མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ1ཚེས26ཉིན། ཞིང་ཆེན་ཏང་ཨུའི་ཧྲུའུ་ཅི་ཝུའུ་ཞའོ་ཅུན་གྱིས་འགོ་འཛིན་བྱས་ཏེ་ཞིང་ཆེན་ཏང་ཨུའི་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་བསྡུས་ནས་ཞིང་ཆེན་དང་པུའུ་རིམ་པའི་འགོ་ཁྲིད་ལས་བྱེད་པ་གཙོ་བོས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དགོངས་དོན་སློབ་སྦྱོང་དང་ལག་བསྟར་བྱེད་པའི་ཆེད་དོན་བགྲོ་གླེང་འཛིན་གྲྭའི་དགོངས་དོན་བརྒྱུད་བསྒྲགས་དང་སློབ་སྦྱོང་བྱས་པ་དང་། རྒྱལ་ཡོངས་རྩ་འཛུགས་པུའུ་ཀྲང་གི་གྲོས་ཚོགས་དང་ཀྲུང་དབྱང་སྲིད་ཁྲིམས་བྱ་བའི་གྲོས་ཚོགས་ཀྱི་དགོངས་དོན་སློབ་སྦྱོང་དང་ལག་བསྟར་བྱས་པར་མ་ཟད། རང་ཞིང་གི་ལག་བསྟར་བསམ་འཆར་ལ་ཞིབ་འཇུག་དང་འབྲེལ་ཡོད་བྱ་བར་བཀོད་སྒྲིག་བྱས།
གྲོས་ཚོགས་ལས་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་འཛིན་གྲྭ་ཚོགས་འགོ་རྩོམ་པའི་མཛད་སྒོའི་སྟེང་གནང་བའི་གསུང་བཤད་གལ་ཆེན་གྱི་མཐོང་རྒྱ་ཡངས་ཤིང་དགོངས་པ་གཏིང་ཟབ་ལ། ནང་དོན་ཕུན་སུམ་ཚོགས་པར་མ་ཟད། ང་ཚོའི་ཏང་གིས་ལོ་ལྔའི་འཆར་འགོད་གཏན་འབེབས་དང་ལག་བསྟར་བྱས་པའི་ཆབ་སྲིད་དགེ་མཚན་དང་ཉམས་མྱོང་རྩ་ཆེན་སྤྱི་སྡོམ་ཟབ་མོ་བྱས་ཡོད་པ་དང་། རྒྱལ་ཁབ་ཕྱི་ནང་གི་གནས་བབ་ལ་རྒྱུས་ལོན་བྱེད་པ་དང་དེང་རབས་ཅན་གྱི་ཐོན་ལས་མ་ལག་འཛུགས་སྐྲུན་བྱེད་པ། འཕེལ་རྒྱས་ཀྱི་རྣམ་པ་གསར་པ་བསྐྲུན་པ། དཔལ་འབྱོར་དང་སྤྱི་ཚོགས་མཐུན་སྦྱོར་སྒོས་འཕེལ་རྒྱས་སུ་གཏོང་བ་སོགས་ཀྲུང་གོའི་ལུགས་ཀྱི་དེང་རབས་ཅན་གྱི་སྤྱི་ཡོངས་ལ་འབྲེལ་བ་ཡོད་པའི་གཞུང་ལུགས་དང་ལག་ལེན་གྱི་གནད་དོན་གལ་ཆེན་ལ་མ་ལག་ལྡན་པའི་སྒོ་ནས་འཆད་འགྲེལ་བྱས་ཡོད་ལ། དེ་ནི་གཏིང་ཟབ་པའི་བསམ་བློའི་སློབ་ཁྲིད་ཆེན་པོ་དང་གཞུང་ལུགས་ཀྱི་སློབ་ཁྲིད་ཆེན་པོ། ལག་ལེན་གྱི་སློབ་ཁྲིད་ཆེན་པོ་བཅས་ཡིན་པར་མ་ཟད། ཆབ་སྲིད་རང་བཞིན་དང་བསམ་བློའི་རང་བཞིན། དམིགས་སའི་རང་བཞིན། མཛུབ་སྟོན་རང་བཞིན་བཅས་དྲག་པོ་ལྡན་པས། སེམས་ཞིབ་མོས་ཤེས་རྟོགས་དང་བློ་བརྟན་འགྱུར་མེད་སྒོས་ལག་བསྟར་བྱེད་དགོས་པ་དང་། བསམ་སྦྱོར་གཉིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་སྟེང་གཅིག་གྱུར་བྱས་ཏེ། འཐབ་ཇུས་ཀྱི་ངེས་ཤུགས་སྲུང་འཛིན་དང་རྒྱལ་ངེས་པའི་ཡིད་ཆེས་ཇེ་དྲག་ཏུ་གཏོང་བ། གསར་གཏོད་ཡར་བརྩོན་བྱེད་ཕོད་པ་བཅས་བྱས་ནས་ཧུར་ཐག་གིས་ལོ་ལྔའི་འཆར་འགོད་བཅོ་ལྔའི་འགོ་བཟང་བོར་རྩོམ་དགོས།
