ཞིང་ཆེན་ཡོངས་ཀྱི་ཁྲིམས་ཁང་གི་དོན་གྲོས་འདྲི་གཅོད་ཕན་འབྲས་མངོན་གསལ་སྒོས་ཇེ་ལེགས་སུ་ཕྱིན།

ཟླ1ཚེས6ཉིན་བསྡུས་པའི་ལོ་ལྔའི་འཆར་འགོད་བཅུ་བཞི་པའི་འཕེལ་རྒྱས་གྲུབ་འབྲས་བརྗོད་གཞི་ཡིན་པའི་གསར་འགྱུར་སྒྲོག་སྤེལ་ཚོགས་འདུ་ལས་ཞིང་ཆེན་མཐོ་རིམ་མི་དམངས་ཁྲིམས་ཁང་གི་ཆེད་དོན་ཚོགས་རའི་སྟེང་། གསར་འགོད་པས་རྒྱུས་ལོན་པ་ལྟར་ན། ལོ་ལྔའི་འཆར་འགོད་བཅུ་བཞི་པའི་ཚུན་ལ། ཞིང་ཆེན་ཡོངས་ཀྱི་ཁྲིམས་ཁང་གིས་སྤུས་ཚད་མཐོ་བའི་འཕེལ་རྒྱས་ལ་གཞི་བཙུགས་པ་དང་། གྲོས་དོན་འདྲི་གཅོད་བཅོས་སྒྱུར་ཕྱོགས་ཡོངས་ནས་ཟབ་སྤེལ་བྱས་ཏེ། ཞིང་ཆེན་ཡོངས་ཀྱི་དཔལ་འབྱོར་གྱི་རྒྱུན་མཐུད་འཕར་སྣོན་དང་ཐོན་ལས་ཀྱི་གནས་བཞི་འཛུགས་སྐྲུན་ཐད་ཁྲིམས་འཛིན་འགོག་ར་བརྟན་པོར་བསྐྲུན་པ་དང་ཕན་འབྲས་མངོན་གསལ་བླངས་ཡོད།

མ་རྩ་རྡིབས་པའི་འདྲི་གཅོད་རྐྱེན་སྲོལ་གསར་གཏོད་བྱས་ནས། ཁེ་ལས་ཀྱི་བུ་ལོན་ཉེན་ཁ་ནུས་མཐོ་སྒོས་སེལ་ཐབས་བྱས། ངོ་བོ་ཟླ་སྒྲིལ་བསྐྱར་སྒྲིག་རྣམ་པ་ཐོག་མར་བེད་སྤྱོད་བྱས་ཏེ། ཞིང་ཆེན་རིམ་པའི་དངུལ་གཏོང་ཀུང་ཟིའི་མ་རྩ་རྡིབ་པའི་བསྐྱར་སྒྲིག་གྱོད་གཞི་འདྲི་གཅོད་ལེགས་འགྲུབ་བྱུང་བ་དང་། སྒོར་ཐེར་ཆེན་བརྒྱད་དང་ཐེར་འབུམ་གཅིག་གི་བུ་ལོན་ཇེ་ཉུང་དུ་བཏང་ནས། ཁེ་ལས་ཀྱི་བུ་ལོན་ཉེན་ཚབས་ནུས་ལྡན་གྱིས་སེལ་ཐབས་བྱས། སྨན་ཁང་དང་ཁེ་ལས་གཉིས་མཐུན་སྦྱོར་མཉམ་འགུལ་བྱས་པར་བརྟེན། བསྐྱར་སྒྲིག་བརྒྱུད་རིམ་ཁྲོད་ཀྱི་གནད་དོན་མང་པོ་ནུས་མཐོ་དང་གཅིག་འདོམས་ཀྱིས་ཐག་གཅོད་བྱས་པ་དང་། གྱོད་གཞི་དེ་ཁྲུན་གཅོད་བསྐྱར་སྒྲིག་བྱས་པ་ནས་བསྐྱར་སྒྲིག་འཆར་གཞི་བརྒྱུད་པའི་བར་དུས་ཡུན་ལོ་གཅིག་འགོར་བར་མ་ཟད་ཟླ་བདུན་གྱི་ནང་ཡོངས་སུ་ལག་བསྟར་བྱས་ལ། མ་རྩ་རྡིབས་པའི་འདྲི་གཅོད་ལས་ཆོད་སྔར་ལས་མཐོ་རུ་བཏང་།

