《བདེན་འཚོལ》དུས་དེབ་སྟེང་དུ་ཞི་ཅིན་ཕིང་གི་རྩོམ་ཡིག་གལ་ཆེན་ཏེ་ཁ་ཡིག་ལ《ཀྲུང་དབྱང་གྲོང་ཁྱེར་བྱ་བའི་ཚོགས་འདུའི་སྟེང་གི་གསུང་བཤད》ཅེས་པ་སྤེལ།

ཟླ1ཚེས16ཉིན་པར་སྐྲུན་བྱས་པའི《བདེན་འཚོལ》དུས་དེབ་འདོན་ཐེངས་གཉིས་པའི་སྟེང་དུ། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་དོན་ཨུ་ཡོན་ལྷན་ཁང་གི་ཀྲུའུ་ཞི་ཞི་ཅིན་ཕིང་གི་རྩོམ་ཡིག་གལ་ཆེན་ཏེ་ཁ་ཡིག་ལ། 《ཀྲུང་དབྱང་གྲོང་ཁྱེར་བྱ་བའི་ཚོགས་འདུའི་སྟེང་གི་གསུང་བཤད》ཅེས་པ་སྤེལ།

རྩོམ་ཡིག་ལས་བསྟན་དོན། ཏང་གི་ཚོགས་ཆེན་བཅོ་བརྒྱད་པའི་ཚུན་དུ། ཏང་ཀྲུང་དབྱང་གིས་གནས་བབ་གསར་པའི་འོག་གི་རང་རྒྱལ་གྱི་གྲོང་ཁྱེར་འཕེལ་རྒྱས་ཆོས་ཉིད་ཁོང་དུ་ཆུད་པར་བྱས་པ་དང་། ཏང་གིས་གྲོང་ཁྱེར་བྱ་བའི་སྤྱི་ཡོངས་ལ་འགོ་ཁྲིད་བྱ་རྒྱུ་རྒྱུན་འཁྱོངས་བྱས་ཤིང་། མི་དམངས་གྲོང་ཁྱེར་མི་དམངས་ཀྱིས་འཛུགས་སྐྲུན་དང་མི་དམངས་གྲོང་ཁྱེར་མི་དམངས་ཀྱི་ཆེད་དུ་ཡིན་པ་རྒྱུན་འཁྱོངས་བྱས་པ་དང་། གྲོང་ཁྱེར་དེ་སྐྱེ་ལྡན་ཚེ་སྲོག་གི་ཕུང་གཟུགས་ཤིག་ཏུ་བརྩིས་ནས་མ་ལག་ལྡན་པའི་སྒོ་ནས་འཆར་འགོད་བྱ་རྒྱུ་རྒྱུན་འཁྱོངས་བྱས་ཏེ། གྲོང་ཁྱེར་འཕེལ་རྒྱས་ལ་ལོ་རྒྱུས་རང་བཞིན་གྱི་གྲུབ་འབྲས་ཐོབ་པར་སྐུལ་འདེད་བཏང་བས། རང་རྒྱལ་གྱི་གྲོང་ཁྱེར་དང་གྲོང་རྡལ་ཅན་གྱི་ཆུ་ཚད་གསར་པ་དང་གྲོང་ཁྱེར་འཕེལ་རྒྱས་ཀྱི་ནུས་རིམ། གྲོང་ཁྱེར་འཆར་འགོད་འཛུགས་སྐྲུན་བཅོས་སྐྱོང་གི་ཆུ་ཚད། བདེ་སྡོད་ལས་རིགས་དང་འཚམ་པའི་ཆུ་ཚད། ལོ་རྒྱུས་རིག་གནས་སྲུང་སྐྱོབ་དང་རྒྱུན་འཛིན་གྱི་ཆུ་ཚད། སྐྱེ་ཁམས་ཁོར་ཡུག་གི་སྤུས་ཚད་བཅས་མངོན་སུམ་ཇེ་མཐོར་སོང་ཡོད། དུས་མཚུངས་སུ། རང་རྒྱལ་གྱི་གྲོང་ཁྱེར་འཕེལ་རྒྱས་གཏོང་བའི་ལས་དོན་ལའང་གནས་ཚུལ་གསར་པ་དང་གནད་དོན་གསར་པ་ཁ་ཤས་གནས་ཡོད། སྤྱི་ཡོངས་ནས་བལྟས་ན། རང་རྒྱལ་གྱི་གྲོང་ཁྱེར་དང་གྲོང་རྡལ་ཅན་མགྱོགས་མྱུར་ངང་འཕར་བའི་དུས་སྐབས་ནས་བརྟན་བརླིང་ངང་འཕེལ་རྒྱས་གཏོང་བའི་དུས་སྐབས་སུ་སྒྱུར་བཞིན་ཡོད་པ་དང་། གྲོང་ཁྱེར་འཕེལ་རྒྱས་དེ་གཞི་ཁྱོན་ཆེ་བའི་འཕར་ཚད་རྒྱ་བསྐྱེད་པའི་དུས་མཚམས་ནས་གསོག་ཚད་ཀྱི་སྤུས་ཚད་མཐོར་གཏོང་དང་ཕན་འབྲས་ཆེ་རུ་གཏོང་རྒྱུ་གཙོ་བོར་འཛིན་པའི་དུས་མཚམས་སུ་སྒྱུར་བཞིན་ཡོད།

རྩོམ་ཡིག་ལས་མིག་སྔར་དང་མ་འོངས་པའི་དུས་སྐབས་ཤིག་རིང་གི་གྲོང་ཁྱེར་ལས་དོན་གྱི་སྤྱིའི་བླང་བྱ་བཏོན་པ་སྟེ། དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དགོངས་པ་མཛུབ་སྟོན་དུ་བཟུང་ནས། ཏང་གི་ཚོགས་ཆེན་ཐེངས་ཉི་ཤུ་པ་དང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གཉིས་པ་དང་གསུམ་པའི་དགོངས་དོན་ལག་བསྟར་ཟབ་མོ་བྱས་ཏེ། ཏང་གི་ཁྱོན་ཡོངས་ཀྱི་འགོ་ཁྲིད་རྒྱུན་འཁྱོངས་དང་དེར་ཤུགས་སྣོན་དགོས་ལ། མི་དམངས་གྲོང་ཁྱེར་གྱི་འདུ་ཤེས་ལག་བསྟར་ནན་མོ་བྱས་ཏེ། བརྟན་ཐོག་ཡར་འཕེལ་གྱི་བྱ་བའི་སྤྱིའི་དགོངས་གཞི་རྒྱུན་འཁྱོངས་བྱས་དང་། ས་གནས་ཀྱི་གནས་ཚུལ་དང་བསྟུན་ནས་རིགས་དགར་ཏེ་མཛུབ་སྟོན་བྱེད་པ་རྒྱུན་འཁྱོངས་བྱས་ནས། གསར་གཏོད་དང་བདེ་སྡོད་དང་འཚམ་པ། མཛེས་པ། མཉེན་ཆ་ལྡན་པ། ཤེས་རིག་ལྡན་པ། བློ་རིག་ལྡན་པ་བཅས་ཀྱི་དེང་རབས་ཅན་གྱི་མི་དམངས་གྲོང་ཁྱེར་འཛུགས་སྐྲུན་བྱ་རྒྱུ་དམིགས་ཡུལ་དུ་བྱས་ཏེ། གྲོང་ཁྱེར་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་རྒྱུ་དེ་བརྗོད་དོན་གཙོ་བོར་འཛིན་པ་དང་། གྲོང་ཁྱེར་གྱི་ནང་སྙིང་ཅན་གྱི་འཕེལ་རྒྱས་རྒྱུན་འཁྱོངས་བྱ་རྒྱུ་དེ་གཙོ་གནད་དུ་བྱས་ཏེ། གྲོང་ཁྱེར་གསར་སྒྱུར་ལ་སྐུལ་འདེད་གཏོང་རྒྱུ་དེ་གཞི་འཛིན་ས་གལ་ཆེན་དུ་བརྩིས་ནས། གྲོང་ཁྱེར་གྱི་གྲུབ་ཚུལ་སྔར་ལས་ཇེ་ལེགས་སུ་གཏོང་བ་དང་སྒུལ་ཤུགས་སྒྱུར་བ། སྤུས་ཚད་མཐོར་འདེགས་གཏོང་བ། ལྗང་མདོག་ཚུལ་སྒྱུར་བྱེད་པ། རིག་གནས་རྒྱུན་མཐུད་བྱེད་པ། བཅོས་སྐྱོང་ཕན་འབྲས་ཆེ་རུ་གཏོང་བ་བཅས་ཀྱི་ཐད་སྐུལ་འདེད་གང་ལེགས་བཏང་སྟེ། གྲོང་ཁྱེར་བདེ་འཇགས་ཀྱི་ཚད་མཐའ་བརྟན་སྲུང་བྱས་ཏེ། ཀྲུང་གོའི་ཁྱད་ཆོས་ཀྱི་གྲོང་ཁྱེར་དེང་རབས་ཅན་གྱི་ལམ་གསར་པ་ཞིག་བསྐྲུན་དགོས།

རྩོམ་ཡིག་ལས་བསྟན་དོན། སྤྱིའི་བླང་བྱ་དེ་དོན་འཁྱོལ་བྱེད་པའི་འགག་རྩ་ནི་གྲོང་ཁྱེར་གྱི་ནང་སྙིང་ཅན་གྱི་འཕེལ་རྒྱས་རྒྱུན་འཁྱོངས་བྱས་ནས་རྩ་དོན་གལ་ཆེན་འགའ་ཁོང་དུ་ཆུད་པར་རག་ལས་ཡོད། གཅིག་ནི་གྲོང་ཁྱེར་འཕེལ་རྒྱས་གཏོང་བའི་འདུ་ཤེས་བསྒྱུར་ནས་མི་རྩ་བར་འཛིན་རྒྱུར་སྔར་ལས་མཐོང་ཆེན་བྱེད་དགོས། གཉིས་ནི་གྲོང་ཁྱེར་འཕེལ་རྒྱས་གཏོང་སྟངས་བསྒྱུར་ནས་ལེགས་བསྡུས་ཞིབ་ཚགས་དང་ཕན་ནུས་ཆེ་བར་སྔར་ལས་མཐོང་ཆེན་བྱེད་དགོས། གསུམ་ནི་གྲོང་ཁྱེར་འཕེལ་རྒྱས་ཀྱི་སྒུལ་ཤུགས་བསྒྱུར་ནས་ཁྱད་ཆོས་ལྡན་པའི་འཕེལ་རྒྱས་ལ་སྔར་ལས་མཐོང་ཆེན་བྱེད་དགོས། བཞི་ནི་གྲོང་ཁྱེར་གྱི་བྱ་བའི་གཙོ་གནད་བསྒྱུར་ནས་བཅོས་སྐྱོང་ལ་མ་དངུལ་གཏོང་རྒྱུར་སྔར་ལས་མཐོང་ཆེན་བྱེད་དགོས། ལྔ་ནི་གྲོང་ཁྱེར་གྱི་བྱ་བ་སྒྲུབ་སྟངས་བསྒྱུར་ནས་གཅིག་གྱུར་འཆར་འགོད་དང་མཐུན་སྦྱོར་ལ་སྔར་ལས་མཐོང་ཆེན་བྱེད་དགོས།

རྩོམ་ཡིག་ལས་གྲོང་ཁྱེར་གྱི་བྱ་བའི་ཐད་ཕྱོགས་བདུན་གཙོ་གནད་དུ་བཟུང་ནས་ལས་འགན་བཀོད་སྒྲིག་བྱས་ཡོད་དེ། གཅིག དེང་རབས་ཅན་གྱི་གྲོང་ཁྱེར་མ་ལག་ལེགས་སྒྱུར་གང་ཐུབ་བྱེད་དགོས། གྲོང་ཁྱེར་གྱིས་མི་འབོར་དང་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་བའི་ཕྱོགས་བསྡུས་ཐེག་ནུས་ཆེ་རུ་གཏོང་རྒྱུར་དམིགས་ནས་ཚོགས་པ་དང་དྲ་རྒྱ་ཅན་གྱི་དེང་རབས་ཅན་གྱི་གྲོང་ཁྱེར་ཁྱུ་ཚོགས་དང་གྲོང་ཁྱེར་གྱི་མུ་ཁྱུད་འཕེལ་རྒྱས་གཏོང་དགོས། གྲོང་ཁྱེར་ཆེ་འབྲིང་ཆུང་གསུམ་དང་གྲོང་རྡལ་ཆུང་ཆུང་མཐུན་སྦྱོར་ངང་འཕེལ་རྒྱས་ཡོང་བར་སྐུལ་འདེད་གཏོང་དགོས། གཉིས། གསོན་ཤུགས་ལྡན་པའི་གསར་གཏོད་གྲོང་ཁྱེར་འཛུགས་སྐྲུན་བྱེད་ཤུགས་ཆེ་རུ་གཏོང་དགོས། གྲོང་ཁྱེར་གྱི་ཐོན་ཁུངས་ཀྱི་སྐྱེ་སྟོབས་དང་རྨང་གཞིའི་ཆ་རྐྱེན་དངོས་ལ་རྐང་བཙུགས་ནས་གསར་གཏོད་ཀྱི་སྐྱེ་ཁམས་གསོ་སྐྱོང་ཞིབ་ཚགས་བྱས་ཏེ། སྤུས་གསར་ཐོན་སྐྱེད་ནུས་ཤུགས་འཕེལ་རྒྱས་གཏོང་བའི་ཐད་རྒྱུན་ཆད་མེད་པར་ཐོད་བརྒལ་ཡོང་བར་བྱེད་དགོས། འདས་ཟིན་པའི་གྲོང་ཁྱེར་འཕར་ཚད་རྒྱ་བསྐྱེད་པའི་དུས་སྐབས་སུ་ཆགས་པའི་སྲིད་ཇུས་ལམ་ལུགས་དེ་བཅོས་སྒྱུར་གྱི་བསམ་ཕྱོགས་ལ་བརྟེན་ནས་ལེགས་སྒྲིག་ལེགས་སྒྱུར་བྱས་ཏེ། སྤུས་ཚད་མཐོ་བའི་སྒོ་ནས་གྲོང་ཁྱེར་གསར་སྒྱུར་བྱེད་དགོས། རྒྱལ་ནང་དང་རྒྱལ་སྤྱིའི་འཁོར་སྐྱོད་ཟུང་གི་ཁྲོད་གྲོང་ཁྱེར་གྱི་ལྟེ་བའི་ནུས་པ་ལེགས་པར་བཏོན་ནས། སྒོ་འབྱེད་མཉམ་ལས་ཀྱི་ཆུ་ཚད་རྒྱུན་ཆད་མེད་པར་མཐོ་རུ་གཏོང་དགོས། གསུམ། བདེ་སྣང་ཆེ་ལ་སྟབས་བདེ་ཡིན་པའི་གྲོང་ཁྱེར་འཛུགས་སྐྲུན་བྱེད་ཤུགས་ཆེ་རུ་གཏོང་དགོས། མི་འབོར་དང་ཐོན་ལས། གྲོང་ཁྱེར་དང་གྲོང་རྡལ། འགྲིམ་འགྲུལ་བཅས་གཞི་གཅིག་ཅན་གྱི་འཆར་འགོད་རྒྱུན་འཁྱོངས་བྱས་ཏེ། གྲོང་ཁྱེར་གྱི་བར་སྟོང་གྲུབ་ཚུལ་ཇེ་ལེགས་སུ་གཏོང་བ་དང་འགྲིམ་འགྲུལ་སྒྲིག་བཀོད་མ་ལག་འཐུས་ཚང་དུ་གཏོང་དགོས། ས་ཁང་བདག་ཁོངས་འཕེལ་རྒྱས་གཏོང་སྟངས་གསར་པ་མགྱོགས་མྱུར་ངང་འཛུགས་པ་དང་། མང་ཚོགས་ཀྱི་མཁྲེགས་གཤིས་དང་སྣ་མང་ཅན་གྱི་ལེགས་བཅོས་རང་བཞིན་གྱི་སྡོད་ཁང་གི་དགོས་མཁོ་སྔར་ལས་ལེགས་པར་སྐོང་བ། གྲོང་ཁྱེར་ནང་གི་གྲོང་ཚོ་དང་ཉེན་ཁ་ཆེ་བའི་ཁང་རྙིང་སྒྱུར་བཀོད་བྱེད་པར་བརྟན་པོའི་ངང་སྐུལ་འདེད་གཏོང་དགོས། བདེ་ཐང་དང་ཁྱིམ་ལས་སོགས་འཚོ་བའི་རང་བཞིན་གྱི་ཞབས་ཞུའི་ལས་རིགས་འཕེལ་རྒྱས་ཤུགས་ཆེན་གཏོང་བ་དང་རྒན་གསོ་ཞབས་ཞུའི་མ་ལག་འཐུས་ཚང་དུ་གཏོང་བ། སློབ་གསོའི་ཐོན་ཁུངས་ཀྱི་སྔོན་དཔག་རང་བཞིན་གྱི་བཀོད་སྒྲིག་ལ་ཤུགས་སྣོན་པ། སྨན་བཅོས་འཕྲོད་བསྟེན་གྱི་རྨང་གཞི་སྟོབས་ལྡན་དུ་གཏོང་བའི་བཟོ་བཀོད་ལག་བསྟར་བཅས་བྱེད་དགོས། བཞི། ལྗང་མདོག་དང་ཐཱན་ཉུང་གི་མཛེས་སྡུག་ལྡན་པའི་གྲོང་ཁྱེར་འཛུགས་སྐྲུན་བྱེད་ཤུགས་ཆེ་རུ་གཏོང་དགོས། ནུས་ཁུངས་དང་སྦུག་ལམ། འགྲིམ་འགྲུལ་སོགས་རྨང་གཞིའི་སྒྲིག་བཀོད་ལྗང་མདོག་ཅན་དང་ཐཱན་ཉུང་ཅན་དུ་སྒྱུར་བཀོད་བྱེད་པར་སྐུལ་འདེད་གཏོང་བ་དང་། གྲོང་ཁྱེར་གྱི་ཆུ་བོ་དང་མཚེའུ་ཡི་ཆུའི་མ་ལག་དང་བརླན་ས། ཆུའི་ཁོར་ཡུག་བཅས་ལ་སྲུང་སྐྱོབ་བྱས་ནས། གྲོང་ཁྱེར་གྱི་སྐྱེ་དངོས་སྣ་མང་རང་བཞིན་ཆེ་རུ་གཏོང་དགོས། ལྔ། བདེ་འཇགས་ཡིན་ལ་བློ་གཏད་ཆོག་པའི་མཉེན་ཆ་ལྡན་པའི་གྲོང་ཁྱེར་འཛུགས་སྐྲུན་བྱེད་ཤུགས་ཆེ་རུ་གཏོང་དགོས། གྲོང་ཁྱེར་གྱི་རྨང་གཞིའི་སྒྲིག་བཀོད་ཀྱི་བདེ་རྩར་ཐུག་པའི་བདེ་འཇགས་བཟོ་བཀོད་འཛུགས་སྐྲུན་བྱེད་པར་སྐུལ་འདེད་གཏོང་བ་དང་། གྲོང་ཁྱེར་གྱི་རང་བྱུང་གནོད་འཚེ་འགོག་བཅོས་བྱེད་ཤུགས་ཆེ་རུ་གཏོང་བ། ཁང་པའི་བདེ་འཇགས་འགན་སྲུང་ཆུ་ཚད་ཁྱོན་ཡོངས་ནས་མཐོ་རུ་གཏོང་དགོས། ཉེན་ཁ་འགོག་སྡོམ་དེ་གྲོང་ཁྱེར་གྱི་དོ་དམ་མ་ལག་ནང་བཅུག་ནས། གྲོང་ཁྱེར་གྱི་བདེ་འཇགས་ཉེན་ཁའི་མ་ལག་འཛུགས་དགོས། དྲུག