ཝུའུ་ཞའོ་ཅུན་གྲངས་ཉུང་མི་རིགས་དང་ཆོས་ལུགས་ལས་རིགས་ཀྱི་མཉམ་འབྲེལ་ཚན་ཆུང་གི་གྲོས་བསྡུར་ལ་ཞུགས་ནས་ཀྲུང་གོའི་ལུགས་ཀྱི་དེང་རབས་ཅན་གྱི་མཚོ་སྔོན་གྱི་ལག་ལེན་ཐད་མི་སེམས་གཅིག་སྒྲིལ་དང་ངོས་འཛིན་གཅིག་མཐུན། སྟོབས་ཤུགས་གཅིག་སྒྲིལ་བཅས་བྱེད་དགོས་པ་ནན་གྱིས་བསྟན།

ཟླ1ཚེས28ཉིན་གྱི་སྔ་དྲོར།   ཞིང་ཆེན་ཏང་ཨུའི་ཧྲུའུ་ཅི། ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་ཝུའུ་ཞའོ་ཅུན་ཞིང་ཆེན་སྲིད་གྲོས་སྐབས་བཅུ་གསུམ་པའི་གྲོས་ཚོགས་ཐེངས་བཞི་པའི་གྲངས་ཉུང་མི་རིགས་དང་ཆོས་ལུགས་ལས་རིགས་ཀྱི་མཉམ་འབྲེལ་ཚན་ཆུང་གི་གྲོས་བསྡུར་ལ་ཞུགས་ནས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མི་རིགས་ལས་དོན་ལ་ཤུགས་སྣོན་དང་ལེགས་བཅོས་བྱེད་པའི་སྐོར་གྱི་དགོངས་པ་གལ་ཆེན་དང་ཆོས་ལུགས་ལས་དོན་སྐོར་གྱི་རྒྱས་བཤད་གལ་ཆེན་ལ་སློབ་སྦྱོང་དང་ལག་བསྟར་གཏིང་ཟབ་བྱས་ཏེ།     ཏང་གཅེས་རྒྱལ་གཅེས་ཆོས་གཅེས་བཅས་ཀྱི་སྲོལ་རྒྱུན་བཟང་པོ་དར་སྤེལ་གཏོང་བ་དང་།     མི་རིགས་ཁག་རྒྱ་ཁྱབ་ཀྱི་འགྲོ་འོང་བརྗེ་རེས་མཉམ་འདྲེས་བྱེད་པར་སྐུལ་འདེད་བཏང་ནས་ཀྲུང་གོའི་ལུགས་ཀྱི་དེང་རབས་ཅན་གྱི་མཚོ་སྔོན་ལག་ལེན་ཐད་མི་སེམས་གཅིག་སྒྲིལ་དང་། ངོས་འཛིན་གཅིག་མཐུན། སྟོབས་ཤུགས་གཅིག་སྒྲིལ་བཅས་བྱེད་དགོས་པ་ནན་གྱིས་བསྟན།   མགོན་པོ་བཀྲ་ཤིས་ཀྱིས་འགོ་འཛིན་བྱས།

ཚོགས་འདུའི་ཐོག་ཨུ་ཡོན་སྒར་བ་ངག་དབང་བཟང་པོ་དང་།     མ་རུའུ་ཡུན།     ཝང་ཧྭ་ཕིང་།     རྒྱལ་མཚན་མགོན་པོ།     ལ་ཧའེ་ཆིང་།     མ་ཅིན་ཝུན།     འགྱུར་མེད་རྡོ་རྗེ།     ཁྲེན་ཡུའེ་ཀུའེ།     ཤར་ཚང.བསྟན་འཛིན་འཇིགས་མེད།  ཝང་ཅི་ཏེ།    བསྟན་པ་རིན་ཆེན།     དཀོན་མཆོག་བསྟན་པ་རྒྱལ་མཚན་བཅས་ཀྱིས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་ཆགས་པ་དང་རང་རྒྱལ་གྱི་ཆོས་ལུགས་ཀྲུང་གོ་ཅན་གྱི་ཁ་ཕྱོགས་རྒྱུན་འཁྱོངས་བྱེད་པ།   རང་ས་གནས་ཀྱི་རིག་གནས་ཞིབ་འཇུག་ཁྱབ་གདལ་གཏོང་བ། རིག་ནུས་མཉེན་ཆས་གསར་གཏོད། འཐེན་ཐུག་ཐོན་ལས་འཕེལ་རྒྱས་སོགས་ལ་དམིགས་ནས་ཐབས་འདོན་ཇུས་འབུལ་བྱས།   ཝུའུ་ཞའོ་ཅུན་གྱིས་ཨུ་ཡོན་གྱི་བསམ་འཆར་དང་གྲོས་གཞིར་ཧུར་ཐག་གིས་ལན་བཏབ་པ་མ་ཟད།     ཚང་མ་དང་བསམ་བློ་བརྗེ་རེས་དང་གྲོས་བསྡུར་གཏིང་ཟབ་བྱས།     

