མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
——ཞིང་ཆེན་དམངས་འཐུས་ཚོགས་ཆེན་སྐབས་བཅུ་བཞི་པའི་གྲོས་ཚོགས་ཐེངས་བཞི་པའི་གསར་འགྱུར་སྒྲོག་སྤེལ་ཚོགས་འདུའི་དངོས་བྲིས།
ཟླ་དང་པོའི་ཚེས27ཉིན་གྱི་ཕྱི་དྲོར། ཞིང་ཆེན་དམངས་འཐུས་ཚོགས་ཆེན་སྐབས་བཅུ་བཞི་པའི་གྲོས་ཚོགས་ཐེངས་བཞི་པས“སྤུས་ཚད་མཐོ་བའི་འཕེལ་རྒྱས་ལ་དམིགས་པ”ཞེས་པའི་བརྗོད་དོན་གཙོ་བོའི་གསར་འགྱུར་སྒྲོག་སྤེལ་ཚོགས་འདུ་བསྡུས་ཏེ། ཞིང་ཆེན་ནགས་ལས་དང་རྩྭ་ཐང་ཅུས་ཀྱི་ཅུས་ཀྲང་གཞོན་པ་ཐེན་ཅན་དང་། ཞིང་ཆེན་འགྲིམ་འགྲུལ་སྐྱེལ་འདྲེན་ཐིང་ཏང་ཙུའུ་ཁོངས་མི། ཐིང་ཀྲང་གཞོན་པ་ཀྲང་ཀྲི་ཅེ། མཚོ་བྱང་བོད་རིགས་རང་སྐྱོང་ཁུལ་རྒྱ་མདོ་ཧུའེ་རིགས་རང་སྐྱོང་རྫོང་ཨུའི་ཧྲུའུ་ཅི། རྫོང་དཔོན་གཞོན་པ་མིན་ཐུང་ཀུང་། མཚོ་ཤར་གྲོང་ཁྱེར་ཧོར་གྲོང་ཧོར་རིགས་རང་སྐྱོང་རྫོང་གི་རྫོང་དཔོན་གཞོན་པ་ཧྲི་ཚོན་ཧྥིན། མཚོ་ཤར་གྲོང་ཁྱེར་དཔའ་ལུང་ཧུའེ་རིགས་རང་སྐྱོང་རྫོང་ཨུའི་ཧྲུའུ་ཅི་གཞོན་པ། རྫོང་དཔོན་ཡེ་ཞང་བཅས་ཀྱིས་རང་ཞིང་གིས་ན་ནིང་ཚུན་ལ་རྒྱལ་ཁབ་སྤྱི་གླིང་འཛུགས་སྐྲུན་དང་། འགྲིམ་འགྲུལ་སྐྱེལ་འདྲེན་ལས་དོན། གངས་འཁྱགས་དཔལ་འབྱོར། སྔོ་ཚལ་བསིལ་གྲང་དང་འཕྲལ་སྡོམ་ཉེན་གཡོལ་སོགས་ཀྱི་ཐད་ལ་བླངས་པའི་མངོན་གསལ་གྱི་འཕེལ་རྒྱས་གྲུབ་འབྲས་དང་བྱ་བའི་སྐུལ་འདེད་གནས་ཚུལ་ངོ་སྤྲོད་གནང་བ་རེད།
སྐྱེ་ཁམས་སྲུང་སྐྱོབ་ལག་ལེན་གཏིང་ཟབ་བྱས་ནས་རྒྱལ་ཁབ་སྤྱི་གླིང་གི་དཔེ་སྟོན་ཞིང་ཆེན་འཛུགས་སྐྲུན་ལ་ནུས་ཤུགས་ཡོད་རྒུས་སྐུལ་འདེད་བཏང་བ།
ཞིང་ཆེན་ནགས་ལས་རྩྭ་ཐང་ཅུས་ཀྱི་ཅུས་ཀྲང་གཞོན་པ། ཐེན་ཅན།
མཚོ་སྔོན་ནི་གཙང་གསུམ་མགོ་ཁུངས་དང“ཀྲུང་ཧྭའི་ཆུ་མཛོད”ཡིན་ཞིང་། རྒྱལ་ཁབ་ཀྱི་སྐྱེ་ཁམས་བདེ་འཇགས་སྲུང་ཡོལ་གལ་ཆེན་ཞིག་ཀྱང་ཡིན། ཉེ་བའི་ལོ་ཤས་རིང་ང་ཚོས་ཞི་ཅིན་ཕིང་གི་སྐྱེ་ཁམས་ཤེས་དཔལ་གྱི་དགོངས་པ་སློབ་སྦྱོང་དང་ལག་བསྟར་གཏིང་ཟབ་དང་། ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཚང་འཛོམས་གྲོས་ཚོགས་ཐེངས་རིམ་བྱུང་གི་དགོངས་དོན་དང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་དུ་རྟོག་ཞིབ་གནང་སྐབས་ཀྱི་གསུང་བཤད་གལ་ཆེན་གྱི་དགོངས་དོན་ལག་བསྟར་དོན་འཁྱོལ་བྱས། “ཆེ་ཤོས་གསུམ”གྱི་ཞིང་ཆེན་གནས་ཚུལ་གྱི་གནས་གཏན་འཁེལ་དང“སྔར་བས་གལ་ཆེན་བ་གསུམ”གྱི་འཐབ་ཇུས་གནས་བབ་ལ་གཞི་བཙུགས་ནས། རྒྱལ་ཁབ་སྤྱི་གླིང་དཔེ་སྟོན་ཞིང་ཆེན་འཛུགས་སྐྲུན་སྣེ་ཁྲིད་དུ་འཛིན་པ་དང་། “བྱང་གསུམ”འགག་སྒྲོལ་འདེགས་སྐྱོར་དུ་བརྩི་བ། ནགས་ཚལ་དང་རྩྭ་དཔོན་ལམ་ལུགས་དམ་འཛིན་བྱེད་སར་བཟུང་ནས་ རི་ཆུ་ནགས་ཞིང་མཚེའུ་དང་རྩྭ་ཐང་བྱེ་ས་གཞི་གཅིག་ཅན་གྱི་སྲུང་སྐྱོབ་དང་མ་ལག་བཅོས་སྐྱོང་ལ་གཅིག་འདོམས་བྱས་ཏེ། ཀྲུང་གོའི་ལུགས་ཀྱི་དེང་རབས་ཅན་མཚོ་སྔོན་གསར་པ་མགྱོགས་མྱུར་སྒོས་བསྐྲུན་ཆེད་ནགས་རྩྭའི་སྟོབས་ཤུགས་ལེགས་སྐྱེས་སུ་ཕུལ།
“རི་གཉིས”ཀྱི་འདུ་ཤེས་ལག་བསྟར་དང་སྐྱེ་ཁམས་ཐོན་རྫས་ཀྱི་རིན་ཐང་མངོན་འགྱུར་བྱེད་པའི་ཐབས་ལམ་རྒྱ་ཆེར་གཏོང་བའི་ཐད། ང་ཚོས“རི་གཉིས”ཀྱི་གཞན་སྒྱུར་ཐབས་ལམ་རྒྱ་སྐྱེད་ཧུར་ཐག་བཏང་ཡོད། “ཟི་ལིང་གི་སྤྱན་མིག”ཅེས་པ་ཟི་ལིང་གི་ས་རྟགས་རང་བཞིན་གྱི་གནས་གྲགས་ཅན་དུ་གྱུར་པ་དང་། ཟི་ལིང་བྱང་རིའི་ཏ་ཏུན་ལིང་(大墩岭)མཛེས་ལྗོངས་ཁུལ་དུ་ཡོང་མཁན་ཡུལ་སྐོར་བ་བསྡོམས་པས་་ཁྲི20ལ་བསླེབས། “ཟི་ལིང་གི་སྤྱན་མིག”ཅེས་པའི་རང་མོས་སྨྱན་སྦྱོར་གྱི་ཀློག་གྲངས་ཁྲི912ལ་ཟིན་པ་བཅས་ཟི་ལིང་གྲོང་ཁྱེར་གྱི་ལྟ་སྐོར་པའི་མི་གྲངས་ཀྱི་ཨང་དང་པོར་ཟིན་ནས་མཚོ་སྔོན་གྱིས་ནགས་ཁྲོད་ཐོན་ལས་འཕེལ་རྒྱས་དང་ལྗང་མདོག་ཕྱོགས་སྒྱུར་འཚོལ་ཞིབ་བྱེད་པའི“བསྡུས་གཟུགས”སུ་གྱུར། རྒྱལ་ཡོངས་ཀྱི་རྒྱལ་ཁབ་སྤྱི་གླིང་སྒྲིག་སྲོལ་ཚོད་ལྟ་བྱེད་མགོ་ཚུགས་ས་ཐོག་མ་ཡིན་པའི་ཆ་ནས། མཚོ་སྔོན་གྱིས་གཙང་གསུམ་མགོ་ཁུངས་དང་མདོ་ལ་རི་བོ། མཚོ་སྔོན་པོ་བཅས་རྒྱལ་ཁབ་སྤྱི་གླིང་གསུམ་གྱི་ཁྱད་ཆོས་མི་འདྲ་བ་དང་ཐོན་ཁུངས་ཀྱི་ལེགས་ཆ་ཟུང་འབྲེལ་བྱས་ཏེ། དམིགས་བསལ་གཉེར་སྐྱོང་སོགས་གཉེར་སྐྱོང་རང་བཞིན་གྱི་ཞབས་ཞུའི་ཧེ་བག་ཅན་གྱི་འཕེལ་རྒྱས་བསམ་ཕྱོགས་བཏོན་པ་མ་ཟད། ས་གནས་དེ་གའི་སྡེ་མིའི་ཡོང་སྒོ་འཕར་བའི་ཐབས་ལམ་དང་བདེ་སྐྱིད་མཁོ་འདོན་བྱས།
