མགོན་པོ་བཀྲ་ཤིས་ཀྱིས་ནུབ་རྒྱུད་གཏེར་ལས་སྡེ་ཚོགས་སུ་རྟོག་ཞིབ་བྱས།

 

ཟླ2པའི་ཚེས27ཉིན།  ཞིང་ཆེན་སྲིད་གྲོས་ཀྱི་ཏང་ཙུའུ་ཧྲུའུ་ཅི།    ཀྲུའུ་ཞི་མགོན་པོ་བཀྲ་ཤིས་ནུབ་རྒྱུད་གཏེར་ལས་སྡེ་ཚོགས་ཚད་ཡོད་ཀུང་སི་རུ་སོང་ནས་མཚོ་སྔོན་གྱི་ཚྭའི་ཐོན་ཁུངས་ནུས་ཡོད་སྒོས་གསར་སྤེལ་བེད་སྤྱོད་བྱེད་པར་སྐུལ་འདེད་བཏང་ནས་འཛམ་གླིང་རིམ་པའི་ཚྭ་མཚོའི་ཐོན་ལས་རྟེན་གཞི་འཛུགས་སྐྲུན་བྱེད་པར་རོགས་འདེགས་བྱེད་པའི་ཐད་བཞུགས་མོལ་དང་རྟོག་ཞིབ་བྱས།

བཞུགས་མོལ་ཚོགས་འདུའི་སྟེང་།  ནུབ་རྒྱུད་གཏེར་ལས་སྡེ་ཚོགས་ཚད་ཡོད་ཀུང་སིས་མཚོ་སྔོན་གྱི་ཚྭའི་ཐོན་ཁུངས་རྩད་ཞིབ་གསར་སྤེལ་དང་ཐོན་ལས་རྒྱུན་སྲིང་བཀོད་སྒྲིག   ལྗང་མདོག་ཐཱན་ཉུང་ཚུལ་སྒྱུར།   ཚན་རྩལ་གསར་གཏོད་མཁྲེགས་གཏོར་སོགས་གནས་ཚུལ་ཡར་ཞུ་བྱས་པ་དང་།     ཚོགས་ཞུགས་མི་སྣས་ཐོན་ཁུངས་ལེགས་སྒྲིག་དང་ལག་རྩལ་ཐོལ་བརྒལ།   ཁྲོམ་ར་རྒྱ་སྐྱེད།  སྲིད་ཇུས་ཀྱི་འདེགས་སྐྱོར་སོགས་གནད་དོན་གཙོ་བོའི་ཐད་ནས་བརྗེ་རེས་ཟབ་མོ་བྱས། མགོན་པོ་བཀྲ་ཤིས་ཀྱིས་ཚོགས་ཞུགས་མི་སྣའི་གཏམ་བཤད་ལ་གཟབ་ནན་གྱིས་ཉན་པ་དང་།    ཚང་མ་དང་མཉམ་དུ་འཕེལ་རྒྱས་ཀྱི་འགག་གནད་དང་དཀའ་གནད་ཐད་ནས་ཞིབ་བསྡུར་བྱས།  ཁོས་བསྟན་དོན།   འཛམ་གླིང་རིམ་པའི་ཚྭ་མཚོའི་ཐོན་ལས་རྟེན་གཞི་འཛུགས་སྐྲུན་བྱེད་པ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་ལ་བཏོན་པའི་འཕེལ་རྒྱས་འཐབ་ཇུས་གལ་ཆེན་ཞིག་ཡིན་ལ།   མཚོ་སྔོན་གྱི་ཕྲག་ཏུ་བབས་པའི་ཆབ་སྲིད་ལས་འགན་དང་ལོ་རྒྱུས་ཀྱི་ལས་འགན་གལ་ཆེན་ཞིག་ཡིན།   ནུབ་རྒྱུད་གཏེར་ལས་སྡེ་ཚོགས་ཞིང་ཆེན་ཁོངས་གཏོགས་ཀྱི་རྒྱལ་དབང་རྐང་འཛིན་ཁེ་ལས་གཙོ་བོ་ཡིན་པའི་ཆ་ནས་གཏེར་ལས་ལ་བརྟེན་ནས་རྒྱལ་ཁབ་ལ་དྲིན་ལན་འཇལ་བ་དང་།   ཚྭ་མཚོའི་ཐོན་ལས་གསར་སྤེལ་ཟབ་མོ་བྱེད་པ།   ཞིང་ཆེན་ཡོངས་ཀྱི་འཕེལ་རྒྱས་ཀྱི་སྤྱི་ཡོངས་ལ་ཞབས་འདེགས་ཞུ་བ་བཅས་རྒྱུན་འཁྱོངས་བྱས་ནས་མཚོ་སྔོན་གྱི་དཔལ་འབྱོར་སྤྱི་ཚོགས་འཕེལ་རྒྱས་ཐད་བྱས་རྗེས་གལ་ཆེན་བཞག  

