མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཀྲུང་དབྱང་དང་ཞིང་ཆེན་ཏང་ཨུའི་ཞིང་གསུམ་བྱ་བའི་སྐོར་གྱི་ཇུས་ཆོད་བཀོད་སྒྲིག་སྣ་ཚོགས་ལག་བསྟར་དོན་འཁྱོལ་བྱེད་པ་དང་ཞིང་ཆེན་ཡོངས་ཀྱི་ལོ་ལྔའི་འཆར་འགོད་བཅོ་ལྔ་པའི་འགོ་བཟང་བོ་རྩོམ་པར་སྐུལ་འདེད་གཏོང་ཆེད། མཚོ་སྔོན་ཞིང་ཆེན་གྱི2026ལོའི་ལས་བྱེད་པ་ཁྲི་གཞི་རིམ་དུ་བསྐྱོད་པའི་བྱེད་སྒོ་ཟླ3པའི་ཚེས4ཉིན་དངོས་སུ་འགོ་བརྩམས། བྱེད་སྒོའི་དུས་ཡུན་ཟླ་གཅིག་ཡིན་པ་དང་། སྲིད་ཇུས་སྒྲོག་བཤད་དང་ཐོན་སྐྱེད་འཕེལ་རྒྱས། ལས་ཞུགས་འབབ་འཕར། གཞི་རིམ་གཏན་འཇགས་བཅས་ལས་འགན་གཙོ་བོར་བྱས་ཏེ་རྒྱ་ཆེའི་ལས་བྱེད་པ་རོང་འབྲོག་ཁུལ་གྱི་འཐབ་ཕྱོགས་དང་པོར་བསྐྱོད་པར་རྩ་འཛུགས་བྱས་ནས་གཞི་རིམ་དུ་སྲིད་ཇུས་ཀྱི་ཁེ་ཕན་ལོངས་སུ་སྤྱོད་དུ་འཇུག་པ་དང་ཞབས་ཞུའི་འགན་སྲུང་དོན་འཁྱོལ་ནན་མོ་བྱ་རྒྱུ་རེད།
བྱེད་སྒོའི་སྐབས་སུ། གཞི་རིམ་དུ་ཟབ་ཞུགས་བྱས་པའི་ལས་བྱེད་པས་མང་ཚོགས་ཀྱི་ལྟ་འདོད་ཉན་འདོད་ཀྱི་རྣམ་པ་བརྒྱུད་དེ་སྲིད་ཇུས་སྒྲོག་བཤད་བྱེད་པ་དང་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་དགོངས་པ་འགྲེལ་ཀློག་ཟབ་མོ་བྱེད་པ། ཀྲུང་དབྱང་དང་ཞིང་ཆེན་ཏང་ཨུའི་གྲོས་ཚོགས་གལ་ཆེན་དང་དེ་མིན་ཡིག་ཆ་དང་པོའི་དགོངས་དོན་བརྒྱུད་སྒྲོག་བྱས་ནས་ཞིང་སྟོབས་ཞིང་ཕན་ཞིང་ཕྱུག་གི་སྲིད་ཇུས་གཞི་རིམ་དུ་དྲིལ་སྒྲོག་བཟང་བོ་བྱ་རྒྱུ་ཡིན་པ་དང་། ཐོན་སྐྱེད་འཕེལ་རྒྱས་ལ་རོགས་འདེགས་བྱེད་པའི་ཐད་ནས་གཞི་རིམ་དུ་ཟབ་ཞུགས་བྱས་པའི་ལས་བྱེད་པས་དཔྱིད་འདེབས་གྲ་སྒྲིག་དང་ཕྱུགས་ལས་ཕྱུགས་སྲུང་སོགས་མིག་སྔར་གྱི་ལས་འགན་གལ་ཆེན་ལ་དམིགས་ནས་ཞིང་ལས་རྒྱུ་ཆ་མཁོ་སྤྲོད་དང་གནོད་འགོག་རིམས་འགོག་སོགས་དངོས་ཡོད་དཀའ་ཁག་མཐུན་སྦྱོར་སྒོས་ཐག་གཅོད་པ་དང་། འབྲུ་རིགས་བདེ་འཇགས་ཀྱི་ཚད་མཐའ་བརྟན་པོར་བསྲུང་ནས་ཚད་གཞི་མཐོ་བའི་ཞིང་ས་འཛུགས་སྐྲུན་སོགས་ལ་སྐུལ་འདེད་གཏོང་རྒྱུ་རེད། དེ་དང་མཉམ་དུ། གཞི་རིམ་དུ་ཁྱད་ལྡན་ཐོན་ལས་དང་ཞིང་ཁྱིམ་དཔལ་འབྱོར་སོགས་དམངས་ཕྱུག་ཐོན་ལས་འཕེལ་རྒྱས་གཏོང་བར་སྐུལ་ཁྲིད་བྱེད་པ་དང་། ཞིང་སྡེའི་མ་དངུལ་དང་མ་རྩ། ཐོན་ཁུངས་བཅས་ཀྱི་དོ་དམ་ཚད་ལྡན་དུ་བཏང་ནས་སྡེ་བའི་ཐུན་མོང་དཔལ་འབྱོར་རྒྱུན་མཐུད་ངང་སྟོབས་ཆེར་གཏོང་རྒྱུ་རེད།
