མཚོ་སྔོན་གྱི་ཚོགས་ཆེན་གཉིས་ཚོགས་མགོ་བརྩམས་སོང་།

 ཟླ1ཚེས25ཉིན་གྱི་སྔ་དྲོར། ཞིང་ཆེན་དམངས་འཐུས་ཚོགས་ཆེན་སྐབས་བཅུ་བཞི་པའི་གྲོས་ཚོགས་ཐེངས་བཞི་བ་དང་། ཞིང་ཆེན་སྲིད་གྲོས་སྐབས་བཅུ་གསུམ་པའི་གྲོས་ཚོགས་ཐེངས་བཞི་པའི་གསར་འགྱུར་ཁྱབ་སྒྲོག་ཚོགས་འདུ་ཟི་ལིང་དུ་བསྡུས་ཤིང་། ཚོགས་ཐོག་ཏུ་ཞིང་ཆེན་དམངས་འཐུས་ཚོགས་ཆེན་སྐབས་བཅུ་བཞི་པའི་གྲོས་ཚོགས་ཐེངས་བཞི་པ་དེ་ཟླ1ཚེས27ཉིན་ནས་ཚེས30ཉིན་བར་ཟི་ལིང་དུ་འཚོག་རྒྱུ་དང་། ཞིང་ཆེན་སྲིད་གྲོས་ཀྱི་སྐབས་བཅུ་གསུམ་པའི་གྲོས་ཚོགས་ཐེངས་བཞི་པ་དེ་ཟླ1ཚེས26ཉིན་ནས་ཚེས29ཉིན་བར་ཟི་ལིང་དུ་འཚོག་རྒྱུ་ཁྱབ་སྒྲོག་བྱས།  ད་སྔ་ཞིང་ཆེན་གྱི་ཚོགས་ཆེན་འདི་གཉིས་ཀྱི་གྲ་སྒྲིག་ལས་ཀ་ཡོངས་སུ་ལེགས་འགྲུབ་བྱུང་ཡོད། 

 ད་ལོའི་ཞིང་ཆེན་གྱི་ཚོགས་ཆེན་གཉིས་ནི་ཞིང་ཆེན་ཡོངས་ཀྱི་གོང་འོག་ཀུན་གྱིས་ཏང་གི་སྐབས་ཉི་ཤུ་པ་དང་སྐབས་ཉི་ཤུ་བའི་ཚང་འཛོམས་གྲོས་ཚོགས་ཐེངས་གཉིས་པ་དང་གསུམ་པ། བཞི་བ་བཅས་ཀྱི་དགོངས་དོན་ལ་སློབ་སྦྱོང་དང་ལག་ལེན་མཐར་ཕྱིན་བྱས་ཏེ།  སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་གྱི་ལས་དོན་ལ་གནང་བའི་ཐུགས་རེ་གལ་ཆེན་ལག་ལེན་མཐའ་འཁྱོལ་དང་།  ཞིང་ཆེན་ཏང་ཨུའི་སྐབས་བཅུ་བཞི་པའི་ཚང་འཛོམས་གྲོས་ཚོགས་རིམ་བསྡུས་ཀྱི་ཇུས་ཆོད་བཀོད་སྒྲིག་ལག་ལེན་མཐར་ཕྱིན་བཅས་བྱས་ནས“ལོ་ལྔའི་འཆར་འགོད་བཅུ་བཞི་པ”བདེ་བླག་ངང་མཇུག་བསྡུས་ཏེ།“ལོ་ལྔའི་འཆར་འགོད་བཅོ་ལྔ་པའི”མགོ་ལེགས་པར་རྩོམ་པའི་ལོ་རྒྱུས་ཀྱི་དུས་བབ་གལ་ཆེན་ཞིག་ལ་བསྡུས་པའི་ཚོགས་འདུ་གལ་ཆེན་ཞིག་ཡིན་ལ།  ཞིང་ཆེན་ཡོངས་ཀྱི་མི་དམངས་ཀྱི་ཆབ་སྲིད་འཚོ་བའི་ཁྲོད་ཀྱི་དོན་ཆེན་ཞིག་ཀྱང་རེད། 