མགོན་པོ་བཀྲ་ཤིས་ཀྱིས་ནན་གྱིས་བསྟན་དོན།     དུས་ཚོད་དམ་འཛིན་སྒོས་སྤྱིའི་བྱ་བའི་ཇུས་གཞི་གཏན་འབེབས་བྱེད་པ་དང་།   ལས་རིམ་སོ་སོའི་ལས་འགན་གཙོ་བོ་དང་འགན་འཁྲི་གཙོ་བོ།    བྱ་བའི་གོ་རིམ།   དུས་ཚོད་བཅས་གཏན་འཁེལ་གསལ་བོ་བྱས་ནས་ནུས་ཡོད་དང་གོ་རིམ་ལྡན་པའི་སྒོ་ནས་བྱ་བ་སོ་སོའི་འཕེལ་རིམ་ལ་གཅིག་གྱུར་སྐུལ་འདེད་གཏོང་དགོས།   ཞིང་ཆེན་ནང་ཁུལ་གྱི་བརྟག་ཞིབ་ལས་དོན་ལ་རྩ་འཛུགས་ནན་མོ་བྱས་ཏེ་བརྟག་ཞིབ་གནད་བསྡུས་གཏན་འབེབས་དང་བརྟག་ཞིབ་ཀྱི་ནང་དོན་གཙོ་བོ་གཏན་འཁེལ་གསལ་བོ་བྱས་ནས་མཚོ་སྔོན་གྱི་ཚྭའི་ཐོན་ཁུངས་ལྗང་མདོག་གསར་སྤེལ་དང་ཐོན་སྐྱེད་ལས་སྣོན།   བྱེད་ནུས་ཐོན་རྫས་ཞིབ་འཇུག་གསར་སྤེལ།  དེ་མིན་ཚྭ་མཚོ་དང་རིག་གནས་ཡུལ་སྐོར་མཉམ་བསྲེས་འཕེལ་རྒྱས་སོགས་ཀྱི་གནས་ཚུལ་ལ་རྒྱུས་ལོན་ཟབ་མོ་བྱེད་དགོས།    ཞིང་ཆེན་གཞན་དུ་སོང་ནས་སློབ་སྦྱོང་དང་རྟོག་ཞིབ་བྱེད་པའི་བྱ་བ་སྤེལ་ཏེ་མཚོ་སྔོན་གྱི་ཚྭའི་ཁྲོམ་རའི་ཚོང་གཉེར་དང་ཐོན་ལས་མཉམ་ལས་ལ་སྐུལ་འདེད།    ཐོན་སློབ་ཞིབ་གསུམ་གཞི་གཅིག་ཅན་གྱི་བརྗེ་རེས་གཏིང་ཟབ་ཏུ་སྤེལ་བ་སོགས་རྟོག་ཞིབ་བྱ་བའི་གཙོ་གནད་གཏན་འཁེལ་གསལ་བོ་བྱེད་པ་དང་།    ཅང་སུའུ་དང་ཧོ་ནན་ཞིང་ཆེན་དུ་བརྗེ་རེས་རྟོབ་ཞིབ་བྱེད་དུ་སོང་ནས་མཚོ་སྔོན་གྱི་ཚྭའི་ཐོན་འཚོང་མཉམ་ལས་སྦྲེལ་མཐུད་ཟབ་མོ་བྱེད་དགོས།     དངོས་གཉེར་གྱིས་དྲིལ་སྒྲོག་ཁྱབ་གདལ་དང་ཆེད་མཁས་པའི་ཞིབ་བསྡུར་བརྗེ་རེས་བྱ་འགུལ་སྤེལ་ནས་ཞིང་ཆེན་ནང་ཁུལ་དུ་བརྟག་ཞིབ་དང་ཞིང་ཆེན་གཞན་དུ་རྟོག་ཞིབ་བྱེད་པའི་རྨང་གཞིའི་སྟེང་།    དྲིལ་སྒྲོག་ཁྱབ་གདལ་དང་ཆེད་མཁས་པའི་ཞིབ་འཇུག་གྲོས་མོལ་བྱ་འགུལ་མཉམ་དུ་སྤེལ་ནས་མཚོ་སྔོན་ཚྭའི་ཟོང་རྟགས་ཀྱི་ཤུགས་རྐྱེན་སྔར་ལས་མཐོར་འདེགས་གཏོང་དགོས།     མ་ལག་ལྡན་པའི་སྒོ་ནས་གྲོས་མོལ་ཕན་འབྲས་སྤྱི་སྡོམ་དང་མཐོར་འདེགས་གཏོང་བ་དང་།  ཆེད་དོན་གྲོས་མོལ་གྲུབ་འབྲས་ཐད་གནས་པའི་གནད་དོན་དང་དེ་མིན་བསམ་འཆར་དང་གྲོས་གཞི་ཕྱོགས་ཡོངས་ནས་ལེགས་སྒྲིག་བྱས་ཏེ་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་ལ་ཇུས་ཆོད་དཔྱད་གཞི་འདོན་སྤྲོད་བྱེད་པ་དང་།    གྲུབ་འབྲས་ཚུལ་སྒྱུར་དོན་འཁྱོལ་དང་འབྲེལ་བའི་བྱ་བ་མཐུན་སྦྱོར་སྒོས་བཟང་བོར་བསྒྲུབ་ནས་གྲོས་མོལ་གྲུབ་འབྲས་དེ་ཐོན་ལས་འཕེལ་རྒྱས་ལ་སྐུལ་འདེད་གཏོང་བའི་ཕན་འབྲས་དངོས་སུ་བསྒྱུར་དགོས།

མགོན་པོ་བཀྲ་ཤིས་ཀྱིས་བསྟན་དོན།   ཞིང་ཆེན་སྲིད་གྲོས་ཀྱིས་ཆེད་དོན་གྲོས་མོལ་ལས་ཁུངས་ཀྱི་བྱེད་ནུས་རྒྱུན་མཐུད་ངང་འདོན་སྤེལ་བྱས་ཏེ་མཚོ་སྔོན་གྱི་ཚྭའི་ཐོན་ལས་འཕེལ་རྒྱས་ལ་དམིགས་ནས་བརྟག་ཞིབ་སྲིད་གླེང་གཏིང་ཟབ་ཏུ་སྤེལ་བ་དང་ཐུན་མོང་གི་ངོས་འཛིན་གཅིག་བསྡུས་བྱེད་པ།   ཕྱོགས་སོ་སོའི་སྟོབས་ཤུགས་མཐུན་སྦྱོར་བཟང་བོ་བཅས་བྱས་ཏེ་ཁེ་ལས་ཀྱི་དཀའ་ཁག་སེལ་བ་དང་ཐོན་ལས་ཀྱི་སྤུས་འདེགས་ནུས་སྤེལ་ཐད་རོགས་འདེགས་བྱེད་ངེས།     ནུབ་རྒྱུད་གཏེར་ལས་སྡེ་ཚོགས་ཀྱིས་ཡིད་ཆེས་ཇེ་བརྟན་དུ་གཏོང་བ་དང་དངོས་སྒྲུབ་སྔོན་བརྩོན་བྱས་ཏེ་མཚོ་སྔོན་གྱི་ཚྭའི་ཐོན་ཁུངས་སྤུས་ཚད་མཐོ་བའི་སྒོ་ནས་གསར་སྤེལ་བེད་སྤྱོད་བྱེད་པའི་ཕན་འབྲས་གསར་པར་བརྟེན་ནས་ཀྲུང་གོའི་ལུགས་ཀྱི་དེང་རབས་ཅན་གྱི་མཚོ་སྔོན་གྱི་ལག་ལེན་ལ་འབད་པས་སྐུལ་འདེད་གཏོང་བའི་ཐད་བྱས་རྗེས་འཇོག་རྒྱུའི་རེ་བ་བཅངས་ཡོད།

ཀྲང་ཞའོ་རོང་བཞུགས་མོལ་ཚོགས་འདུར་ཞུགས།