ཞིང་ཆེན་དམངས་ཆེན་སྐབས་བཅུ་བཞི་པའི་གྲོས་ཚོགས་ཐེངས་བཞི་པས་ཚང་འཛོམས་གྲོས་ཚོགས་ཐེངས་གཉིས་པ་བསྡུས།

ཟླ1ཚེས28ཉིན་གྱི་ཕྱི་དྲོར། ཞིང་ཆེན་དམངས་ཆེན་སྐབས་བཅུ་བཞི་པའི་གྲོས་ཚོགས་ཐེངས་བཞི་པས་ཚང་འཛོམས་གྲོས་ཚོགས་ཐེངས་གཉིས་པ་བསྡུས། ཚོགས་འདུར་ཞུགས་དགོས་པའི་འཐུས་མི382ཡོད་ཅིང་དངོས་སུ་ཚོགས་འདུར་ཞུགས་པའི་འཐུས་མི348ཡོད་པས། ཁྲིམས་བཀོད་མི་གྲངས་དང་མཐུན།

ཚོགས་ཆེན་གྱི་ཀྲུའུ་ཞི་ཚོགས་པའི་རྒྱུན་ལས་ཀྲུའུ་ཞི། ལག་བསྟར་ཀྲུའུ་ཞི་དབྱང་ཧྥེང་ཁྲུན་གྱིས་ཚོགས་འདུར་འགོ་འཛིན་བྱས།

ལག་བསྟར་ཀྲུའུ་ཞི་ཝང་ཝེ་ཏུང་དང་ཝུའུ་ལ་ཙེ་པིའེ་ཁོ·རེ་སུའུ་ལི་ཧན། དབྱང་ཧྥེང་ཁྲུན། ཀྲུའུ་ཞང་ཏུང་། ཞུང་ཡོན་ལའེ། ཀྲང་ཧྥེང་། ཚའེ་ཁྲེང་ཡུང་། ཉིང་ཧའེ་དབྱིན། ཤ་བོ་སྐྱབས་བཅས་ཀྲུའུ་ཞི་སྟེགས་བུའི་མདུན་གྲལ་དུ་བསྡད་ཡོད།

ཝུའུ་ཞའོ་ཅུན་དང་ལུའོ་ཏུང་ཁྲོན། མགོན་པོ་བཀྲ་ཤིས། ལིའུ་ཆི་ཧྥན། ཝང་ལི་མིང་། ལིའུ་མེ་ཕིན། ཀྲང་ཅིན་ཀང། ཚེ་རིང་ཐར། ཝང་ཏ་ནན། ཀྲུའུ་ཞང་ཧྥེང་། ཧོ་ལུའུ་ཁྲུན། ཚའོ་ཅུན། ཉི་མ་སྒྲོལ་མ། ལིའུ་ཐུང་ཏེ། ཀྲང་ཧོང་ཡོན། ལིའུ་ཀང་། ཝང་ཅིན་ཀྲའེ། ལིའུ་ཐའོ། ལིའུ་ཁྲའོ། ལི་ཧུང་ཡ། ཝང་ཧའེ་ཧུང་། ཁྲེང་ཅི་ཝེ། རིན་ཆེན་རྣམ་རྒྱལ། ཁོང་ཡུང་། ཝང་ཞོན། ཀྲང་ཞའོ་རུང་། ལི་ཞའོ་ནན། ཐེན་ཁུའེ། ལིའུ་ཏ་ཡེ། གསེར་ཁྲི་ཆོས་ཀྱི་བློ་གྲོས་རྒྱ་མཚོ། མ་ཡུའེ་ཞང་། ཀྲང་ཙེ་ཅུན། ཀྲ་ཆིང་ཅིའུ་སོགས་འགོ་ཁྲིད་དང་ཚོགས་ཆེན་གྱི་ཀྲུའུ་ཞུ་ཚོགས་པའི་ཁོངས་མི་རྣམས་ཀྲུའུ་ཞིའི་སྟེགས་བུའི་སྟེང་བསྡད་ཡོད།