“དུད་ཚང་རེར་ལས་གནས་གཅིག”གི་ལམ་སྲོལ་ཁྱབ་གདལ་བཏང་ནས། མང་ཚོགས་ལ་སྐྱེ་ཁམས་ཁྱིམ་གཞིས་མཉམ་སྐྲུན་དང་སྐྱེ་ཁམས་བདེ་སྐྱིད་མཉམ་སྤྱོད་བྱ་བར་ཁྲིད་སྟོན་ཐད་ནས“སྐྱེ་ཁམས་དོ་དམ་སྲུང་སྐྱོབ་པ”ཅུས་ཨེ་ལུའུ་འདུས་པའི་དོ་དམ་སྲུང་སྐྱོབ་པ་ཚོས་འཐབ་ས་དང་པོར་གཞི་ཚུགས་ཏེ། ནགས་རྩྭ་དང་རྒྱལ་ཁབ་སྤྱི་གླིང་ལ་དགའ་ཞེན་བྱེད་པ་དེ་ཡུན་གཏན་གྱི་སྲུང་སྐྱོབ་དུ་འགྱུར་བ་བྱས་ནས། འགན་འཁྲི་ཁག་ཁུར་དེ་ཕ་ཡུལ་གྱི་སྔོ་ལྗང་རི་ཀླུང་དུ་འཐིམ་པར་བྱས་ཡོད། སྐྱེ་ཁམས་དོ་དམ་སྲུང་སྐྱོབ་པའི་ལམ་ལུགས་ལག་བསྟར་བྱས་པ་དང་བསྟུན་ནས། འབྲོག་པ་དེ་བས་མང་བ་སྐྱེ་ཁམས་སྲུང་སྐྱོབ་མཁན་དུ་གྱུར་ཡོད་པ་རེད། མིག་སྔར་ཞིང་ཆེན་ཡོངས་སུ་རིགས་ཁག་གི་སྐྱེ་ཁམས་ནགས་སྲུང་བ་ཁྲི་8ལྷག་ཙམ་ཡོད་པ་དང་དུད་ཚང་རེར་ལོ་རེར་ཡོང་སྒོ་སྒོར་ཁྲི་2ཙམ་བྱུང་ཡོད།2025ལོའི་ལོ་མཇུག་ཏུ་གཙང་གསུམ་མགོ་ཁུངས་རྒྱལ་ཁབ་སྤྱི་གླིང་གིས་རྒྱ་སྐྱེད་ཁུལ་དུ“དུད་ཚང་རེར་ལས་གནས་གཅིག”གི་སྐྱེ་ཁམས་དོ་དམ་སྲུང་སྐྱོབ་གི་སྤྱི་ཕན་ལས་གནས་ཇེ་མང་དུ་བཏང་སྟེ། དེ་སྔའི17211ནས20843ལ་འཕར་བ་དང་མི་རེར་ཟླ་རེར་སྒོར1800ཡི་ཁ་གསབ་སྤྲད། ལམ་སྲོལ་དེས་འབྲོག་པར“སྐྱེ་ཁམས་ཀྱི་ཟ་མ”ཟ་ཐུབ་པ་བྱུང་ནས། སྐྱེ་ཁམས་སྲུང་སྐྱོབ་དང་དམངས་འཚོ་ལེགས་གཏོང་གཉིས་ཕན་ཚུན་སྐུལ་འདེད་གཏོང་བའི་རྣམ་པ་བཟང་པོ་ཞིག་ཆགས་ཡོད།
2025ལོར། ཚྭ་འདམ་གཤོངས་ས་སོགས་གཙོ་གནད་སྐྱེ་ཁམས་ས་ཁོངས་ལ་དམིགས་ནས་རང་བྱུང་ནགས་ཚལ་སྲུང་སྐྱོབ་དང་ནགས་སྐྲུན། རྩྭ་ཐང་ཞན་འགྱུར་སླར་གསོ། ཐང་རྒོད་ཅན་བཅོས་སྐྱོང་།ནགས་ཚལ་སྤུས་ཚད་མཐོར་གཏོང་།འདམ་ར་སྲུང་སྐྱོབ་ལྟ་ཞིབ་ཚད་ལེན་སོགས་ཀྱི་ལྟེ་བའི་ལས་འགན་ལ་བརྒྱུད་རིམ་ལྡན་པའི་ངང་སྐུལ་འདེད་བཏང་ནས། རྒྱལ་ཁོངས་ས་ཞིང་མུའུ་ཁྲི་693.4(མུའུ1≈སྤྱི་ཆིངས0.067)སྔོ་སྒྱུར་དང་། བྱེ་འགོག་བྱེ་བཅོས་མུའུ་ཁྲི228.28ལ་འོས་འགན་སྡོང་བོ་རྐང་ཁྲི1700བཙུགས། གཙང་གསུམ་མགོ་ཁུངས་རྒྱལ་ཁབ་སྤྱི་གླིང་འཛུགས་སྐྲུན་སྤུས་ཚད་མཐོ་པོའི་ངང་སྐུལ་འདེད་བཏང་བ་དང་།མདོ་ལ་རིང་མོ་རྒྱལ་ཁབ་སྤྱི་གླིང་འོས་འདེམས་ཁུལ་དུ་སྤྱི་གླིང་འཛུགས་པར་གྲ་སྒྲིག་བྱས་ཟིན་པ་དང་།མཚོ་སྔོན་པོ་རྒྱལ་ཁབ་སྤྱི་གླིང་འདེམས་ཁུལ་གྱི་དཔྱད་དཔོག་ཞིབ་བཤེར་རྩིས་ལེན་ལེགས་གྲུབ་བྱས། ལོ་ཧྲིལ་པོར་རིམ་རྩིས་བྱས་ན་རོང་འབྲོག་པ་ཁྲི3.96ལས་གྲྭའི་འཛུགས་སྐྲུན་ནང་ཞུགས་པ་དང་ངལ་ནུས་གླ་ཆ་སྒོར་དུང་ཕྱུར3.44སྤྲད། ད་ཆ་སྐྱེ་ཁམས་སྲུང་སྐྱོབ་གྲུབ་འབྲས་ཀྱིས་སྤུས་ཚད་མཐོ་བའི་འཕེལ་རྒྱས་དང་སྤུས་ཚད་མཐོ་བའི་འཚོ་བར་ཕན་ཁེ་བསྐྲུན་ཡོད།
མཚོ་སྔོན་གྱི་ནགས་རྩྭ་སྲུང་སྐྱོབ་མཁན་གྱིས་ཐོག་མཐའ་བར་གསུམ་དུ“རྒྱལ་ཁབ་ཀྱི་དོན་ཆེན”བློ་ལ་བརྟན་པོར་བཅངས་ཏེ། “རི་བོ་གཉིས”ཀྱི་འདུ་ཤེས་ལག་བསྟར་དང་།བློ་བརྟན་འགྱུར་མེད་ངང“ཀྲུང་ཧྭའི་ཆུ་མཛོད”སྲུང་མཁན་ཡག་པོ་ཞིག་བྱས་ཏེ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་བླང་བྱ་གལ་ཆེན་མཐོ་སྒང་གི་ས་གཞི་ཆེ་མོར་རྩ་བ་ཚུགས་པ་དང་འབྲས་བུ་བཟང་པོ་ཐོན་རྒྱུར་ཧུར་ཐག་སྒོས་སྐུལ་འདེད་གཏང་རྒྱུ།
མཚོ་སྔོན་གྱི་འགྲིམ་འགྲུལ་ལ་ལོ་རྒྱུས་རང་བཞིན་གྱི་ཐོད་བརྒལ་བྱུང་སྟེ། དམངས་འཚོའི་འགྲིམ་འགྲུལ་ཀྱིས་རོང་འབྲོག་མང་ཚོགས་ལ་ཕན་ཁེ་བསྐྲུན།
ཞིང་ཆེན་འགྲིམ་འགྲུལ་སྐྱེལ་འདྲེན་ཐིང་གི་ཏང་ཙུའུ་ཁོངས་མི། ཐིང་ཀྲང་གཞོན་པ་ཀྲང་ཀྲི་ཅེ།
འདས་ཟིན་པའི་ལོ་ལྔའི་ནང་། ཞིང་ཆེན་ཡོངས་ཀྱི་འགྲིམ་འགྲུལ་སྐྱེལ་འདྲེན་ཁོངས་གཏོགས་ཀྱིས“ལམ་འབྱེད་གདོང་ལེན་པའི”ངེས་གནས་ཁོང་དུ་བརྟན་པོ་ཆུད་པ་དང། སྐྱེ་ཁམས་ཤེས་དཔལ་གྱི་མཐོ་ས་གཏོད་པ་དང་ཐོན་ལས་འཛུགས་སྐྲུན་བྱེད་པར་དམིགས་ནས་དམིགས་ཚད་གཙོ་བོ“སྔ་སྣུར་གསུམ་དང་།མཐོར་གཏོང་གསུམ།འཕར་སྣོན་གསུམ”བཅས་མངོན་འགྱུར་བྱུང་བ་དང་འགྲིམ་འགྲུལ་སྐྱེལ་འདྲེན་བྱ་གཞག་དེ“འགག་རྩའི་ཚོད་འཛིན”ནས“གཞི་རྩའི་ཆ་ནས་འཚམ་པ”དང“འགན་ལེན་སྣེ་ཁྲིད”བར་ལོ་རྒྱུས་རང་བཞིན་གྱི་ཐོད་བརྒལ་བྱུང་ཡོད།
