ཞིང་ཆེན་སྲིད་གྲོས་ཨུ་ཡོན་གྱིས་ཚན་ཆུང་བགོས་ནས་སྲིད་གཞུང་བྱ་བའི་སྙན་ཞུ་དང་སྙན་ཞུ་གཞན་དག་ལ་གྲོས་བསྡུར་བྱས།

ཟླ1ཚེས28ཉིན། ཞིང་ཆེན་སྲིད་གྲོས་སྐབས་བཅུ་གསུམ་པའི་གྲོས་ཚོགས་ཐེངས་བཞི་པར་ཞུགས་པའི་ཨུ་ཡོན་རྣམས་ཀྱིས་ཚན་ཆུང་བགོས་ནས་སྲིད་གཞུང་བྱ་བའི་སྙན་ཞུ་དང་། ལོ་ལྔའི་འཆར་འགོད་བཅོ་ལྔ་པའི་རྩ་གནད་འཆར་ཟིན་དང་འཆར་གཞི། སྔོན་རྩིས་སྙན་ཞུ་བཅས་ལ་གྲོས་བསྡུར་བྱས། ཨུ་ཡོན་རྣམས་ཀྱིས་གཅིག་གྱུར་སྒོས་བལྟས་ན། སྲིད་གཞུང་བྱ་བའི་སྙན་ཞུའི་ཆབ་སྲིད་ཀྱི་ལངས་གནས་མཐོ་ཞིང་བྱ་བའི་ཕན་འབྲས་དོན་དངོས་ཡིན་ལ། བསམ་ཕྱོགས་བྱེད་ཐབས་གསལ་བོ་ཡིན་པས། མངགས་བཅོལ་ཡིད་ལ་དམ་པོར་འཛིན་པ་དང་དྲིན་གཟོ་ཡར་བརྩོན་གྱི་འགན་འཁྲི་ཁག་ཁུར་མངོན་ཡོད། སྙན་ཞུས་མ་ལག་ལྡན་པའི་སྒོ་ནས2025ལོ་དང་ལོ་ལྔའི་འཆར་འགོད་བཅུ་བཞི་པའི་དུས་སྐབས་ཀྱི་བྱ་བར་ཕྱིར་དྲན་བྱས་ཤིང་། ཚན་རིག་དང་མཐུན་པའི་སྒོ་ནས་ལོ་ལྔའི་འཆར་འགོད་བཅོ་ལྔ་པའི་དུས་སྐབས་ཀྱི་དམིགས་འབེན་ལས་འགན་དང2026ལོའི་བྱ་བར་བཀོད་སྒྲིག་དང་འཆར་འགོད་བྱས་པར་བརྟེན། ཁ་ཕྱོགས་ཁྲིད་སྟོན་དང་བདེན་འཚོལ་དངོས་གཉེར། ངར་ཤུགས་བསྐྱེད་པ་བཅས་ཀྱི་སྤུས་ཚད་ལྡན་པའི་སྙན་ཞུ་ཞིག་ཏུ་འདོད།

ཚན་ཆུང་བགོས་ནས་གྲོས་བསྡུར་བྱེད་པའི་ཡུལ་དངོས་ཀྱི་རྣམ་པར་སྤྲོ་དགས་ཁེངས་ཡོད། ཨུ་ཡོན་རྣམས་ཀྱིས་སྲིད་གཞུང་བྱ་བའི་སྙན་ཞུ་ལས་གཏན་འཁེལ་བྱས་པའི་དམིགས་འབེན་ལས་འགན་ལ་གཞིགས་པ་དང་། ལས་རིགས་སོ་སོའི་ཁྱད་ཆོས་དང་བྱ་བའི་དངོས་ཡོད་ལ་ཟུང་འབྲེལ་བྱས་ཤིང་། ཚ་གནད་བརྗོད་བྱར་དམིགས་ནས་བསམ་ཚུལ་ལྷུག་པར་བརྗོད། ཚང་མས་བལྟས་ན། འདས་པའི་ལོ་ངོ་གཅིག་གི་རིང་། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གིས་ཞིང་ཆེན་ཡོངས་ཀྱི་མི་དམངས་ཀྱི་སྣེ་ཁྲིད་དེ་དྲིན་གཟོ་ཡར་བརྩོན་དང་དངོས་སྒྲུབ་སྔོན་བརྩོན་བྱས་པས། སྐྱེ་ཁམས་ཁོར་ཡུག་དང་དཔལ་འབྱོར་འཕེལ་རྒྱས། ཁྱད་ལྡན་ཐོན་ལས། དམངས་འཚོ་ལེགས་སྒྱུར་སོགས་ཀྱི་ཁྱབ་ཁོངས་སུ་ཡར་རྒྱས་ཆེན་པོ་བྱུང་ཡོད། ལོ་ངོ་གཅིག་གི་རིང་། ཞིང་ཆེན་སྲིད་གྲོས་ཀྱི་ཨུ་ཡོན་རྣམས་ཀྱིས་ཞིང་ཆེན་ཡོངས་ཀྱི་ལྟེ་བའི་ཁྱོན་ཡོངས་ལ་དམིགས་ནས་ལས་སྒྲུབ་ནན་མོ་བྱས་པ་དང་། རྟོག་ཞིབ་ཇུས་འདོན་གཏིང་ཟབ་བྱས་ལ། སྤྱི་ཡོངས་ལ་ཞབས་འདེགས་ཞུ་བའི་ཁྲོད་ཐུན་མོང་ངོས་འཛིན་གཅིག་སྡུད་དང་དམངས་འཚོའི་དོ་ཁུར་ལ་དང་ལེན་བྱེད་པའི་ཁྲོད་ཇུས་ལེགས་འདོན་པ། ཡར་བརྩོན་སྟོབས་ཤུགས་གཅིག་སྡུད་ཀྱི་བརྒྱུད་རིམ་ཁྲོད་ཁག་ཁུར་མངོན་པ་བཅས་བྱས་ཏེ། སྤྱི་ཚོགས་རིང་ལུགས་ཀྱི་གྲོས་མོལ་དམངས་གཙོ་དེ་མཚོ་སྔོན་དུ་གསོན་ཉམས་ལྡན་པའི་ངང་ལག་ལེན་བྱས་པ་མངོན་ཡོད་པར་འདོད།

གྲུབ་འབྲས་ཀྱིས་བརྩོན་སེམས་བསྐྱེད་པར་བྱེད་ལ་འཆར་འགོད་ཀྱིས་ངར་ཤུགས་རྒྱས་པར་བྱེད། ཚང་མས་ལང་ལོང་སྒོས་བསྟན་དོན། ཁྱོན་ཡོངས་ཀྱི་ལངས་གནས་ལ་གཞིགས་ནས་འགན་སྒྲུབ་ལ་འཆར་འགོད་བྱེད་པ་དང་། ལྟེ་གནས་ལ་རྐང་བཙུགས་ཏེ་དངོས་སྒྲུབ་ལ་ཕྱོགས་ནས། རང་ཞིང་གི་ལོ་ལྔའི་འཆར་འགོད་བཅོ་ལྔ་པའི་འཕེལ་རྒྱས་ཀྱི་ཐབས་ཇུས་ལས་འགན་དང་བྱེད་ཐབས་གལ་ཆེན་ལ་ཚད་བསྡུར་བྱས་ཏེ། འགན་སྒྲུབ་ཀྱི་འགོ་རྩོམ་ས་དང་ཤུགས་འདོན་ས་སྔར་ལས་ཡང་དག་སྒོས་འཚོལ་བ། བརྟག་དཔྱད་ཞིབ་འཇུག་གཏིང་ཟབ་ཏུ་སྤེལ་བ་དང་། བློ་གྲོས་ལྡན་པའི་ཐབས་འདོན་པ་དང་དངོས་གཉེར་ཀྱི་ཇུས་བཏོན་ནས། ནུས་ཤུགས་ཡོད་རྒུས་ཀྲུང་གོའི་ལུགས་ཀྱི་དེང་རབས་ཅན་གྱི་མཚོ་སྔོན་གྱི་ལེའུ་འབད་པས་འབྲི་བར་བློ་གྲོས་དང་སྟོབས་ཤུགས་མང་པོ་འབུལ་དགོས།