མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ12པའི་ཚེས12ཉིན། མཚོ་སྔོན་བཟོ་ཚོགས་ཀྱིས2026ལོའི་ལུགས་གསར་ལོ་སར་དང་ལུགས་རྙིང་ལོ་སར་སྐབས་སུ་དྲོད་ཁོལ་སྐྱེལ་བའི་བྱེད་སྒོ་ཟི་ལིང་དུ་དངོས་སུ་སྤེལ་འགོ་བརྩམས། 2025ལོའི་ཟླ12པའི་ཟླ་སྟོད་ནས2026ལོའི་ཟླ3པའི་ཟླ་སྟོད་བར། ཞིང་ཆེན་ཡོངས་ཀྱི་རིམ་པ་སོ་སོའི་བཟོ་ཚོགས་ཀྱིས་འཚམས་འདྲིའི་བྱ་འགུལ་རྒྱ་ཆེར་སྤེལ་ནས་ཏང་དང་སྲིད་གཞུང་གི་ཐུགས་ཁུར་དང་། བཟོ་ཚོགས་རྩ་འཛུགས་ཀྱི་དྲོད་ཁོལ་རྒྱ་ཆེའི་ལས་བཟོ་བ་རྣམས་ཀྱི་སེམས་སུ་སྐྱེལ་བར་འགན་སྲུང་བྱ་རྒྱུ་རེད།
ཐེངས་འདིའི་དྲོད་ཁོལ་སྐྱེལ་བའི་བྱེད་སྒོས་བཟོ་སྐྲུན་གཙོ་བོ་དང་ལས་གཞི་གཙོ་བོ། ཁྱབ་ཁོངས་གཙོ་བོ། ཨར་ལས་བཟོ་སྐྲུན་དང་སྤྱི་བའི་འགྲིམ་འགྲུལ། ཁོར་ཡུག་འཕྲོད་བསྟེན་སོགས་ལས་རིགས་གཙོ་བོ་དང་། ཐོན་སྐྱེད་བདག་གཉེར་གྱི་དཀའ་ཁག་ཡོད་པའི་ཁེ་ལས་དང་ཁེ་ལས་ཕྲན་ཆུང་། ཆ་རྐྱེན་ཞན་པའི་ཁེ་ལས་སོགས་གཙོ་གཞི་ལ་དམིགས་ནས་ངལ་རྩོལ་དཔེ་ལེགས་ཅན་དང་དཀའ་ཁག་ཡོད་པའི་ལས་བཟོ་པ། གསར་དུ་ལས་ཞུགས་བྱས་པའི་ངལ་རྩོལ་པ་སོགས་མི་ཚོགས་གཙོ་བོར་བཟུང་ནས་རོགས་སྐྱོར་བྱ་རྒྱུ་ཡིན་ལ། ལྷག་པར་དུ་དུས་ཆེན་སྐབས་སུ་ལས་གནས་བརྟན་སྲུང་བྱས་ཡོད་པའི་ལས་ཡུལ་དང་པོའི་ལས་བཟོ་པར་དོ་ཁུར་བྱ་རྒྱུ་རེད། དྲོད་ཁོལ་སྐྱེལ་བའི་བྱེད་སྒོས་ཁེ་ལས་གཙོ་གཞི་དང་། གྲོང་ཁྱེར་དང་རྫོང་རིམ་པའི་སྤྱིའི་བཟོ་ཚོགས་ཀྱིས་དོན་འཁྱོལ་བྱེད་པ། ཞིང་ཆེན་རིམ་པའི་སྤྱིའི་བཟོ་ཚོགས་ཀྱིས་སྤྱིའི་འགན་འཁུར་བ། རྒྱལ་ཡོངས་སྤྱིའི་བཟོ་ཚོགས་ཀྱིས་གཅིག་གྱུར་འཆར་འགོད་བྱེད་པའི་རྩ་དོན་ལྟར། བྱེད་ཐབས་ནན་མོ་སྤྱད་དེ་དཀའ་ཁག་ཡོད་པའི་ལས་བཟོ་པའི་གནས་ཚུལ་ལ་ཕྱོགས་ཡོངས་ནས་ཞིབ་བཤེར་བྱེད་པ་དང་། ཆ་རྐྱེན་དང་མཐུན་པའི་ལས་བཟོ་པ་ཡོད་ཚད་རོགས་སྐྱོར་ཁྱབ་ཁོངས་སུ་འཇོག་པར་འགན་སྲུང་བྱས་ནས་དཀའ་ཁག་ཡོད་པའི་ལས་བཟོ་པ་གཅིག་ཀྱང་ཆད་ལུས་མེད་པ་མངོན་འགྱུར་བྱ་རྒྱུ་རེད།
འགོ་རྩོམ་མཛད་སྒོའི་སྟེང་། ཞིང་ཆེན་དང་གྲོང་ཁྱེར་ཀྱི་བཟོ་ཚོགས་དང་འབྲེལ་ཡོད་ཐོན་ལས་བཟོ་ཚོགས་ཀྱི་འགན་ཁུར་བློ་མཐུན་གྱིས་ཡུལ་དངོས་ནས་དཀའ་ཁག་ཡོད་པའི་ཁེ་ལས་ཀྱི་འཐུས་མི་དང་ངལ་རྩོལ་དཔེ་ལེགས་ཅན་གྱི་འཐུས་མི། སྤྱི་བདེ་ལས་བྱེད་ཉེན་རྟོག་པ། འགྲིམ་འགྲུལ་ཉེན་རྟོག་པ། བདེ་སྲུང་མི་སྣ་སོགས་དང་དེ་བཞིན་ཡིག་ཚགས་སུ་བཀོད་ཡོད་པའི་དཀའ་ཁག་ཅན་གྱི་ལས་བཟོ་པ་རྣམས་ལ་འཚམས་འདྲིའི་མ་དངུལ་བྱིན།