ཝུའུ་ཞའོ་ཅུན་གྱིས་སྲིད་གཞུང་བྱ་བའི་སྙན་ཞུ་དང་སྲིད་གྲོས་རྒྱུན་ལས་ཨུ་ཡོན་ལྷན་ཁང་གི་བྱ་བའི་སྙན་ཞུ་ནི་དར་ཆ་མཐོན་པོར་སྒྲེང་བ་དང་སེམས་ནུས་གཅིག་སྒྲིལ། སྤྱི་ཡོངས་ལ་ཞབས་ཞུ། འཁུར་ལེན་ལས་སྒྲུབ། ཐོག་མའི་དམ་བཅའ་བརྟན་སྲུང་།     དམངས་ཀྱི་ཆེད་དུ་འགན་འཁྲི་སྒྲུབ་པ་བཅས་ཀྱི་སྙན་ཞུ་ཡག་པོ་ཞིག་ཡིན་པས།   ཚང་མའི“བཀའ་དྲིན་ཚོར་བ་དང་བརྩེ་བ་ཡོད་པ། དངོས་སྒྲུབ་ལ་མཐོང་ཆེན་བྱེད་པ”བཅས་ཀྱི་འགན་ཁུར་མངོན་པར་མཚོན་ཡོད།  ན་ནིང་ཞིང་ཆེན་ཡོངས་ཀྱི་མི་རིགས་ཁག་གི་མང་ཚོགས་ཀྱིས་དྲིན་གཟོ་མདུན་སྐྱོད་དང་དངོས་སྒྲུབ་སྔོན་བརྩོན་བྱས་པ་བརྒྱུད། ཞིང་ཆེན་ཡོངས་ཀྱི་ཕྱོགས་བསྡུས་སྟོབས་ཤུགས་དང་མི་དམངས་ཀྱི་འཚོ་བའི་ཆུ་ཚད་མངོན་གསལ་དོད་པོས་ཇེ་མཐོར་སོང་སྟེ།   རྒྱལ་ཡོངས་མི་རིགས་མཐུན་སྒྲིལ་ཡར་ཐོན་གྱི་དཔེ་སྟོན་ཞིང་ཆེན་སྔོན་ལ་གསར་སྐྲུན་བྱས་པས།     མི་རིགས་འགྲིག་མཐུན་དང་སྤྱི་ཚོགས་འཆམ་མཐུན།     ཆོས་ལུགས་ཞི་མཐུན་བཅས་ཀྱི་རྣམ་པ་བཟང་པོ་མངོན་ཡོད་ཅེས་བསྟན།     

