མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཚེས5ཉིན་གྱི་སྔ་དྲོ་རྒྱལ་ཡོངས་དམངས་འཐུས་ཚོགས་ཆེན་སྐབས་བཅུ་བཞི་པའི་ཚོགས་འདུ་ཐེངས་བཞི་པ་མི་དམངས་ཚོགས་ཁང་ཆེན་མོར་མགོ་ཚུགས་པ་དང་ཞི་ཅིན་ཕིང་སོགས་ཏང་དང་རྒྱལ་ཁབ་ཀྱི་མགོ་ཁྲིད་རྣམས་མགོ་ཚུགས་ཚོགས་འདུར་ཞུགས་པ་དང་། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་གིས་ཚོགས་ཐོག་ཏུ་སྲིད་གཞུང་གི་བྱ་བའི་སྙན་ཞུ་ཕུལ། །
སྲིད་གཞུང་བྱ་བའི་སྙན་ཞུའི་ནང2026ལོའི་སྲིད་གཞུང་བྱ་བའི་ལས་འགན་ངོ་སྤྲོད་བྱེད་སྐབས་འདི་སྐད།
གྲོང་ཁྱེར་དང་གྲོང་གསེབ་ཀྱི་གྲོང་མིའི་རྨང་གཞིའི་རྒན་གསོའི་དངུལ་གྱི་ཟླ་རེའི་ཚད་གཞི་དམའ་ཤོས་སླར་ཡང་སྒོར20ཇེ་མཐོར་གཏོང་དགོས་པ།
གཞི་རྩའི་རྒན་གསོའི་འགན་སྲུང་གི་རྒྱལ་ཡོངས་གཅིག་གྱུར་འཆར་འགོད་ལམ་ལུགས་འཐུས་ཚང་དུ་བཏང་ནས་ལག་བསྟར་དོན་འཁྱོལ་བྱེད་པ་དང་། ལས་ཤོར་དང་ལས་རྨས་འགན་སྲུང་གི་ཁྱབ་རྒྱ་ཆེ་རུ་གཏོང་བ། བརྟན་ཞིང་གོ་རིམ་ལྡན་པའི་སྒོ་ནས་ལས་རིགས་ཀྱི་གནོད་འཚེ་འགན་སྲུང་ཚོད་ལྟའི་ཁྱབ་ཁོངས་རྒྱ་བསྐྱེད་པར་སྐུལ་འདེད་གཏོང་བ། སྤྱི་ཚོགས་འགན་སྲུང་གི་འབྲེལ་བ་སྤོ་སྒྱུར་དང་རྒྱུན་མཐུད་བྱེད་པའི་སྲིད་ཇུས་འཐུས་ཚང་དུ་གཏོང་དགོས་པ།
མི་འབོར་རྒན་རྒོན་ཅན་དུ་འགྱུར་བར་ཁ་གཏད་ཧུར་ཐག་གཅོག་པའི་རྒྱལ་ཁབ་ཀྱི་འཐབ་ཇུས་ལག་བསྟར་གཏིང་ཟབ་བྱེད་པ་དང་། ཀུན་ཕན་རྒན་གསོའི་ཞབས་ཞུ་མཁོ་སྤྲོད་བྱེད་རྒྱ་ཆེ་རུ་གཏོང་བ། གྲོང་གསེབ་ཀྱི་རྒན་གསོའི་ཞབས་ཞུ་འཕེལ་རྒྱས་ཧུར་ཐག་གཏོང་བ། ནུས་ཤོར་འབྲིང་ཙམ་ཡན་གྱི་རྒན་རྒོན་གྱི་རྒན་གསོའི་ཞབས་ཞུའི་འཛད་སྤྱོད་ཁ་གསབ་རྣམ་གྲངས་ལག་བསྟར་བྱ་དགོས་པ།
རྒན་རྒོན་གྱི་མི་ཤུགས་ཐོན་ཁུངས་གསར་སྤེལ་ཧུར་ཐག་དང་། སྐྲ་དཀར་དཔལ་འབྱོར་སྤུས་ཚད་མཐོ་བའི་སྒོ་ནས་གོང་དུ་སྤེལ་བར་སྐུལ་འདེད་གཏོང་བའི་བྱེད་ཐབས་གཏན་འབེབས་བྱེད་དགོས་པ་དང་། རྒན་རྒོན་གྱི་མཁོ་ཆས་ཐོན་རྫས་དང་། རྒན་གསོའི་དངུལ་རྩ། ཡུལ་སྐོར་རྒན་གསོ་སོགས་ཀྱི་རྒྱབ་སྐྱོར་སྲིད་ཇུས་འཐུས་ཚང་དུ་གཏོང་དགོས་པ།
བདེ་ཐང་སླར་གསོའི་སྨན་ཞབས་ཀྱི་ཤོང་ཚད་ཆེ་རུ་གཏོང་བའི་ལས་གཞི་ལག་བསྟར་བྱ་དགོས་པ།
ཡུན་རིང་སྨན་ཞབས་ཀྱི་འགན་སྲུང་ལམ་ལུགས་ཁྱབ་སྤེལ་གཏོང་དགོས་པ།
ཁེར་སྡོད་རྒན་རྒོན་དང་ནུས་ཤོར་དང་རིག་པ་མི་གསལ་བ་སོགས་དཀའ་ངལ་ཡོད་པའི་ཚོགས་སྤྱིར་གཅེས་སྐྱོང་དང་རོགས་སྐྱོར་ཡག་པོ་བྱ་དགོས་པའི་བླང་བྱ་བཏོན་ནོ།
