མཚོ་སྔོན་དུ་སྡོད་པའི་རྒྱལ་ཡོངས་སྲིད་གྲོས་ཨུ་ཡོན་རྒྱལ་སར་མ་སོང་སྔོན་གྱི་བཞུགས་མོལ་ཚོགས་འདུ་བསྡུས།

 

ཟླ2པའི་ཚེས27ཉིན། ཞིང་ཆེན་སྲིད་གྲོས་ཀྱིས་མཚོ་སྔོན་དུ་སྡོད་པའི་རྒྱལ་ཡོངས་སྲིད་གྲོས་ཨུ་ཡོན་རྒྱལ་སར་མ་སོང་སྔོན་གྱི་བཞུགས་མོལ་ཚོགས་འདུ་བསྡུས་ཏེ། རང་ཞིང་གི་རྒྱལ་ཡོངས་ཚོགས་ཆེན་གཉིས་ཀྱི་གྲ་སྒྲིག་གནས་ཚུལ་གྱི་སྙན་ཞུ་ཚོགས་འདུའི་དགོངས་དོན་སློབ་སྦྱོང་དང་བརྒྱུད་སྒྲོག་བྱས་པ་དང་། སྔར་ལས་ལྷག་པའི་སྒོ་ནས་བསམ་བློ་གཅིག་གྱུར་དང་། ཐུན་མོང་གི་ངོས་འཛིན་གཅིག་གྱུར་བྱས་ཏེ། རྒྱལ་སར་བསྐྱོད་ནས་རྒྱལ་ཡོངས་ཚོགས་ཆེན་གཉིས་ལ་ཞུགས་པར་གྲ་སྒྲིག་གང་ལེགས་བྱས། རྒྱལ་ཡོངས་སྲིད་གྲོས་ཨུ་ཡོན་དང་མཚོ་སྔོན་དུ་སྡོད་པའི་རྒྱལ་ཡོངས་སྲིད་གྲོས་ཨུ་ཡོན་རྣམས་ཕྱོགས་གཅིག་ཏུ་བསྡུས་པ་དང་། ཞིང་ཆེན་སྲིད་གྲོས་ཀྱི་ཀྲུའུ་ཞི་མགོན་པོ་བཀྲ་ཤིས་ཚོགས་འདུར་ཞུགས་པར་མ་ཟད་གཏམ་བཤད། རྒྱལ་ཡོངས་སྲིད་གྲོས་ཨུ་ཡོན། ཞིང་ཆེན་སྲིད་གྲོས་ཀྱི་ཀྲུའུ་ཞི་གཞོན་པ་ཝང་ཞུན་གྱིས་འགོ་འཛིན་བྱས།

ཚོགས་འདུ་ལས། ལིའུ་ཐུང་ཏི། མཱ་ཡའོ་ཞང་། ཝང་ཁུན། ཀྲུའུ་ཁྲུན་ཡུན། ལི་ཆིན། ཨུ་ཁྲུང་རུང་། ཀྲུའོ་ཧའེ་ཞང་། ཀའོ་ཆིན་པའོ། ཅིན་ཧྭ། མཱ་ཧའེ་ཅོན། ཧན་ཝུན་ལཱང་། ཀྲང་དབྱིན་སོགས་མཚོ་སྔོན་དུ་སྡོད་པའི་རྒྱལ་ཡོངས་སྲིད་གྲོས་ཨུ་ཡོན་གྱིས་གྲོས་གཞི་འབུལ་བ་དང་། རིགས་དབྱེ་ཚོ་ཆུང་གི་གཏམ་བཤད་སོགས་ཀྱི་བྱ་བའི་ཐད། རིམ་བཞིན་སོ་སོས་གྲ་སྒྲིག་བྱས་པའི་གནས་ཚུལ་ངོ་སྤྲོད་དང་གཏམ་བཤད་སྤེལ། ཚང་མས་མཉམ་གཅིག་ཏུ་ཞིང་ཆེན་ཏང་ཨུའི་མངག་བཅོལ་དང་ཞིང་ཆེན་ཡོངས་ཀྱི་རིགས་སོ་སོའི་མི་དམངས་ཀྱི་རེ་སྒུག་ཡིད་ལ་དམ་པོར་བཟུང་སྟེ། ཚོགས་ཆེན་གྱི་སྒྲིག་ལམ་དམ་པོར་སྲུང་བ་དང་། སྤུས་ཚད་མཐོ་བའི་ཐབས་འདོན་ཇུས་འབུལ་ལ་བརྟེན་ནས། རང་ཞིང་རྒྱལ་ཁབ་ཀྱི་ཁྱོན་ཡོངས་ཁྲོད་མཉམ་འདྲེས་དང་ཞབས་ཞུ་བྱེད་པར་སྐུལ་འདེད་གཏོང་རྒྱུ་ཡིན་ཞེས་བསྟན།

