མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ2པའི་ཚེས28ཉིན། ཞིང་ཆེན་ཏང་ཨུའི་ཧྲུའུ་ཅི་གཞོན་པ། ཧྲིན་ཀྲང་ལུའོ་ཏུང་ཁྲོན་གྱིས་འགོ་འཛིན་བྱས་ཏེ་ཞིང་ཆེན་སྲིད་གཞུང་གི་རྒྱུན་ལས་གྲོས་ཚོགས་བསྡུས་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་དང་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱས་ཏེ། ཞིང་ཆེན་ཏང་ཨུའི་བླང་བྱ་དོན་འཁྱོལ་བྱས་པ་དང་། སྦགས་བཙོག་འགོག་བཅོས་ཀྱི་མཁྲེགས་གཏོར་བྱ་བ་དང་རང་བྱུང་སྲུང་སྐྱོབ་ཁུལ་གྱི་གཅིག་བསྡུས་ལེགས་གཏོང་། ཁྲིམས་སྐྱོང་སྲིད་གཞུང་འཛུགས་སྐྲུན། སློབ་གསོ་ལ་བརྟེན་ནས་ཞིང་ཆེན་སྟོབས་ཆེར་གཏོང་བ། ཚོང་འགུག་དངུལ་འདྲེན་སོགས་ཀྱི་བྱ་བར་ཞིབ་འཇུག་དང་བཀོད་སྒྲིག་བྱས།
གྲོས་ཚོགས་ལས་ཞི་ཅིན་ཕིང་གི་སྐྱེ་ཁམས་དཔལ་ཡོན་གྱི་དགོངས་པ་སློབ་སྦྱོང་དང་ལག་བསྟར་གཏིང་ཟབ་བྱས་ཏེ། སྐྱེ་ཁམས་ཁོར་ཡུག་སྲུང་སྐྱོབ་ཀྱི་ཆབ་སྲིད་འགན་འཁྲི་བློ་བརྟན་འགྱུར་མེད་ཀྱིས་འཁུར་བ་དང་། མུ་མཐུད་དུ་སྦགས་བཙོག་འགོག་བཅོས་ཀྱི་མཁྲེགས་གཏོར་ལ་སྐུལ་འདེད་གཏིང་ཟབ་གཏོང་བ། ཐཱན་ཉུང་གཏོང་དང་སྦགས་བཙོག་ཉུང་གཏོང་། ལྗང་མདོག་རྒྱ་བསྐྱེད་པ་དང་འཕར་སྣོན་བཅས་ལ་གཅིག་གྱུར་འཆར་འགོད་ཀྱིས་སྐུལ་འདེད་གཏོང་བ། ཏན་ཏིག་གིས་ཀྲུང་དབྱང་གི་སྐྱེ་ཁམས་དང་ཁོར་ཡུག་སྲུང་སྐྱོབ་ཀྱི་ལྟ་སྐུལ་ཕྱིར་ལྡོག་གནད་དོན་བཅོས་སྒྲིག་ལེགས་པོ་བྱས་པས། ནུས་ཤུགས་ཡོད་རྒུས་སྐྱེ་ཁམས་དཔལ་ཡོན་གྱི་མཐོ་ས་འཛུགས་སྐྲུན་ལ་སྐུལ་འདེད་གཏོང་བའི་ཕན་འབྲས་གསར་པ་ཐོབ་པར་སྐུལ་འདེད་གཏོང་དགོས། རང་བྱུང་སྲུང་སྐྱོང་ཁུལ་གཅིག་བསྡུས་ཇེ་ལེགས་སུ་གཏོང་བའི་ལས་འགན་སྣ་ཚོགས་དོན་འཁྱོལ་བྱ་རྒྱུར་སྐུལ་འདེད་ནུས་ལྡན་བཏང་ནས། བར་སྟོང་བཀོད་སྒྲིག་ལུགས་མཐུན་དང་མཐའ་མཚམས་ཀྱི་ཁྱབ་ཁོངས་གསལ་བ། དོ་དམ་ཚད་ལྡན་ནུས་ལྡན་བཅས་ཀྱི་མ་ལག་རིམ་བཞིན་བཙུགས་ནས། རྒྱལ་ཁབ་ཀྱི་འཐུས་ཚབ་རང་བཞིན་དང་འཛམ་གླིང་གི་ཤུགས་རྐྱེན་ལྡན་པའི་རང་བྱུང་སྲུང་སྐྱོབ་ཁུལ་གྱི་དཔེ་མཚོན་ཧུར་ཐག་གིས་བསྐྲུན་དགོས་པ་ནན་གྱིས་བསྟན།
གྲོས་ཚོགས་ལས་ཞི་ཅིན་ཕིང་གི་ཁྲིམས་སྐྱོང་དགོངས་པ་ལག་ལེན་གཏིང་ཟབ་བྱས་ཏེ། སྲིད་གཞུང་གི་ཁྲིམས་འཛུགས་ཀྱི་སྤུས་ཚད་དང་ཕན་འབྲས་རྒྱུན་མཐུད་སྒོས་མཐོར་འདེགས་སུ་གཏོང་བ་དང་། གཟབ་ནན་ཚད་ལྡན་དང་གཞུང་དྲང་དཔལ་ཡོན་གྱི་ཁྲིམས་བསྟར་ལ་སྐུལ་འདེད་གཏོང་བ། སྤྱི་པའི་བཅའ་ཁྲིམས་ཞབས་ཞུའི་མ་ལག་འཛུགས་སྐྱོང་ལ་ཤུགས་སྣོན་པ། སྲིད་གཞུང་གི་བྱ་བ་སྣ་ཚོགས་ཁྲིམས་སྐྱོང་ཅན་དུ་འགྱུར་བར་ཕྱོགས་ཡོངས་ནས་སྐུལ་འདེད་གཏོང་བ་བཅས་བྱས་ནས། ཀྲུང་གོའི་ལུགས་ཀྱི་དེང་རབས་ཅན་གྱི་མཚོ་སྔོན་གྱི་ལག་ལེན་ལ་སྐུལ་འདེད་གཏོང་བར་ཁྲིམས་སྐྱོང་གི་འགན་སྲུང་ནུས་ལྡན་འདོན་སྤྲོད་བྱ་དགོས་པ་ནན་གྱིས་བསྟན།
གྲོས་ཚོགས་ལས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་སློབ་གསོའི་ཐད་ཀྱི་རྒྱས་བཤད་གལ་ཆེན་ནན་ཏན་གྱིས་སློབ་སྦྱོང་དང་ལག་བསྟར་བྱེད་པ་དང་། མི་བཟང་གསོ་སྐྱོང་གི་རྩ་བའི་ལས་འགན་ཕྱོགས་ཡོངས་ནས་དོན་འཁྱོལ་བྱས་ཏེ། ཤར་ནུབ་རྒྱུད་མཉམ་ལས་དང་སློབ་གསོས་མཚོ་སྔོན་ལ་རོགས་སྐྱོར་བྱེད་པའི་རྐྱེན་སྲོལ་གྱི་ཁྱད་སྟོབས་སྔར་བས་འདོན་སྤེལ་བྱས་ཏེ། ནུས་ཤུགས་ཡོད་རྒུས་སློབ་གསོའི་ཐོན་ཁུངས་ཇེ་ལེགས་སུ་གཏོང་བ་དང་། ས་གནས་གཞན་དུ་སློབ་གཉེར་བྱེད་པའི་གྲུབ་འབྲས་མུ་མཐུད་དུ་རྒྱ་ཆེར་གཏོང་བ། མཐོ་རིམ་ཞིབ་འཇུག་གླིང་འཛུགས་སྐྲུན་ལ་བརྟན་པོའི་ངང་སྐུལ་འདེད་གཏོང་བ། སློབ་གསོའི་གྲངས་ཀའི་ཚུལ་སྒྱུར་འཕེལ་རྒྱས་ལ་ཤུགས་སྣོན་པ། སློབ་གྲྭའི་བདེ་འཇགས་འགོག་སྲུང་འཛིང་རགས་དངོས་གནས་ཇེ་བརྟན་དུ་གཏོང་བ། སློབ་གསོ་ལ་བརྟེན་ནས་ཞིང་ཆེན་སྟོབས་ལྡན་འཛུགས་སྐྲུན་བྱེད་པའི་ཆུ་ཚད་སྐས་རིམ་གསར་པར་སྙེག་པར་སྐུལ་འདེད་ཇེ་མགྱོགས་སུ་གཏོང་དགོས་པ་ནན་གྱིས་བསྟན།
གྲོས་ཚོགས་ལས་ཞི་ཅིན་ཕིང་གི་དཔལ་འབྱོར་དགོངས་པ་སློབ་སྦྱོང་དང་ལག་བསྟར་གཏིང་ཟབ་བྱས་ཏེ། ཞིང་ཆེན་ཡོངས་ཀྱི་ཁེ་ལས་པའི་བཞུགས་མོལ་ཚོགས་འདུ་དང་ཞིང་ཆེན་ཡོངས་ཀྱི་གཙོ་གནད་ཐོན་ལས་ཕྲེང་རྒྱས་ཕྲེང་གསབ་ཕྲེང་བསྲིང་ལ་སྐུལ་འདེད་གཏོང་བ་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་བཞུགས་མོལ་ཚོགས་འདུའི་བཀོད་སྒྲིག་བླང་བྱ་དངོས་འབེབ་ནན་མོ་བྱེད་པ། བཟོ་ལས་ཀྱི་དངུལ་གཏོང་ཁྲག་ཁྲིག་ལས་བརྒལ་བ་རྩ་འཛུགས་དང་ལག་བསྟར་བཟང་བོ་བྱེད་པ། ཞབས་ཞུ་ཇེ་ལེགས་སུ་བཏང་ནས་ཡིད་ཆེས་མཐོ་རུ་གཏོང་བའི་དམངས་ཁྲོད་ཀྱི་དངུལ་གཏོང་གསོན་ཤུགས་ལ་སྐུལ་སྤེལ་བྱེད་པ། གཙོ་གནད་ཐོན་ལས་ཀྱི་ཚོང་འགུགས་ནུས་པ་འདུས་པའི“བྱ་སྤྱོད་ཆེན་པོ་གསུམ”ཚད་བརྒལ་ཡོང་བ་བྱས་ཏེ། སྤུས་ཚད་མཐོ་བའི་སྒོ་ནས་སྐབས་གསུམ་པའི་མཚོ་སྔོན་གྱི་ལྗང་མདོག་རྩིས་ནུས་ཐོན་ལས་འཕེལ་རྒྱས་ཀྱི་འོས་སྦྱོར་ཚོགས་འདུར་གྲ་སྒྲིག་བྱས་ཏེ། མུ་ཕྲེང་རྣམ་པའི་ཚོང་འགུགས་དང་གནད་ལ་འཁེལ་བའི་ཚོང་འགུགས། ཚོང་ལས་ལ་བརྟེན་ནས་ཚོང་འགུགས་བཅས་གཏིང་ཟབ་ཏུ་བཏང་སྟེ། ཁྲོམ་ར་ཅན་དང་ཁྲིམས་སྐྱོང་ཅན། རྒྱལ་སྤྱི་ཅན་བཅས་ཀྱི་ཚོང་གཉེར་ཁོར་ཡུག་རྩེ་གྲ་བསྐྲུན་ཤུགས་ཆེ་རུ་བཏང་སྟེ། ཚོང་འགུགས་དངུལ་འདྲེན་གྱི་གྲུབ་འབྲས་མང་པོར་བརྟེན་ནས་དེང་རབས་ཅན་གྱི་མཚོ་སྔོན་གསར་པ་འཛུགས་སྐྲུན་བྱེད་པར་འདེགས་སྐྱོར་བྱ་དགོས་པ་ནན་གྱིས་བསྟན།
