མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ1ཚེས28ཉིན། ཞིང་ཆེན་དམངས་ཆེན་སྐབས་བཅུ་བཞི་པའི་གྲོས་ཚོགས་ཐེངས་བཞི་པར་ཞུགས་པའི་འཐུས་མིས་སྲིད་གཞུང་བྱ་བའི་སྙན་ཞུར་མུ་མཐུད་དུ་གྲོས་ཞིབ་བྱས་པ་དང་། “ལོ་ལྔའི་འཆར་འགོད་བཅོ་ལྔ་པའི”འཆར་འགོད་རྩ་གནད་འཆར་ཟིན་དང་འཆར་གཞིའི་སྙན་ཞུ་དང་འཆར་ཟིན། སྔོན་རྩིས་སྙན་ཞུ་དང་འཆར་ཟིན་བཅས་ལ་ཞིབ་བཤེར་བྱས། འཐུས་ཚབ་ཚོགས་པ་ཁག་གི་གྲོས་ཞིབ་ཡུལ་དངོས་ཀྱི་རྣམ་པར་སྤྲོ་སེམས་འཁོལ་བ་དང་། འཐུས་མི་ཚོར་སེམས་ཤུགས་ཀྱིས་ཁེངས་ཡོད་པ་དང་བསམ་ཚུལ་ཐད་ཀར་བརྗོད་པ་དང་སྐད་ཆ་ལྷུག་པོར་བཤད།
འཐུས་མི་ཚོས་གཅིག་མཐུན་གྱིས་བལྟས་ན། སྲིད་གཞུང་བྱ་བའི་སྙན་ཞུའི་ནང་རྒྱལ་ཡོངས་འཕེལ་རྒྱས་ཀྱི་ཁྱོན་ཡོངས་ཁྲོད་ཀྱི་མཚོ་སྔོན་གྱི་འཐབ་ཇུས་ངེས་གནས་སྟངས་འཛིན་བྱས་ཏེ། འབྱུང་འགྱུར་གྱི་ལོ་ལྔའི་རིང་གི་འཕེལ་རྒྱས་ལ་ཚན་རིག་དང་མཐུན་པར་ཇུས་འགོད་བྱས་ཡོད། ཞིང་ཆེན་གྱི་གནས་ཚུལ་ལ་གཞི་ཚུགས་ནས་བཀོད་སྒྲིག་ཇུས་འགོད་གང་ལེགས་བྱས་ཡོད་ལ། བདེན་སྲུང་གསར་གཏོད་ཀྱི་འགན་ཁུར་སྙིང་སྟོབས་ཁྱོན་ཡོངས་ནས་མངོན་པ་དང་། ནན་འཛིན་དངོས་སྒྲུབ་དང་དཀའ་སེལ་འགག་སྒྲོལ་གྱི་སྙིང་སྟོབས་མངོན་པར་མཚོན་ཏེ། ཀྲུང་དབྱང་གི་དགོངས་དོན་ལག་བསྟར་བྱེད་པ་དང་མཚོ་སྔོན་གྱི་དོན་དངོས་དང་མཐུན་ལ། མི་དམངས་ཀྱི་རེ་སྒུག་དང་བསྟུན་པས། སྔ་མཐུད་རྗེས་སྐྱོང་དང་ཡིད་ཆེས་ཆེར་སྐྱེད། འཕེལ་རྒྱས་ཁྲིད་སྟོན་གྱི་སྙན་ཞུ་ཡག་པོ་ཞིག་ཡིན་པར་འདོད།
གྲོས་ཞིབ་ཁྲོད། འཐུས་མི་ཚོས“ལོ་ལྔའི་འཆར་འགོད་བཅུ་བཞི་པའི”སྐབས་ཞིང་ཆེན་ཡོངས་ཀྱི་དཔལ་འབྱོར་སྤྱི་ཚོགས་འཕེལ་རྒྱས་ལས་བླངས་པའི་གྲུབ་འབྲས་ཆེན་པོ་དྲུག་ལ་དམིགས་ནས་གྲོས་བསྡུར་གཏིང་ཟབ་བྱས། ཚང་མས་གཅིག་གྱུར་གྱིས་བལྟས་ན། ལོ་ལྔ་བོ་འདི་ནི་སྐྱེ་ཁམས་དཔལ་ཡོན་འཛུགས་སྐྲུན་ལ་གྲུབ་འབྲས་མངོན་གསལ་དོད་པོ་ཐོབ་པ་དང་། ཕྱོགས་བསྡུས་དཔལ་འབྱོར་སྟོབས་ཤུགས་མངོན་གསལ་དོད་པོས་ཆེ་རུ་ཕྱིན་པ། བཅོས་སྒྱུར་སྒོ་འབྱེད་ཀྱི་གོམ་སྟབས་མངོན་གསལ་དོད་པོས་ཇེ་མགྱོགས་སུ་ཕྱིན་པ། མཁར་གྲོང་རྣམ་པར་འགྱུར་ལྡོག་མངོན་གསལ་དོད་པ། མི་དམངས་ཀྱི་འཚོ་བའི་སྤུས་ཚད་མངོན་གསལ་དོད་པོས་ཇེ་ལེགས་སུ་ཕྱིན་པ། བདེ་འཇགས་འཕེལ་རྒྱས་ཀྱི་ཆུ་ཚད་མངོན་གསལ་མཐོར་འདེགས་བྱུང་བའི་ལོ་ལྔ་ཡིན་པ་དང་། ཀྲུང་གོའི་ལུགས་ཀྱི་དེང་རབས་ཅན་གྱི་མཚོ་སྔོན་གསར་པ་འཛུགས་སྐྲུན་ལ་རྣམ་པ་གསར་པ་མངོན་ཡོད་པར་འདོད།
གྲོས་ཞིབ་བྱེད་སྐབས་འཐུས་མི་ཚོས་སྤྲོ་སེམས་རབ་ཏུ་འཁོལ་བའི་སྒོ་ནས་བསམ་ཚུལ་ལྷུག་པོར་བརྗོད། ཚང་མས་གཅིག་གྱུར་གྱིས་བལྟས་ན། “ལོ་ལྔའི་འཆར་འགོད་བཅོ་ལྔ་པའི”འཆར་འགོད་རྩ་གནད་འཆར་ཟིན་ལས“ལོ་ལྔའི་འཆར་འགོད་བཅོ་ལྔ་པའི”དུས་སྐབས་ཀྱི་མཚོ་སྔོན་འཕེལ་རྒྱས་ཀྱི་ལོ་རྒྱུས་ཀྱི་ཕྱོགས་གནས་གནད་ལ་འཁེལ་བའི་སྒོ་ནས་ཁོང་དུ་ཆུད་པ་དང་། དམིགས་འབེན་དང་བསམ་ཕྱོགས་གསལ་པོ་ཡིན་པ་ལ། ལས་འགན་དང་བྱེད་ཐབས་དངོས་གཉེར་ཡིན་པས། ཀྲུང་གོའི་ལུགས་ཀྱི་དེང་རབས་ཅན་གྱི་མཚོ་སྔོན་གྱི་ལེའུ་འབད་པས་འབྲི་ཆེད“དཔེ་རིས”དང“ལས་འགན་ཡི་གེ”གསལ་པོ་འདོན་སྤྲོད་བྱས་ཡོད་ལ། ཞིང་ཆེན་ཡོངས་ཀྱི་དཔལ་འབྱོར་སྤྱི་ཚོགས་འཕེལ་རྒྱས་ལ་ཤུགས་རྐྱེན་གཏིང་ཟབ་ཐོན་ངེས་པར་འདོད།
2026ལོ་ནི“ལོ་ལྔའི་འཆར་འགོད་བཅོ་ལྔ་པ”འགོ་ཚུགས་པའི་ལོ་ཡིན་ལ། ཀྲུང་གོའི་ལུགས་ཀྱི་དེང་རབས་ཅན་གྱི་མཚོ་སྔོན་གྱི་ལེའུ་འབྲི་བའི་གནད་འགག་གི་ལོ་ཞིག་ཀྱང་ཡིན། འཐུས་མི་ཚོས་གཅིག་རྗེས་གཉིས་མཐུད་དུ་འབད་བརྩོན་དང་བབ་བསྟུན་མདུན་སྐྱོད། རྒྱུན་མཐུད་འབད་འཐབ་དང་ཡར་བརྩོན་ལྷོད་མེད་བཅས་བྱས་ཏེ། ལངས་གནས་སྔར་ལས་མཐོ་བ་དང་འགན་ཁུར་སྔར་ལས་དྲག་པ། བྱེད་ཐབས་སྔར་ལས་ཏན་ཏིག་བཅས་ཀྱི་ཐོག་ནས“ལོ་ལྔའི་འཆར་འགོད་བཅོ་ལྔ་པའི”དམིགས་འབེན་ལས་འགན་སོ་སོ་དོན་འཁྱོལ་བྱས་ཏེ། “ལོ་ལྔའི་འཆར་འགོད་བཅོ་ལྔ་པའི”འགོ་ཡག་པོ་རྩོམ་པར་སྟོབས་ཤུགས་འབུལ་རྒྱུ་ཡིན་ཟེར།