ཚོགས་ཐོག་ཏུ་སྔ་རྗེས་སུ་ཞིང་ཆེན་དམངས་ཆེན་སྐབས་བཅུ་བཞི་པའི་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་གཞོན་པ་ཝང་ལི་མིང་གིས་ཕུལ་བའི་ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་བྱ་བའི་སྙན་ཞུ་དང་། ཞིང་ཆེན་མཐོ་རིམ་མི་དམངས་ཁྲིམས་ཁང་གི་ཡོན་ཀྲང་ཀྲང་ཙེ་ཅུན་གྱིས་ཕུལ་བའི་ཞིང་ཆེན་མཐོ་རིམ་མི་དམངས་ཁྲིམས་ཁང་གི་བྱ་བའི་སྙན་ཞུ། ཞིང་ཆེན་མི་དམངས་ཞིབ་དཔྱོད་ཁང་གི་ཞིབ་དཔྱོད་དཔོན་ཀྲ་ཆིང་ཅིའུ་ཡིས་ཕུལ་བའི་ཞིང་ཆེན་མི་དམངས་ཞིབ་དཔྱོད་ཁང་གི་བྱ་བའི་སྙན་ཞུ་བཅས་ལ་ཉན།

ཝང་ལི་མིང་གིས་སྙན་ཞུའི་ནང་བཤད་རྒྱུར། 2025ལོར་བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གི་འགོ་ཁྲིད་བརྟན་པོའི་འོག་ཏུ། ཞིང་ཆེན་ཏང་ཨུས་ཞིང་ཆེན་ཡོངས་ཀྱི་མི་རིགས་སོ་སོའི་མི་དམངས་ལ་མཐུན་སྒྲིལ་སྣེ་ཁྲིད་བྱས་ཏེ། ཏང་གི་ཚོགས་ཆེན་ཐེངས་ཉི་ཤུ་པ་དང་ཏང་གི་སྐབས་ཉི་ཤུ་པའི་ཚང་འཛོམས་གྲོས་ཚོགས་ཐེངས་རེ་རེའི་དགོངས་དོན་ཁྱོན་ཡོངས་ནས་ལག་བསྟར་བྱས་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་གྱི་བྱ་བར་བཏོན་པའི་བླང་བྱ་གལ་ཆེན་གནད་ལ་འཁེལ་བའི་སྒོ་ནས་དོན་འཁྱོལ་བྱས་ལ། མངགས་བཅོལ་བློ་ལ་བརྟན་པོར་བཅངས་ཤིང་འབད་བརྩོན་ཆེན་པོས་མདུན་སྐྱོད་བྱས་ནས། རྒྱལ་ངེས་པའི་ཆོད་སེམས་ལ་བརྟེན་ནས“ལོ་ལྔའི་འཆར་འགོད་བཅུ་བཞི་པའི”མཇུག་ཡག་པོར་བསྡུས་པ་དང་འབད་འབུངས་ཡར་བརྩོན་གྱི་རྣམ་པར་བརྟེན་ནས“ལོ་ལྔའི་འཆར་འགོད་བཅོ་ལྔ་པར”འཆར་འགོད་ལེགས་པོ་བྱས་ཏེ། མཚོ་སྔོན་གྱི་འཕེལ་རྒྱས་ཐད་གྲུབ་འབྲས་གསར་པ་བླངས་ཡོད། ལོ་གཅིག་གི་རིང་ལ། ཞིང་ཆེན་ཏང་ཨུའི་ཡང་དག་པའི་འགོ་ཁྲིད་འོག་ཏུ། ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དགོངས་པ་མཛུབ་སྟོན་དུ་འཛིན་རྒྱུ་རྒྱུན་འཁྱོངས་བྱས་པ་དང་། ཏང་གི་འགོ་ཁྲིད་དང་མི་དམངས་ཀྱིས་རང་ཁྱིམ་རང་བདག་བྱེད་པ། ཁྲིམས་ལྟར་རྒྱལ་ཁབ་སྐྱོང་བ་བཅས་གཅིག་གྱུར་དམ་པོ་ཡོང་བར་བྱས་ཏེ། བརྒྱུད་རིམ་ཧྲིལ་པོའི་མི་དམངས་དམངས་གཙོ་ལག་ལེན་མཐར་ཕྱིན་བྱས་ནས། ཞིང་ཆེན་ཡོངས་ཀྱི་བཅོས་སྒྱུར་འཕེལ་རྒྱས་གཏན་འཇགས་ལ་ཁྱོན་ཡོངས་དང་རང་འགུལ་ངང་མཉམ་འདྲེས་དང་ཞབས་འདེགས་ཞུས་ཤིང་། ལྟེ་བའི་ལས་འགན་ལ་དམིགས་ནས། ཁྲིམས་ལྟར་འགན་འཁྲི་སྒྲུབ་ཤུགས་གཅིག་སྡུད་དང་། ཕྱོགས་སོ་སོའི་སྟོབས་ཤུགས་གཅིག་སྡུད་བྱས་ནས། ཞིང་ཆེན་དམངས་ཆེན་སྐབས་བཅུ་བཞི་པའི་གྲོས་ཚོགས་ཐེངས་གསུམ་པས་གཏན་འཁེལ་བྱས་པའི་དམིགས་འབེན་དང་ལས་འགན་ཁག་ཚང་མ་ཕྱོགས་ཡོངས་ནས་ཡོངས་འགྲུབ་བྱས་ཏེ། ཀྲུང་གོའི་ལུགས་ཀྱི་དེང་རབས་ཅན་གྱི་མཚོ་སྔོན་གྱི་ལག་ལེན་ལ་ལམ་ལུགས་ཀྱི་འདེགས་སྐྱོར་དང་ཁྲིམས་སྐྱོང་གི་འགན་སྲུང་བརྟན་པོ་འདོན་སྤྲོད་བྱས་ཡོད། 2026ལོར་རྒྱུན་ལས་ཨུ་ཡོན་ལྷན་ཁང་གིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དགོངས་པ་མཛུབ་སྟོན་དུ་འཛིན་རྒྱུ་རྒྱུན་འཁྱོངས་དང་། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པ་དང་། ཀྲུང་དབྱང་དཔལ་འབྱོར་བྱ་བའི་གྲོས་ཚོགས། དེ་བཞིན་ཀྲུང་དབྱང་གི་ཕྱོགས་ཡོངས་ནས་ཁྲིམས་ལྟར་རྒྱལ་ཁབ་སྐྱོང་བའི་བྱ་བའི་གྲོས་ཚོགས་བཅས་ཀྱི་དགོངས་དོན་ཁྱོན་ཡོངས་ནས་དོན་འཁྱོལ་བྱས་ཏེ། ཞིང་ཆེན་ཏང་ཨུའི་སྐབས་བཅུ་བཞི་པའི་ཚང་འཛོམས་གྲོས་ཚོགས་ཐེངས་བཅུ་པའི་བཀོད་སྒྲིག་བླང་བྱ་ལྟར། རང་རྟོགས་སྒོས་ཏང་གི་ཕྱོགས་ཡོངས་ཀྱི་འགོ་ཁྲིད་རྒྱུན་འཁྱོངས་དང་དོན་འཁྱོལ་བྱས་ཏེ། “གཙོ་གནད་གཅིག་དང་འཆར་གཞི་གསུམ”དོན་འཁྱོལ་ནན་མོ་བྱེད་པ་དང་། “ལོ་ལྔའི་འཆར་གཞི་བཅོ་ལྔ་པའི”འཆར་འགོད་ཕྱོགས་ཡོངས་ནས་ལག་བསྟར་བྱེད་པར་ཁྲིམས་ལྟར་འགན་སྲུང་བྱེད་པ། རྩ་ཁྲིམས་དང་བཅའ་ཁྲིམས་ཀྱིས་སྤྲད་པའི་འགན་འཁྲི་ལག་བསྟར་ནན་མོ་བྱེད་པ། བརྒྱུད་རིམ་ཧྲིལ་པོའི་མི་དམངས་དམངས་གཙོ་ལག་བསྟར་གང་ལེགས་བྱེད་པ། ལས་ཁུངས་བཞི་འཛུགས་སྐྲུན་ལ་སྐུལ་འདེད་ནན་མོ་གཏོང་བ། དམིགས་འབེན་དང་ལས་འགན་ཚང་མ་ཡོངས་འགྲུབ་ཡོང་བར་ཁག་ཐེག་བྱས་ཏེ། ཁྲིམས་ལྟར་འགན་འཁྲི་སྒྲུབ་པར་ཁོར་ཡུག་བཟང་པོ་ཞིག་བསྐྲུན་པ་དང་། བདེན་སྲུང་གསར་གཏོད་ཀྱིས་འཕེལ་རྒྱས་ལ་སྐུལ་འདེད་གཏོང་བ། བློ་རྩེ་གཅིག་སྒྲིམ་གྱིས་ལེའུ་གསར་པ་རྩོམ་པ་བཅས་ཀྱི་དུས་རབས་ཀྱི་རྒྱུགས་ལན་ཡག་པོ་ཞིག་སྤྲོད་དགོས་ཟེར།

ཀྲང་ཙེ་ཅུན་གྱིས་སྙན་ཞུའི་ནང་བཤད་རྒྱུར། 2025ལོར་ཞིང་ཆེན་ཡོངས་ཀྱི་ཁྲིམས་ཁང་གིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དགོངས་པ་མཛུབ་སྟོན་དུ་འཛིན་རྒྱུ་རྒྱུན་འཁྱོངས་དང་། ཞི་ཅིན་ཕིང་གི་ཁྲིམས་སྐྱོང་དགོངས་པ་དང་ཞི་ཅིན་ཕིང་གི་སྐྱེ་ཁམས་དཔལ་ཡོན་དགོངས་པ་ལག་བསྟར་ནན་མོ་བྱས་ཏེ། ཏང་གི་ཚོགས་ཆེན་ཉི་ཤུ་པ་དང་ཏང་གི་སྐབས་ཉི་ཤུ་པའི་ཚང་འཛོམས་གྲོས་ཚོགས་ཐེངས་རེ་རེའི་དགོངས་དོན་དང་། ཞི་ཅིན་ཕིང་གིས་མཚོ་སྔོན་ལ་གཟིགས་ཞིབ་གནང་སྐབས་ཀྱི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་དོན་འཁྱོལ་བྱས་པ་དང་། ཞིང་ཆེན་ཏང་ཨུའི་སྐབས་བཅུ་བཞི་པའི་ཚང་འཛོམས་གྲོས་ཚོགས་རེ་རེའི་དགོངས་དོན་དོན་འཁྱོལ་ནན་མོ་བྱས་ལ། ཞིང་ཆེན་དམངས་ཆེན་སྐབས་བཅུ་བཞི་པའི་གྲོས་ཚོགས་ཐེངས་གསུམ་པའི་གྲོས་ཆོད་ལག་བསྟར་ནན་ཏན་བྱས་ཏེ། རྩ་ཁྲིམས་དང་བཅའ་ཁྲིམས་ཀྱིས་སྤྲད་པའི་འགན་འཁྲི་ལྷག་བསམ་རྣམ་དག་གིས་ལག་བསྟར་བྱས་ནས། བདེ་འཇགས་དང་བརྟན་བརླིང་ལ་སྲུང་སྐྱོབ་མཐའ་གཅིག་ཏུ་བྱས་པ་དང་། བདེ་འཇགས་མཚོ་སྔོན་འཛུགས་སྐྲུན་ལ་སྐུལ་འདེད་གང་ལེགས་བྱས་ལ། འཕེལ་རྒྱས་ཀྱི་འདུ་ཤེས་གསར་པ་ལག་བསྟར་ནན་ཏན་བྱས་ཤིང་། སྤུས་ཚད་མཐོ་བའི་འཕེལ་རྒྱས་ལ་འདེགས་སྐྱོར་དང་ཞབས་འདེགས་ཞུས་པ་དང་། མི་དམངས་བླ་ན་མེད་པའི་བསམ་ཕྱོགས་ཐོག་མཐའ་བར་གསུམ་དུ་རྒྱུན་འཁྱོངས་བྱས་ལ། དྲང་གཞག་ཁྲིམས་འཛིན་ལ་བརྟེན་ནས་སྤྱི་ཚོགས་ཀྱི་དྲང་གཞག་དྲང་བདེན་ལ་སྲུང་སྐྱོབ་བྱས་པ་དང་། བདེན་སྲུང་གསར་གཏོད་རྒྱུན་འཁྱོངས་བྱས་ཏེ། ཞིང་ཆེན་ཡོངས་ཀྱི་ཁྲིམས་ཁང་གི་འདྲི་གཅོད་ལས་དོན་དེང་རབས་ཅན་དུ་འགྱུར་བར་མྱུར་དུ་སྐུལ་འདེད་བཏང་བ་དང་། བྱེད་ཕྱོགས་ནན་མོ་རྒྱུན་འཁྱོངས་བྱས་ཏེ། དུས་རབས་གསར་པའི་ཁྲིམས་ཁང་སྟོབས་ལྡན་ཡོང་བར་འབད་ནས། ཕྱོགས་སོ་སོའི་ལྟ་སྐུལ་རང་རྟོགས་ངང་དང་ལེན་བྱས་པ་དང་། ཁྲིམས་ཁང་གི་ལས་དོན་ལ་མུ་མཐུད་དུ་ཤུགས་སྣོན་དང་ལེགས་བཅོས་བྱས། ཞིང་ཆེན་ཡོངས་ཀྱི་ཁྲིམས་ཁང་གིས་ཁྱོན་གྱོད་གཞི་འབུམ་གཉིས་དང་ཁྲི་བཞི་སྟོང་གཉིས་ཉིས་བརྒྱ་དོན་གཉིས་བདག་སྤྲོད་བྱས་པའི་ཁྲོད་གྱོད་གཞི་འབུམ་གཉིས་དང་ཁྲི་གཉིས་སྟོང་གཅིག་དྲུག་བརྒྱ་ཞེ་བརྒྱད་ཐག་གཅོད་བྱས་པར་བརྟེན། ལས་རིམ་སོ་སོར་འཕེལ་རྒྱས་གསར་པ་བྱུང་ཡོད། 2026ལོ་ནི“ལོ་ལྔའི་འཆར་འགོད་བཅོ་ལྔ་པ”འགོ་རྩོམ་པའི་ལོ་ཡིན། ཞིང་ཆེན་ཡོངས་ཀྱི་ཁྲིམས་ཁང་གིས་ཏང་ཀྲུང་དབྱང་གི“ལོ་ལྔའི་འཆར་འགོད་བཅོ་ལྔ་པའི”དུས་སྐབས་ཀྱི་ཇུས་ཆོད་གལ་ཆེན་དང་། ཞིང་ཆེན་ཏང་ཨུའི་བྱ་བའི་བཀོད་སྒྲིག་དང་ཆེས་མཐོ་མི་དམངས་ཁྲིམས་ཁང་གི་བྱ་བའི་བླང་བྱ་ལ་དམིགས་ཏེ། ཏང་གི་འགོ་ཁྲིད་མཐའ་གཅིག་ཏུ་རྒྱུན་འཁྱོངས་དང་། ཁྲིམས་ལྟར་ཁྱོན་ཡོངས་ལ་ཞབས་འདེགས་ཞུ་རྒྱུ་རྒྱུན་འཁྱོངས། དམངས་ཀྱི་ཆེད་དུ་ཁྲིམས་འཛིན་པ་་རྒྱུན་འཁྱོངས་བཅས་བྱས་ཏེ། མུ་མཐུད་དུ་རང་ངོས་འཛུགས་སྐྲུན་བྱེད་ཤུགས་ཆེ་རུ་གཏོང་བ་དང་། དོན་འཁྱོལ་ནན་ཏན་དང་ལག་བསྟར་ནན་ཏན་བྱས་ཏེ། བློ་སྟོབས་ཆེན་པོས་གནས་བབ་གསར་པ་བསྐྲུན་ནས། མཚོ་སྔོན་གྱི་བདེ་འཇགས་བརྟན་བརླིང་དང་སྤུས་ཚད་མཐོ་བའི་འཕེལ་རྒྱས་ལ་སྤུས་ལེགས་དང་ཕན་འབྲས་མཐོ་བའི་ཁྲིམས་འཛིན་གྱི་ཞབས་ཞུ་མཁོ་འདོན་བྱེད་དགོས་ཟེར།

ཀྲ་ཆིང་ཅིའུ་ཡིས་སྙན་ཞུའི་ནང་བཤད་རྒྱུར། འདས་ཟིན་པའི་ལོ་གཅིག་གི་རིང་ལ། ཞིང་ཆེན་ཡོངས་ཀྱི་ཞིབ་དཔྱོད་ལས་ཁུངས་ཀྱིས་ཞིང་ཆེན་དམངས་ཆེན་སྐབས་བཅུ་བཞི་པའི་གྲོས་ཚོགས་ཐེངས་གསུམ་པའི་གྲོས་ཆོད་ལག་བསྟར་ནན་མོ་བྱས་ཏེ། སྤྱི་ཡོངས་གཙོ་བོར་འཛིན་པ་དང་བདེ་འཇགས་རྨང་གཞིར་འཛིན་པ། དམངས་འཚོ་དོན་ཆེན་དུ་འཛིན་པ། སྤུས་ཚད་དང་ཕན་འབྲས་རྩ་བར་འཛིན་པ། དམངས་འདོད་མེ་ལོང་དུ་འཛིན་པ། ཆབ་སྲིད་སྲོག་རྩ་རུ་བརྩི་བ་བཅས་རྒྱུན་འཁྱོངས་བྱས་ཏེ། སྤུས་ཚད་མཐོ་བའི་འཕེལ་རྒྱས་ལ་ཞབས་འདེགས་ཞུ་བར་འབད་བརྩོན་བྱས་ནས། བདེ་འཇགས་དང་བརྟན་བརླིང་ལ་ནུས་ཤུགས་ཡོད་རྒུས་སྲུང་སྐྱོབ་བྱས་པ་དང་། དམངས་འཚོའི་བདེ་སྐྱིད་ཆེ་རུ་གཏོང་བར་རོགས་རམ་བྱས་ལ། ཁྲིམས་འཛིན་དྲང་གཞག་ལ་སྲུང་སྐྱོབ་གང་ལེགས་བྱས་ཤིང་། ཁྲིམས་ལྟར་འགན་འཁྲི་སྒྲུབ་པར་ཁག་ཐེག་བྱེད་པར་འབད་བརྩོན་བྱས་པ་དང་། ཞིབ་དཔྱོད་སྟོབས་ལྡན་ཡོང་བར་ཤུགས་བསྣན་ཏེ། “སྤུས་ཚད་དང་ཕན་འབྲས་ཆེ་རུ་གཏོང་བ་དང་། ཁྱད་ཆོད་གཟེངས་སུ་ཐོན་པར་བྱེད་པ།  