ཞིང་ཆེན་ཡོངས་ཀྱི་ཚོགས་ཆེན་གཉིས་ཀྱི་འཐུས་མི་དང་ཨུ་ཡོན་རྣམས་ཀྱིས་སྔ་གཞུག་ཏུ་མིང་རྟགས་བཀོད་པ།

འཐུས་མི་རྣམས་སྡོད་སར་ཞིང་ཆེན་དམངས་འཐུས་ཚོགས་ཆེན་སྐབས་བཅུ་བཞི་པའི་གྲོས་ཚོགས་ཐེངས་བཞི་པར་ཞུགས་མཁན་གྱི་འཐུས་མི་རེ་རེར་སེམས་ཤུགས་དང་ཡིད་ཆེས་ཀྱིས་ཁེངས། ལས་དོན་པའི་སྣེ་ཁྲིད་འོག གོ་རིམ་ཡོད་པའི་སྒོ་ནས་ཚོགས་ཞུགས་ཀྱི་དཔང་ཡིག་དང་རྒྱུ་ཆ་དག་བླངས་པ་དང་། མིང་ཐོ་བཀོད་རྗེས་ལམ་སེང་རྒྱུ་ཆ་ཞིབ་ཀློག་དང་། ཡང་ན་བསམ་འཆར་ལེགས་སྒྲིག འགན་སྒྲུབ་ཀྱི་མྱོང་ཚོར་ཐད་ནས་གླེང་མོལ་ལ་སོགས་བྱས་ནས་ཚོགས་ཞུགས་ཀྱི་གྲ་སྒྲིག་ལ་རེམ་པ་དང་།  གྲོས་ཚོགས་ལ་རེ་ལྟོས་དང་སྤྲོ་སེམས་ཀྱིས་ཁེངས། ཁོ་ཚོས་འདི་སྐད། གྲོས་ཚོགས་ཀྱི་རིང་དུ་སྒྲིག་ལམ་ནན་མོ་སྲུང་སྟེ། དམངས་འཐུས་ཚོགས་ཆེན་གྱི་ལས་འགན་དོན་འཁྱོལ་ནན་ཏན་བྱ་རྒྱུ་མ་ཟད། མང་ཚོགས་ཀྱིས་དོ་སྣང་བྱེད་པའི་ཚ་གནད་དང་དཀའ་གནད། རེ་འདུན་ལ་སོགས་ཚོགས་ཐོག་ཏུ་འཁྱེར་རྒྱུ་དང་། ཚོགས་ཆེན་ལ་བློ་རྩེ་གཅིག་ཏུ་སྒྲིམ་སྟེ། སྙན་ཞུ་ཁག་ལ་གྲོས་ཞིབ་ཧུར་ཐག་བྱས་ནས་དམངས་སེམས་ཀྱི“སྐད་སྦུག”དང་མང་ཚོགས་ཀྱི“མགྲིན་ཚབ་པ”ལེགས་པོ་ཞིག་བྱས་ཏེ། མཚོ་སྔོན་གྱི་སྤུས་ཚད་མཐོ་བའི་འཕེལ་རྒྱས་ལ་བློ་གྲོས་དང་སྟོབས་ཤུགས་འབུལ་རྒྱུ་ཡིན་ཟེར།

  ཨུ་ཡོན་སྡོད་སར། གྲ་སྒྲིག་ལས་ཀ་ཁག་བསྒྲུབས་ཚར་བ་དང་། ཡུལ་དངོས་སུ་མིང་ཐོ་འགོད་མཁན་ཨུ་ཡོན་རྣམས་མིང་ཐོ་འགོད་སར་ཡོང་ནས་མིང་ཐོ་འགོད་ཅིང་། དཔང་ཡིག་ལེན་པ་དང་། སྡོད་ཁང་གི་འགྲོ་རིམ་བསྒྲུབས་རྗེས། ཚོགས་ཞུགས་དཔང་ཡིག་བཏགས་ཏེ་ཚོགས་དོན་གྱི་རྒྱུ་ཆ་བཀླགས་ཤིང་། གྲོས་རིམ་བཀོད་སྒྲིག་ལ་རྒྱུས་ལོན་གསལ་བོ་བྱས་ནས་ཚོགས་ཆེན་གཉིས་ལ་ཞུགས་པའི་གྲ་སྒྲིག་ལ་བྲེལ། ཨུ་ཡོན་གྱིས་འདི་སྐད། “རྒྱལ་ཁབ་ཀྱི་དོན་ཆེན”སེམས་སུ་ཉར་ཞིང་། “ཞིང་ཆེན་གྱི་དོན་ཆེན”དམིགས་སུ་བཟུང་སྟེ།  ཆབ་སྲིད་ཀྱི་འགན་འཁྲིའི་མཐོ་ཚད་དང་གཟབ་ནན་གྱི་ལས་སྒྲུབ་རྣམ་འགྱུར་བཟུང་ནས་ཨུ་ཡོན་གྱི་འགན་འཁྲི་ཕྲག་ཏུ་འཁུར་ཏེ། དམངས་སེམས་ཕྱོགས་བསྡུས་བྱས་པའི་གཞི་རིམ་གྱི་རེ་འདུན་ཚོགས་འདུར་འབུལ་རྒྱུ་དང་། མང་ཚོགས་ཀྱི་རེ་ལྟོས་དང་སྤྱི་ཚོགས་ཀྱི་དོ་སྣང་དམིགས་སུ་བཟུང་སྟེ། དངོས་དོན་ལ་གཞིགས་ནས་ཐབས་འདོན་ཇུས་འབུལ་བྱས་ནས་མཚོ་སྔོན་ཞིང་ཆེན་གྱི་དཔལ་འབྱོར་སྤྱི་ཚོགས་སྤུས་ཚད་མཐོ་བའི་སྒོ་ནས་གོང་དུ་སྤེལ་བར་ལྟ་བ་ཕྱོགས་བསྡུ་དང་། བློ་གྲོས་མཉམ་བསྡུ། སྟོབས་ཤུགས་མཉམ་འབུལ་བྱ་འཆར་ཡོད་ཟེར།