   ད་ལོའི་ཞིང་ཆེན་གྱི་ཚོགས་ཆེན་གཉིས་ཡག་པོ་ཞིག་འཚོག་ཆེད།   ཞིང་ཆེན་ཏང་ཨུ་དང་ཞིང་ཆེན་དམངས་འཐུས་ཚོགས་ཆེན་རྒྱུན་ལས་ཨུ་ཡོན་ལྷན་ཁང་། ཞིང་ཆེན་མི་དམངས་སྲིད་གཞུང་། ཞིང་ཆེན་སྲིད་གྲོས། དེ་མིན་འབྲེལ་ཡོད་ཀྱི་སྡེ་ཚན་དག་གིས་མཐོང་ཆེན་ཚད་མེད་མཛད་དེ་གྲ་སྒྲིག་ཨང་གསར་བྱས་ཤིང་།  ཚོགས་ཆེན་གྲ་སྒྲིག་ལས་ཀ་ལས་ཁུངས་བཙུགས་ཏེ།  ཚོགས་དོན་དང་། སྒྲིག་འཛུགས།  དྲིལ་སྒྲོག  ལོ་ཙཱ།   སྲུང་སྐྱོང་།   སྤྱི་གཉེར།  སྨན་བཅོས་འགན་སྲུང་།  ཚོགས་འདུའི་ཀུན་སྤྱོད་དང་སྒྲིག་ལམ་ལྟ་རྟོག་ལ་སོགས་པའི་ལས་དོན་ཚོགས་ཆུང་བཀོད་སྒྲིག་བརྒྱབ་པ་དང་།  ཚོགས་ཆུང་སོ་སོས་ལས་འགན་དང་ལས་ཇུས་ནན་ཏན་བཟོས་ནས་གོ་རིམ་མ་འཆོར་བ་ཚ་ཚ་འུར་འུར་ངང་གྲ་སྒྲིག་ལས་ཀ་ཡོངས་ཚགས་ཚུད་པ་བསྒྲུབས། 

   ད་སྔ་ཞིང་ཆེན་གྱི་ཚོགས་ཆེན་གཉིས་ཀྱི་སྙན་ཞུ་ཁག་དང་འབྲེལ་ཡོད་ཡིག་ཆ་དང་རྒྱུ་ཆ་དག་ཚགས་ཚུད་པ་གྲ་སྒྲིག་བྱས་ཚར།  ཚོགས་འདུ་མ་ཚོགས་གོང་ལ། དམངས་འཐུས་ཚོགས་ཆེན་གྱི་འཐུས་མི་དང་སྲིད་གྲོས་ཨུ་ཡོན་རྣམས་གཞི་རིམ་དུ་བསྐྱོད་དེ་དམངས་ལ་སེམས་འདུན་ཅི་ཡོད་རྒྱུས་ལོན་བྱས་པ་དང་།  འཕེལ་རྒྱས་དངོས་སྟངས་འཛིན་བྱས་ཏེ་གྲོས་ཚོགས་སྐབས་སུ་གྲོས་གཞི་དང་གྲོས་འགོ་སྤུས་ལེགས་འདོན་པར་གྲ་སྒྲིག་གང་ལེགས་བྱས། ད་ལྟ་ཚོགས་ཆེན་གཉིས་ཀྱི་ལས་ཀའི་ཚོགས་ཆུང“གྲོས་ཚོགས”ཀྱི་སྐབས་སུ་བབ་ཡོད་པས།  གྲོས་ཚོགས་བདེ་བླག་ཏུ་འཚོག་པར་ཞབས་ཞུའི་འགན་སྲུང་སྟོབས་དང་ལྡན་པ་བཏོན་དང་འདོན་བཞིན་ཡོད། 

  ཚོགས་འདུའི་སྐབས་སུ།  ཚོགས་འདུའི་ཀུན་སྤྱོད་དང་སྒྲིག་ལམ་ལྟ་རྟོག་ཚན་ཆུང་གིས་ཚོགས་ཆེན་གྱི་བླང་བྱ་ཁག་སོ་སོ་དང་བྱེད་ཐབས་ལག་བསྟར་ནན་མོ་བྱས་ཏེ།  འཐུས་མི་དང་ཨུ་ཡོན།  ཚོགས་ཞུགས་མི་སྣ། ལས་དོན་མི་སྣ་རྣམས་ཀྱིས་གྲོས་ཚོགས་སྐབས་ཀྱི་སྒྲིག་ལམ་ལ་སོགས་ཀྱི་གནས་ཚུལ་ལ་ལྟ་རྟོག་དང་ཞིབ་བཤེར་ནན་མོ་བྱས་ཏེ།   སྤྱོད་བཟང་གཞུང་དྲང་དང་དངོས་གཉེར་ཕན་ཆེ་ཡི་ཁོར་ཡུག་ཡག་པོ་བསྐྲུན་པར་ནུས་ཤུགས་ཡོད་རྒུ་འདོན་རྒྱུ་རེད།