ཁྲིམས་སྐྱོང་ཚོང་གཉེར་ཁོར་ཡུག་ལེགས་སྒྱུར་བྱས་ནས། དམངས་གཉེར་དཔལ་འབྱོར་འཕེལ་རྒྱས་འགྲོ་བར་རོགས་ཤུགས་བཏོན། 2024ལོའི་ཟླ3པར། ཞིང་ཆེན་མཐོ་རིམ་མི་དམངས་ཁྲིམས་ཁང་གིས་ཁྲིམས་སྐྱོང་ཁོར་ཡུག་ལེགས་སྒྱུར་དང་དམངས་གཉེར་དཔལ་འབྱོར་འཕེལ་རྒྱས་འགྲོ་བར་སྐུལ་འདེད་གཏོང་བའི་སྐོར་གྱི་བརྡ་ཐོ་འགྲེམ་སྤེལ་བྱས་ཏེ། ཁྲིམས་འཛིན་འདྲི་གཅོད་འགན་ནུས་འདོན་སྤེལ་ལེགས་པོ་བྱས་པ་དང་། ཁྲིམས་སྐྱོང་ཅན་གྱི་བྱེད་ཐབས་ལ་བརྟེན་ནས་དམངས་གཉེར་དཔལ་འབྱོར་གྱི་སྤུས་ཚད་མཐོ་བའི་འཕེལ་རྒྱས་ལ་གཞོགས་འདེགས་བྱས། ཟི་ལིང་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གིས་ཞི་ཀང་སྡེ་ཚོགས་ཀྱི་མ་རྩ་རྡིབས་པའི་བསྐྱར་སྒྲིག་གྱོད་གཞིར་ནུས་མཐོ་སྒོས་སྐུལ་འདེད་བཏང་སྟེ། ཟླ་དྲུག་གི་དུས་ཚོད་སྤྱད་དེ་གྱོད་གཞི་འདྲི་གཅོད་བྱས་པ་དང་། སྒོར་ཐེར་ཆེན་གཉིས་དང་ཐེར་འབུམ་གཉིས་ཀྱི་བུ་ལོན་གཙང་འཇལ་བྱས་ལ། ལས་བཟོ་པ་སྟོང་བཞི་དང་བཞི་བརྒྱ་བཅུ་བཞིའི་ལས་ཞུགས་བརྟན་པོར་བཏང་ཞིང་། ཁྲོམ་ཞུགས་ཀུང་ཟི་ཁྲོམ་རས་ལས་ཕྱིར་བུད་པའི་ཉེན་ཁ་སེལ་ཐབས་བྱས་ནས། ཁུལ་ཁོངས་ཀྱི་དཔལ་འབྱོར་གཏན་འཇགས་ངང་འཕེལ་རྒྱས་འགྲོ་ཆེད་ཁྲིམས་འཛིན་གྱི་སྒུལ་ནུས་བསྣན།

