མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ་དང་པོའི་ཚེས27ཉིན་གྱི་ཕྱི་དྲོར། ཞིང་ཆེན་ཏང་ཨུའི་ཧྲུའུ་ཅི། ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་ཝུའུ་ཞའོ་ཅུན་ཞིང་ཆེན་དམངས་ཆེན་སྐབས་བཅུ་བཞི་པའི་གྲོས་ཚོགས་ཐེངས་བཞི་པའི་ཟི་ལིང་འཐུས་ཚབ་ཚོགས་པའི་གྲོས་ཞིབ་ལ་ཞུགས་ཏེ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་གྱི་བྱ་བའི་ཐད་གནང་བའི་བླང་བྱ་གལ་ཆེན་སློབ་སྦྱོང་དང་ལག་བསྟར་གཏིང་ཟབ་བྱས་ཏེ། ཁྱོན་ཡོངས་ཀྱི་གནས་སུ་ལངས་ནས་འཕེལ་རྒྱས་ལ་འཆར་འགོད་དང་། འགན་གཙོ་བོ་འཁུར་བ། སྙིང་སྟོབས་ཆེན་པོས་སྔོན་བརྩོན་བཅས་བྱས་ནས། ཀྲུང་གོའི་ལུགས་ཀྱི་དེང་རབས་ཅན་གྱི་མཚོ་སྔོན་ལག་ལེན་ལ་སྐུལ་འདེད་གཏོང་བ་དང་། ཞིང་ཆེན་ཡོངས་ཀྱི་སྤུས་ཚད་མཐོ་བའི་འཕེལ་རྒྱས་ལ་ཞབས་འདེགས་ཞུ་བའི་ཐད་འགན་འཁྲི་སྔར་ལས་ཆེ་བ་མངོན་དགོས་ཞེས་ནན་གྱིས་བསྟན།
ཟི་ལིང་འཐུས་ཚབ་ཚོགས་པས་གཟབ་ནན་དང་འཁྲུག་ཆ་དོན་པོས་གྲོས་ཞིབ་བྱས། ཝང་ཝེ་ཏུང་དང་ཧྲི་ཅན་ཕིང་། ཐུང་ཆིང་ཅུན། ནན་ཧའེ་ཡན། ཁྲེན་ཡིའུ་ཚེ། ཝང་ཧྲེང་ཡོན། ཁྲེན་ཡུང་ཆིན། མཱ་ཅུན་ཆི་སོགས་འཐུས་མིས་གཏམ་བཤད།
ཚང་མས་གཏམ་བཤད་ལ་ཉན་རྗེས། ཝུའུ་ཞའོ་ཅུན་གྱིས་སྲིད་གཞུང་བྱ་བའི་སྙན་ཞུའི་གྲུབ་འབྲས་ཕྱོགས་བསྡོམས་བྱས་པ་དངོས་ཐོག་བདེན་འཚོལ་དང་བྱ་བའི་བཀོད་སྒྲིག་གནད་ཁེལ་དངོས་གཉེར་ཡིན་ལ། ཡིད་ཆེས་ཆེར་བསྐྱེད་དང་སྟོབས་ཤུགས་གཅིག་སྡུད་བྱས་ནས་ཆབ་སྲིད་ཀྱི་རང་རྟོགས་མཐོན་པོ་མངོན་པ་དང་། ཚན་རིག་གི་ལག་ལེན་ཐབས་ལམ་མངོན་ལ། མི་དམངས་ཀྱི་བརྩེ་དུང་ཟབ་མོ་ལྡན་པས་ཡོངས་སུ་འཐད་པ་ཡིན་ཞེས་བསྟན།
