(རྒྱལ་ཡོངས་ཀྱི་ཚོགས་ཆེན་གཉིས་སུ།) ཀྲེང་ཀུང་ཁྲེང་གིས། སྟབས་སྟུན་ལས་རིགས་ཀྱི་ལས་བཞུགས་པའི་ཡོང་འབབ་ཚད་གཞི་མཐོ་རུ་གཏོང་དགོས་པའི་གྲོས་འཆར་བཏོན།

རྒྱལ་ཡོངས་མི་དམངས་འཐུས་མི་ཚོགས་ཆེན་གྱི་འཐུས་མི་དང་། ཀྲུང་གོ་སྤྱི་ཚོགས་འགན་སྲུང་སློབ་ཚོགས་ཀྱི་ཚོགས་གཙོ་ཀྲེང་ཀུང་ཁྲེང་གིས་རྒྱལ་ཡོངས་ཀྱི་ཚོགས་ཆེན་གཉིས་པོའི་ཐོག་གསར་འགོད་པའི་བཅར་འདྲི་དང་ལེན་བྱེད་སྐབས། "སྟབས་སྟུན་ལས་རིགས་ཀྱི་ལས་བཞུགས་པའི་ངོས་ནས་མཚོན་ན། ཁོ་ཚོའི་ངལ་རྩོལ་གྱི་ཡོང་འབབ་ཚད་གཞི་མཐོ་རུ་གཏོང་རྒྱུར་གཙོ་གནད་དུ་བསམ་བློ་གཏོང་དགོས་པ་དང་། ཆུ་ཚོད་རེའི་ངལ་རྩོལ་གྱི་གླ་ཆ་གཏན་འཁེལ་ལམ་ལུགས་ལག་བསྟར་བྱེད་དགོས་"ཞེས་ནན་བཤད་བྱས།

རྒྱལ་ཡོངས་སྤྱི་ཁྱབ་བཟོ་ཚོགས་ནས་ཐོན་པའི་གཞི་གྲངས་ལ་གཞིགས་ན། ཀྲུང་གོའི་ལས་ཞུགས་རྣམ་པ་གསར་པའི་ངལ་རྩོལ་པ་ཁྲི་8400ཟིན་ཡོད། ཁྲོམ་གཞུང་དང་གསང་ལམ་དུ་རྒྱུ་བའི་ཟ་མ་སྐྱེལ་མཁན་དང་། མྱུར་སྐྱེལ་མི་སྣ། དྲ་སྤྱོད་རླངས་འཁོར་བརྡལ་གླ་རྒྱུགས་མཁན་སོགས་ནི་སྤྱི་ཚོགས་འཁོར་སྐྱོད་བྱེད་པར་མེད་དུ་མི་རུང་བའི་ཆ་ཤས་ཤིག་ཡིན་པ་དང་། དུས་མཚུངས་སུ་མི་ཚོགས་འདིའི་སྤྱི་ཚོགས་འགན་བཅོལ་གྱི་དངུལ་སྤྲོད་པ་སོགས་ཀྱི་ཁྲིམས་མཐུན་ཁེ་དབང་སྲུང་སྐྱོབ་ཀྱི་གནད་དོན་དེ་ཡང་དམངས་འཚོའི་ཐད་ཀྱི་ "གནད་འགག་" ཅིག་ཏུ་གྱུར་ཡོད།

བཅར་འདྲི་བྱེད་སྐབས། ཁོང་གིས་གསར་འགོད་པར་གསུངས་དོན། ད་ཆ། དྲ་ཐོག་ནས་ཟ་མ་སྐྱེལ་མཁན་དང་། དྲ་ཐོག་ནས་རླངས་འཁོར་བརྡལ་གླ་རྒྱུགས་མཁན་སོགས་ཀྱི་ངལ་རྩོལ་པའི་གྲངས་འབོར་ཧ་ཅང་ཆེ་བ་དང་། ལས་ཀར་ཞུགས་མཁན་འདི་དག་གི་ལས་ཀའི་རང་བདག་རང་དབང་ཆེ་ནའང་། ལས་ཞུགས་ཀྱི་ངལ་རྩོལ་སྲུང་སྐྱོབ་ཀྱི་ཁྲིམས་ལུགས་ཁྲིམས་སྲོལ་གྱིས་ཚད་བཀག་མི་ཐུབ་པ་དང་། སྟེགས་བུའི་དོ་དམ་འོག་ཡོད་པས། ངལ་རྩོལ་འབྲེལ་བ་ངོས་འཛིན་བྱ་རྒྱུ་དཀའ་ལ། དེའི་རྐྱེན་གྱིས་སྲོལ་རྒྱུན་གྱི་སྤྱི་ཚོགས་འགན་བཅོལ་ལམ་ལུགས་ཀྱིས་ཁེབས་རྒྱ་ཡོངས་སུ་ཁྱབ་ཐུབ་ཀྱི་མེད།