ཐོན་ལས་ཀྱི་གནས་བཞི་འཛུགས་སྐྲུན་ལ་དམིགས་ནས། གཙོ་གནད་ཐོན་ལས་ཕྲེང་སྦྲེལ་གྱི་གཏན་འཇགས་ལ་འགན་སྲུང་བྱས། ཀྲུང་གོའི་ཚྭ་མཚོའི་སྡེ་ཚོགས་འཛུགས་པ་གོ་སྐབས་སུ་བྱས་ཏེ། དུས་ཡུན་རིང་པོར་ཐག་གཅོད་བྱས་མེད་པའི་མ་རྩ་རྡིབས་པའི་གྱོད་གཞིའི་འཕེལ་རིམ་ལ་གོ་རིམ་ལྡན་པར་སྐུལ་འདེད་བཏང་ཞིང་། དངུལ་གཏོང་བ་གནད་འཁེལ་གྱིས་ནང་འདྲེན་བྱས་པ་བརྒྱུད། ཚྭ་མཚོའི་རྨེ་ལས་དང་ཚྭ་མཚོའི་ཧེ་ནཱ་ཀུང་ཟི་བསྐྱར་སྒྲིག་བྱ་བ་ལེགས་འགྲུབ་བྱུང་བ་དང་། ཚྭ་མཚོ་འཁོར་རྒྱུག་གི་དཔལ་འབྱོར་ཐོན་ལས་ཕྲེང་སྦྲེལ་ཆ་ཚང་ཡོང་བར་ནུས་ལྡན་གྱིས་སྲུང་སྐྱོང་བྱས་ནས། ཀྲུང་གོའི་ཚྭ་མཚོའི་སྡེ་ཚོགས་འཛུགས་ཆེད་རྨང་གཞི་བརྟན་པོ་བཏིངས། 2025ལོའི་ཟླ4པར། བསྐྱར་སྒྲིག་གྱོད་གཞི་དེར2024ལོའི་རྒྱལ་ཡོངས་ཀྱི་མ་རྩ་རྡིབས་པའི་དཔེ་མཚོན་གྱོད་གཞིའི་མིང་འདོན་བྱ་དགའ་ཐོབ།

བྱ་བའི་རྐྱེན་སྲོལ་འཐུས་ཚང་དུ་བཙུགས་ཏེ། མ་རྩ་རྡིབས་པའི་འདྲི་གཅོད་སྤུས་ནུས་མཐོར་འདེགས་བཏང་། བུན་བདག་གིས་མ་རྩ་རྡིབས་པའི་དོ་དམ་པ་འོས་སྦྱོར་བྱེད་པའི་སྐོར་གྱི་བྱ་བའི་བྱེད་ཐབས་འགྲེམ་སྤེལ་བྱས་ནས། འདྲི་གཅོད་བྱ་བའི་རྐྱེན་སྲོལ་བསྟུད་མར་འཐུས་ཚང་དུ་བཏང་བ་དང་། མ་རྩ་རྡིབས་པའི་འདྲི་གཅོད་བྱ་བ་དེ་ཆེད་ལས་ཅན་དང་ཚད་ལྡན་ཅན་གྱི་ཕྱོགས་སུ་འཕེལ་བར་བྱས། ལོ་ལྔའི་འཆར་འགོད་བཅུ་བཞི་པའི་ཚུན་ལ། ཁྱོན་བསྡོམས་མ་རྩ་རྡིབས་པའི་གྱོད་གཞི་གོ་བརྒྱད་འདྲི་གཅོད་བྱས་པ་དང་། རྒྱུ་ནོར་གྱི་གཞི་ཁྱོན་བསྡོམས་པས་སྒོར་ཁྲག་ཁྲིག་གཉིས་དང་འབྲེལ་བ་ཡོད་པས། ཁྲོམ་རའི་ཐོན་ཁུངས་ཀྱི་ལེགས་སྒྱུར་བཀོད་སྒྲིག་ལ་སྐུལ་འདེད་ནུས་ལྡན་བཏང་སྟེ། ཞིང་ཆེན་ཡོངས་ཀྱི་དཔལ་འབྱོར་གྱི་སྤུས་ཚད་མཐོ་བའི་འཕེལ་རྒྱས་ལ་ཁྲིམས་འཛིན་གྱི་ཞབས་ཞུ་ནུས་ལྡན་དང་འགན་སྲུང་བརྟན་པོ་འདོན་སྤྲོད་བྱས།