ཞིང་ཆེན་ཡོངས་ཀྱི་ཞོར་ལས་པ་བཞི་བརྒྱ་སུམ་ཅུ་ཞིང་ཆེན་བརྒལ་ཏེ་ལས་ཞུགས་བྱས།

 

ཟླ2པའི་ཚེས27ཉིན། མཚོ་སྔོན་ཞིང་ཆེན་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཐིང་དང་ཀྲུང་གོའི་ལྕགས་ལམ་མཚོ་བོད་སྡེ་ཚོགས་ཚད་ཡོད་ཀུང་སི་གཉིས་ཀྱིས་གཙོ་སྒྲུབ་བྱས་པའི་ཞིང་ཆེན་བརྒལ་བའི་ཞོར་ལས་པའི་འགྲོ་སྐྱོད་བྱེད་སྒོ་ཟི་ལིང་མེ་འཁོར་འབབ་ཚུགས་སུ་བསྡུས། དེ་ཡིས་རང་ཞིང་གི་ཞིང་ཆེན་ལས་བརྒལ་ནས་ལས་ཞུགས་བྱེད་པའི་བྱ་བ་དངོས་སུ་འགོ་བརྩམས་པ་མཚོན། 

ཐེངས་འདིའི་བྱེད་སྒོའི་ཁྲོད་ཐོག་མའི་ཞོར་ལས་པ430ཙམ་གཅིག་སྡུད་སྒྲིག་འཛུགས་བྱས་ནས་མེ་འཁོར་དང་གནམ་གྲུ་སོགས་བརྒྱུད་ནས་ཅང་སུའུ་དང་། ཧྥུའུ་ཅན། ཀོང་ཏུང་སོགས་སུ་ཕྱོགས་བསྡུས་ངང་ལས་ཞུགས་བྱེད་པར་བསྐྱལ་ཞིང་། གཙོ་བོ་རླངས་འཁོར་སྒྲིག་སྦྱོར་ལས་སྣོན་དང་། ནུས་ཁུངས་གསར་པའི་རྒྱུ་ཆ་བཟོ་སྐྲུན། གློག་རྡུལ་ལྷུ་ལག་ཐོན་སྐྱེད་སྒྲིག་འཛུགས། བཟོ་སྐྲུན་སོགས་ལས་རིགས་གཉེར་གྱི་ཡོད་པ་དང་། ཟླ་རེའི་ཆ་སྙོམས་གླ་ཕོགས་སྒོར6000ཡིན། ཞིང་ཆེན་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཐིང་གིས་ཕྱི་ལ་ཕུད་པའི་ཞོར་ལས་བ་ཁག་དང་པོ་ལ་སེམས་བརྩེ་པའི་ལག་རྟགས་གྲ་སྒྲིག་ཞིབ་ཚགས་བྱས་པ་དང་། རླངས་འཁོར་གྱིས་བརྒྱུད་རིམ་ཧྲིལ་པོར་སྐྱེལ་འདྲེན་བཀོད་སྒྲིག་བྱས་ལ།  ལྕགས་ལམ་སྡེ་ཁག་གིས་པ་སེ་ཉོ་བ་སྔོན་ཉར་བྱེད་པར་མཐུན་སྦྱོར་བྱས། དེ་དང་མཉམ་དུ་ལས་བཟོ་པའི་ལག་དེབ་ཞིབ་ཚགས་སྒྲིག་བཟོ་དང་སྲིད་ཇུས་དྲིལ་བསྒྲགས་བྱེད་པ།   ཆེད་མངགས་མི་སྣ་བདམས་ནས་བརྒྱུད་རིམ་ཧྲིལ་པོར་ཕྱིར་སྐྱོད་འགན་སྲུང་བྱེད་པའི་འགན་འཁུར་བ་བཅས་བྱས་ཏེ་ལས་བཟོ་མང་ཚོགས་སེམས་བདེ་མོའི་ངང་ཕྱིར་སྐྱོད་བྱེད་པ་དང་བདེ་བླག་ངང་ལས་གནས་སུ་ལོག་པར་འགན་སྲུང་ཏན་ཏིག་བྱས།

ད་ལོའི་ལོ་འགོར། ཞིང་ཆེན་ཡོངས་ཀྱི་སྐབས་དང་པོའི་ལས་ཞུགས་བྱ་བར་རམ་འདེགས་བྱེད་ཆེད།  ཞིང་ཆེན་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཐིང་གིས་ཞོར་ལས་བའི་ལས་ཞུགས་འགག་སྒོ་གཙོར་བཟུང་ནས། ཐབས་ལམ་སྣ་མང་བརྒྱུད་དེ་རོང་འབྲོག་ས་ཁུལ་གྱི་ཞོར་ལས་པ་ཕྱིར་བསྐྱོད་ལས་ཞུགས་རྩ་འཛུགས་བྱས།  ཁ་གཏད་རོགས་སྐྱོར་དང་། ཤར་ནུབ་རྒྱུད་གྱི་རོགས་ལས་མཐུན་སྦྱོར། རྨ་ཆུའི་རྒྱུད་གྱི་ཞིང་ཆེན་དགུའི་ངལ་རྩོལ་རོགས་ལས་རྐྱེན་སྲོལ་བཅས་ལ་བརྟེན་ནས། ཅང་སུའུ་དང་། ཧྥུའུ་ཅན། ཀོང་ཏུང་སོགས་ཞིང་ཆེན་ཕྱི་རོལ་གྱི་སྤུས་ལེགས་ཁེ་ལས་དང་གནད་ལ་འཁེལ་བའི་སྒོ་ནས་འབྲེལ་མཐུད་བྱས་ནས་ཁེ་ལས་ཀྱི་གླ་ཕོགས་ཐོབ་ཐང་དང་ལས་བཟོ་ཁོར་ཡུག་སོགས་གནས་ཚུལ་ཤེས་རྟོགས་བྱས་ཏེ་ཞིང་ཆེན་ཕྱི་རོལ་གྱི་ལས་གནས་ཆ་འཕྲིན་ཁྲི1ལྷག་ཙམ་ལེགས་འདེམས་བྱས།  དེ་དང་མཉམ་དུ་ལས་དོན་མི་སྣ་ཧུར་ཐག་གིས་སྒྲིག་འཛུགས་བྱས་ཏེ།   ཞང་གྲོང་དང་གྲོང་ཚོ་དང་སྡེ་ཁུལ་གྱི་འཐབ་ཕྱོགས་སུ་ཟབ་ཞུགས་བྱས་ཏེ། གྲོང་གསེབ་ཀྱི་ཆེད་དོན་གདན་ཞུ་དང་སྐད་གཉིས་ཐད་གཏོང་ལས་གནས་ཁྲིད་ཕྱོགས་སོགས་ཀྱི་བྱེད་སྒོ་བརྒྱུད་ནས་རང་ཁྱིམ་གྱི་སྒོ་ཁ་ནས་བཟོ་གྲྭའི་སྒོ་ཁའི་བར་གྱི་གནད་ལ་འཁེལ་བའི་ཞབས་ཞུའི་བགྲོད་ལམ་ནུས་ལྡན་ངང་བཏོད་ཡོད།