨང་གཞིའི་ནུས་པ་དང་འགྲན་རྩོད་ནུས་པ་ཆེ་རུ་གཏོང་རྒྱུ་དང་། ཐོན་ལས་གསར་པ་དང་འགྲན་ལམ་གསར་པ་གསོ་སྐྱོང་དང་གོང་འཕེལ་གཏོང་རྒྱུ། མདུན་གྲལ་གྱི་ཚན་རྩལ་འགག་གནད་སྒྲོལ་བ། གསར་གཏོད་ཀྱི་རྨང་གཞིའི་ནུས་པ་ཆེ་རུ་གཏོང་རྒྱུ་བཅས་ལ་དམིགས་ནས་རྣམ་གྲངས28བཏོན་ཡོད།
དེང་རབས་ཅན་གྱི་རྨང་གཞིའི་སྒྲིག་བཀོད་མ་ལག་འཛུགས་སྐྱོང་ཐད། རྒྱལ་ཁབ་ཀྱི་ཕྱོགས་བསྡུས་ལངས་གཟུགས་འགྲིམ་འགྲུལ་དྲ་བ་དང་། ནུས་རྒྱུའི་མ་ལག་གསར་པ། རྨང་གཞིའི་སྒྲིག་བཀོད་གསར་པ། ཕྱི་ཕྱོགས་ལ་སྒོ་དབྱེའི་ལས་སྟེགས་སོགས་ལ་དམིགས་ཏེ་རྣམ་གྲངས་23བཏོན་ཡོད།
གྲོང་ཁྱེར་དང་གྲོང་གསེབ་མཉམ་འདྲེས་གོང་འཕེལ་ལ་སྐུལ་འདེད་གཏོང་བའི་ཐད། གྲོང་ཁྱེར་དང་གྲོང་རྡལ་ཅན་གསར་པ་འཛུགས་སྐྲུན་དང་། ཞིང་ལས་དང་གྲོང་གསེབ་དེང་རབས་ཅན་གྱི་འཛུགས་སྐྲུན་ལ་དམིགས་ནས་རྣམ་གྲངས་9བཏོན་ཡོད།
དམངས་འཚོ་འགན་ལེན་དང་ལེགས་སུ་གཏོང་བའི་ཐད། སྤྱི་ཚོགས་རིང་ལུགས་ཀྱི་རིག་གནས་དར་རྒྱས་གོང་འཕེལ་དང་། སྤུས་ཚད་མཐོ་བའི་སློབ་གསོའི་མ་ལག་འཛུགས་སྐྱོང་། བདེ་ཐང་ཀྲུང་གོ་འཛུགས་སྐྲུན། “རྒན་བྱིས་གཉིས”ཀྱི་ཞབས་ཞུ་ལེགས་འགྱུར། སྤྱི་ཚོགས་ཀྱི་གཅེས་སྐྱོང་ཞབས་ཞུ་བཅས་ལ་དམིགས་ནས་རྣམ་གྲངས25བཏོན་ཡོད།
སྦགས་མེད་ཐཱན་ཉུང་རིགས་སྒྱུར་ལ་སྐུལ་འདེད་གཏོང་བའི་ཐད། ཐཱན་རྩེ་གྲངས་དང་ཐཱན་བཏང་སྙོམས། ཁོར་ཡུག་སྤུས་ཚད་མཐོར་གཏོང་། འབྱུང་ཁམས་སྲུང་སྐྱོང་ཉམས་གསོ་བཅས་ལ་དམིགས་ནས་རྣམ་གྲངས18བཏོན་ཡོད། གཙོ་གནད་ཁྱབ་ཁོངས་ཀྱི་བདེ་འཇགས་འགན་ལེན་ཐད། འབྲུ་རིགས་དང་ནུས་རྒྱུ་བདེ་འཇགས་སོགས་ལ་དམིགས་ནས་རྣམ་གྲངས6བཏོན་ཡོད་པ་རེད།
ལས་གྲྭ་གལ་ཆེན་འདི་དག་གིས་མིག་སྔ་དང་ཕུགས་གཉིས་ལ་ཀུན་སྙོམས་ལྟ་རྟོག་བྱེད་པ་སྟེ། སྒྲིག་ཆས་སྒྲིག་བཀོད་ཀྱི་མ་འཇོག་དང་འབྲེལ་བ་ཡོད་ལ་ལམ་སྲོལ་ནང་རྐྱེན་འཛུགས་སྐྱོང་ཡང་ཚུད་ཡོད། ང་ཚོས་སྲིད་གཞུང་གི་མ་འཇོག་ལ་བརྟེན་ནས་སྤྱི་ཚོགས་སྟོབས་ཤུགས་དེའི་ནང་ཞུགས་པར་སྐུལ་ཁྲིད་བྱ་རྒྱུར་བརྩི་མཐོང་བྱས་ཏེ། གཙོ་གནད་ལས་གྲྭའི་རྣམ་གྲངས་ཀྱི་རྨང་གཞི་བརྟན་གཏོང་དང་། ཞན་ཆ་ཁ་གསབ། གཏིང་ཤུགས་ཆེར་སྐྱེད་སོགས་ཀྱི་ནུས་པ་གལ་ཆེན་འདོན་སྤེལ་སྔར་བས་ལེགས་པ་བྱ་རྒྱུ་རེད།
