རྒྱལ་ཡོངས་དམངས་ཆེན་སྐབས་བཅུ་བཞི་པའི་གྲོས་ཚོགས་ཐེངས་བཞི་པས་གསར་འགྱུར་སྒྲོག་སྤེལ་ཚོགས་འདུ་བསྡུས།

རྒྱལ་ཡོངས་དམངས་ཆེན་སྐབས་བཅུ་བཞི་པའི་གྲོས་ཚོགས་ཐེངས་བཞི་པས་ཟླ་གསུམ་པའི་ཚེས་བཞི་ཉིན་གསར་འགྱུར་སྒྲོག་སྤེལ་ཚོགས་འདུ་བསྡུས།　ཚོགས་ཆེན་གྱི་མགྲིན་ཚབ་པ་ལོའུ་ཆིན་ཅན་གྱིས་ངོ་སྤྲོད་བྱས། ཐེངས་འདིའི་ཚོགས་ཆེན་ཟླ3ཚེས5ཉིན་གྱི་སྔ་དྲོར་འཚོགས་འགོ་རྩོམ་རྒྱུ་ཡིན་པ་དང་། ཚེས12ཉིན་གྱི་ཕྱི་དྲོར་གྲོལ་རྒྱུ་ཡིན་ལ། ཚོགས་ཡུན་ཉིན་བརྒྱད་རེད། ཚོགས་ཆེན་གྱི་གྲོས་རིམ་ནང་སྲིད་གཞུང་བྱ་བའི་སྙན་ཞུ་དང་། རྒྱལ་དམངས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ལོ་ལྔའི་འཆར་འགོད་བཅོ་ལྔ་པའི་རྩ་གནད་འཆར་ཟིན་ལ་ཞིབ་བཤེར་བྱེད་པ་སོགས་དོན་ཚན11ཚུད་ཡོད་པ་རེད། གསར་འགོད་པའི་དྲི་བར་ལན་འདེབས་སྐབས། ལོའུ་ཆིན་ཅན་གྱིས་བསྟན་དོན། ལོ་ངོ་གཅིག་གི་རིང་། རྒྱལ་ཡོངས་དམངས་ཆེན་རྒྱུན་ལས་ཨུ་ཡོན་ལྷན་ཁང་གིས་བཅའ་ཁྲིམས་དང་། བཅའ་ཁྲིམས་འགྲེལ་བཤད། ཆོད་དོན་འཆར་ཟིན་བཅས་ཁག40ལ་གྲོས་ཞིབ་བྱས་པ་དང་། དེའི་ཁྲོད་ཀྱི་ཁག24ལ་གྲོས་འཆམ་བྱུང་། དེའི་ནང་བཅའ་ཁྲིམས་ཁག6གཏན་འབེབས་དང་། བཅའ་ཁྲིམས་ཁག14བཟོ་བཅོས། བཅའ་ཁྲིམས་ཁག1གསལ་འགྲེལ་དང་བཅའ་ཁྲིམས་ཀྱི་གནད་དོན་དང་གནད་དོན་གལ་ཆེན་དང་འབྲེལ་བའི་ཆོད་དོན་ཁག3བཅས་ལ་གྲོས་འཆམ་བྱུང་། དེ་དག་ཕྱི་ཕྱོགས་ཉོ་ཚོང་སྐོར་གྱི་བཅའ་ཁྲིམས་དང་། མཚོ་ཐོག་ཚོང་ལས་སྐོར་གྱི་བཅའ་ཁྲིམས། རྒྱལ་ཁབ་སྤྱི་གླིང་སྐོར་གྱི་བཅའ་ཁྲིམས་སོགས་དང་འབྲེལ་ཡོད་པ་རེད། 

རྒྱལ་ཡོངས་དམངས་ཆེན་སྐབས་བཅུ་བཞི་པའི་གྲོས་ཚོགས་ཐེངས་བཞི་པའི་མགྲིན་ཚབ་པ་ལོའུ་ཆིན་ཅན་གྱིས་བཤད་རྒྱུར། “ལོ་ལྔའི་འཆར་འགོད་བཅོ་ལྔ་པའི”དུས་སྐབས་ནི་རང་རྒྱལ་དུ་སྤྱི་ཚོགས་རིང་ལུགས་ཀྱི་དེང་རབས་ཅན་གཞི་རྩའི་ཆ་ནས་མངོན་འགྱུར་བྱེད་པའི་རྨང་གཞི་བརྟན་པོ་དང་། ཕྱོགས་ཡོངས་ནས་ཤུགས་འདོན་པའི་གནད་འགག་གི་དུས་སྐབས་རེད། ལོ་ལྔའི་འཆར་འགོད་བཅོ་ལྔ་པའི་འཆར་འགོད་རྩ་གནད་འཆར་ཟིན་ནང་བསམ་འཆར་བསྡུ་ལེན་རྒྱ་ཆེར་བྱས་པའི་རྨང་གཞིའི་སྟེང་། ཐེངས་འདིའི་ཚོགས་ཆེན་ལ་ཞིབ་བཤེར་ཆོག་མཆན་ཞུ་རྒྱུར་ཕུལ་ནས་ཡོངས་བསྒྲགས་ལག་བསྟར་བྱས་ཏེ། ཏང་གི་ལངས་ཕྱོགས་ཁྲིམས་གཏན་གྱི་བརྒྱུད་རིམ་ལྟར་རྒྱལ་ཁབ་ཀྱི་འདོད་བློ་དང་མི་དམངས་ཀྱི་བྱ་སྤྱོད་དུ་བསྒྱུར་དགོས་པ་རེད།

སྒྲོག་སྤེལ་ཚོགས་འདུའི་སྟེང་། ཚོགས་ཆེན་གྱི་མགྲིན་ཚབ་པས་ད་དུང་ཚན་རྩལ་གསར་གཏོད་ཇེ་མགྱོགས་སུ་གཏོང་བ་དང་། འཛད་སྤྱོད་སྐུལ་སྤེལ་ལ་ཤུགས་རྒྱག་པ། དམངས་གཉེར་དཔལ་འབྱོར་འཕེལ་རྒྱས་ལ་སྐུལ་འདེད་གཏོང་བ་སོགས་ཀྱི་གནད་དོན་ཐད་ཀྲུང་གོ་དང་ཕྱི་རྒྱལ་གྱི་གསར་འགོད་པའི་དྲི་བར་ལན་བཏབ།