བྱང་ཚད་ཇེ་ལེགས་སུ་གཏོང་བ། གཞི་རིམ་གྱི་རྨང་གཞི་སྲ་བརྟན་དུ་གཏོང་བ། སྤྱོད་གཙང་སྲུང་སྐྱོབ”བཅས་རྒྱུན་འཁྱོངས་ལྷོད་མེད་བྱས་ནས། སྤུས་ཚད་མཐོ་ཞིང་ཕན་འབྲས་ལྡན་པའི་གྱོད་གཞི་རེ་རེ་རྒྱུན་མཐུད་ངང་ཐག་གཅོད་ལེགས་པོ་བྱས་པས། ལས་དོན་ཁག་ལ་འཕེལ་རྒྱས་གསར་པ་དང་གྲུབ་འབྲས་གསར་པ་ཐོབ་ཡོད། ད་ལོ་ནི“ལོ་ལྔའི་འཆར་འགོད་བཅོ་ལྔ་པ”འགོ་རྩོམ་པའི་ལོ་ཡིན། ཞིང་ཆེན་ཡོངས་ཀྱི་ཞིབ་དཔྱོད་ལས་ཁུངས་ཀྱིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དགོངས་པ་མཛུབ་སྟོན་དུ་འཛིན་རྒྱུ་རྒྱུན་འཁྱོངས་དང་། ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་དང་བཞི་པའི་དགོངས་དོན་ལག་བསྟར་གཏིང་ཟབ་བྱས་ཤིང་། ཞི་ཅིན་ཕིང་གི་ཁྲིམས་སྐྱོང་དགོངས་པ་དང་ཞི་ཅིན་ཕིང་གིས་མཚོ་སྔོན་གྱི་བྱ་བའི་ཐད་བཏོན་པའི་བླང་བྱ་གལ་ཆེན་ཁྱོན་ཡོངས་ནས་ལག་བསྟར་དང་། ཞིང་ཆེན་ཏང་ཨུ་སྐབས་བཅུ་བཞི་པའི་ཚང་འཛོམས་གྲོས་ཚོགས་ཐེངས་དགུ་པ་དང་བཅུ་པ་ལག་བསྟར་དོན་འཁྱོལ་བྱས་ཏེ། རང་རྟོགས་སྒོས“སྲུང་སྐྱོང་གཉིས”ལག་བསྟར་དང་སྐྱེ་ཁམས་དཔལ་ཡོན་འཛུགས་སྐྲུན་ལ་སྐུལ་འདེད་གང་ལེགས་གཏོང་བ། བདེ་འཇགས་མཚོ་སྔོན་འཛུགས་སྐྲུན་ལ་སྐུལ་འདེད་སྔར་ལས་གང་ལེགས་གཏོང་བ། སྤུས་ཚད་མཐོ་བའི་འཕེལ་རྒྱས་ལ་སྔར་ལས་རང་འགུལ་ངང་ཞབས་འདེགས་ཞུ་བ། མི་དམངས་ཀྱི་ཁེ་དབང་སྔར་ལས་ཏན་ཏིག་ངང་སྲུང་བ། བཅའ་ཁྲིམས་ལྟ་སྐུལ་ལ་སྔར་ལས་ཤུགས་སྣོན་པ། རང་ངོས་འཛུགས་སྐྲུན་ལ་སྔར་ལས་བློ་བརྟན་འགྱུར་མེད་ངང་སྐུལ་འདེད་གཏོང་བ་བཅས་བྱས་ཏེ། མཚོ་སྔོན་གྱི“ལོ་ལྔའི་འཆར་འགོད་བཅོ་ལྔ་པ”སྤུས་ཚད་མཐོ་བའི་ངང་ནས་འགོ་རྩོམ་པར་ཁྲིམས་འཛིན་གྱི་འགན་སྲུང་ནུས་ལྡན་མཁོ་འདོན་བྱེད་དགོས་ཟེར།

ཞིང་ཆེན་སྲིད་གྲོས་སྐབས་བཅུ་གསུམ་པའི་གྲོས་ཚོགས་ཐེངས་བཞི་པར་ཞུགས་པའི་ཨུ་ཡོན་རྣམས་ཚོགས་འདུར་ཟུར་ཞུགས་བྱས།