མགོན་པོ་བཀྲ་ཤིས་ཀྱིས་བསྟན་དོན། ཞིང་ཆེན་ཏང་ཨུའི་བློ་བརྟན་འགྱུར་མེད་ཀྱི་འགོ་ཁྲིད་འོག མཚོ་སྔོན་དུ་སྡོད་པའི་རྒྱལ་ཡོངས་སྲིད་གྲོས་ཨུ་ཡོན་གྱི་ཆབ་སྲིད་བསམ་བློའི་བློ་སྦྱོང་མུ་མཐུད་དུ་མཐོར་གདེགས་གཏོང་བ་དང་། སྲིད་ཞུགས་སྲིད་གླེང་གི་ནུས་པ་རྒྱུན་ཆད་མེད་པར་མཐོ་རུ་གཏོང་བ། ལྟེ་བར་དམིགས་པ་དང་སྤྱི་ཡོངས་ལ་ཞབས་ཞུ་བྱེད་པའི་འགན་སྒྲུབ་ཆུ་ཚད་མུ་མཐུད་དུ་མཐོར་འདེགས་གཏོང་བ་བཅས་བྱས་ཏེ། མཚོ་སྔོན་གྱི་སྤུས་ཚད་མཐོ་བའི་འཕེལ་རྒྱས་ལ་ཧུར་ཐག་གིས་བྱས་རྗེས་འཇོག་པར་སྐུལ་འདེད་གཏོང་དགོས།