ཀུན་སྤྱོད་ལ་བརྩི་བཀུར་དང་བཟང་ཕྱོགས་ཀྱི་དཔལ་ཡོན་ལྡན་པའི་གྲོང་ཁྱེར་འཛུགས་སྐྲུན་བྱེད་ཤུགས་ཆེ་རུ་གཏོང་དགོས། ལོ་རྒྱུས་རིག་གནས་སྲུང་སྐྱོབ་རྒྱུན་འཛིན་མ་ལག་འཐུས་ཚང་དུ་བཏང་ནས་གྲོང་ཁྱེར་གྱི་ཐུན་མོང་མ་ཡིན་པའི་ལོ་རྒྱུས་རིག་གནས་དང་མི་ཆོས་ས་ཁམས། རང་བྱུང་མཛེས་ལྗོངས་བཅས་སྲུང་སྐྱོབ་བྱ་རྒྱུར་མཐོང་ཆེན་བྱེད་དགོས། གྲོང་ཁྱེར་གྱི་ཤེས་རིག་གསོ་སྐྱོང་དང་གྲོང་ཁྱེར་གྱི་སྙིང་སྟོབས་འབད་པས་བསྐྲུན་དགོས། བདུན། སྟབས་བདེ་ཡིན་ལ་ཕན་འབྲས་ཆེ་བའི་བློ་རིག་ལྡན་པའི་གྲོང་ཁྱེར་འཛུགས་སྐྲུན་བྱེད་ཤུགས་ཆེ་རུ་གཏོང་དགོས། གྲངས་རིག་ཅན་གྱི་འཕེལ་ཕྱོགས་དང་བསྟུན་ནས། གྲོང་ཁྱེར་བཅོས་སྐྱོང་བློ་རིག་ཅན་དང་ཞིབ་ཚགས་ཅན་དུ་འགྱུར་བའི་ཆུ་ཚད་རྒྱུན་ཆད་མེད་པར་ཇེ་མཐོར་གཏོང་དགོས། ཏང་འཛུགས་ཀྱི་སྣེ་ཁྲིད་རྒྱུན་འཁྱོངས་བྱས་ཏེ། གཞི་རིམ་དམ་འཛིན་འབུར་ཐོན་ཡོང་བར་བྱེད་པ་དང་རྨང་གཞི་ཇེ་བརྟན་དུ་གཏོང་བ། མང་ཚོགས་ཀྱི་བྲེལ་དཀའ་ཁྲལ་སྒུག་གི་གནད་དོན་ཕན་འབྲས་ཆེ་བའི་སྒོ་ནས་ཐག་གཅོད་བྱེད་དགོས།

རྩོམ་ཡིག་ལས་ནན་གྱིས་བསྟན་དོན། དེང་རབས་ཅན་གྱི་མི་དམངས་གྲོང་ཁྱེར་འཛུགས་སྐྲུན་བྱེད་པར་ངེས་པར་དུ་ཏང་གིས་གྲོང་ཁྱེར་བྱ་བར་ཁྱོན་ཡོངས་ནས་འགོ་ཁྲིད་བྱེད་པར་ཤུགས་སྣོན་དགོས། འགོ་ཁྲིད་ཀྱི་སྒྲིག་སྲོལ་དང་བྱ་བའི་ལམ་སྲོལ་སྔར་ལས་འཐུས་ཚང་དུ་གཏོང་བ་དང་། གྲོང་ཁྱེར་གྱི་སྲིད་ཇུས་མཐུན་སྦྱོར་རང་བཞིན་ཆེ་རུ་གཏོང་བ། ཕྱོགས་སོ་སོའི་ལག་བསྟར་བྱེད་ཤུགས་ཆེ་རུ་གཏོང་དགོས། ཆབ་སྲིད་གྲུབ་འབྲས་ཀྱི་ལྟ་བ་ཡང་དག་པ་འཛུགས་པ་དང་དེ་ལག་ལེན་དུ་བསྟར་བ། ཚན་རིག་དང་མཐུན་པའི་གྲོང་ཁྱེར་འཕེལ་རྒྱས་ཀྱི་གདེང་འཇོག་མ་ལག་འཛུགས་པ་དང་འཐུས་ཚང་དུ་གཏོང་དགོས། གྲོང་ཁྱེར་བྱ་བའི་ལས་བྱེད་པའི་དཔུང་སྡེ་ཡི་བྱང་ཚད་དང་ནུས་པ་འཛུགས་སྐྱོང་བྱེད་ཤུགས་ཆེ་རུ་གཏོང་དགོས། དངོས་ཐོག་བདེན་འཚོལ་དང་བདེན་འཚོལ་དངོས་གཉེར་རྒྱུན་འཁྱོངས་བྱས་ཏེ། ཕྱི་ཚུལ་རིང་ལུགས་དང་དཔོན་ཉམས་རིང་ལུགས་ལ་ངོ་རྒོལ་མཐའ་གཅིག་ཏུ་བྱེད་དགོས།