གྲོས་ཚོགས་ལས་ནན་གྱིས་བསྟན་དོན། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པ་ལས་ལོ་ལྔའི་འཆར་འགོད་བཅོ་ལྔ་པའི་དུས་སྐབས་ཀྱི་དཔལ་འབྱོར་སྤྱི་ཚོགས་འཕེལ་རྒྱས་ཐད་བཏོན་པའི་འཐབ་ཇུས་བཀོད་སྒྲིག་ལ་ཕྱོགས་ཡོངས་དང་གཏིང་ཟབ་པ། ཡང་དག་པ་བཅས་ཀྱི་སྒོ་ནས་ཤེས་རྟོགས་དང་རྒྱུས་ལོན་བྱེད་དགོས་པ་དང་། རྒྱུན་ཆད་མེད་པར་དེང་རབས་ཅན་འཛུགས་སྐྲུན་གྱི་བྱེད་ནུས་མཐོར་འདེགས་གཏོང་བ་དང་ཏང་གི་གསར་གཏོད་གཞུང་ལུགས་ལ་བརྩོན་ཞིབ་བྱེད་པ། དམིགས་སའི་རང་བཞིན་ལྡན་པའི་སྒོ་ནས་སློབ་སྦྱོང་བྱེད་པ། ཆེད་ལས་ཀྱི་བྱང་ཚད་མཐོར་འདེགས་གཏོང་བ་སོགས་བྱས་ནས་སློབ་སྦྱོང་གི་གྲུབ་འབྲས་དེ་བྱ་བའི་བསམ་ཕྱོགས་དང་བྱེ་བྲག་གི་བྱེད་ཐབས་སུ་བསྒྱུར་དགོས། ཡང་དག་པའི་སྲིད་འབྲས་ལྟ་བ་འཛུགས་པ་དང་ལག་བསྟར་བྱེད་པ་དང་། དངོས་ཡོད་ནས་འགོ་རྩོམ་པ་དང་ཆོས་ཉིད་ལྟར་བྱ་བ་སྒྲུབ་རྒྱུ་རྒྱུན་འཁྱོངས་བྱེད་པ། སྐྱེ་ཁམས་སྲུང་སྐྱོབ་དང་སྤུས་ཚད་མཐོ་བའི་འཕེལ་རྒྱས། མི་རིགས་མཐུན་སྒྲིལ། དམངས་འཚོ་ལེགས་བཅོས་སོགས་ཁྱབ་ཁོངས་སུ་ཤུགས་བཏོན་ནས་མི་དམངས་ཀྱི་ཆེད་དུ་སྲིད་འབྲས་ལེན་པ་དང་དངོས་སྒྲུབ་ལ་བརྟེན་ནས་སྲིད་འབྲས་ལེན་དགོས། འཐབ་རྩོད་ཀྱི་སྙིང་སྟོབས་ཤུགས་ཆེན་པོས་དར་སྤེལ་གཏོང་བ་དང་། ཏང་ཀྲུང་དབྱང་གི་ཇུས་ཆོད་བཀོད་སྒྲིག་ལག་བསྟར་དོན་འཁྱོལ་བྱེད་པའི་སྟེང་གོང་འོག་མཉམ་འབྲེལ་དང་ལག་བསྟར་ནུས་ལྡན་བྱེད་ཐུབ་པར་བྱེད་པ། དཔལ་འབྱོར་སྤྱི་ཚོགས་འཕེལ་རྒྱས་ལ་སྐུལ་འདེད་གཏོང་བའི་ཁྲོད་རྒྱུན་ཆད་མེད་པར་འཐབ་རྩོད་ཀྱི་ནུས་པ་མཐོར་འདེགས་དང་བྱ་བའི་མཉམ་ཤུགས་གཅིག་བསྡུས་བཅས་བྱས་ནས་དཀའ་ཁག་ཡོད་ཀྱང་མདུན་སྐྱོད་ཀྱི་སྙིང་སྟོབས་ལྡན་པར་བྱེད་དགོས། སྤྱོད་བཟང་སྒྲིག་ནན་ལ་བརྟེན་ནས་རུལ་སུངས་ལ་ངོ་རྒོལ་བྱེད་པ་དང་། ཁྱབ་ཁོངས་གཙོ་བོར་དམ་དུ་དམིགས་ནས་ལྟ་