རོང་འབྲོག་མང་ཚོགས་ཀྱི་ལས་ཞུགས་འབབ་འཕར་ལ་སྐུལ་འདེད་གཏོང་རྒྱུ་ནི་ཐེངས་འདིའི་བྱ་འགུལ་གྱི་ལས་འགན་གཙོ་བོ་ཡིན་པས། གཞི་རིམ་དུ་བསྐྱོད་པའི་ལས་བྱེད་པས་ལས་ཞུགས་དགོས་མཁོ་འཚོལ་སྒྲིག་བྱས་ནས་མང་ཚོགས་ཀྱིས་ཐག་ཉེ་ས་ནས་ལས་ཞུགས་བྱེད་པར་རོགས་སྐྱོར་བྱེད་པ་དང་། ཡུལ་གཞན་གནས་སྤོར་ཁྱིམ་ཚང་དང་ཡང་བསྐྱར་དབུལ་བོར་འགྱུར་བ་སྔོན་འགོག་བྱེད་པའི་ལྟ་ཞིབ་ཚད་ལེན་བྱ་ཡུལ་སོགས་མི་ཚོགས་ལ་དོ་ཁུར་བྱས་ནས་ལས་ཞུགས་འབབ་འཕར་གྱི་ཚད་མཐའ་བརྟན་པོར་བསྲུང་རྒྱུ་རེད།
དེ་མིན། གཞི་རིམ་དུ་བསྐྱོད་པའི་ལས་བྱེད་པ་རྣམས་ད་རུང་གྲོང་གསེབ་བཅོས་སྐྱོང་ཁྲོད་ཟབ་ཞུགས་བྱས་ནས་འགལ་བ་དང་རྩོད་གཞི་ཞིབ་བཤེར་ཐག་གཅོད་བྱེད་པ་དང་། རོང་འབྲོག་ཁུལ་གྱི་ཁྱབ་ཁོངས་གཙོ་བོའི་བདེ་འཇགས་ཐད་ཀྱི་མངོན་མེད་རྐྱེན་ངན་དག་ཐེར་བཅོས་སྐྱོང་བྱེད་པ། ཁྲིམས་འགལ་ནག་ཉེས་ཀྱི་བྱ་སྤྱོད་སྣ་ཚོགས་ལ་རྡུང་རྡེག་གཏོང་བར་མཐུན་སྦྱོར་བྱེད་པ། དཀའ་ཁག་ཆེ་བའི་མང་ཚོགས་ལ་གཅེས་སྐྱོང་བཅས་བྱས་ནས་གཞི་རིམ་སྤྱི་ཚོགས་ཀྱི་འཆམ་མཐུན་གཏན་འཇགས་སྲུང་སྐྱོང་བྱ་རྒྱུ་རེད།
བྱེད་སྒོས་ས་ཁུལ་སོ་སོ་དང་སྡེ་ཁག་སོ་སོས་བྱ་བའི་འགན་འཁྲི་ནན་དཀྲི་བྱེད་པ་དང་སྒྲོག་བཤད་བྱེད་ཐབས་གསར་གཏོད་བྱེད་པ་སོགས་བྱས་ནས་བརྒྱུད་སྒྲོག་ནུས་པ་དང་ཁེབས་ཚད་ཇེ་དྲག་ཏུ་གཏོང་དགོས། གཞི་རིམ་དུ་བསྐྱོད་པའི་ལས་བྱེད་པ་རྣམས་ཀྱིས་དངོས་འབྲས་ཁྲིད་ཕྱོགས་རྒྱུན་ཁྱོངས་བྱེད་པ་དང་། ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་ནན་མོར་བསྲུང་བ། དངོས་གཉེར་གྱི་སྤྱོད་ཚུལ་ལ་བརྟེན་ནས་གཞི་རིམ་དུ་བསྐྱོད་པ་དང་མང་ཚོགས་ལ་ཞབས་འདེགས་ཞུ་བ། ཐེངས་འདིའི་བྱེད་སྒོ་དེ་མང་ཚོགས་ལ་འབྲེལ་འདྲིས་བྱེད་པ་དང་ཏང་གཤིས་སྦྱོང་བརྡར་བྱེད་པའི་ལག་ལེན་སློབ་ཁྲིད་ཅིག་ཏུ་འགྱུར་བར་བྱེད་པ་བཅས་བྱས་ཏེ་ལས་བྱེད་པ་གཞི་རིམ་དུ་བསྐྱོད་པའི་ཕན་འབྲས་དངོས་ལ་བརྟེན་ནས་གྲོང་གསེབ་འཕེལ་རྒྱས་ལ་སྐུལ་འདེད་ནན་མོ་གཏོང་དགོས་པའི་བླང་བྱ་བཏོན།
