མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ1ཚེས27ཉིན་གྱི་ཕྱི་དྲོར། ཞིང་ཆེན་ཏང་ཨུའི་ཧྲུའུ་ཅི་གཞོན་པ། ཧྲིན་ཀྲང་ལུའོ་ཏུང་ཁྲོན་ཞིང་ཆེན་དམངས་ཆེན་སྐབས་བཅུ་བཞི་པའི་གྲོས་ཚོགས་ཐེངས་བཞི་པའི་མཚོ་ཤར་འཐུས་ཚབ་ཚོགས་པའི་གྲོས་ཞིབ་ལ་ཞུགས་ཏེ། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པ་དང་ཀྲུང་དབྱང་དཔལ་འབྱོར་བྱ་བའི་གྲོས་ཚོགས་ཀྱི་དགོངས་དོན་ཕྱོགས་ཡོངས་ནས་ལག་བསྟར་དོན་འཁྱོལ་བྱེད་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་གྱི་བྱ་བའི་ཐད་གནང་བའི་བླང་བྱ་གལ་ཆེན་སློབ་སྦྱོང་དང་ལག་བསྟར་གཏིང་ཟབ་བྱེད་པ། དངོས་སྒྲུབ་ལག་ལེན་དང་ངར་སྐྱེད་སྔོན་བརྩོན་བྱེད་པ། སྟོབས་ཤུགས་ཡོད་རྒུས་ལོ་ལྔའི་འཆར་འགོད་བཅོ་ལྔ་པའི་འགོ་བཟང་བོ་རྩོམ་པ་བཅས་བྱས་ཏེ་ཞིང་ཆེན་ཡོངས་ཀྱི་སྤུས་ཚད་མཐོ་བའི་འཕེལ་རྒྱས་ཀྱི་འཕར་སྣེ་གལ་ཆེན་མགྱོགས་མྱུར་སྒོས་བསྐྲུན་དགོས་ཞེས་ནན་གྱིས་བསྟན།
གྲོས་ཞིབ་བྱེད་སྐབས། ཝང་ཧྭ་ཅེ་དང་ཀྲང་ཧྥུའུ་ཆེང་། ཧན་ཀྲི་ཧུའེ། ཆི་ཧའེ་ཞ་སོགས་འཐུས་མིས་གཏམ་བཤད་དེ་སྲིད་གཞུང་བྱ་བའི་སྙན་ཞུར་ཚད་མཐོའི་གདེང་འཇོག་བྱས་པ་དང་། ས་ཁུལ་དཔལ་འབྱོར་འཕེལ་རྒྱས་ཀྱི་དམིགས་འབེན་དང་མཐོ་སྒང་གི་གྲང་འཁྱག་སྔོ་ཚལ་ཐོན་ལས་སྟོབས་ལྡན་དུ་གཏོང་བ། འཆམ་མཛེས་གྲོང་གསེབ་འཛུགས་སྐྲུན་བྱེད་པ། སློབ་གསོའི་ལས་དོན་འཕེལ་རྒྱས་ལ་སྐུལ་འདེད་གཏོང་སོགས་ལ་དམིགས་ནས་བསམ་འཆར་དང་གྲོས་གཞི་བཏོན། ལུའོ་ཏུང་ཁྲོན་གྱིས་ཁོ་ཚོའི་གཏམ་བཤད་གལ་ཆེན་ལ་ནན་ཏན་གྱིས་ཉན་པ་དང་། འཐུས་མི་རྣམས་ཀྱིས་བྱས་རྗེས་གལ་ཆེན་བཞག་པར་བཀའ་དྲིན་ཞུས་ལ། ཁོ་ཚོའི་བསམ་འཆར་དང་གྲོས་གཞི་བསྡུ་ལེན་གང་ལེགས་བྱ་རྒྱུ་ཡིན་ཞེས་བསྟན།
ལུའོ་ཏུང་ཁྲོན་གྱིས་བཤད་རྒྱུར། འདས་པའི་ལོ་ལྔའི་རིང་། ཞིང་ཆེན་ཡོངས་ཀྱི་གོང་འོག་ཚང་མས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དགོངས་པ་མཛུབ་སྟོན་དུ་འཛིན་རྒྱུ་རྒྱུན་འཁྱོངས་བྱས་ཏེ་དཔལ་འབྱོར་གྱི་སྤུས་འབོར་མཉམ་འཕར་གནས་བབ་དང་ལྗང་མདོག་ཐཱན་ཉུང་ཚུལ་སྒྱུར། དམངས་འཚོ་འགན་སྲུང་ཆུ་ཚད་མཐོར་འདེགས་བཅས་སྔར་ལས་མངོན་གསལ་དུ་གྱུར་ཡོད། གྲུབ་འབྲས་ལ་རྒྱུས་ལོན་ཡང་དག་བྱས་ཏེ་ཡིད་ཆེས་མཐོར་འདེགས་གཏོང་བ་དང་དམིགས་འབེན་ལ་རྒྱུས་ལོན་ཡང་དག་བྱས་ནས་ཁ་ཕྱོགས་གསལ་བར་བྱེད་པ། ལས་འགན་གཙོ་བོར་རྒྱུས་ལོན་ཡང་དག་བྱས་ཏེ་དོན་འཁྱོལ་དམ་འཛིན་བྱེད་པ། བྱ་བའི་བླང་བྱར་རྒྱུས་ལོན་ཡང་དག་བྱས་ནས་འགན་འཁྲི་ཇེ་དྲག་ཏུ་གཏོང་བ་བཅས་བྱས་ཏེ་དཔལ་འབྱོར་འཕེལ་རྒྱས་ལ་ཕན་པ་ཡོད་ཚད་དམ་འཛིན་ནན་མོ་བྱས་ཏེ་ཕན་འབྲས་ཐོན་པར་བྱེད་པ་དང་། དམངས་འཚོའི་བདེ་སྐྱིད་ཇེ་དྲག་ཏུ་གཏོང་ཐུབ་པ་ཡོད་ཚད་དངོས་སྒྲུབ་ལག་ལེན་བྱས་ཏེ་གྲུབ་འབྲས་སྔར་ལས་བཟང་བོ་ལེན་དགོས། དམིགས་འབེན་ལ་དམ་དུ་དམིགས་པ་དང་འབེན་འཛུགས་ཤུགས་འདོན་བྱས་ནས་ལས་འགན་གྱི་གསལ་ཁྲར་དབྱེ་ཞིབ་ནན་མོ་བྱེད་པ་དང་། གཙོ་གནད་ཐོལ་བརྒལ་ལ་བརྟེན་ནས་ཕྱོགས་ཡོངས་ཀྱི་བྱ་བའི་སྤུས་འདེགས་ནུས་སྤེལ་ལ་སྐུལ་ཁྲིད་བྱེད་དགོས། ཚད་གཞི་སྔར་ལས་མཐོན་པོས་ཏང་ཀྲུང་དབྱང་གི་ཇུས་ཆོད་བཀོད་སྒྲིག་གི་ལག་བསྟར་པ་དང་འགུལ་སྐྱོད་པ། དངོས་སྒྲུབ་པ་བཅས་བྱེད་པ་དང་། ཡང་དག་པའི་སྲིད་འབྲས་ལྟ་བ་འཛུགས་པ་དང་ལག་བསྟར་བྱས་ཏེ་མི་དམངས་ཀྱི་ཆེད་དུ་སྲིད་འབྲས་ལེན་པ་དང་དངོས་སྒྲུབ་ལ་བརྟེན་ནས་སྲིད་འབྲས་ལེན་པ། ཆོས་ཉིད་ལྟར་བྱ་བ་སྒྲུབ་རྒྱུ་རྒྱུན་འཁྱོངས་བཅས་བྱས་ནས་དངོས་སྒྲུབ་ཁག་ཁུར་གྱི་སྤྱོད་ཚུལ་སྦྱོང་བརྡར་བྱེད་དགོས།
