རང་ཞིང་གིས་འཛམ་གླིང་གི་རི་སྐྱེས་སྲོག་ཆགས་དང་སྐྱེ་དངོས་ཉིན་མོའི་དྲིལ་སྒྲོག་བྱེད་སྒོ་སྤེལ།

ཟླ3པའི་ཚེས3ཉིན། རང་ཞིང་གིས་རི་སྐྱེས་སྲོག་ཆགས་དང་སྐྱེ་དངོས་སྲུང་སྐྱོབ་བྱས་ཏེ་བདེ་ཐང་གི་མ་འོངས་པ་བསྐྲུན་ཞེས་པ་བརྗོད་དོན་ཡིན་པའི2026ལོའི་འཛམ་གླིང་གི་རི་སྐྱེས་སྲོག་ཆགས་དང་སྐྱེ་དངོས་ཉིན་མོའི་དྲིལ་སྒྲོག་བྱེད་སྒོ་མགོ་བརྩམས་ཏེ། ཁྱད་དུ་འཕགས་པའི་མཐོ་སྒང་གི་རི་སྐྱེས་སྐྱེ་དངོས་ཀྱི་ཐོན་ཁུངས་ལ་རྐང་བཙུགས་པ་དང་། དྲ་ལམ་དང་ཡུལ་དངོས་མཉམ་འགུལ་གྱི་རྣམ་པར་བརྟེན་ནས། མཚོ་སྔོན་གྱི་རི་སྐྱེས་སྐྱེ་དངོས་ཀྱི་སྐྱེ་ཁམས་དང་། རིག་གནས། བདེ་ཐང་བཅས་ཀྱི་རིན་ཐང་ཕྱོགས་ཡོངས་ནས་མངོན་པ་དང་། མི་རྣམས་ཀྱི་རི་སྐྱེས་སྲོག་ཆགས་དང་སྐྱེ་དངོས་ལ་སྲུང་སྐྱོབ་བྱེད་པའི་འདུ་ཤེས་ནུས་ལྡན་སྒོས་ཇེ་མཐོར་བཏང་།

མཚོ་སྔོན་དུ་རི་སྐྱེས་སྐྱེ་དངོས་རིགས་སྣ2867ཡོད་ལ། ཉེ་བའི་ལོ་འདི་འགར་རང་ཞིང་གིས་ཡུལ་དངོས་དང་ཡུལ་གཞན་གནས་སྤོར་གྱི་སྲུང་སྐྱོབ་ཤུགས་དྲག་ཏུ་བཏང་སྟེ། རྨ་འབྲི་རྫ་གསུམ་འབྱུང་ཡུལ་དང་། མདོ་ལ་རི་བོ་སོགས་གཙོ་གནད་ཁྱབ་ཁོངས་སུ་སྲུང་སྐྱོབ་ནན་མོ་དང་འགུལ་རྣམ་ལྟ་ཞིབ་བྱས་ཤིང་། བརྒྱ་ཆའི་དོན་ལྔའི་ཡན་གྱི་རི་སྐྱེས་སྐྱེ་དངོས་སྲུང་སྐྱོབ་ཁྱབ་ཁོངས་ཁྲོད་བཞག་ཅིང་། ཟི་ལིང་རྒྱལ་ཁབ་སྐྱེ་དངོས་གླིང་འཛུགས་སྐྲུན་དང་རྒྱལ་ཁབ་ནགས་རྩྭ་དངོས་རྒྱུའི་ཐོན་ཁུངས་སྒྲིག་ཆས་གསོག་ཉར་མཛོད་མཚོ་སྔོན་ཡན་ལག་མཛོད་འཛུགས་སྐྲུན་བྱེད་པར་སྤུས་ཚད་མཐོན་པོས་སྐུལ་འདེད་བཏང་བ་དང་། རྩ་ཆེའི་ཉམས་ཉེན་སྐྱེ་དངོས་གསོ་གཉོར་དང་། ཕྱིར་རང་གནས་སུ་སྐྱེལ་བའི་བྱ་བ་སྒྲུབ་པ་དང་། རིགས་སྣ་ཆུང་གྲས་ཀྱི་སྐྱེ་དངོས་སླར་གསོ་འབྱུང་བར་རོགས་ཤུགས་བཏོན། དུས་མཉམ་དུ། ནུས་ཤུགས་གང་ཡོད་འདོན་པ་དང་ཐབས་མང་མཉམ་སྤྱོད་བྱས་ཤིང་། ཁྲིམས་བསྟར་ལྟ་སྐུལ་དང་དོ་དམ་ནན་མོ་བྱས་ལ། རྒྱུན་མཐུད་བེད་སྤྱོད་ཚད་ལྡན་དུ་བཏང་ཞིང་ཚན་རིག་ཤེས་བྱ་ཁྱབ་གདལ་དང་དྲིལ་སྒྲོག་གཏིང་ཟབ་ཏུ་བཏང་།