ལོ་ལྔའི་རིང་། ཞིང་ཆེན་ཡོངས་སུ་བསྡོམས་པས་གཞུང་ལམ་དང་ཆུ་ལམ་འགྲིམ་འགྲུལ་གྱི་གཏན་འཇགས་རྒྱུ་ནོར་ལ་མ་དངུལ་སྒོར་དུང་ཕྱུར་936བཏང་བ་དང་།གཞུང་ལམ་ཐོག་རླངས་འཁོར་ཤར་གཏོང་ཐུབ་པའི་སྤྱིའི་ལམ་ཚད་སྤྱི་ལེ་ཁྲི་9.34ཟིན། ཞིང་ཆེན་དབར་གྱི་མྱུར་བགྲོད་གཞུང་ལམ10ཤར་གཏོང་བྱས་པ་དང་། མྱུར་བགྲོད(རིམ་པ་དང་པོ་ཚུད་པ)གཞུང་ལམ་གྱི་ལམ་ཚད་སྤྱི་ལེ5465ཟིན། རྫོང36ལ་མྱུར་བགྲོད་གཞུང་ལམ་ཤར་གཏོང་ཐུབ་པ་མངོན་འགྱུར་བྱུང་སྟེ།ཟི་ལིང་དང་།མཚོ་ཤར།མཚོ་ནུབ།མཚོ་བྱང་།རྨ་ལྷོ་བཅས་ལ“རྫོང་དང་རྫོང་གི་བར་དུ་མྱུར་བགྲོད་གཞུང་ལམ་ཤར་གཏོང”བྱས། རྫོང(གྲོང་ཁྱེར་དང་ས་ཁུལ)45རུ་རིམ་པ་གཉིས་པ་དང་དེའི་ཡན་གྱི་གཞུང་ལམ་ཤར་གཏོང་བྱས་ཤིང་། ཡུལ་ཚོ་དང་གྲོང་རྡལ84%རིམ་པ་གསུམ་པ་དང་དེའི་ཡན་གྱི་གཞུང་ལམ་ཤར་གཏོང་བྱས། མི་གྲངས་གཞི་རྒྱ་ཅུང་ཆེ་བའི་སྡེ་བ80%རུ་ཨར་ལམ་ཤར་གཏོང་བྱས་ཏེ། “ལོ་ལྔའི་འཆར་འགོད་བཅོ་ལྔ་པའི”འགྲིམ་འགྲུལ་སྐྱེལ་འདྲེན་འཕེལ་རྒྱས་ཐད་་རྨང་གཞི་བརྟན་པོ་ཞིག་བཏིངས།
ང་ཚོས“མ་དངུལ་ཆུང་ངུ་བཏང་ནས་དམངས་ཚིས་ཆེན་པོ་སྐྱོང་རྒྱུ”མཐའ་འཁྱོངས་བྱས་ཏེ། “ལོ་ལྔའི་འཆར་འགོད་བཅུ་བཞི་པའི”རིང་བསྡོམས་པས་མ་དངུལ་སྒོར་དུང་ཕྱུར་82བཏང་ཞིང་། ཞིང་ཆེན་གྱི་གཞུང་ལམ་དཀྱུས་མ་དང་ཞིང་སྡེའི་གཞུང་ལམ་སྤྱི་ལེ་ཁྲི་1.8གསར་སྐྲུན་དང་བསྐྱར་སྐྲུན་བྱས་པ་དང་།ཞིང་ཆེན་ཡོངས་ཀྱི་ཞིང་སྡེ་གཞུང་ལམ་གྱི་སྤྱིའི་ལམ་ཚད་སྤྱི་ལེ་ཁྲི་7ལས་བརྒལ་པས། རོང་འབྲོག་ཁུལ་གྱི་འགྲིམ་འགྲུལ་གནས་ཚུལ་ཇེ་ལེགས་དང་། རོང་འབྲོག་ལས་ཀྱི་ཕན་འབྲས་ཆེ་བསྐྱེད།རོང་འབྲོག་མང་ཚོགས་ཀྱི་ཡོང་སྒོ་ཇེ་མང་། རོང་འབྲོག་ཁུལ་གྱི་འཕེལ་རྒྱས་བཅས་ལ་སྐུལ་འདེད་ནུས་ལྡན་ཐེབས་ཡོད།
2025ལོར་ང་ཚོས“ཞིང་སྡེ་ལམ་བུ་ཡག་པོ་བཞིའི”སྤུས་ཚད་མཐོ་བའི་འཕེལ་རྒྱས་ལ་དམིགས་ནས། མང་ཚོགས་ཀྱི་དཀའ་ངལ་དང་རེ་སྒུག་དང་འབྲེལ་བ་ཡོད་པའི་གནད་དོན་གྲལ་བཤེར་གཏིང་ཟབ་དང་ཕྱོགས་ཡོངས་ནས་གསེད་བཀྲོལ་བྱས། རྒྱལ་ཁབ་དང་ཞིང་ཆེན་གྱི་གཞུང་ལམ་དང་ཞིང་སྡེ་གཞུང་ལམ་གྱི་ལམ་དུམ་སྤྱི་ལེ4000གཅིག་སྡུད་ཐོག་བཅོས་སྐྱོང་བྱས་པ་དང་། སྤྱི་ལེ300གྲོང་ཚོར་བསྐྱོད་པའི་གཞུང་ལམ་གསལ་པོ་བཟོ་བའི་ལས་གྲྭ་ལག་བསྟར་བྱས། ཡུལ་ཚོ་དང་གྲོང་རྡལ16གི་གཞུང་ལམ་ས་མཚམས་སྒྲོལ་བའི་ལས་གྲྭ་ལེགས་སྒྲུབ་བྱས་པ་དང་། འགྲིམ་འགྲུལ་དང་ཡུལ་སྐོར་མཉམ་འདྲེས་འཕེལ་རྒྱས་ལ་སྤྱི་འདོམས་སྐུལ་འདེད་བཏང་། མཚོ་སྔོན་པོའི་ཡུལ་སྐོར་ལྗོངས་གཟིགས་ལམ་ཆེན་ཨང་རྟགས་དང་པོ་དང་ཚྭ་འདམ་གཞོང་གི་ཡུལ་སྐོར་ལྗོངས་གཟིགས་ལམ་ཆེན་ཨང་རྟགས་དང་པོ་སོགས་“ཨང་རྟགས་དང་པོ་ལྔ”ཡི་འགྲིམ་འགྲུལ་ཡུལ་སྐོར་མཉམ་འདྲེས་ཀྱི་སྐྱེ་ཁམས་ལྗོངས་གཟིགས་ལམ་ཆེན་དང་ལ་ལྗིད། སྨོན་ལམ་མཐོན་པོ་སོགས“རི་བོ10”ཡི་འགྲིམ་འགྲུལ་མཉམ་འདྲེས་ལས་གྲྭ་མུ་མཐུད་དུ་སྐུལ་འདེད་དང་། “འགྲིམ་འགྲུལ་ལམ་ཐིག”དེ“ལྗོངས་གཟིགས་ལམ་ཐིག”དང“དཔལ་འབྱོར་ལམ་ཐིག”ཏུ་བསྒྱུར་བར་ཤུགས་ཆེན་པོས་སྐུལ་འདེད་བྱས་ཏེ། རྒྱལ་སྤྱིའི་སྐྱེ་ཁམས་ཡུལ་སྐོར་དམིགས་ས་འཛུགས་སྐྲུན་ལ་རོགས་འདེགས་བྱས།
“ཆུ་ལ་བརྒལ་དཀའ་བའི”གནད་དོན་ལ་དམིགས་ནས“ངེད་ཚང་གི་མདུན་ཕྱོགས་ཀྱི་ཟམ་པ”ཞེས་པའི་དམངས་ཕན་ལས་གྲྭ་ལག་བསྟར་བྱས་ཏེ། ལོ་གསུམ་ནང་དམངས་ཕན་ཟམ་པ1500བསྐྲུན་རྒྱུ་དང་།“ཚོད་ལྟ་སྔོན་ལ་སྤེལ་བ་དང་ས་ཁོངས་ཡོངས་སུ་ཁྱབ་གདལ་གཏོང་བའི”བྱེད་སྟངས་གསར་གཏོད་ཐོག་བེད་སྤྱོད་བྱས། སྤྱི་སྤྱོད་པར་རིས་གཅིག་སྡུད་ཚད་ལྡན་བཟོས་ཏེ། སྒྲིག་སྦྱོར་རྣམ་པའི་ངར་ལྕགས་གྲུབ་ཆའི་ལྷུ་ལག་ཕྱོགས་ཡོངས་ནས་ཁྱབ་གདལ་གཏོང་བ་བཅས་བྱས་ནས་འཛུགས་སྐྲུན་གྱི་ལས་ཕྱོད་དང་སྐྱེ་ཁམས་སྲུང་སྐྱོབ་ལ་ལྟ་རྟོག་བྱས། 2025ལོར་ཟམ་པ500བསྐྲུན་དེ་གྲོང་ཁྱེར་དང་ཁུལ8དང་རྫོང(གྲོང་ཁྱེར་དང་ཆུས)29ཡི་རོང་འབྲོག་མང་ཚོགས་ཁྲི་30ལྷག་ཙམ་ལ་ཕན་ཁེ་བསྐྲུན་ཏེ་རོང་འབྲོག་པ་མང་ཚོགས་ཕྱིར་སྐྱོད་དཀའ་བའི་གནད་དོན་ནུས་ལྡན་གྱིས་ཐག་གཅོདབྱས་ནས་རོང་འབྲོག་ཐོན་རྫས་སྐྱེལ་འདྲེན་གྱི་བགྲོད་ལམ་བཏོད་ཡོད།
2026ལོར། ང་ཚོས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱས་ཏེ། མི་དམངས་ལྟེ་བར་འཛིན་རྒྱུ་མཐའ་འཁྱོངས་དང་། འགྲིམ་འགྲུལ་སྟོབས་ལྡན་གྱི་རྒྱལ་ཁབ་འཛུགས་སྐྲུན་བྱེད་པའི་དམིགས་ཚད་ལ་དམིགས་ནས། ཞིང་སྡེ་གཞུང་ལམ་སྤྱི་ལེ5000གསར་སྐྲུན་དང་རྒྱས་སྐྲུན་བྱ་རྒྱུ་ཡིན་ཞིང་། ཡུལ་ཚོ་དང་གྲོང་རྡལ6ཁར་བསྣན་ནས་རིམ་པ་གསུམ་པ་དང་དེའི་ཡན་གྱི་གཞུང་ལམ་བསྐྲུན་རྒྱུ། རང་བྱུང་སྡེ་བ100རུ་མཁྲེགས་ལམ་ཤར་གཏོང་བྱ་རྒྱུ། དམངས་ཕན་ཟམ་པ500གསར་སྐྲུན་དང་ཉེན་ཡོད་ཟམ་པ20བསྒྱུར་བཀོད་བྱས་ཏེ། གྲོང་གསེབ་ཁྱོན་ཡོངས་ནས་དར་སྤེལ་བྱེད་པར་སྐུལ་འདེད་གཏིང་ཟབ་དང་། ཞིང་ལས་དང་ཞིང་སྡེ་དེང་རབས་ཅན་མགྱོགས་མྱུར་གྱིས་བསྐྲུན་པར་ཞབས་ཞུའི་འགན་སྲུང་གདོན་རྒྱུ་རེད།
རྒྱལ་སྤྱིའི་སྐྱེ་ཁམས་ཡུལ་སྐོར་དམིགས་ས་འཛུགས་སྐྲུན་གྱི་ཐབས་ལམ་བཏོད་པ།
རྒྱ་མདོ་རྫོང་ཨུའི་ཧྲུའུ་ཅི་གཞོན་པ། རྫོང་དཔོན་མིན་ཐུང་ཀུང་།
རྒྱ་མདོ་རྫོང་ནི་མདོ་ལ་རི་བོ་དང་དར་པན་རི་བོའི་དབར་གྱི་གཞོང་ཁུལ་དུ་གནས་པ་དང་། རྟ་ཐང་གཙང་པོ་མངའ་ཁོངས་ཡོངས་སུ་འཕྲེད་དུ་བཅད་ཅིང་། གངས་རི་དང་།འཁྱགས་ཀླུང་།སྨུག་སྤྲིན་སོགས་གངས་འཁྱག་ཐོན་ཁུངས་ཕུན་སུམ་ཚོགས་པོ་ཡོད་པས། མཚོ་སྔོན་གྱིས་གངས་འཁྱག་ཡུལ་སྐོར་འཕེལ་རྒྱས་གཏོང་བའི་གནས་ཡན་གར་བ་ཞིག་ཏུ་གྱུར་རེད། ཉེ་བའི་ལོ་ཤས་རིང་། ང་ཚོས་ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཚང་འཛོམས་གྲོས་ཚོགས་ཐེངས་རིམ་བྱུང་གི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱས་ཏེ།སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་གྱི་ལས་དོན་ལ་བཏོན་པའི་བླང་བྱ་གལ་ཆེན་ལག་བསྟར་དོན་འཁྱོལ་མཐའ་གཅིག་ཏུ་བྱས་པ་དང་། ཞིང་ཆེན་ཏང་ཨུ་་དང་ཞིང་ཆེན་སྲིད་གཞུང་།ཁུལ་ཨུ་དང་དང་ཁུལ་སྲིད་གཞུང་བཅས་ཀྱིས་རྒྱལ་སྤྱིའི་སྐྱེ་ཁམས་ཡུལ་སྐོར་དམིགས་ས་གཏོད་པའི་འཐབ་ཇུས་བཀོད་སྒྲིག་ལ་དམ་པོར་དམིགས་ནས། གངས་འཁྱགས་དཔལ་འབྱོར་དེ“གངས་དང་ཁ་བས་གཡོག་པའི་རི་ཀློང་ཡང་གསེར་རི་དངུལ་རི་ཡིན་པའི”འདུ་ཤེས་ལག་བསྟར་དམ་འཛིན་དང་། རྫོང་ཁོངས་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་གནད་འགག་གི་ཐོད་བརྒལ་བྱེད་ཡུལ་དུ་བརྩིས་ཏེ། སྔོན་ཆད་འཕེལ་རྒྱས་ལ་ཚོད་འཛིན་བྱེད་པའི“འཁྱགས་ཀློང་གི་ཐོན་ཁུངས་”དེ་དམངས་ཕྱུག་རྫོང་དར་གྱི“ཚ་པའི་འགུལ་ནུས”དུ་གྱུར་ཏེ། གངས་ཁུལ་ས་མཐོའི་སྐྱེ་ཁམས་དང་འཕེལ་རྒྱས་གཉིས་ཕན་གྱི་གསོན་ཉམས་དོད་པའི་རི་མོ་བྲིས།
སྐྱེ་ཁམས་སྲུང་སྐྱོབ་སྔོན་ལ་འཇོག་རྒྱུ་མཐའ་འཁྱོངས་བྱས་ཏེ“འཁྱགས་ཀློང་གི་ཐོན་ཁུངས”བརྗེ་སྒྱུར་གྱི་ལྗང་མདོག་རྨང་གཞི་ཇེ་བརྟན་དུ་གཏོང་དགོས། ང་ཚོས“མཚོ་སྔོན་བྱང་རྒྱུད་ཀྱི་སྐྱེ་ཁམས་མཐོ་ས”ཧུར་ཐག་གཏོད་པ་དང་སྦགས་བཙོག་འགོག་བཅོས་བྱེད་ཐབས་ནན་ཤོས་དོན་འཁྱོལ་བྱས་ནས། ཞིང་ཆེན་ཡོངས་ཀྱི་རྒྱལ་ཁབ་སྤྱི་གླིང་བརྗོད་དོན་གཙོ་བོར་བྱས་པའི་རང་བྱུང་རིགས་ཀྱི་ཚན་རིག་ཁྱབ་གདལ་ཁང་དང་པོ་སྟེ་མདོ་ལ་རིང་བོ་རྒྱལ་ཁབ་སྤྱི་གླིང་སྐྱེ་ཁམས་ཚན་རིག་ཁྱབ་གདལ་ཁང་བསྐྲུན་པ་དང་།“རི་ཆུ་ནགས་ཞིང་མཚེའུ་རྩྭ་ཐང”གཞི་གཅིག་ཅན་གྱི་སྐྱེ་ཁམས་སྲུང་སྐྱོབ་སླར་གསོ་དང་།རྟ་ཐང་གཙང་པོའི་རྒྱུག་ཁུལ(རྒྱ་མདོའི་ས་ཁུལ)ཁོར་ཡུག་བཅོས་སྒྲིག་དང་སྐྱེ་ཁམས་ནུས་པ་མཐོར་གཏོང་སོགས་ཀྱི་ལས་གྲྭ་ལག་བསྟར་བྱས་པས།ཕུལ་དུ་བྱུང་བའི་སྐྱེ་ཁམས་ཀྱིས་མཛེས་སྡུག་ལྡན་པའི་རང་བྱུང་གི་མཛེས་ལྗོངས་མངོན་ནས། རྒྱ་མདོ་རྫོང་གི་སྐྱེ་ཁམས་ཡུལ་སྐོར་གྱི་ཆེས་གཏིང་ཟབ་པའི་རྨང་གཞི་ཞིག་ཏུ་གྱུར་ཡོད།
ཐོན་ལས་མཉམ་འདྲེས་འཕེལ་རྒྱས་ལ་དམིགས་ནས“འཁྱགས་ཀློང་གི་ཐོན་ཁུངས”བརྗེ་སྒྱུར་གྱི་ལྟེ་བའི་སྒུལ་ནུས་སྐུལ་སློང་བྱེད་དགོས། ང་ཚོས“ས་ཁོངས་ཡོངས་དང་དུས་ཚིགས་ཧྲིལ་པོའི་”ཡུལ་སྐོར་འཕེལ་རྒྱས་ཀྱི་འདུ་ཤེས་བརྟན་པོ་བཙུགས་ཏེ།“ཡུལ་སྐོར+”གྱི་རྣམ་པས་ལས་རྣམ་མང་པོ་མཉམ་འདྲེས་གཏིང་ཟབ་ཡོང་བར་སྐུལ་འདེད་གཏོང་བ་དང་། མདོ་ལ་རིང་མོའི་མེ་ལྷ་གངས་དཀར་ཏེ།“མི་ཚེའི་གངས་རི་ཐོག་མ”ཡི་ལྟེ་བའིIPསྐྲུན་པ་དང་། རྟ་ཐང་གཙང་པོ་རྒྱུག་ཁུལ་གྱི་ནགས་ཚལ་དང་འདམ་ར་སོགས་རང་བྱུང་ཐོན་ཁུངས་དང་མཛེས་སྡུག་ལྡན་པའི་སྨུག་སྤྲིན་གྱི་མཛེས་ལྗོངས་ལ་བརྟེན་ནས། “སྒར་འདེབས+ལྗོངས་གཟིགས”ཀྱི་ཡུལ་སྐོར་ཟོང་རྟགས་གཏོད་ནས། “འཁྱགས་ཀློང་ཐོན་ཁུངས”ཀྱིས“ཚ་སྒུལ་ནུས་པ”མུ་མཐུད་དུ་འདོན་དུ་འཇུག་དགོས། “ཞིང་ལས་ལུས་རྩལ་རིག་གནས་ཡུལ་སྐོར་ཚོང་པ”མཉམ་འདྲེས་འཕེལ་རྒྱས་ལ་སྐུལ་འདེད་གཏིང་ཟབ་བཏང་བས། རྫོང་ཡོངས་ཀྱི་ཡུལ་སྐོར་ལས་རིགས་འཕེལ་རྒྱས་དང་འཛད་སྤྱོད་སྐུལ་ཁྲིད་ལ་སྐུལ་འདེད་ཆེན་པོ་ཐེབས་ཡོད།2025ལོར་རྒྱ་མདོ་རྫོང་གིས་ཡུལ་སྐོར་བ་མི་ཐེངས་ཁྲི358.95ལ་སྣེ་ལེན་ཞུས་པ་དང་། ཡུལ་སྐོར་གྱི་སྤྱིའི་འགྲོ་གྲོན་སྒོར་དུང་ཕྱུར་14.69མངོན་འགྱུར་བྱས་ཏེ་དུས་མཚུངས་ལས21.16%དང20.04%སོ་སོར་འཕར་ཡོད།
དམངས་ཕྱུག་རྩ་བར་འཛིན་རྒྱུ་མཐའ་འཁྱོངས་བྱས་ནས“འཁྱགས་ཀློང་གི་ཐོན་ཁུངས”བརྗེ་སྒྱུར་བྱས་པའི་འཕེལ་རྒྱས་ཀྱི་གྲུབ་འབྲས་མཉམ་སྤྱོད་བྱེད་དགོས། ང་ཚོས་ཐོག་མཐའ་བར་གསུམ་དུ་མང་ཚོགས་འབབ་འཕར་ཕྱུག་འགྱུར་བྱ་རྒྱུ་དེ་གངས་འཁྱག་དཔལ་འབྱོར་འཕེལ་རྒྱས་གཏོང་བའི་མགོ་འཛུགས་ས་དང་དོན་གྱི་འབབ་སར་བརྩིས་ནས། ཁེ་ཕན་འབྲེལ་མཐུད་ལམ་སྲོལ་འཐུས་ཚང་དུ་བཏང་སྟེ། འཕེལ་རྒྱས་ཀྱི་གྲུབ་འབྲས་རྫོང་ཡོངས་ཀྱི་མི་རིགས་ཁག་གི་མང་ཚོགས་ལ་དེ་བས་མང་བ་དང་དེ་བས་དྲང་སྙོམས་ཀྱི་ཕན་པ་ཐོབ་པ་བྱས་ཡོད། གངས་དཀར་མཛེས་ལྗོངས་ཁུལ་དུ“གངས་རིའི་སྣེ་ཁྲིད”ཀྱི་ཞིང་ཆེན་རིམ་པའི་ངལ་ནུས་སྤུས་རྟགས་སྐྱེད་སྲིང་ཞིབ་ཚགས་བྱས་ཏེ། ཉེ་འཁོར་གྱི་རོང་འབྲོག་པ་ཡུལ་སྐོར་ཞབས་ཞུ་དང་སྐྱེ་ཁམས་དོ་དམ་སྲུང་སྐྱོབ་སོགས་ཀྱི་ལས་དོན་ནང་སྔོན་ལ་ཞུགས་སུ་བཅུག་པ་དང་། “མཛེས་ལྗོངས་སྐུལ་ཁྲིད་དང་།ཐོན་ལས་མཉམ་འགུལ།མང་ཚོགས་ཟུར་ཞུགས། ལས་རྣམ་མང་བའི་འཕེལ་རྒྱས”བཅས་ཀྱི་གྲོང་གསེབ་དར་སྤེལ་གྱི་རྣམ་པ་གསར་པ་བཏོད། རྫོང་ཡོངས་ཀྱི་ཁྱབ་ཁོངས་སུ“བཟའ་བཏུང་ཞགས་སྡོད་ཡུལ་སྐོར་དང་རོལ་རྩེད་བཅས”ཀྱི་ཐོན་ལས་སྦྲེལ་ཐག་ཧྲིལ་པོ་ཧུར་ཐག་བསྐྲུན་ནས“ཡུལ་སྐོར་འདྲེན་གཏོང་དང་།ཞིང་ལས་ཐོན་རྫས་ཀྱི་རིན་ཐང་འཕར་བ།མང་ཚོགས་ལ་ཕན་པ་ཐོབ་པ”བཅས་ཀྱི་འཁོར་རྒྱུག་བཟང་པོ་ཞིག་ཆགས་སུ་བཅུག །
ཞབས་ཞུ་འགན་སྲུང་གི་འདེགས་སྐྱོར་ལ་ཤུགས་སྣོན་བརྒྱབ་ནས“འཁྱགས་ཀློང་གི་ཐོན་ཁུངས”བརྗེ་སྒྱུར་གྱི་འཕེལ་རྒྱས་རྨང་གཞི་སྲ་བརྟན་དུ་བཏང་།ང་ཚོས“སྲིད་ཇུས་དང་། ཞབས་ཞུ།བདེ་འཇགས་བཅས་ཟུང་དུ་འབྲེལ་བའི”ཕྱོགས་གསུམ་གཞི་གཅིག་གི་འགན་ལེན་མ་ལག་རྒྱུན་མཐུད་ངང་བཙུགས་ནས། རྨང་གཞིའི་འགན་ལེན་ནུས་པ་དང་།འཕྲལ་སྡོམ་འགན་ལེན་ནུས་པ།ཞབས་ཞུ་འགན་ལེན་ནུས་པ་བཅས་ཆེ་རུ་བཏང་སྟེ་གངས་འཁྱག་དཔལ་འབྱོར་འཕེལ་རྒྱས་ཀྱི་འདེགས་སྐྱོར་ནུས་པ་རྒྱུན་ཆད་མེད་པར་ཆེ་རུ་བཏང་།
ང་ཚོས“སྐྱེ་ཁམས་སྔོན་ལ་འཇོག་པ་དང་ལྗང་མདོག་འཕེལ་རྒྱས”ཀྱི་འདུ་ཤེས་རྒྱུན་མཐུད་གཏིང་ཟབ་ཏུ་བཏང་ནས། རྒྱལ་སྤྱིའི་སྐྱེ་ཁམས་ཡུལ་སྐོར་དམིགས་ས་འཛུགས་སྐྲུན་ལ་དམ་པོར་དམིགས་པ་དང་། གངས་འཁྱག་ཡུལ་སྐོར་མཐོར་གཏོང་འཆར་གཞི་ཤུགས་ཆེན་པོས་སྤེལ་ཏེ། གངས་འཁྱག་དཔལ་འབྱོར་གཞི་ཁྱོན་ཅན་དང་།སྤུས་ཚད་ཅན།མཉམ་འདྲེས་ཅན་བཅས་སུ་འཕེལ་རྒྱས་འགྲོ་བར་ནུས་ཤུགས་ཡོད་རྒུས་སྐུལ་འདེད་དང་། གངས་ཀྱིས་གཡོག་པའི་རི་ཀློང་དེ་བས་མང་བ་ཞིག“གསེར་རི་དངུལ་རི”ལྟ་བུར་འགྱུར་བ་བྱས་ནས་རྒྱ་མདོའི་སྤུས་ཚད་མཐོ་བའི་འཕེལ་རྒྱས་ལ་སྒུལ་ཤུགས་ཆེན་པོ་བསྣན་རྒྱུ།
ས་མཐོའི་འཁྱག་ཚལ་ཐོན་ལས“འགྱུར་ལྡོག་གསུམ”གྱི་ལྗང་མདོག་འཕེལ་རྒྱས་ཀྱི་ལམ་བུའི་ཐོག་བསྐྱོད་པ།
ཧོར་གྲོང་རྫོང་མི་དམངས་སྲིད་གཞུང་གི་རྫོང་དཔོན་གཞོན་པ། ཧྲི་ཚུན་ཧྥེང་།
