མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཀྲུང་གུང་ཀྲུང་དབྱང་གིས་བློ་མཐུན་ཧུའུ་ཡའོ་པང་སྐུ་འཁྲུངས་ནས་ལོ་འཁོར110ལོན་པའི་བཞུགས་མོལ་ཚོགས་འདུ་བསྡུས། ཞི་ཅིན་ཕིང་གིས་གསུང་བཤད་གལ་ཆེན་གནང་།
ཚའེ་ཆི་ཡིས་མགོ་འཛིན་གནང་། ལི་ཞི་ཚོགས་འདུར་ཞུགས།
ཟླ11པའི་ཚེས20ཉིན། ཀྲུང་གུང་ཀྲུང་དབྱང་གིས་བློ་མཐུན་ཧུའུ་ཡའོ་པང་སྐུ་འཁྲུངས་ནས་ལོ་འཁོར110ལོན་པའི་བཞུགས་མོལ་ཚོགས་འདུ་བསྡུས། ཞི་ཅིན་ཕིང་དང་ཚའེ་ཆི། ལི་ཞི་སོགས་བཞུགས་མོལ་ཚོགས་འདུར་ཞུགས།
ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཀྲུང་གུང་ཀྲུང་དབྱང་གིས་ཟླ11པའི་ཚེས20ཉིན་མི་དམངས་ཚོགས་ཁང་ཆེན་མོ་ནས་བཞུགས་མོལ་ཚོགས་འདུ་བསྡུས་ཏེ། བློ་མཐུན་ཧུའུ་ཡའོ་པང་སྐུ་འཁྲུངས་ནས་ལོ་འཁོར110ལོན་པར་དྲན་གསོ་ཞུས། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅིའམ་རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུའི་ཀྲུའུ་ཞི་ཞི་ཅིན་ཕིང་གིས་གསུང་བཤད་གལ་ཆེན་གནང་སྟེ་ནན་གྱིས་བསྟན་དོན། བློ་མཐུན་ཧུའུ་ཡའོ་པང་གི་བླ་ན་མེད་པའི་སྙིང་སྟོབས་དང་སྤྱོད་ཚུལ་བཟང་པོར་སློབ་སྦྱོང་ནན་ཏན་བྱེད་པ་དང་། ཐོག་མའི་བསམ་འདུན་མི་བརྗེད་པར་འགན་འཁྲི་ཡིད་ལ་དམ་པོར་བཅངས་ཤིང་། ལོ་རྒྱུས་ཀྱི་གདེང་སྤོབས་ཆེ་རུ་གཏོང་བ་དང་ལོ་རྒྱུས་ཀྱི་རང་འགུལ་ལ་ཤུགས་བསྣན་ནས། ཞུམ་མེད་མདུན་སྐྱོད་ཀྱི་འབད་འཐབ་རྣམ་པས་བྱ་གཞག་སོ་སོར་སྐུལ་འདེད་ཏན་ཏིག་གཏོང་དགོས།
ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ཨུ་ཚའེ་ཆི་ཡིས་བཞུགས་མོལ་ཚོགས་འདུར་མགོ་འཛིན་གནང་བ་དང་། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ཨུ་ལི་ཞི་བཞུགས་མོལ་ཚོགས་འདུར་ཞུགས།