མགོན་པོ་བཀྲ་ཤིས་ཀྱིས་ད་ལོའི་རྒྱལ་ཡོངས་ཚོགས་ཆེན་གཉིས་ནི་ལོ་ལྔའི་འཆར་འགོད་བཅོ་ལྔ་པ་གཏན་འབེབས་ལག་བསྟར་བྱེད་པ་དང་། ཁྱོན་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་ཀྱི་བགྲོད་ལམ་གསར་འཛུགས་བྱེད་པའི་གནད་འགག་གི་དུས་སྐབས་སུ་བསྡུས་པའི་གྲོས་ཚོགས་གལ་ཆེན་ཞིག་ཡིན་ལ། ཐེངས་འདིའི་ཚོགས་ཆེན་བདེ་བླག་ངང་འཚོགས་ཐུབ་པར་དོན་སྙིང་གལ་ཆེན་ལྡན། སྤུས་ཚད་མཐོ་བའི་སྒོ་ནས་ཚོགས་ཆེན་ལ་ཞུགས་པའི་རྒྱུ་ཆ་དག་སྒྲིག་དང་གྲ་སྒྲིག་ཡང་ཡང་བྱེད་དགོས། ཚོགས་ཆེན་སྔོན་གྱི་དུས་ཚོད་བེད་སྤྱད་དེ་རང་ངོས་ཀྱི་ཁྱད་ཆོས་དང་དངོས་ཡོད་བྱ་བ་ཟུང་འབྲེལ་བྱས་ཏེ། གྲོས་ཚོགས་ཀྱི་བླང་བྱ་དོན་འཁྱོལ་བྱེད་པ་དང་སྤུས་ཚད་མཐོ་བའི་གྲོས་གཞི་འདོན་པ་གཉིས་ཟུང་འབྲེལ་བྱས་ཏེ། གྲ་སྒྲིག་བྱ་བའི་རྨང་གཞིའི་སྟེང་། གྲོས་གཞི་འདོན་པ་དང་ཚོགས་ཆེན་གྱི་གཏམ་བཤད་སོགས་ཀྱི་བྱ་བ་ཡང་བསྐྱར་འཐུས་ཚང་དུ་གཏོང་དགོས། ཚོགས་པའི་འགྲིལ་ཤུགས་གཅིག་བསྡུས་བྱས་ཏེ་མཚོ་སྔོན་གྱི་སྣང་བརྙན་བཟང་བོ་མངོན་དགོས་ལ། མཚོ་སྔོན་གྱི་གྲོས་གཞི་བཟང་བོ་འབུལ་དགོས། ཆབ་སྲིད་ཀྱི་འགན་འཁྲི་དམ་འཛིན་བྱེད་པ་དང་། སྙིང་སྟོབས་ཀྱིས་ཁེངས་པའི་རྣམ་པ་རྒྱུན་འཁྱོངས་བྱས་ཏེ། “རྒྱལ་དོན་གྱི་ཆེ་ཕྱོགས”དང“ཞིང་ཆེན་གྱི་དོན་ཆེན”ལ་རྐང་བཙུགས་ནས། སྲིད་གླེང་ཇུས་འབུལ་གྱི་ནུས་པ་ཆེར་སྐྱེད་དང་། མཚོ་སྔོན་གྱི་གཏམ་རྒྱུད་ལེགས་པོར་བརྗོད་པའི་འགན་འཁྲི་བརྟན་པོར་འཁུར་དགོས་ལ། ལངས་གཟུགས་ཅན་དང་ཚོགས་ར་ཡོངས་ཀྱི་རྣམ་པས་མཚོ་སྔོན་གྱིས་མཚོ་བོད་མཐོ་སྒང་གི་སྐྱེ་ཁམས་སྲུང་སྐྱོབ་དང་སྤུས་ཚད་མཐོ་བའི་འཕེལ་རྒྱས། མི་རིགས་མཐུན་སྒྲིལ་ཡར་ཐོན། མཐོ་སྒང་གི་ཁམས་གསོའི་ཐོན་ལས་འཕེལ་རྒྱས་སོགས་ཕྱོགས་ཀྱི་འགྱུར་ལྡོག་གསར་བ་དང་གྲུབ་འབྲས་གསར་བ་སྐུལ་འདེད་བཏང་བ་ལེགས་པོར་བརྗོད་དགོས། ཞིང་ཆེན་སྲིད་གྲོས་གཞུང་སྒྲུབ་ཐིང་གིས་སྔར་ལས་ལྷག་པའི་སྒོ་ནས་བྱ་བའི་ལས་རིམ་ཞིབ་ཕྲ་ཅན་དང་སྤུས་ལེགས་ཅན་དུ་བསྒྱུར་ཏེ། ཞབས་ཞུ་འགན་སྲུང་གི་བྱ་བ་ཁག་ལེགས་པོར་སྒྲུབ་པ་དང་། དྲིལ་བསྒྲགས་སྙན་ཞུའི་བྱ་བ་རྩ་འཛུགས་ལེགས་པོ་བྱེད་པ། ཁྱད་པར་དུ“ཨུ་ཡོན་བརྒྱུད་ལམ”གྱི་དྲིལ་བསྒྲགས་གོ་སྐབས་དམ་འཛིན་བྱས་ཏེ། རྣམ་པ་མི་འདྲ་བ་དང་མཐོང་སྣེ་མི་འདྲ་བ། རིམ་པ་མི་འདྲ་བ་བཅས་ཀྱིས་མཚོ་སྔོན་དུ་སྡོད་པའི་རྒྱལ་ཡོངས་སྲིད་གྲོས་ཨུ་ཡོན་གྱི་འགན་སྒྲུབ་གྲུབ་འབྲས་དང་རྣམ་པ་བཟང་བོ་མངོན་དགོས་པར་མ་ཟད། ཐུན་མོང་གིས་མཚོ་སྔོན་འཕེལ་རྒྱས་ཀྱི་གཏམ་རྒྱུད་ཕུན་སུམ་ཚོགས་པ་དང་གསོན་ཉམས་ལྡན་པ། ངོ་མཚར་བ་བཅས་ཀྱི་སྒོ་ནས་བརྗོད་དགོས་ཞེས་བསྟན།