མཚོ་ཤར་གྲོང་ཁྱེར་ཧོར་གྲོང་ཧོར་རིགས་རང་སྐྱོང་རྫོང་ནི་མཚོ་སྔོན་ཞིང་ཆེན་གྱི་བྱང་ཤར་རྒྱུད་དུ་གནས་ཤིང་། མཚོ་བོད་ས་མཐོ་དང་ས་སེར་ས་མཐོའི་བར་བརྒལ་ཁུལ་དུ་གནས་པ་དང་ཆ་སྙོམས་ས་བབ་མཐོ་ཚད་སྨི་2700ཟིན་པ་དང་ལོ་རེའི་ཆ་སྙོམས་དྲོད་ཚད5.8℃ཡིན། ས་བབ་མཐོ་བ་དང་། དྲོད་ཚད་ཧེ་བག་ཆེ་བ། གནམ་གཤིས་གྲང་མོ་ཡོད་པ་བཅས་དེ་དག་དེ་སྔ་ཞིང་ལས་འཕེལ་རྒྱས་ཀྱི“ཚོད་འཛིན་ཆ་རྐྱེན”དུ་བརྩི་གི་ཡོད།ད་ཆ་ཚན་རིག་དང་མཐུན་པའི་ཇུས་འགོད་དང་གསར་གཏོད་ལག་ལེན་བྱས་པ་བརྒྱུད་ང་ཚོས་སྤུས་ཚད་མཐོ་བའི་འཁྱག་ཚལ་ཐོན་ལས་འཕེལ་རྒྱས་གཏོང་བའི་ཐུན་མོང་མ་ཡིན་པའི་ལེགས་ཆར་གྱུར་པ་དང་།བཏབ་པའི་སྔོ་ཚལ་གྱི་སྤུས་ཚད་ཧ་ཅང་ལེགས་པ།ལྗང་མདོག་སྦགས་བཙོག་མེད་པ་དང་།བྲོ་བ་ཞིམ་པ།འཚོ་བཅུད་ཕུན་སུམ་ཚོགས་པ་སོགས་ཀྱི་ཁྱད་ཆོས་ལྡན་པས་ཧོར་གྲོང་རྫོང་གི་ས་མཐོའི་འཁྱག་ཚལ་ཐོན་ལས་ལ“འགྱུར་ལྡོག་གསུམ”གྱི་ལྗང་མདོག་འཕེལ་རྒྱས་ལམ་བུར་སྐྱོད་བཞིན་ཡོད།
“གནམ་གཤིས་ཀྱི་ཞན་ཆ”དེ“ཐོན་ལས་ཀྱི་ཁྱད་ཆོས”སུ་བསྒྱུར། སྔོན་ཆད་ང་ཚོའི་མཐོ་གྲང་ས་ཁུལ་དུ་སྲོལ་རྒྱུན་གྱི་འབྲུ་རིགས་ལོ་ཏོག་མ་གཏོགས་འདེབས་མི་ཐུབ་པ་དང་།སྐྱེ་འཚར་གྱི་དུས་འཁོར་རིང་བ་དང་། ཐོན་ཚད་ལ་ཚད་ཡོད་པ་མ་ཟད་དཔལ་འབྱོར་གྱི་རིན་ཐང་ཡང་དམའ་བ་ཡིན་མོད།འོན་ཀྱང་སྤུས་ཚད་མཐོ་བའི་འཕེལ་རྒྱས་ཀྱི་སྲོག་ཤིང་ནི་ཡུལ་བབ་དང་བསྟུན་པ་དང་ལེགས་ཆ་གཞན་སྒྱུར་བྱ་རྒྱུ་དེ་ཡིན་པ་ང་ཚོས་ངོས་འཛིན་གཏིང་ཟབ་བྱུང་ཡོད།ཧོར་གྲོང་རྫོང་གི་ལོ་རེའི་ཆ་སྙོམས་དྲོད་ཚད་དམའ་བ་དང་།དབྱར་དུས་བསིལ་ཞིང་ཉིན་མཚན་གྱི་དྲོད་ཚད་ཧེ་བག་ཆེ་བ།མཁའ་རླུང་གི་སྤུས་ཚད་གཙང་བ།ས་རྒྱུར་སྦགས་བཙོག་མེད་པ་བཅས་ནི་སྤྱི་གནོད་མེད་པ་དང་སྤུས་ཚད་མཐོ་བའི་འཁྱག་ཚལ་ཐོན་སྐྱེད་བྱེད་པའི་ཁོར་ཡུག་བཟང་པོ་ཞིག་ཡིན་པས།ང་ཚོས་དུས་ཐོག་ཏུ་བསམ་ཕྱོགས་བསྒྱུར་ནས་ཚོད་འཛིན་གྱི་རྒྱུ་རྐྱེན་དེ་དམིགས་བསལ་ཐོན་ཁུངས་སུ་བསྒྱུར་ནས་ཞིང་ལས་དེ་ཐོན་ཚད་ཀྱི་གཞི་ཁྱོན་དོན་གཉེར་བྱེད་པ་ནས་སྤུས་ཚད་དང་ཕན་འབྲས་དོན་གཉེར་བྱེད་པར་འགྱུར་རྒྱུར་སྐུལ་འདེད་བཏང་ཡོད།ནན་མོན་འགག་གྲོང་རྡལ་གྱི་འཕེལ་རྒྱས་ལག་ལེན་ལས་ཚད་བརྒལ་བྱེད་ཕོད་པ་དང་ལེགས་ཆ་སྤྱོད་མཁས་པོ་བྱས་ཚེ་ས་མཐོའི“གྲང་རླུང”གིས་ཐོན་ལས་ཀྱི་ས་ཆ་བཟང་པོ་ཞིག་རྦད་དེ་སྐྱེད་སྲིང་ཐུབ་པ་ར་འཕྲོད་གང་ལེགས་བྱུང་ཡོད།
“སྲོལ་རྒྱུན་གྱི་རྨོ་ལས”དེ“རིག་ནུས་ཞིང་ལས”སུ་བསྒྱུར། ང་ཚོས་ཀྲུང་གོ་ཚན་རིག་ཁང་དང་ཧྲན་ཏུང་ཞིང་ལས་ཚན་རིག་ཁང་སོགས་གཙོ་གནད་སློབ་གླིང་དང་མཉམ་ལས་ཧུར་ཐག་བྱས་ཏེ། སྔོ་ཚལ་ཐོན་ལས་ཀྱི་རིགས་གཅིག་མཁས་ཅན་ཚོགས་པ་བཙུགས་པ་དང་།རྫོང་སྔོ་ཚལ་ལག་རྩལ་ཞབས་ཞུའི་ལྟེ་གནས་བཙུགས་པ།གཙོ་ཁྲིད་སྣ་ཁ་གདམ་གསེས་དང་ཁྱབ་གདལ་གཙོ་བོའི་ལག་རྩལ་ཁྱབ་གདལ་ལས་དོན་བརྒྱུད་རིམ་ལྡན་པའི་ངང་སྤེལ་བ།ལེགས་བསྡུས་ཞིབ་གཉེར་ཅན་གྱི་མྱུ་གུ་གསོ་བ་དང་།ནད་འབུའི་གནོད་འཚེ་ལྗང་མདོག་སྔོན་འགོག་ཚོད་འཛིན།ཆུ་ལུད་གཞི་གཅིག་ཅན་སོགས་འགག་རྩའི་ལག་རྩལ་གཙོ་གནད་ཐོག་འགག་སྒྲོལ་བྱས་ཏེ། སྔོ་ཚལ་འདེབས་འཛུགས་མུ་མཐུད་དུ་ཚད་ལྡན་ཅན་དང་ཆེད་ལས་ཅན་གྱི་རིམ་སྤོར་ལ་སྐུལ་འདེད་དང་། སྔོ་ཚལ་གྱི་སོན་བཟང་སྤུས་ལེགས་ལ་མགོ་ཁུངས་ནས་འགན་སྲུང་བྱས། ལྷག་པར2025ལོར་ང་ཚོས“ས་མཐོའི་འཁྱག་ཚལ”སྤུས་རྟགས་རིམ་སྤོར་ལ་དམིགས་ནས་ནན་མོན་འགག་དང་།ཐའེ་ཙེ།ཏུང་ཧོ།ཐང་ཁྲོན་སོགས་ཤང་གྲོང་7དུ་ཕྱིའི་སྔོ་ཚལ་དང་ཆུ་ལུད་གཞི་གཅིག་ཅན་གྱི་ཆུ་འདྲེན་ལག་རྩལ་གཙོ་གནད་ཐོག་ཁྱབ་གདལ་བཏང་བས། ཐོན་ཁུངས་གྲོན་ཆུང་དང་མ་གནས་དམའ་རུ་ཕྱིན་པ་མ་ཟད།ཐོན་རྫས་ཀྱི་ལྗང་མདོག་སྐྱེ་ལྡན་རང་བཞིན་དེ་བས་མངོན་གསལ་དོད་དུ་ཕྱིན་ཡོད།མིག་སྔར་རྫོང་ཡོངས་སུ་སྔོ་ཚལ་ཐོན་ལས་གཉེར་མཁན་འབྲེལ་ཡོད་ལས་ཞུགས་མི་སྣ་ཁྲི2.3ཙམ་ཡོད་པ་དང་མི་རེའི་ཆ་སྙོམས་ཡོང་འབབ་ཁེ་གཙང་སྒོར་ཁྲི2.1ཙམ་ཟིན་གྱི་ཡོད། ཚན་རྩལ་གྱི་སྟོབས་ཤུགས་ཀྱིས་ང་ཚོའི་འཁྱག་ཚལ་ཐོན་ལས་དེ་བས་རིག་ནུས་དང་།དེ་བས་ནུས་ཆེ།དེ་བས་དམངས་ཕྱུག་བཅས་སུ་འགྱུར་བཞིན་ཡོད།