ཡུལ་དངོས་སུ། ཀྲུང་གོ་ཚན་རིག་གླིང་ནུབ་བྱང་མཐོ་སྒང་སྐྱེ་དངོས་ཞིབ་འཇུག་སའོ་ཡི་ཆེད་མཁས་པས་མཐོ་སྒང་གི་སྨན་བཀོལ་སྐྱེ་དངོས་ཞིབ་འཇུག་གྲུབ་འབྲས་མཉམ་སྤྱོད་བྱས་ཏེ། ཚང་མས་མཐོ་སྒང་གི་སྨན་བཀོལ་སྐྱེ་དངོས་ཀྱི་རིན་ཐང་ལ་རྒྱུས་ལོན་བྱེད་པར་ཁྲིད་སྟོན་དང་། ཟི་ལིང་སྐྱེ་དངོས་གླིང་གི་དྲོད་ཁང་དང་ཚན་རིག་ཤེས་བྱ་ཁྱབ་གདལ་ཁང་དུ་སོང་སྟེ། ཡུལ་དངོས་ནས་རི་སྐྱེས་སྐྱེ་དངོས་སྲུང་སྐྱོབ་ཀྱི་གནས་བབ་ལ་རྒྱུས་ལོན་བྱེད་དུ་བཅུག  བྱེད་སྒོ་དེ་སྔོན་གྱི་གྲ་སྒྲིག་དང་ཚོགས་ར་གཙོ་བོས་ཤུགས་འདོན་པ། རྗེས་མཐུད་ཤུགས་འདོན་བཅས་དུས་རིམ་གསུམ་དུ་དབྱེ་ནས་གོ་རིམ་ཡོད་པའི་སྐུལ་འདེད་བཏང་། ཟི་ལིང་སྐྱེ་དངོས་གླིང་གིས་རྒྱལ་ཡོངས་སྐྱེ་དངོས་གླིང་གི་མཉམ་འབྲེལ་ཆེད་འགྲེམ་སྤེལ་ཏེ། ཚན་རིག་ཤེས་བྱ་ཁྱབ་གདལ་སློབ་གླིང་དུ་བསྐྱོད་པའི་བྱེད་སྒོ་ཟི་ལིང་གྲོང་ཁྱེར་ཀུའུ་ཁྲིན་ཐའེ་སློབ་ཆུང་དང་། ཁུ་ནུ་ལམ་སློབ་ཆུང་དུ་སྤེལ་ནས་སློབ་མ4000ཙམ་བྱེད་སྒོའི་ཁྲོད་ཞུགས། དྲ་ལམ་སྟེགས་བུས་མཐོ་སྒང་གི་སྨན་དྲི་འཐུལ་བའི་དུས་ཚན་བཅུ་གཉིས་སོགས་ཀྱི་ནང་དོན་ཁྱབ་སྤེལ་བཏང་། བྱེད་སྒོ་ལས་ད་དུང་ཚན་རིག་ཤེས་བྱ་ཁྱབ་གདལ་སློབ་གླིང་དུ་བསྐྱོད་པའི་སྤྱི་ཕན་འཆད་འཁྲིད་མུ་མཐུད་དུ་སྤེལ་ཏེ། སྨྱན་སྦྱོར་གསར་བར་གཞི་བཅོལ་ནས་ཚན་རིག་ཤེས་བྱའི་ནང་དོན་མུ་མཐུད་ཁྱབ་བསྒྲགས་དང་། དུས་མཉམ་དུ་སྣ་མང་ཟབ་ཞུགས་རྐྱེན་སྲོལ་འཐུས་ཚང་དུ་བཏང་ནས། རི་སྐྱེས་སྲོག་ཆགས་དང་སྐྱེ་དངོས་སྲུང་སྐྱོབ་བྱ་བ་རྒྱུན་རྣམ་ཅན་དང་ཡུན་ཕན་ཅན་གྱི་འཕེལ་རྒྱས་ལ་སྐུལ་འདེད་གཏོང་དགོས།