མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཟླ10པའི་ཚེས16ཉིན། རྒྱལ་སྲིད་ཨུ་ཡོན་ཧྲིན་དབྱི་ཆིན་སི་ཁྲོན་ཞིང་ཆེན་ཁྲེང་ཏུའུ་རུ་ཀྲུང་གོའི་སྒྱུ་རྩལ་དུས་ཆེན་སྐབས་བཅུ་བཞི་པའི་མགོ་ཚུགས་མཛད་སྒོར་ཞུགས་པ་མ་ཟད་མགོ་ཚུགས་པ་ཁྱབ་བསྒྲགས་གནང་།
ཀྲུང་གོའི་སྒྱུ་རྩལ་དུས་ཆེན་ནི་རང་རྒྱལ་གྱི་ཚད་གཞི་མཐོ་ཤོས་དང་ཤུགས་རྐྱེན་ཆེ་ཤོས་ལྡན་པའི་རྒྱལ་ཁབ་རིམ་པའི་ཕྱོགས་བསྡུས་རང་བཞིན་གྱི་རིག་གནས་སྒྱུ་རྩལ་གྱི་འདུ་འཛོམས་ཆེན་པོ་ཞིག་རེད། སྐབས་འདིའི་ཀྲུང་གོའི་སྒྱུ་རྩལ་དུས་ཆེན་གྱིས་ཞི་ཅིན་ཕིང་གི་རིག་གནས་དགོངས་པ་ལག་བསྟར་གཏིང་ཟབ་དང་། 2013ལོའི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྟེན་འབྲེལ་འཕྲིན་ཡིག་གི་དགོངས་དོན་དོན་འཁྱོལ་བྱས་ཏེ། ནུས་ཤུགས་ཡོད་རྒུས“སྒྱུ་རྩལ་གྱི་རྒྱས་སྟོན་དང་མི་དམངས་ཀྱི་དུས་ཆེན”བསྐྲུན་ནས། ཉེ་བའི་ལོ་ཤས་རིང་རང་རྒྱལ་གྱི་རིག་རྩལ་གྱི་མཐོ་ཚད་གསར་པ་དང་རྣམ་པ་གསར་པ། རིག་རྩལ་ལས་དོན་པའི་བྱས་རྗེས་གསར་པ་དང་རྣམ་པ་གསར་པ་གཅིག་སྡུད་ཐོག་མངོན་པ་རེད། དེའི་རིང“སྒྱུ་རྩལ་སི་ཁྲོན་དང་ཁྲུན་ཆིན་ཡུལ་གྲུ་གཉིས་སུ་བསྐྱོད་ནས་དུས་རབས་ཀྱི་ལེའུ་གསར་པ་མཉམ་དུ་འབྲི”ཞེས་པ་བརྗོད་བྱ་གཙོ་བོར་བྱས་ཏེ། ཕུལ་བྱུང་གར་སྟེགས་སྒྱུ་རྩལ་བརྩམས་ཆོས100ལྷག་དང་མང་ཚོགས་ཀྱི་རིག་རྩལ་བརྩམས་ཆོས170ལྷག་འཁྲབ་སྟོན་བྱ་རྒྱུ་དང་། རྒྱལ་ཡོངས་ཀྱི་ཕུལ་བྱུང་མཛེས་རྩལ་དང་། ཡིག་གཟུགས་རྐོས་རིས། པར་ལེན་བརྩམས་ཆོས1000ཙམ་འགྲེམས་སྟོན་བྱ་རྒྱུ་དང་། ཝུན་ཧྭ་བྱ་དགའ་དང་སྐར་མའི་བྱ་དགའ་དཔྱད་འདེམས་དང་། རྩེད་རྩལ་སྒྱུ་འཕྲུལ་འགྲེམས་སྟོན། མངོན་མེད་རིག་གནས་ཤུལ་བཞག་འགྲེམས་སྟོན། གྲངས་འཛིན་སྒྱུ་རྩལ་འགྲེམས་སྟོན།“གཞོན་ནུ་ལོ་ཆུང་སྒྱུ་རྩལ་གསར་གཏོད་གཟའ་འཁོར”སོགས་ཀྱི་བྱེད་སྒོ་སྤེལ་རྒྱུ་རེད། དེ་དང་ཆབས་ཅིག སྐད་གྲགས་ཅན་གྱི་མི་སྣའི་བྱ་དགའི་དཔྱད་བསྡུར་ཚོགས་པ་སྒྲིག་འཛུགས་བྱས་ནས་མཛེས་ལྗོངས་ཁུལ་དང་། ཁྲོམ་གཞུང་། སྡེ་ཁུལ་བཅས་སུ་བསྐྱོད་དེ་འཁྲབ་སྟོན་བྱས་ནས། རིག་རྩལ་གསར་རྩོམ་གྱི་གསོན་ཤུགས་སྐུལ་སྤེལ་དང་སྒྱུ་རྩལ་གཞི་རིམ་དུ་རྩ་བ་ཚུགས་རྒྱུར་སྐུལ་འདེད་གཏོང་བ་དང་།“འཁྲབ་སྟོན་དང་མཉམ་དུ་ཡུལ་སྐོར་དུ་འགྲོ་བ”དང“སྒྱུ་རྩལ་མཛོད་ཁང་གི་མཚན་མོ”སོགས་སྤུས་ལེགས་ལམ་ཐིག་ཇུས་འགོད་དང་འགྲེམས་སྤེལ་བྱས་ནས། རིག་གནས་དང་ཡུལ་སྐོར་མཉམ་འདྲེས་གཏིང་ཟབ་བྱ་རྒྱུར་སྐུལ་འདེད་གཏོང་རྒྱུ་རེད།
སྐབས་འདིའི་ཀྲུང་གོའི་སྒྱུ་རྩལ་དུས་ཆེན་ནི་རིག་གནས་དང་ཡུལ་སྐོར་པུའུ་དང་། ཁྲུང་ཆིང་གྲོང་ཁྱེར་མི་དམངས་སྲིད་གཞུང་། སི་ཁྲོན་ཞིང་ཆེན་མི་དམངས་སྲིད་གཞུང་བཅས་ཀྱིས་ཐུན་མོང་ཐོག་གཙོ་སྒྲུབ་བྱས་པ་རེད། །