ཝུའུ་ཞའོ་ཅུན་གྱིས་ཟི་ལིང་གི་དཔལ་འབྱོར་སྤྱི་ཚོགས་འཕེལ་རྒྱས་ལ་ཐོབ་པའི་འཕེལ་རིམ་གསར་པ་དང་ཕན་འབྲས་གསར་པར་ཁས་ལེན་གང་ལེགས་བྱས་ཏེ། ཞིང་ཆེན་གྱི་ལྟེ་གནས་སྟོབས་དང་ལྡན་ན་ཞིང་ཆེན་ཡོངས་སྟོབས་དང་ལྡན་པ་དང་། ཟི་ལིང་སྟོབས་དང་ལྡན་ན་མཚོ་སྔོན་སྟོབས་དང་ལྡན་ངེས། ད་ལོ་ནི“ལོ་ལྔའི་འཆར་འགོད་བཅོ་ལྔ་པ”འགོ་རྩོམ་པའི་གནད་འགག་གི་ལོ་ཡིན་པས། ཟི་ལིང་གིས་ཞིང་ཆེན་ལྟེ་གནས་ཀྱི་སྣེ་ཁྲིད་ནུས་པ་སྔར་ལས་ལེགས་པར་བཏོན་ནས། འགན་འཁྲི་སྔར་ལས་ལྕི་མོ་དང་སྔར་ལས་ཆེན་པོ་ཕྲག་ཏུ་ལེན་པ་དང་ཧུར་ཐག་གིས་གྲུབ་འབྲས་སྔར་ལས་བཟང་པོ་བརྩོན་ལེན་བྱེད་དགོས། ལྗང་མདོག་ཐཱན་ཉུང་སྤོ་སྒྱུར་དང་ཁུལ་ཁོངས་ཀྱི་ཁྱད་སྟོབས་ལ་དམིགས་ནས། ལྗང་གློག་སོགས་ཁྱད་སྟོབས་ཐོན་ལས་གོང་སྤེལ་ཆེན་པོ་བྱས་ཏེ། ནུས་གསོག་དང་གཤིས་ནུས་མཐོ་བའི་རྒྱུ་ཆ། རྩིས་གློག་མཉམ་འདྲེས་བཅས་ཀྱི་འགྲན་ལམ་གསར་པ་གཏོད་པ་དང་། ཐོན་ལས་མུ་ཕྲེང་གི་འགག་རྩའི་རིམ་པ་དང་ལྟེ་བའི་ཁེ་ལས། གསར་གཏོད་ཐོན་ཁུངས་མགྱོགས་མྱུར་གཅིག་སྡུད་བཅས་ལ་སྐུལ་འདེད་བཏང་སྟེ། ལྗང་གློག་གི་ཁྱད་སྟོབས་ནུས་མཐོ་ཚུལ་སྒྱུར་དང་ཐོན་ལས་ཀྱི་གཅིག་སྡུད་ཕན་འབྲས་མྱུར་དུ་འདོན་སྤེལ་བྱེད་དགོས། “ལོ་ལྔའི་འཆར་འགོད་བཅོ་ལྔ་པའི”སྐབས་ཀྱི་ཞིང་ཆེན་ཡོངས་ཀྱི་ཚན་རྩལ་གསར་གཏོད་ཀྱི་དགོས་མཁོ་གལ་ཆེན་ལ་དམ་པོར་དམིགས་ཏེ། ཚན་རྩལ་གསར་གཏོད་ཀྱི་ཐོན་ཁུངས་ཀྱི་གཅིག་བསྡུས་ཁྱད་སྟོབས་འདོན་སྤེལ་བྱས་ནས། རྒྱལ་ཁབ་ཀྱི་འཐབ་ཇུས་ཚན་རྩལ་སྟོབས་ཤུགས་དང་དབུས་ཤར་རྒྱུད་ཀྱི་གསར་གཏོད་ཐོན་ཁུངས་དང་རང་འགུལ་ངང་སྦྲེལ་མཐུད་བྱས་ཏེ། རྒྱལ་ཡོངས་ཀྱི་གཙོ་གནད་ཚོད་ལྟ་ཁང་སོགས་ཀྱི་སྟེགས་བུ་འཛུགས་པ་དང་བེད་སྤྱོད་ཡག་པོ་བྱས་ནས། ཤེས་ལྡན་མི་སྣ་དཀོན་པོ་སྔར་ལས་མང་པོ་བསྡུ་ལེན་བྱེད་པ་དང་། སློབ་གསོའི་ཚན་རྩལ་ཤེས་ལྡན་མི་སྣ་གཞི་གཅིག་ཅན་དུ་འགྱུར་བར་སྐུལ་འདེད་གཏོང་བ་དང་ཞིང་ཆེན་ཡོངས་ཀྱི་གསར་གཏོད་ཀྱི་སྒུལ་ནུས་གསར་པའི་ཐད་