ལུའོ་ཏུང་ཁྲོན་གྱིས་མཚོ་ཤར་གྲོང་ཁྱེར་གྱིས་བྱ་བ་སོ་སོའི་ཐད་བླངས་པའི་གྲུབ་འབྲས་ལ་ཁས་ལེན་གང་ལེགས་བྱས། ཁོས་བཤད་རྒྱུར། མཚོ་ཤར་གྱིས་ཞིང་ཆེན་ཡོངས་ཀྱི་དཔལ་འབྱོར་སྤྱི་ཚོགས་འཕེལ་རྒྱས་ཁྲོད་འགན་འཁྲི་གཙོ་བོ་ཁུར་ཡོད་པ་དང་། འཕེལ་རྒྱས་ཀྱི་རྨང་གཞི་བརྟན་ཞིང་དགེ་མཚན་ཕུན་སུམ་ཚོགས་ལ། གནས་བབ་བཟང་བར་མ་ཟད། སྦས་ཤུགས་ཆེ་བས་གཞི་རྩ་ཇེ་བརྟན་དུ་གཏོང་བའི་བྱ་བ་བཟང་བོར་བསྒྲུབ་ནས་སྐྱེ་ཁམས་བདེ་འཇགས་འགོག་རའི་མཚོ་ཤར་གྱི་འདེགས་སྐྱོར་དང་དཔལ་འབྱོར་གཏན་འཇགས་འཕར་སྣོན་གྱི་འདེགས་སྐྱོར་གལ་ཆེན། ནུབ་ཕྱོགས་ཚོང་གཉེར་ཁོར་ཡུག་གི་མཐོ་སའི་ཤར་ཕྱོགས་ཀྱི་འདེགས་སྐྱོར་བཅས་ཇེ་དྲག་ཏུ་གཏོང་དགོས་པ་དང་། དཔལ་འབྱོར་འཕེལ་རྒྱས་ཀྱི་འདེགས་སྐྱོར་གལ་ཆེན་སྲ་བརྟན་དུ་གཏོང་དགོས། སྦས་ཤུགས་སྔོག་འདོན་ཟབ་མོ་བྱས་ནས་ཞིང་ལས་ཀྱི་ཐོན་འཕར་དང་ཐོན་ལས་རིམ་སྤོར། འཛད་སྤྱོད། དངུལ་གཏོང་བཅས་ཀྱི་སྦས་ཤུགས་སྔོན་འདོན་བཟང་བོ་བྱས་ཏེ་དཔལ་འབྱོར་འཕར་སྣོན་གྱི་གསོན་ཤུགས་བསྐྱེད་དགོས། རྒྱ་བསྐྱེད་བྱ་བ་བཟང་བོར་སྒྲུབ་ནས་ཚན་རྩལ་གསར་གཏོད་སྣེ་ཁྲིད་རྒྱུན་འཁྱོངས་བྱེད་པ་དང་བཅོས་སྒྱུར་ལ་སྐུལ་འདེད་ནན་མོ་གཏོང་བ། སྒོ་འབྱེད་རོགས་ལས་གཏིང་ཟབ་ཏུ་སྤེལ་བ་བཅས་བྱས་ནས་དཔལ་འབྱོར་འཕེལ་རྒྱས་ཀྱི་སྒུལ་ནུས་གསར་པ་བསྐྱེད་དགོས། དམངས་ཕན་ལས་དོན་བཟང་བོར་སྒྲུབ་ནས་སྤུས་ཚད་མཐོན་པོས་ལས་ཞུགས་བྱེད་པར་སྐུལ་འདེད་གཏོང་བ་དང་སྤྱི་ཚོགས་ཀྱི་ལས་དོན་འཕེལ་རྒྱས་ལ་ཤུགས་སྣོན་པ། སྤྱི་ཚོགས་བཅོས་སྐྱོང་ཕན་ནུས་མཐོར་འདེགས་གཏོང་བ་བཅས་བྱས་ནས་དམངས་འཚོའི་བདེ་སྐྱིད་རྒྱུན་མཐུད་ངང་ཇེ་དྲག་ཏུ་གཏོང་དགོས།
ཝུའུ་ལ་ཙི་པིའེ་ཁོ་རེ་སུའུ་ལི་ཧན་གྱིས་འགོ་འཛིན་བྱས་པ་དང་། ཚའོ་ཅུན་དང་ཉི་མ་སྒྲོལ་མ། ལིའུ་ཐུང་ཏི། ཀྲ་ཆིན་ཅིའུ་བཅས་གྲོས་ཞིབ་ཁྲོད་ཞུགས།