དེ་མིན་གཞན་ཡང་། སྟབས་སྟུན་ལས་རིགས་ཀྱི་ལས་བཞུགས་མི་སྣ་ཁ་ཤས་ཀྱི་ཡོང་འབབ་བརྟན་པོ་མེད་པ་དང་། དངུལ་སྤྲོད་པའི་རྨང་གཞིའི་གྲངས་ཀ་མཐོ་དྲགས་པས། སྤྱི་ཚོགས་ཀྱི་འགན་བཅོལ་མུ་མཐུད་སྤྲོད་རྒྱུར་འགན་ལེན་བྱེད་དཀའ། ལས་ཤོར་འགན་བཅོལ་ཡང་ "ཁེབས་རྒྱ་མི་འཚམ་པའི" གནད་དོན་དང་འཕྲད་ཀྱིན་ཡོད་པ་རེད། ད་ཆ་ལས་ཤོར་འགན་བཅོལ་ནང་ཞུགས་མཁན་ཕལ་ཆེ་བ་ནི་བརྟན་ལྷིང་གི་ལས་ཞུགས་པ་ཡིན་པ་ལས། སྟབས་སྟུན་ལས་རིགས་ཀྱི་ལས་བཞུགས་མི་སྣ་ནི་དེ་ལས་ལྡོག་སྟེ་འགན་བཅོལ་ནང་ཞུགས་རྒྱུ་དཀའ་བ་རེད།

"ད་ཆ། ལམ་ལུགས་ཀྱི་འགོག་རྐྱེན་སེལ་བ་དང་། མི་ཚོགས་ཀྱི་ཞན་ཆ་སྐོང་བ། དངུལ་སྤྲོད་རིམ་པའི་སྒྲིག་བཀོད་ལེགས་སྒྱུར། འཕར་ཆག་ལྡན་པའི་དངུལ་སྤྲོད་ལམ་ལུགས་འཛུགས་པ། ཡོང་འབབ་ཀྱི་འགྱུར་ལྡོག་ལ་གཞིགས་ནས་རང་འགུལ་གྱིས་དངུལ་སྤྲོད་ཆོག་པ་བཅས་བྱེད་དགོས། " ཀྲེང་ཀུང་ཁྲེང་གི་ལྟ་ཚུལ་ལྟར་ན། "ལོ་ལྔ་ཚན་བཅོ་ལྔ་པའི་འཆར་གཞིའི་" སྐབས་སུ། ལས་ཞུགས་རྣམ་པ་གསར་པར་འགན་སྲུང་ལམ་ལུགས་འཚམ་པོར་འཛུགས་དགོས་པ་དང་། སྟབས་སྟུན་ལས་རིགས་ཀྱི་ལས་བཞུགས་མི་སྣ་ལས་ཀར་ཞུགས་གནས་སུ་འགན་བཅོལ་ནང་ཞུགས་རྒྱུའི་ཐེམ་ཐོའི་ཚད་བཀག་མེད་པར་བཟོ་དགོས་པ། ལས་རིགས་ཀྱི་རྨས་སྐྱོན་འགན་སྲུང་ཚོད་ལྟ་བྱེད་སའི་ཁྱབ་ཁོངས་རྒྱལ་ཡོངས་སུ་རྒྱ་བསྐྱེད་དགོས་པ། ལས་ཞུགས་རྣམ་པ་གསར་པའི་མི་སྣ་མང་ཙམ་འགན་སྲུང་གི་ཁྱབ་ཁོངས་ནང་འཇུག་དགོས།