“ས་ཁོངས་ཀྱི་ཁྱད་ལྡན་ཐོན་རྫས”དེ“རྒྱ་ཆེ་བའི་མིང་བྱང་”དུ་བསྒྱུར། ང་ཚོས་ཞིང་ཆེན་ཡོངས་ཀྱི་ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ཕྱིར་གཏོང་བྱ་ཡུལ་སྔོན་ལ་ལག་བསྟར་བྱེད་པའི་དཔེ་སྟོན་རྫོང་འཛུགས་སྐྲུན་ལ་དམིགས་ནས། གཅིག་སྡུད་ཡུག་སྦྲེལ་གྱིས་ས་མཐོའི་འཁྱག་ཚལ་འཕེལ་རྒྱས་གཏོང་བ་དང་།ཞིང་ཆེན་དང་གྲོང་ཁྱེར་གྱི་གཟིགས་སྐྱོང་སྲིད་ཇུས་ཁག་དོན་འཁྱོལ་ནན་པོ་བྱེད་པ།རྒྱབ་སྐྱོར་བྱེད་ཤུགས་རྒྱུན་ཆད་མེད་པར་ཆེ་རུ་གཏོང་བ།ཞབས་ཞུའི་འགན་ལེན་ཁག་ཡག་པོ་བྱེད་པ་བཅས་བྱས་པས་འཁྱག་ཚལ་ཐོན་ལས་མ་ལག་ཅན་དང་དེང་རབས་ཅན་གྱི་འཕེལ་རིམ་མངོན་གསལ་དོད་པོས་མགྱོགས་སུ་ཕྱིན་པ་དང་། ཁྲོམ་རའི་འགྲན་རྩོད་ནུས་པ་དང་བཟུང་ཚད་རྒྱུན་མཐུད་ངང་མཐོ་རུ་ཕྱིན་ཡོད།མིག་སྔར། རྫོང་ཡོངས་སུ་སྣེ་འདྲེན་ཁེ་ལས2དང་ཆེད་ལས་མཉམ་ལས་ཁང75། འདེབས་འཛུགས་དུད་ཆེན152བཅས་ལས་གྲུབ་པའི་ཐོན་ལས་རྐང་འཛིན་ཁྱུ་ཚོགས་ཤིག་སྐྱེད་སྲིང་བྱས་ཡོད། ན་ནིང་གི་ཟླ11པར་ས་མཐོའི་འཁྱག་ཚལ་ཏུན17གྱིས་དུས་ཡུན་ཆུ་ཚོད་46རིང་ཨའོ་མོན་ཁྲོམ་རར་ཐད་ཀར་མཁོ་འདོན་བྱས་པས་མཚོ་སྔོན་གྱི་འཁྱག་ཚལ་ཨོ་སི་ཁྲུ་ལི་ཡར་ཕྱིར་གཏོང་ཚད“གཅིག་ཀྱང་མེད་པའིཐོད་བརྒལ”མངོན་འགྱུར་བྱུང་།
ཧོར་གྲོང་རྫོང་གི་འཁྱག་ཚལ་ཐོན་ལས་འཕེལ་རྒྱས་གཏོང་རྒྱུ་ནི། ང་ཚོས་སྤུས་ཚད་མཐོ་བའི་འཕེལ་རྒྱས་ཀྱི་བླང་བྱ་ལག་བསྟར་དང་། ཐོན་ཁུངས་ཀྱི་སྤུས་ཚད་ལ་གཞི་ཚུགས་ནས“ཁྱད་ལྡན”ཐོན་རྫས་བཟོ་བའི་བསྡུས་གཟུགས་ཤིག་ཡིན། ང་ཚོས་མུ་མཐུད་དེ་སོན་བཟང་ལེགས་སྤེལ་དང་།སྤུས་ཚད་མཐོ་འདེགས། སྤུས་རྟགས་གསར་གཏོད།ཐོན་སྐྱེད་ཚད་ལྡན་བཅས་ཀྱི་ཐད་འབད་བརྩོན་དེ་བས་ཆེ་བ་བྱས་ཏེ། འཁྱག་ཚལ་ཐོན་ལས་དེ་རིམ་པ་དེ་བས་མཐོ་བའི་ཕྱོགས་སུ་བསྐྱོད་རྒྱུར་སྐུལ་འདེད་བཏང་ཐོག དེ་ཉིད་དམངས་ཕྱུག་རྫོང་སྟོབས་ཆེར་གཏོང་བའི་ལྗང་མདོག་ཀ་རྟེན་ཐོན་ལས་དངོས་བསྒྱུར་ནས་ ཞིང་ཆེན་ཡོངས་ཀྱི་ཞིང་ལས་དེང་རབས་ཅན་དུ་འགྱུར་ཆེད་ཧོར་གྲོང་གི་སྟོབས་ཤུགས་དབུལ་རྒྱུ།
མི་དམངས་གོང་དུ་བཀུར་ནས་མ་མཐའི་ཚད་ཐིག་ནན་སྲུང་དང་།འགོག་སྲུང་ཞིབ་ཚགས་ཀྱིས་སྲུང་ཡོལ་བསྐྲུན་དགོས།
དཔའ་ལུང་རྫོང་ཨུའི་ཧྲུའུ་ཅི་གཞོན་པ། རྫོང་དཔོན་ཡེ་ཞང་།
ཉེ་བའི་ལོ་ཤས་རིང་། དཔའ་ལུང་ཧུའེ་རིགས་རང་སྐྱོང་རྫོང་གིས་མང་ཚོགས་ཀྱི་ཚེ་སྲོག་དང་རྒྱུ་ནོར་གྱི་བདེ་འཇགས་སྲུང་སྐྱོབ་བྱ་རྒྱུ་དེ་ཆབ་སྲིད་ཀྱི་འགན་འཁྲི་དང་པོར་བརྩིས་ནས། འཕྲལ་སྡོམ་ཉེན་གཡོལ་གྱི་ལས་དོན་ཁག་ལ་སྐུལ་འདེད་ཏན་ཏིག་བཏང་ཡོད།ན་ནིང་འབྲུབ་དུས་སུ་གློ་བུར་དུ་བྱུང་བའི་ཉེན་ཁའི་གནས་ཚུལ27བདེ་བླག་ངང་ཐག་གཅོད་བྱས་ནས་གནོད་འཚེ་ཚབས་ཆེན་ལ“ཤི་རྨས་མེད་པ་དང་གྱོང་གུན་ཉུང་བའི”དམིགས་ཚད་མངོན་འགྱུར་བྱུང་ཡོད།
ང་ཚོས“རྫོང་རིམ་པའི་མགོ་ཁྲིད་ཀྱིས་ཞང་དང་གྲོང་རྡལ་འགན་གཙང་ལེན་པ་དང་།ཞང་དང་གྲོང་རྡལ་གྱི་ལས་བྱེད་པས་གྲོང་ཚོ་འགན་གཙང་ལེན་པ།གྲོང་ཚོའི་ལས་བྱེད་པས་མཉམ་ལས་ཁང་འགན་གཙང་ལེན་པ།དྲ་མིག་ཅན་གྱིས་དུད་ཚང་འགན་གཙང་ལེན་པ།ཏང་ཡོན་ལས་བྱེད་པས་མང་ཚོགས་འགན་གཙང་ལེན་པ་”བཅས་ཀྱི་རིམ་པ་ལྔའི་འགན་ལེན་འགན་འཁྲིའི་ལམ་ལུགས་ཕྱོགས་ཡོངས་ནས་བཙུགས་ཏེ།ཆུ་ལོག་སྔོན་འགོག་གི་འགན་འཁྲི་དང་ཡོངས་སུ་ཁྱབ་པའི་ལས་ཀའི་རྣམ་པ་ཕྱོགས་ཡོངས་ནས་དོན་འཁྱོལ་བྱས་ཡོད། རིམ་ཁག་འགན་བཅོལ་ནང་ཞུགས་མཁན་གྱི“འགྱུར་མེད་འགན་འཁྲི”ཁ་གསལ་བཟོས་ནས“དུད་ཚང་རེར་འགན་འཁྲི་འཁུར་མཁན་རེ་དང་མི་རེར་རོགས་སྐྱོར་པ་རེ”མངོན་འགྱུར་བྱས། འགན་འཁྲིའི་མ་ལག་དེར་བརྟེན་ནས2025ལོའི་ཟླ9ཚེས3ཉིན་གྱི་ཐོ་རེངས་སུ་དཔའ་ལུང་རྫོང་ར་རྫ་སྡེ་བར་སྨི་རང་སུམ་སྒྱུར་དུང་ཕྱུར3.7རྒྱལ་ནང་དུ་མཐོང་དཀོན་པའི་རི་ཉིལ་གནས་ཚུལ་ཚབས་ཆེན་བྱུང་། གནོད་འཚེ་མ་ཐོན་གོང་སྡེ་བའི་ཏང་ཀྲི་པུའུ་ཧྲུའུ་ཅི་དགེ་འདུན་སྡེ་བ་རིམ་པའི་འགན་གཙང་ལེན་གྱི་འགན་འཁུར་པ་ཞིག་ཡིན་པའི་ངོས་ནས། རི་ཉིལ་བའི་གནས་ཚུལ་སྔོན་ལ་ཤེས་རྟོགས་བྱུང་བ་དང་འབྲེལ་འཕྲལ་མར་གོང་ཞུ་བྱས་པ་དང་།རྫོང་རིམ་པའི་སྡེ་ཚན་མང་པོའི་འཕྲལ་སྡོམ་དཔུང་ཁག་གིས་འཕྲལ་སྡོམ་རོགས་སྐྱོབ་བྱས་ཏེ་ནུས་ཆེའི་ཉེན་གཡོལ་གྱི་དཔེ་མཚོན་བཏོད།
ང་ཚོས་“ལྟ་ཞིབ་ཚད་ལེན་སྔོན་བརྡ་གཏོང་བ་དང་།གཞི་རིམ་གྱིས་དང་ལེན་དང་གཞོགས་འདེགས་བྱེད་པའི”“གཞོགས་འདེགས་ཟུང”གི་ལམ་སྲོལ་གསར་གཏོད་བྱས་ནས་བཙུགས་པ་དང་།“ལག་རྩལ་གྱི་ཉེན་བརྡ་གཏོང་བ་དང་མི་ཐབས་ལ་བརྟེན་ནས་ཞིབ་བཤེར་བྱེད་པ”“སྐུད་ཐོག་འོས་སྦྱོར་དང་སྐུད་འོག་སྒོ་རྡུང”བཅས་ཕྱོགས་ཡོངས་རྣམ་པ་བརྒྱུད་དེ། སྔོན་བརྡའི་ཆ་འཕྲིན་བརྒྱུད་སྤྲོད་བྱེད་པར“དུས་ཚོད་ནར་འགྱངས་མི་བྱེད་པ་དང་ཕྱོགས་ཡོངསསུ”འགན་ལེན་བྱས་ཡོད།“སྔོན་བརྡ་གཏོང་བའི”ལྷུ་ཚིགས་སུ“གནམ་གཤིས་དང་།ཆུ་བེད།རང་བྱུང་ཐོན་ཁུངས།འཕྲལ་སྡོམ་”བཅས་སྡེ་ཚན་བཞིའི་གྲངས་གཞི་བསྡུ་སྒྲིལ་བྱས་ནས་རྫོང་རིམ་པའི་འཕྲལ་སྡོམ་བཀོད་འདོམས་ལས་སྟེགས་བསྐྲུན་ཏེ་དྲག་ཆར་དང་ས་གཤིས་གནོད་འཚེ་སོགས་ཀྱི་སྔོན་བརྡའི་ཆ་འཕྲིན་ལ་རིམ་དབྱེ་རིགས་དབྱེའི་འོས་སྦྱོར་བྱས། ན་ནིང་འབྲུབ་དུས་སུ་རིམ་རྩིས་བྱས་ན་ས་གཤིས་གནོད་འཚེའི་གནམ་གཤིས་ཉེན་ཁའི་སྔོན་བརྡ་ཐེངས99བཏང་བ་དང་།ཉེན་ཟོན་སྔོན་བརྡའི་འཕྲིན་ཐུང113བསྐུར་བ། འཕྲལ་སྡོམ་རླུང་འཕྲིན་གྱིས་ཉེན་ཟོན་སྔོན་བརྡའི་ཆ་འཕྲིན952བསྒྲགས་ཏེ་དུས་ཡུན་ཆུ་ཚོད89ལ་ཁྱབ་བསྒྲགས་བྱས་ནས་ཉེན་ཟོན་སྔོན་བརྡའི་ཆ་འཕྲིན་མི་སེམས་སུ་འཇགས་པར་བྱས། “གནོད་འཚེ་ཁ་གཏད་འཇལ་བའི”ལྷུ་ཚིགས་སུ།“གཞི་རིམ་གྱིས་དང་ལེན་དང་གཞོགས་འདེགས་བྱེད་པའི”ལམ་སྲོལ་འཐུས་ཚང་དུ་བཏང་སྟེ།“གཞོགས་འདེགས་དང་ལེན་བྱེད་པ་དང་། དང་ལེན་ནས་འགུལ་སྐྱོད་བྱེད་པའི”བྱ་བའི་བླང་བྱ་ཁ་གསལ་བཟོས། དེ་དང་ཆབས་ཅིག“སྟོད་སྨད་མཉམ་འགུལ་དང་ཤང་གྲོང་ལས་བརྒལ་བའི་མཉམ་ལས”ཀྱི་དང་ལེན་ལམ་སྲོལ་བཙུགས། ན་ནིང་ཚུན་དུ་དཔའ་ལུང་རྫོང་གིས“གཞོགས་འདེགས་ཟུང”གི་ལམ་སྲོལ་བརྒྱུད་བསྡོམས་པས་མང་ཚོགས་དུད་ཚང1608ཀྱི་མི8235བདེ་འཇགས་ངང་གནས་སྤོ་བཀོད་སྒྲིག་བྱས་པས་མགྱོགས་མྱུར་སྒོས་ཉེན་གཡོལ་ཐུབ་པ་བྱུང་།
ང་ཚོས“མཐུན་སྦྱོར་འགན་ལེན”གྱི་འདེགས་སྐྱོར་བརྟན་པོ་བྱས་ཏེ་དངོས་ཟོག་འགན་ལེན་ཐད“ཐག་ཉེ་སར་གསོག་འཇོག་དང་རིམ་དབྱེ་འགན་ལེན”གྱི་རྩ་དོན་གཞིར་བཟུང་། རྫོང་རིམ་པའི་འཕྲལ་སྡོམ་དངོས་ཟོག་གྲབས་གསོག་ལྟེ་གནས1དང་ཡུལ་ཚོ་དང་གྲོང་རྡལ12ཀྱི་གྲབས་གསོག་ས་ཚིགས་བཙུགས་ནས། འཕྲལ་སྡོམ་དངོས་ཟོག་སྣ་ཚོགས6230(ཆ་ཚང)གྲབས་གསོག་བྱས། དཔུང་ཁག་འཛུགས་སྐྱོང་ཐད་རྫོང་རིམ་པའི་འཕྲལ་སྡོམ་ཉེན་སེལ་རུ་ཁག་དང་། ཤང་གྲོང་ཕྱོགས་བསྡུས་འཕྲལ་སྡོམ་རུ་ཁག སྡེ་བ་རིམ་པའི་དང་བླངས་རོགས་སྐྱོབ་རུ་ཁག་བཅས་དཔུང་ཁག་གསུམ་བཙུགས་པར་ཁྱོན་མི་གྲངས4228ཟིན་པ་དང་། ན་ནིང་འཕྲལ་སྡོམ་སྦྱོང་བརྡར་སྣ་ཚོགས་ཐེངས943ལ་སྤེལ། དེ་དང་ཆབས་ཅིག སྡེ་མི་འཕྲལ་སྡོམ་དང་བླངས་ཞབས་ཞུའི་ནང་ཞུགས་རྒྱུར་སྐུལ་མ་བཏང་ནས“ཆེད་ལས་དང་གཞི་རིམ་ཟུང་དུ་འབྲེལ་བའི”རོགས་སྐྱོབ་རྣམ་པ་ཞིག་ཆགས་པ་བྱས། སྤྱི་ཚོགས་རོགས་སྐྱོར་ཐད་ཐོག་མཐའ་བར་གསུམ་དུ་མི་རིགས་མཐུན་སྒྲིལ་ཁྱིམ་ཚང་གཅིག་ལྟར་བརྩེ་བའི་འདུ་ཤེས་རྒྱུན་འཁྱོངས་བྱས་ཏེ།སྤྱི་ཚོགས་ལས་རིགས་ཁག་གི་གཅེས་སེམས་མི་སྣས་གཅིག་རྗེས་གཉིས་མཐུད་ཀྱིས་རོགས་སྐྱོར་བྱས་ཏེ།དངུལ་དང་དངོས་པོ་ཞལ་འདེབས་དང་དང་བླངས་ཞབས་ཞུའི་ནང་ཞུགས་པ་དང་།བྱ་སྤྱོད་དངོས་ཀྱི་ཐོག་ནས་སྤྱི་ཚོགས་ཀྱི་འགན་འཁྲི་ལག་བསྟར་བྱེད་པར་བསྔགས་སྐུལ་བྱས་ཡོད།མིག་སྔར་དཔའ་ལུང་རྫོང་ཞུང་ཞན་བོད་རིགས་ཡུལ་ཚོ་ཞུང་ཞན་སྡེ་བ་དང་བ་ཡན་གྲོང་རྡལ་ཀ་ཤིས་སྡེ་བ2ཉེན་གཡོལ་གནས་སྤོའི་གཅིག་སྡུད་བཀོད་སྒྲིག་ས་ཚིགས་གཉིས་ཀྱི་རྣམ་གྲངས་ཁྱོན་ཡོངས་ནས་ལས་མགོ་ཚུགས། སྔོན་དཔག་བྱས་ན་ད་ལོའི་ཟླ་དྲུག་པའི་ཟླ་མཇུག་གོང་མང་ཚོགས་ཁྱོན་ཡོངས་ནས་གནས་སྤོ་ཐུབ་རྒྱུ་རེད།
སླད་ཕྱིན། དཔའ་ལུང་རྫོང་གིས“རིམ་ལྔའི་འགན་ལེན”གྱི་འགན་འཁྲིའི་མ་ལག་མུ་མཐུད་ཇེ་ལེགས་དང་།“གཞོགས་འདེགས་ཟུང”གི་སྔོན་བརྡའི་ལམ་སྲོལ་འཐུས་སྒོ་ཇེ་ཚང་།མཐུན་སྦྱོར་འགན་ལེན་གྱི་ནུས་པ་ཆེར་བསྐྱེད་བཅས་བྱས་ནས་མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་བདེ་འཇགས་ཀྱི་འགོག་སྲུང་འཛིང་རགས་བརྟན་པོ་མུ་མཐུད་དུ་ཇེ་བརྟན་དུ་གཏང་འཆར་ཡོད།