ལྟེ་བའི་ནུས་པ་འདོན་དགོས། མི་དམངས་གྲོང་ཁྱེར་གྱི་འདུ་ཤེས་རྒྱུན་འཁྱོངས་བྱས་ཏེ། ཆུ་ཚད་མཐོ་བའི་འཆར་འགོད་དང་ཚད་གཞི་མཐོ་བའི་འཛུགས་སྐྲུན་བྱེད་དགོས། གྲོང་ཁྱེར་གྱི་སྐྱེ་ཁམས་ཁོར་ཡུག་སྲུང་སྐྱོབ་དང་རྨང་གཞིའི་སྒྲིག་ཆས་ཀྱི་ཞན་ཆ་ཁ་གསབ་ལ་ཤུགས་སྣོན་པ་དང་། ཚ་གཡོལ་སྡོད་གནས་དཔལ་འབྱོར་འཕེལ་རྒྱས་སུ་གཏོང་བ། གྲོང་ཁྱེར་འཕེལ་རྒྱས་ཀྱི་སྤུས་ཚད་མུ་མཐུད་དུ་མཐོ་རུ་གཏོང་བ། གྲོང་ཁྱེར་གྱི་ནང་རྒྱས་རྣམ་པའི་འཕེལ་རྒྱས་ལ་སྐུལ་འདེད་གཏོང་བ་དང་ཞིང་ཆེན་ཡོངས་སུ་རྣམ་པ་གསར་པའི་མཁར་གྲོང་ཅན་གྱི་ཞབས་ཞུའི་ཐད་མཐོ་སྒང་གི་དཔེ་དབྱིབས་བསྐྲུན་དགོས། སྤུས་ཚད་མཐོ་བའི་འཕེལ་རྒྱས་དང་ཆུ་ཚད་མཐོ་བའི་བདེ་འཇགས་ལ་གཅིག་གྱུར་འཆར་འགོད་བྱས་ཏེ། འགལ་བ་དང་རྩོད་གཞི་འགོག་སེལ་བྱེད་རྒྱུར་མུ་མཐུད་དུ་སྐུལ་འདེད་གཏོང་བ་དང་། སྤྱི་ཚོགས་བདེ་འཇགས་སྤྱི་ཡོངས་ཀྱི་བཀག་སྡོམ་མ་ལག་འཐུས་ཚང་དུ་གཏོང་བ། ཐལ་དྲགས་གནམ་གཤིས་དང་ས་གཤིས་གནོད་འཚེར་ཁ་གཏད་འཇལ་བའི་ནུས་པ་ཆེ་རུ་གཏོང་བ་བཅས་བྱས་ནས། ཕྱོགས་ཡོངས་ནས་སྤྱི་ཚོགས་ཀྱི་བཅོས་སྐྱོང་ནུས་པ་མཐོ་རུ་གཏོང་བ་དང་ཞིང་ཆེན་ཡོངས་ཀྱི་བདེ་འཇགས་དང་བརྟན་བརླིང་གིས་ཁྱོན་ཡོངས་ལ་ཞབས་འདེགས་ཞུ་བའི་ཐད་འགོག་སྲུང་བརྟན་པོ་ཞིག་འཛུགས་དགོས། སྤྱོད་བཟང་སྒྲིག་ནན་གྱིས་རུལ་སུངས་ལ་ངོ་རྒོལ་བྱེད་པར་སྐུལ་འདེད་གཏིང་ཟབ་གཏོང་བ་དང་། ཡང་དག་པའི་སྲིད་འབྲས་ལྟ་བ་འཛུགས་པ་དང་ལག་བསྟར་བྱེད་པ། ཕྱོགས་ཡོངས་ནས་ཏང་དང་དཔོན་རིགས་ལ་དོ་དམ་ནན་མོ་བྱེད་པ་དང་། ཞིང་ཆེན་ཡོངས་ལ་ཞབས་འདེགས་ཞུ་བའི་ཐད་སྤྱོད་གཙང་གཞུང་དྲང་གི་ཆབ་སྲིད་ཀྱི་ཁོར་ཡུག་བསྐྲུན་པའི་ཐད་དཔེ་སྟོན་སྣེ་ཁྲིད་ཀྱི་ནུས་པ་འདོན་དགོས།
དབྱང་ཧྥེང་ཁྲུན་དང་ཀྲང་ཧོང་ཡོན། ལིའུ་ཐའོ། ཀྲང་ཙེ་ཅུན་བཅས་གྲོས་ཞིབ་ལ་ཞུགས།