ཁོང་གིས་གསར་འགོད་པར་ནན་བཤད་བྱས་དོན། "ལོ་ལྔ་ཚན་བཅོ་ལྔ་པའི་འཆར་གཞིའི་" དུས་སྐབས་ཀྱི་འགན་བཅོལ་ཁྱབ་ཁོངས་རྒྱ་སྐྱེད་པ་ནི་སྤྱིར་བཏང་གི་མི་གྲངས་སྣོན་པ་ཙམ་མིན་པར། གཙོ་གནད་མི་ཚོགས་ལ་དམིགས་པ་དང་། འགན་བཅོལ་ནང་ཞུགས་པའི་འགོག་རྐྱེན་སེལ་རྒྱུ་དེ་ཡིན།

ཀྲེང་ཀུང་ཁྲེང་གིས་བཤད་དོན། ད་ལྟའི་ཆར། སྟབས་སྟུན་ལས་རིགས་ཀྱི་ལས་བཞུགས་མི་སྣ་དང་། ཞིང་པ་ལས་མི། ལས་ཞུགས་རྣམ་པ་གསར་པའི་མི་སྣ་བཅས་ལ་སྤྱི་ཚོགས་འགན་བཅོལ་གྱི་ཁེ་དབང་འདྲ་མཉམ་ངང་ལོངས་སྤྱོད་བྱེད་དུ་འཇུག་དགོས་ཤིང་། དེ་ནི་རྒྱལ་ཡོངས་ཀྱི་ཚོང་རའི་གཅིག་གྱུར་ཆེན་པོ་བསྐྲུན་པ་དང་། ངལ་རྩོལ་ནུས་ཤུགས་རང་དགར་རྒྱུག་པར་རྒྱབ་སྐྱོར་མཁོ་འདོན་བྱ་རྒྱུ་དེ་ཡིན། དེ་དང་ཆབས་ཅིག་སྤྱི་ཚོགས་འགན་བཅོལ་གྱི་ཁེབས་རྒྱ་རྒྱ་ཆེར་བཏང་ན། དངུལ་སྤྲོད་པའི་རྨང་གཞིའི་གྲངས་ཀ་ཕུན་སུམ་ཚོགས་སུ་གཏོང་བ་དང་། ཐེབས་རྩའི་སྒྲིག་གཞི་ལེགས་སྒྱུར་བྱེད་ཐུབ།

ངལ་རྩོལ་གྱི་ཡོང་བབས་གནད་དོན་ཐད་ལ། ཁོང་གིས་སྟབས་སྟུན་ལས་རིགས་ཀྱི་ལས་བཞུགས་མི་སྣ་སོགས་ཀྱི་མང་ཚོགས་ལ་མཚོན་ན། ངལ་རྩོལ་ཡོང་བབས་ཀྱི་ཚད་གཞི་མཐོ་རུ་གཏོང་རྒྱུར་གཙོ་གནད་དུ་བསམ་བློ་གཏོང་དགོས་པ་དང་། ཆུ་ཚོད་རེའི་ངལ་རྩོལ་གྱི་གླ་ཆ་གཏན་འཁེལ་བའི་ལམ་ལུགས་ལག་བསྟར་བྱེད་དགོས་པའི་ལྟ་ཚུལ་བཏོན།

"ངལ་རྩོལ་གྱི་ཡོང་བབས་མཛུབ་སྟོན་རེའུ་མིག་བཟོ་རྒྱུའི་རེ་བ་ཡོད་དཔེར་ན། ཟ་མ་སྐྱེལ་མཁན་དང་མྱུར་སྐྱེལ་མི་སྣ་ལྟ་བུའི་ངལ་རྩོལ་པའི་ཆུ་ཚོད་རེའི་གླ་ཆར་མཛུབ་སྟོན་གྱི་རིན་གོང་ཡོད་པ་དང་། སྲིད་གཞུང་གིས་ཐེ་ཇུས་འཚམ་པོར་བྱས་ཏེ། མ་རྩ་དང་། ངལ་རྩོལ་པ། འཛད་སྤྱོད་པ་བཅས་ཀྱི་འབྲེལ་བ་དོ་མཉམ་ཡོང་བར་བྱེད་དགོས། དེ་དང་མཉམ་དུ་སྟབས་སྟུན་ལས་རིགས་ཀྱི་ལས་བཞུགས་མི་སྣ་མང་ཙམ་ངལ་རྩོལ་ལྟ་ཞིབ་ཀྱི་ཁྱབ་ཁོངས་ནང་འཇུག་དགོས་"ཞེས་བཤད།