ཞིང་ཆེན་ཡོངས་ཀྱི་དྲ་རྒྱའི་གླེང་ཕྱོགས་ཀྱི་ཆེད་དམིགས་བྱ་བའི་བཀོད་སྒྲིག་ཚོགས་འདུ་བསྡུས།

ཟླ3པའི་ཚེས4ཉིན། ཞིང་ཆེན་ཡོངས་ཀྱི་དྲ་རྒྱའི་གླེང་ཕྱོགས་ཀྱི་ཆེད་དམིགས་བྱ་བའི་བཀོད་སྒྲིག་ཚོགས་འདུ་ཟི་ལིང་དུ་བསྡུས། ཚོགས་འདུ་ལས་ཀྲུང་དབྱང་དང་ཞིང་ཆེན་ཏང་ཨུའི་འབྲེལ་ཡོད་གྲོས་ཚོགས་ཀྱི་དགོངས་དོན་བརྒྱུད་སྒྲོག་དང་སློབ་སྦྱོང་བྱས་པ་དང་། མིག་སྔའི་ཞིང་ཆེན་ཡོངས་ཀྱི་དྲ་རྒྱའི་གླེང་ཕྱོགས་ཀྱི་གནས་བབ་ལ་དབྱེ་ཞིབ་བརྡར་གཅོད་བྱས་ཏེ། གོ་རིམ་རྗེས་མའི་བྱ་བར་བཀོད་སྒྲིག་བྱས། ཞིང་ཆེན་ཏང་ཨུའི་རྒྱུན་ཨུ། དྲིལ་སྒྲོག་པུའུ་ཡི་པུའུ་ཀྲང་ཝང་ཏ་ནན་ཚོགས་འདུར་ཞུགས་པར་མ་ཟད་གཏམ་བཤད།

ཚོགས་འདུ་ལས་བསྟན་དོན། གླེང་ཕྱོགས་ནི་སྤྱི་ཚོགས་ཀྱི་གནས་ཚུལ་དང་དམངས་ཀྱི་འདོད་བློ་མཚོན་ཚུལ་གཙོ་བོ་ཡིན་པས། གླེང་ཕྱོགས་བྱ་བ་ལེགས་པོར་སྒྲུབ་དགོས་ན། དམངས་འདོད་ལ་རྒྱུས་ལོན་བྱེད་པ་དང་དམངས་ཀྱི་དོ་ཁུར་དང་ལེན་བྱས་ཚེ། ད་གཟོད་དངོས་ཡོད་བྱ་བ་ལེགས་པོར་སྒྲུབ་ཐུབ། ས་གནས་སོ་སོ་དང་སྡེ་ཁག་སོ་སོས་ཆབ་སྲིད་ཀྱི་ལངས་གནས་ཇེ་མཐོར་གཏོང་བ་དང་། འགན་འཁྲི་ཁག་ཁུར་ཇེ་དྲག་ཏུ་བཏང་སྟེ། ཆབ་སྲིད་ཀྱི་འགན་འཁྲི་འཁུར་སེམས་དང་ལས་འགན་སྒྲུབ་སེམས་དྲག་པོས་དྲ་རྒྱའི་གླེང་ཕྱོགས་ཀྱི་ཉེན་ཁ་འགོག་ཟོན་གྱི་འགོ་ཁུངས་བཅོས་སྐྱོང་ལ་ཤུགས་སྣོན་པ་དང་། སྤུས་ཚད་མཐོ་བའི་འཕེལ་རྒྱས་ཐད་བརྟན་བརླིང་རིམ་ལྡན་གྱི་དྲ་རྒྱའི་གླེང་ཕྱོགས་ཀྱི་ཁོར་ཡུག་བསྐྲུན་དགོས།