གྲོས་ཚོགས་ལས《མཚོ་སྔོན་ཞིང་ཆེན་གྱི་སྤྱི་པའི་གཞི་གྲངས་ཐོན་ཁུངས་ཐོ་འགོད་དོ་དམ་ལག་བསྟར་ཞིབ་སྲོལ》དང《མཚོ་སྔོན་ཞིང་ཆེན་གྱི་གཏེར་སྙིགས་གསོག་མཛོད་ཀྱི་མངོན་མེད་རྐྱེན་ངན་གྱི་ཆེད་དམིགས་ཞིབ་བཤེར་བཅོས་སྒྲིག་བྱེད་པའི་བྱ་སྤྱོད་ཇུས་གཞི》བཅས་ལ་གྲོས་ཞིབ་བྱས་ནས་རྩ་དོན་སྟེང་གྲོས་འཆམ་བྱུང་། རང་ཞིང་གི་སྤྱི་པའི་གཞི་གྲངས་ཀྱི་ཐོན་ཁུངས་དོ་དམ་བེད་སྤྱོད་ཚད་ལྡན་ཅན་གྱི་ཆུ་ཚད་རྒྱུན་ཆད་མེད་པར་མཐོ་རུ་བཏང་ནས། གཞི་གྲངས་ཀྱི་རྒྱུ་རྐྱེན་གཙོ་བོའི་རིན་ཐང་འདོན་སྤེལ་གང་ལེགས་བྱས་ཏེ། གྲངས་འཛིན་མཚོ་སྔོན་འཛུགས་སྐྲུན་ལ་འདེགས་སྐྱོར་བརྟན་པོ་འདོན་སྤྲོད་བྱ་དགོས། ནུས་ཤུགས་ཡོད་རྒུས་གཏེར་སྙིགས་གསོག་མཛོད་ཀྱི་སྦགས་བཙོག་དང་བདེ་འཇགས་ལ་གནོད་པའི་རྐྱེན་རྩ་ཞིབ་བཤེར་བཅོས་སྐྱོང་བྱེད་པའི་བྱ་བ་ལེགས་པོར་བསྒྲུབས་ནས། གཏེར་སྙིགས་གསོག་མཛོད་བདེ་འཇགས་ཀྱི་ཁོར་ཡུག་སྲུང་སྐྱོབ་བརྟན་བརླིང་ངང་འཁོར་སྐྱོད་བྱེད་པར་འགན་སྲུང་བྱ་དགོས་པ་ནན་གྱིས་བསྟན།
གྲོས་ཚོགས་ལས་ཞིང་ཆེན་ཡོངས་ཀྱི་སྲིད་གཞུང་ཁོངས་གཏོགས་ཀྱིས་ཡང་དག་པའི་སྲིད་འབྲས་ལྟ་བ་འཛུགས་པ་དང་ལག་ལེན་བསྟར་བའི་སློབ་སྦྱོང་དང་སློབ་གསོ་ཏན་ཏིག་དང་ནུས་ལྡན་ངང་སྤེལ་དགོས་པ་དང་། རང་རྟོགས་སྒོས་མི་དམངས་ལ་སྲིད་འབྲས་འདོན་པ་དང་། དངོས་སྒྲུབ་ལ་བརྟེན་ནས་སྲིད་འབྲས་འདོན་པ། དམིགས་འབེན་གཏན་འཁེལ་དང་ཤུགས་ཆེ་རུ་བཏང་ནས་འཕར་སྣོན་བརྟན་པོ་དང་ཉེན་ཁ་འགོག་པ། དམངས་འཚོ་འགན་སྲུང་བཅས་ཀྱི་བྱ་བ་སྣ་ཚོགས་ལ་གཅིག་གྱུར་འཆར་འགོད་བྱས་ནས་ལེགས་པར་སྒྲུབ་སྟེ། ཧུར་ཐག་གིས་དུས་ཚིགས་དང་པོའི“འགོ་ཡག་པོ”རྩོམ་པ་མངོན་འགྱུར་བྱས་ནས། “ལོ་ལྔའི་འཆར་འགོད་བཅོ་ལྔ་པའི”འགོ་ཡག་པོ་རྩོམ་པར་སྐུལ་འདེད་གཏོང་ཆེད་རྨང་གཞི་ཇེ་བརྟན་དུ་གཏོང་དགོས་པ་ནན་གྱིས་བསྟན།
གྲོས་ཚོགས་ལས་ད་དུང་དོན་དག་གཞན་དག་ལ་ཞིབ་འཇུག་བྱས།