སྐུལ་རྐྱེན་སྲོལ་བཙུགས་ཏེ་འཐུས་ཚང་དུ་གཏོང་བ། རྒྱུན་རྣམ་ཅན་གྱི་སྒོ་ནས་ཉེན་བརྡའི་སློབ་གསོ་སྤེལ་ཏེ་བློ་བརྟན་འགྱུར་མེད་སྒོས་དམིགས་བསལ་གླེང་བ་དང་ཁ་གསབ་སེམས་ཁམས་མེད་པར་བྱས་ནས་སྤྱོད་ཚུལ་བཟང་བོར་བརྟེན་ཏེ་ལོ་ལྔའི་འཆར་འགོད་བཅོ་ལྔ་པའི་འགོ་བཟང་བོར་རྩོམ་པར་འགན་སྲུང་བྱེད་དགོས།
གྲོས་ཚོགས་ལས་བསྟན་དོན། དུས་རབས་གསར་པའི་ཏང་གི་འཛུགས་སྐྲུན་གྱི་སྤྱིའི་བླང་བྱ་དང་དུས་རབས་གསར་པའི་ཏང་གི་རྩ་འཛུགས་ལམ་ཕྱོགས་དོན་འཁྱོལ་ནན་མོ་བྱེད་པ་དང་། ཆབ་སྲིད་འཛུགས་སྐྲུན་སྣེ་ཁྲིད་དུ་བྱས་ཏེ་སྲིད་འབྲས་ལྟ་བའི་སློབ་གསོར་ཤུགས་སྣོན་པ། སྐབས་བརྗེ་གོ་སྐབས་སུ་བྱས་ཏེ་ཏང་འཛུགས་ལ་བརྟེན་ནས་གཞི་རིམ་བཅོས་སྐྱོང་ལ་ཁྲིད་སྟོན་ཟབ་མོ་བྱེད་པ། འཇོན་མིའི་ཞིང་ཆེན་སྟོབས་ལྡན་གྱི་འཐབ་ཇུས་མགྱོགས་མྱུར་སྒོས་ལག་བསྟར་བྱས་ཏེ་ཕུང་བྱུང་འཇོན་མི་གསོ་སྐྱོང་བྱེད་པ་དང་། རྩ་འཛུགས་སྡེ་ཁག་རང་སྟེང་གི་འཛུགས་སྐྲུན་ལ་ཤུགས་སྣོན་པ་བཅས་བྱས་ནས་དེང་རབས་ཅན་གྱི་མཚོ་སྔོན་གསར་པ་འཛུགས་སྐྲུན་ཐད་སྟོབས་དང་ལྡན་པའི་རྩ་འཛུགས་ཀྱི་འགན་སྲུང་འདོན་སྤྲོད་བྱེད་དགོས།
གྲོས་ཚོགས་ལས་ནན་གྱིས་བསྟན་དོན། ཏང་གིས་སྲིད་ཁྲིམས་བྱ་བར་མཐའ་གཅིག་ཏུ་འགོ་ཁྲིད་བྱེད་པར་ཤུགས་སྣོན་པ་དང་། རང་ཞིང་གི་སྲིད་ཁྲིམས་བྱ་བའི་ཐད་ཀྱི་གནས་བབ་གསར་པ་དང་ལས་འགན་གསར་པར་རྒྱུས་ལོན་ཟབ་མོ་བྱེད་པ། རྒྱལ་ཁབ་བདེ་འཇགས་ཀྱི་འགན་འཁྲིའི་ལམ་ལུགས་དང་སྤྱི་ཚོགས་གཏན་འཇགས་ལ་སྲུང་སྐྱོབ་བྱེད་པའི་འགན་འཁྲིའི་ལམ་ལུགས་དོན་འཁྱོལ་ནན་མོ་བྱེད་པ། འཛུགས་སྐྲུན་ལྔར་ཤུགས་ཆེན་པོས་སྐུལ་འདེད་གཏོང་བ། ཁྱབ་ཁོངས་གཙོ་བོ་དང་དུས་རིམ་གཙོ་བོའི་ཉེན་ཁ་འགོག་སེལ་བྱེད་པ། ཆུ་ཚད་སྔར་ལས་མཐོ་བའི་བདེ་འཇགས་མཚོ་སྔོན་དང་ཁྲིམས་སྐྱོང་མཚོ་སྔོན་འཛུགས་སྐྲུན་བཅས་བྱས་ཏེ་ཁུལ་ཁོངས་གཅིག་གི་འཆམ་མཐུན་ལ་བརྟེན་ནས་སྤྱི་ཡོངས་གཏན་འཇགས་སྲུང་སྐྱོབ་བྱེད་དགོས།
གྲོས་ཚོགས་སྟེང2025ལོའི་དམངས་འཚོའི་དོན་དངོས་བཟོ་སྐྲུན་ཡོངས་འགྲུབ་གནས་ཚུལ་དང2026ལོའི་ལས་གཞི་བཀོད་སྒྲིག་དང་འཛུགས་སྐྲུན་གྱི་སྙན་ཞུར་ཉན་པར་མ་ཟད། དོན་དག་གཞན་དག་ལའང་ཞིབ་འཇུག་བྱས།