ཚོགས་འདུ་ལས་ནན་གྱིས་བསྟན་དོན། གནོད་འཚེ་མ་བྱུང་སྔོན་དུ་ཐག་གཅོད་བྱེད་ཐབས་སྤྱོད་པ་དང་། གནད་འཁེལ་གྱིས་ཞིབ་འཇུག་བརྡར་གཅོད་བྱེད་པ། དཔལ་འབྱོར་སྤྱི་ཚོགས་དང་སྐྱེ་ཁམས་ཁོར་སྲུང་། དམངས་འཚོ་འགན་སྲུང་། བདེ་འཇགས་ཐོན་སྐྱེད་སོགས་གཙོ་གནད་ཁྱབ་ཁོངས་ལ་དམིགས་ནས། རྒྱུན་རྣམ་ཅན་དང་གསལ་ཐོ་ཅན། འགུལ་རྣམ་ཅན་བཅས་ཀྱི་ཉེན་ཁ་གྲལ་བཤེར་རྐྱེན་སྲོལ་འཛུགས་པ་དང་། ཚད་མཐའ་རྟོགས་ཤིང་གནས་ཚུལ་གསལ་བོ་ཡིན་པར་བྱེད་དགོས། ཁྲིད་སྟོན་ལ་ཤུགས་སྣོན་པ་དང་། ཐུན་མོང་ངོས་འཛིན་གཅིག་སྡུད་བྱས་ནས། དྲ་རྒྱའི་གཙོ་རྒྱུན་གླེང་ཕྱོགས་སྔར་ལས་སྲ་བརྟན་དང་རྒྱ་བསྐྱེད་གཏོང་བ་དང་། དྲ་རྒྱའི་བརྗོད་དོན་ཆེན་མོ་དྲིལ་སྒྲོག་དང་གྲོས་དོན་གཙོ་བོ་བཀོད་སྒྲིག་བྱེད་པར་རྩ་འཛུགས་ཞིབ་མོ་བྱེད་པ། དྲང་ཕྱོགས་གཏམ་བརྗོད་ཀྱི་ཁེབས་ཚད་དང་ཤུགས་རྐྱེན་སྔར་ལས་ཆེ་རུ་གཏོང་བ་དང་། དྲ་རྒྱའི་གླེང་ཕྱོགས་ཀྱི་ཁྲིད་སྟོན་དུས་ཡུན་དང་ཚད་གཞི། ཕན་འབྲས་བཅས་དམ་འཛིན་ལེགས་པོ་བྱེད་པ། མི་དམངས་མང་ཚོགས་ཀྱིས་སེམས་ཁུར་དང་དོ་ཁུར་བྱེད་པར་དམིགས་ཏེ། བསམ་བློའི་ངེས་ཤེས་ཀྱི་མཐུན་ས་དང་བརྩེ་སེམས་བརྗེ་རེས་ཀྱི་མཐུན་ས་ཡང་དག་སྒོས་འཚོལ་བ་དང་། དབང་ཟིལ་ཆ་འཕྲིན་ཁྱབ་བསྒྲགས་བྱེད་པ། དྲ་རྒྱའི་འཆལ་གཏམ་ལ་རྡུང་རྡེག་གཏོང་བ་བཅས་བྱས་ཏེ། སྤྱི་ཚོགས་ཀྱི་ཐུན་མོང་ངོས་འཛིན་སྔར་ལས་གཅིག་སྡུད་བྱེད་དགོས། འགན་འཁྲི་དངོས་འབེབས་དང་གནད་དོན་ཐག་གཅོད་བྱེད་དགོས། དྲ་རྒྱ་དང་ཡུལ་དངོས་ཀྱི་མཐུན་སྦྱོར་བཅོས་སྐྱོང་ལ་ཤུགས་སྣོན་པ་དང་། གླེང་ཕྱོགས་ལ་ཁ་གཏད་འཇལ་བ་དང་དོན་དག་ཐག་གཅོད་པ་གཉིས་ཟུང་འབྲེལ་བྱས་ནས། གླེང་ཕྱོགས་ཀྱི་འབྱུང་ཁུངས་ཡང་དག་པར་འཚོལ་བ་དང་། མང་ཚོགས་ཀྱིས་ཚུར་སྣང་དྲག་པོ་བྱས་པའི་དཀའ་ཁག་དང་གནད་དོན་ཐག་གཅོད་པར་སྐུལ་འདེད་བཏང་སྟེ། འགལ་བ་དང་ཉེན་ཁ་འགོ་ཁུངས་ནས་སེལ་བ་དང་རྩ་བ་ནས་ཐག་གཅོད་དགོས།