ཝུའུ་ཞའོ་ཅུན་གྱིས་སྲིད་གྲོས་ཀྱི་འགོ་ཁྲིད་ཚན་ཁག་དང་སྲིད་གྲོས་ཨུ་ཡོན་ཡོངས་ཀྱིས་ཀྲུང་གོའི་ལུགས་ཀྱི་དེང་རབས་ཅན་གྱི་མཚོ་སྔོན་ལག་ལེན་ཁྲོད་བྱས་རྗེས་བཞག་པར་ཁས་ལེན་གང་ལེགས་བྱས།   ཁོས“ལོ་ལྔའི་འཆར་འགོད་བཅོ་ལྔ་པའི”འགོ་ཚུགས་ས་གསར་པ་ནས་ཨུ་ཡོན་རྣམ་པས་ཏང་གི་གསུང་ལ་ཉན་པ་དང་ཏང་གི་དྲིན་ཤེས་པ། ཏང་གི་རྗེས་སུ་འབྲངས་པ་བཅས་ཀྱི་སྣེ་ཁྲིད་པ་དང་། འཕེལ་རྒྱས་ཀྱི་ཁྱོན་ཡོངས་ལ་ཞབས་འདེགས་ཞུ་བའི་སྐུལ་འདེད་པ།  ཀྲུང་ཧྭ་མི་རིགས་གཅིག་མཐུན་ཚོགས་པ་འཛུགས་སྐྲུན་གྱི་སྔོན་སྐྱོད་པ།   རང་རྒྱལ་གྱི་ཆོས་ལུགས་ཀྲུང་གོ་ཅན་ལ་སྐུལ་འདེད་གཏོང་བའི་ལག་ལེན་པ་བཅས་བྱས་ཏེ། རྒྱལ་ཡོངས་དང་དུས་མཉམ་དུ་སྤྱི་ཚོགས་རིང་ལུགས་དེང་རབས་ཅན་གཞི་རྩའི་ཆ་ནས་མངོན་འགྱུར་ཡོང་ཆེད་མཉམ་དུ་འབད་བརྩོན་བྱེད་དགོས།     རྒྱལ་ཁབ་ཀྱི་རླབས་ཆེན་གྲུབ་འབྲས་དང་ཉེ་འགྲམ་གྱི་འཕེལ་རྒྱས་འགྱུར་ལྡོག་སྤྱད་དེ་མི་རིགས་ཁག་གི་མང་ཚོགས་ལ་རྒྱལ་ཁབ་གཅིག་གྱུར་དང་མི་རིགས་མཐུན་སྒྲིལ།     སྤྱི་ཚོགས་བརྟན་བརླིང་བཅས་སྲུང་སྐྱོང་བྱེད་པའི་དོན་སྙིང་གལ་ཆེན་གསལ་པོར་བཤད་དགོས་པ་དང་།    ཚང་མས་ད་ལྟའི་བདེ་སྐྱིད་ཀྱི་འཚོ་བར་གཅེས་སྤྲས་ཆེན་པོ་བྱས་ཏེ་དཀའ་སྤྱད་འབད་བརྩོན་ལ་བརྟེན་ནས་སྔར་ལས་མཛེས་སྡུག་ལྡན་པའི་འབྱུང་འགྱུར་གཏོད་དགོས་པར་ཁྲིད་སྟོན་བྱེད་པ་དང་།     ལྟེ་བར་དམིགས་པ་དང་ཁྱོན་ཡོངས་ལ་ཞབས་འདེགས་ཞུས་ཏེ་ཚན་རྩལ་ཡར་ཐོན་དང་སྤྱི་ཚོགས་འཕེལ་རྒྱས་ལས་བྱུང་བའི་འགྲན་སློང་གསར་པ་དང་དགོས་མཁོ་གསར་པ་རང་འགུལ་ངང་སྟངས་འཛིན་བྱས་ནས། སྤུས་ཚད་མཐོ་བའི་འགན་འཁྲི་བསྒྲུབས་ནས་དཔལ་འབྱོར་འཕེལ་རྒྱས་དང་དམངས་འཚོ་ལེགས་སྒྱུར།    སྤྱི་ཚོགས་བརྟན་བརླིང་བཅས་ལ་རོགས་སྐུལ་བྱེད་དགོས།     ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་ཆགས་པའི་དཔེ་སྟོན་ཞིང་ཆེན་འཛུགས་སྐྲུན་བྱེད་པའི་དམིགས་འབེན་དེ་ཞིབ་ཕྲའི་ལས་དོན་དུ་བསྒྱུར་རྒྱུ་དང་།     རིག་གནས་ཀྱི་ཐོན་ཁུངས་དེ་བསམ་པའི་འབྲེལ་ཐག་ཏུ་བསྒྱུར་རྒྱུ།  མི་རིགས་མཐུན་སྒྲིལ་ཡར་ཐོན་གྱི་གསོན་ཉམས་ལྡན་པའི་གཏམ་རྒྱུད་སྔོག་འདོན་གཏིང་ཟབ་བྱས་ཏེ། མཚོ་སྔོན་གྱི་མཚོན་རྟགས་ལྡན་པ་དང་རྒྱལ་ཡོངས་སུ་ཤུགས་རྐྱེན་ལྡན་པའི“འགྲོ་འོང་བརྗེ་རེས་མཉམ་འདྲེས་གསུམ”གྱི་ཟོང་རྟགས་སྐོར་ཅིག་རྒྱུན་མཐུད་ངང་གཏོད་དགོས།     “ཆབ་སྲིད་ཐད་བློ་གཏད་ཆོག་པ་དང་ཆོས་ལུགས་ཐད་ཐོས་བསམ་ཟབ་པ། སྤྱོད་ལམ་ཐད་དམངས་མགུ་བ་དང་གནད་འགག་སྐབས་སུ་ནུས་པ་ཐོན་པའི”ཚད་གཞི་ལག་ལེན་བསྟར་ནས། ཕྱོགས་ཡོངས་ནས་ཆོས་ལུགས་ནན་སྐྱོང་དང་ཏང་གཅེས་རྒྱལ་གཅེས་ཆོས་གཅེས་ཀྱི་སྲོལ་རྒྱུན་བཟང་པོ་དར་སྤེལ་གཏོང་བ།     ཁྲིམས་ལྟར་དགོན་པ་སྐྱོང་བ་དང་དགེ་འདུན་དོ་དམ་བཅས་ཀྱི་ཐད་ཚད་ཤིང་བྱས་ཏེ། ཆོས་ལུགས་ཁྱབ་ཁོངས་ཀྱི་འཆམ་མཐུན་བརྟན་བརླིང་གི་རྣམ་པ་བཟང་པོ་མཉམ་དུ་སྲུང་སྐྱོང་ཡག་པོ་བྱེད་དགོས་པ་ནན་གྱིས་བསྟན།     

ཀྲུའུ་ཞང་ཧྥེང་དང་། རིན་ཆེན་རྣམ་རྒྱལ། གསེར་ཁྲི་ཆོས་ཀྱི་བློ་གྲོས་རྒྱ་མཚོ། མ་ཡུའེ་ཞང་བཅས་གྲོས་བསྡུར་ལ་ཞུགས།