ཞི་ཅིན་ཕིང་གིས་གསུང་བཤད་གནང་སྐབས་བློ་མཐུན་ཧུའུ་ཡའོ་པང་གི་འོད་སྟོང་འཕྲོ་བའི་མི་ཚེ་དང་གཟེངས་སུ་ཐོན་པའི་བྱས་རྗེས་ལ་ཕྱིར་དྲན་གནང་། ཁོང་གིས་བསྟན་དོན། བློ་མཐུན་ཧུའུ་ཡའོ་པང་ནི་ཉམས་སད་ཡུན་རིང་ཐེག་པའི་ལྷག་བསམ་རྣམ་དག་གི་གུང་ཁྲན་རིང་ལུགས་ཀྱི་འཐབ་མོ་བ་དང་། རླབས་ཆེའི་འབྱོར་མེད་གྲལ་རིམ་གྱི་གསར་བརྗེ་པ་དང་ཆབ་སྲིད་པ། རང་དམག་གི་ཆབ་སྲིད་བྱ་བ་སྒྲུབ་མཁན་ཕུལ་དུ་བྱུང་བ་ཞིག་ཡིན། དུས་ཡུན་རིང་པོར་ཏང་གི་འགོ་ཁྲིད་གལ་ཆེན་གྱི་ལས་འགན་འཁུར་བའི་འགོ་ཁྲིད་ཕུལ་དུ་བྱུང་བ་ཞིག་ཡིན་པས། མི་རིགས་རང་བཙན་དང་བཅིངས་འགྲོལ། སྤྱི་ཚོགས་རིང་ལུགས་ཀྱི་གསར་བརྗེ་དང་འཛུགས་སྐྲུན། བཅོས་བསྒྱུར་སྒོ་འབྱེད་དང་སྤྱི་ཚོགས་རིང་ལུགས་དེང་རབས་ཅན་འཛུགས་སྐྲུན་བཅས་ཀྱི་ཐད་ཉམས་མེད་ཀྱི་མཛད་རྗེས་བཞག་ཡོད།
ཞི་ཅིན་ཕིང་གིས་ནན་གྱིས་བསྟན་དོན། བློ་མཐུན་ཧུའུ་ཡའོ་པང་གིས་ཕུགས་བསམ་ཆེན་པོ་བཅངས་ནས་གུང་ཁྲན་རིང་ལུགས་ཀྱི་ལས་དོན་ལ་འབད་འཐབ་ལྷོད་མེད་བྱེད་པའི་དུས་ཡུན་རིང་པོའི་ལག་ལེན་ཁྲོད་བློ་བརྟན་འགྱུར་མེད་ཀྱི་གསར་བརྗེའི་བློ་སྟོབས་མངོན་ཡོད། ཏང་ཡོངས་ཀྱི་བློ་མཐུན་ཚོས་ཁོང་དང་འདྲ་བར་ཕུགས་བསམ་དང་དད་སེམས་ཇེ་བརྟན་དུ་བཏང་ནས། ཏང་ལ་བློ་དཀར་བ། ཀྲུང་གོའི་ལུགས་ཀྱི་དེང་རབས་ཅན་འཛུགས་སྐྲུན་ལ་ཧུར་ཐག་གིས་ཞུགས་ཏེ། ཕུགས་བསམ་ཆེན་པོ་དང་ཐུན་མོང་གི་ཕུགས་བསམ་མངོན་འགྱུར་བྱ་ཆེད་འབད་འཐབ་བྱ་དགོས།
ཞི་ཅིན་ཕིང་གིས་བསྟན་དོན། བློ་མཐུན་ཧུའུ་ཡའོ་པང་གིས་ཡོད་ཚད་ལག་ལེན་ནས་འགོ་རྩོམ་རྒྱུར་མཐོང་ཆེན་བྱས་ཏེ། མར་ཁེ་སི་རིང་ལུགས་ཀྲུང་གོ་ཅན་དུ་འགྱུར་བ་དང་རྩ་འཛུགས་ལམ་ཕྱོགས་ཀྱི་ཟིང་བཅོས་ཡོ་བསྲང་ལ་སྐུལ་འདེད་གཏོང་ཆེད་བྱས་རྗེས་གལ་ཆེན་བཞག་ཡོད། ཏང་ཡོངས་ཀྱི་བློ་མཐུན་ཚོས་ཁོང་ནང་བཞིན་དངོས་ཐོག་བདེན་འཚོལ་རྒྱུན་འཁྱོངས་དང་། བདེན་དོན་འཚོལ་སྙེག་བྱེད་པ། རང་རྟོགས་ཀྱིས་ཏང་གི་གསར་གཏོད་གཞུང་ལུགས་ཀྱི་ངེས་ཤེས་བསྐྱེད་དེ། ལག་ལེན་ལ་མཛུབ་སྟོན་བྱེད་པ་དང་བྱ་བར་སྐུལ་འདེད་གཏོང་བ་བཅས་བྱས་ནས། དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་ལག་ལེན་རླབས་ཆེན་ལ་སྐུལ་འདེད་གཏོང་བའི་བརྒྱུད་རིམ་ཁྲོད་མར་ཁེ་སིའི་རིང་ལུགས་ཀྱི་བདེན་དོན་གྱི་སྟོབས་ཤུགས་རྒྱུན་ཆད་མེད་པར་མངོན་དགོས།
ཞི་ཅིན་ཕིང་གིས་ནན་གྱིས་བསྟན་དོན། བློ་མཐུན་ཧུའུ་ཡའོ་པང་གིས་བཅོས་སྒྱུར་སྒོ་འབྱེད་དར་སྤེལ་དང་སྐུལ་འདེད་བཏང་ནས། སྤྱི་ཚོགས་རིང་ལུགས་དེང་རབས་ཅན་འཛུགས་སྐྲུན་ལ་སྐུལ་འདེད་གཏོང་ཆེད་སེམས་ནུས་ཡོད་ཚད་བཏོན་ཡོད། ཏང་ཡོངས་ཀྱི་བློ་མཐུན་ཚོས་ཁོང་ནང་བཞིན་དུས་རབས་ཀྱི་མདུན་གྲལ་དུ་ལངས་ཕོད་པ་དང་བློ་རྩ་བརྟན་པོས་བཅོས་བསྒྱུར་དང་གསར་གཏོད་བྱེད་པ། དཀའ་གནད་ལ་གདོང་གཏོད་པའི་སྙིང་སྟོབས་ལ་བརྟེན་ནས་བཅོས་སྒྱུར་སྔར་ལས་གཏིང་ཟབ་ཏུ་བཏང་སྟེ། སྤྱི་ཚོགས་ཀྱི་ཐོན་སྐྱེད་ནུས་ཤུགས་རྒྱུན་ཆད་མེད་པར་བཅིངས་འགྲོལ་དང་འཕེལ་རྒྱས་སུ་གཏོང་བ་དང་སྤྱི་ཚོགས་ཀྱི་གསོན་ཤུགས་སྤེལ་བ་དང་ཇེ་དྲག་ཏུ་གཏོང་དགོས།
ཞི་ཅིན་ཕིང་གིས་བློ་མཐུན་ཧུའུ་ཡའོ་པང་གིས་མི་དམངས་ལ་བརྩེ་སེམས་ཟབ་མོ་བཅངས་ནས་དཔལ་འབྱོར་འཕེལ་རྒྱས་དང་མི་དམངས་ཀྱི་འཚོ་བ་གང་ལེགས་སྐྱེལ་ཆེད་བྱ་བ་དངོས་དང་བྱ་བ་བཟང་པོ་མང་དུ་བསྒྲུབས་ཡོད། ཏང་ཡོངས་ཀྱི་བློ་མཐུན་ཚོས་ཁོང་དང་འདྲ་བར་ཐོག་མཐའ་བར་གསུམ་དུ་མི་དམངས་ལ་བསམ་བློ་གཏོང་བ་དང་། ཁེ་ཕན་ཀུན་ལ་དབང་བ། ཏང་གི་རྩ་བའི་དམིགས་ཡུལ་རང་རྟོགས་ཀྱིས་ལག་ལེན་དུ་བསྟར་བ། དུས་རབས་གསར་པའི་ཏང་གི་མང་ཚོགས་ལམ་ཕྱོགས་སུ་ཡག་པོར་སྐྱོད་པ་དང་། འབད་འཐབ་ལྷོད་མེད་ལ་བརྟེན་ནས་མི་དམངས་མང་ཚོགས་ཀྱི་ཐོབ་སྣང་དང་སྐྱིད་སྣང་བདེ་སྣང་བཅས་རྒྱུན་ཆད་མེད་པར་ཆེ་རུ་གཏོང་དགོས་ཞེས་བཏོན།
ཞི་ཅིན་ཕིང་གིས་ནན་གྱིས་བསྟན་དོན། བློ་མཐུན་ཧུའུ་ཡའོ་པང་གིས་ཏང་སྲོལ་ལེགས་པོ་སྐྱོང་རྒྱུར་ཚད་མཐོའི་མཐོང་ཆེན་གནང་ནས། ཏང་གི་སྲོལ་རྒྱུན་དང་སྤྱོད་ཚུལ་བཟང་པོ་དར་སྤེལ་གཏོང་ཆེད་གཟི་འོད་འཕྲོ་བའི་མིག་དཔེ་བཏོད་ཡོད། ཏང་ཡོངས་ཀྱི་བློ་མཐུན་དང་ལྷག་པར་དུ་འགོ་ཁྲིད་ལས་བྱེད་པས་ཁོང་གི་སྤྱོད་ཚུལ་དང་མཐུན་པར་བྱས་ཏེ། ག་དུས་ཡིན་ཡང་རང་དཔེ་གཞན་སྟོན་བྱ་དགོས་ལ། སྙིང་རུས་ལྷོད་མེད་ཀྱིས་ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་དོན་འཁྱོལ་བྱས་ནས། ཚུལ་མིན་སྤྱོད་ཚུལ་དང་རུལ་སུངས་ཀྱི་སྣང་ཚུལ་མཐའ་གཅིག་ཏུ་བཀག་འགོག་བྱས་ཏེ། ཐོག་མཐའ་བར་གསུམ་དུ་གུང་ཁྲན་ཏང་མིའི་སྤྱོད་གཙང་གཞུང་དྲང་གི་ཆབ་སྲིད་རང་མདངས་སྲུང་འཛིན་བྱ་དགོས།
ཚའེ་ཆི་ཡིས་བཞུགས་མོལ་ཚོགས་འདུར་འགོ་འཛིན་གནང་སྐབས་གསུང་རྒྱུར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་ལས་བློ་མཐུན་ཧུའུ་ཡའོ་པང་གིས་ཏང་དང་མི་དམངས་ཀྱི་ཆེད་དུ་བཞག་པའི་ཉམས་མེད་མཛད་རྗེས་ལ་ཕྱིར་དྲན་བྱས་ཏེ། ཏང་ཡོངས་ཀྱི་བློ་མཐུན་རྣམས་ལ་བློ་མཐུན་ཧུའུ་ཡའོ་པང་གི་བླ་ན་མེད་པའི་སྙིང་སྟོབས་དང་སྤྱོད་ཚུལ་བཟང་པོ་སློབ་སྦྱོང་བྱ་དགོས་པའི་འབོད་སྐུལ་གནང་བར་བརྟེན། ཆབ་སྲིད་རང་བཞིན་དང་བསམ་བློའི་རང་བཞིན། མཛུབ་སྟོན་རང་བཞིན་བཅས་དྲག་པོ་ལྡན། ང་ཚོས་སློབ་སྦྱོང་དང་གོ་བ་ཟབ་མོ་ལེན་པ་དང་། ལག་བསྟར་དོན་འཁྱོལ་དམ་འཛིན་ཡག་པོ་བྱ་དགོས། བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གི་མཐའ་འཁོར་དུ་སྔར་ལས་མཐུན་སྒྲིལ་དམ་ཟབ་བྱས་ཏེ། “གཏན་ཕབ་གཉིས”ཀྱི་ཐག་གཅོད་རང་བཞིན་གྱི་དོན་སྙིང་ལ་གོ་བ་གཏིང་ཟབ་ལེན་པ་དང་། “འདུ་ཤེས་བཞི”ཇེ་དྲག་ཏུ་གཏོང་བ། “ཡིད་ཆེས་བཞི”ཇེ་བརྟན་དུ་གཏོང་བ། “སྲུང་སྐྱོང་གཉིས”ལེགས་པོར་སྒྲུབ་སྟེ། སེམས་ཤུགས་གཅིག་སྒྲིལ་དང་འབད་འབུངས་ཡར་བརྩོན་གྱིས་ཀྲུང་གོའི་ལུགས་ཀྱི་དེང་རབས་ཅན་གྱི་རྒྱལ་ཁབ་སྟོབས་ལྡན་འཛུགས་སྐྲུན་དང་མི་རིགས་བསྐྱར་དར་གྱི་རླབས་ཆེའི་བྱ་གཞག་ལ་ཕྱོགས་ཡོངས་ནས་སྐུལ་འདེད་གཏོང་ཆེད་འབད་འཐབ་ཧུར་ཐག་བྱ་དགོས།
བཞུགས་མོལ་ཚོགས་འདུའི་སྟེང་། ཀྲུང་དབྱང་ཏང་གི་ལོ་རྒྱུས་དང་ཡིག་ཚང་ཞིབ་འཇུག་ཁང་གི་ཡོན་ཀྲང་ཆུས་ཆིན་ཧྲན་དང་། ཀྲུང་དབྱང་རྩ་འཛུགས་པུའུ་རྒྱུན་ལྡན་བྱ་བའི་ལས་བགོས་འགན་འཁུར་པུའུ་ཀྲང་གཞོན་པ་ཧོང་ཅན་ཧྥ། ཀྲུང་དབྱང་ཏང་གི་སློབ་གྲྭའི(རྒྱལ་ཁབ་སྲིད་འཛིན་སློབ་གླིང)རྒྱུན་ལྡན་བྱ་བའི་ལས་འགན་འཁུར་མཁན་སློབ་གཙོ་གཞོན་པ(ཡོན་ཀྲང་གཞོན་པ)ཞེ་ཁྲུན་ཐའོ། གུང་གཞོན་ཚོགས་པ་ཀྲུང་དབྱང་ཧྲུའུ་ཅི་ཁྲུའུ་ཡི་ཧྲུའུ་ཅི་དང་པོ་ཨ་ཏུང་། ཧུའུ་ནན་ཞིང་ཆེན་ཏང་ཨུའི་ཧྲུའུ་ཅི་ཧྲིན་ཞའོ་མིན་བཅས་ཀྱིས་སྔ་རྗེས་སུ་གཏམ་བཤད།
ཧྲི་ཐའེ་ཧྥིན་དང་ལི་ཀན་ཅེ། ལི་ཧྲུའུ་ལེ། ལི་ཧུང་ཀྲུང་། ཁྲིན་ཝུན་ཆིན། ལིའུ་ཅིན་གོ ཝང་ཞའོ་ཧུང་། ཀྲང་ཧྲིན་མིན་བཅས་བཞུགས་མོལ་ཚོགས་འདུར་ཞུགས།
ཀྲུང་དབྱང་ཏང་སྲིད་དམག་གསུམ་གྱི་འབྲེལ་ཡོད་སྡེ་ཁག་དང་ཧུའུ་ནན་ཞིང་ཆེན་གྱི་འགན་འཁུར་བློ་མཐུན། དམངས་གཙོའི་ཏང་ཁག་སོ་སོའི་ཀྲུང་དབྱང་དང་། རྒྱལ་ཡོངས་བཟོ་ཚོང་མཉམ་འབྲེལ་ལྷན་ཚོགས་ཀྱི་འགན་འཁུར་བ། ཏང་ཁག་གང་ལའང་མི་གཏོགས་པའི་མི་སྣ་བཅས་ཀྱི་འཐུས་མི། བློ་མཐུན་ཧུའུ་ཡའོ་པང་གི་གཉེན་ཉེ་དང་། ཁོང་འཚོ་བཞེས་སྐབས་ཀྱི་གྲོགས་པོ་དང་ཕ་ཡུལ་གྱི་འཐུས་མི་སོགས་བཞུགས་མོལ་ཚོགས་འདུར་ཞུགས། །
