སྔོན་གཤེགས་དཔའ་བོར་རྗེས་དྲན་ཞུ་བའི་ཉིན་མོར་མི་དམངས་དཔའ་བོར་མེ་ཏོག་གི་ཕྲེང་བ་འབུལ་བའི་མཛད་སྒོ་པེ་ཅིང་དུ་གཟབ་རྒྱས་ངང་བསྡུས།

སྔོན་གཤེགས་དཔའ་བོའི་མཛད་རྗེས་ཡིད་ལ་བརྟན་པོར་འཛིན། འབད་འཐབ་ཀྱི་སྙིང་སྟོབས་ཞུན་བརྡར་བྱེད། སྔོན་གཤེགས་དཔའ་བོར་རྗེས་དྲན་ཞུ་བའི་ཉིན་མོར་མི་དམངས་དཔའ་བོར་མེ་ཏོག་གི་ཕྲེང་བ་འབུལ་བའི་མཛད་སྒོ་ཚེས་30ཉིན་གྱི་སྔ་དྲོ་པེ་ཅིང་གནམ་བདེ་སྒོ་མོ་ཆེའི་ཐང་ཆེན་དུ་གཟབ་རྒྱས་ངང་བསྡུས། ཏང་དང་རྒྱལ་ཁབ་ཀྱི་འགོ་ཁྲིད་ཞི་ཅིན་ཕིང་། ལི་ཆང་། ཀྲའོ་ལེ་ཅི། ཝང་ཧུའུ་ཉིང་། ཚའེ་ཆི། ཏིང་ཞུའེ་ཞང་། ལི་ཞི། ཧན་ཀྲིན་སོགས་ལས་རིགས་སོ་སོའི་འཐུས་མི་དང་མཉམ་དུ་མཛད་སྒོར་ཞུགས། 
       བརྗིད་ཉམས་ལྡན་པའི་གནམ་བདེ་སྒོ་མོ་ཆེའི་ཐང་ཆེན་དུ། དམར་མདངས་བཀྲ་བའི་སྐར་ལྔའི་དར་དམར་ལྷབ་ལྷུབ་ཏུ་བསྐྱོད་ཅིང་། མི་དམངས་དཔའ་བོའི་རྗེས་དྲན་རྡོ་རིང་འགྱིང་ངེར་ལངས་ཡོད། ཐང་ཆེན་གྱི་དཀྱིལ་དབུས་སུ“མེས་རྒྱལ་ལ་སྨོན་འདུན་ཞུ”ཞེས་པའི་མེ་ཏོག་གི་ཕྲེང་བ་ཆེན་མོས་མེས་རྒྱལ་དར་རྒྱས་གོང་འཕེལ་ཡོང་བའི་སྨོན་འདུན་བཟང་པོ་མཚོན། རྗེས་དྲན་རྡོ་རིང་གི་བྱང་ངོས་སུ། མེ་ཏོག་སྡིངས་ཆའི་གཉིས་ཀྱི་སྟེང་མེ་ཏོག་དཀར་པོ་སོགས་མེ་ཏོག་སྣ་ཚོགས་ལས་གྲུབ་པའི་མེ་ཏོག་གི་ཨ་ལོང18ཀྱིས་ཀྲུང་ཧྭའི་བུ་དང་བུ་མོ་ཡོངས་ཀྱིས་སྔོན་གཤེགས་དཔའ་བོར་བརྩེ་དུང་ཟབ་མོ་འཆང་བ་མཚོན།
        དུས་ཚོད་བཅུའི་སྟེང་། ཞི་ཅིན་ཕིང་། ལི་ཆང་། ཀྲའོ་ལི་ཅི། ཝང་ཧུའུ་ཉིང་། ཚའེ་ཆི། ཏིང་ཞུའེ་ཞང་། ལི་ཞི། ཧན་ཀྲིན་སོགས་ཏང་དང་རྒྱལ་ཁབ་ཀྱི་འགོ་ཁྲིད་པ་གནམ་བདེ་སྒོ་མོ་ཆེའི་ཐང་ཆེན་དུ་ཕེབས་ནས་མི་དམངས་དཔའ་བོར་མེ་ཏོག་གི་ཕྲེང་བ་འབུལ་བའི་མཛད་སྒོར་ཞུགས། རུ་སྟར་གྱི་སྔོན་དུ། ཀྲུང་གུང་ཀྲུང་དབྱང་དང་། རྒྱལ་ཡོངས་དམངས་ཆེན་རྒྱུན་ལས་ཨུ་ཡོན་ལྷན་ཁང་། རྒྱལ་སྲིད་སྤྱི་ཁྱབ་ཁང་དང་། རྒྱལ་ཡོངས་སྲིད་གྲོས། ཀྲུང་དབྱང་དམག་དོན་ཨུ་ཡོན་ལྷན་ཁང་། དམངས་གཙོའི་ཏང་ཁག་སོ་སོ། རྒྱལ་ཡོངས་བཟོ་ཚོང་མཉམ་འབྲེལ་ལྷན་ཚོགས་དང་ཏང་ཁག་གང་ལའང་མི་གཏོགས་པའི་རྒྱལ་གཅེས་མི་སྣ། མི་དམངས་ཚོགས་པ་སོ་སོ་དང་ལས་རིགས་སོ་སོའི་མང་ཚོགས། འཐབ་མོ་བ་རྒན་པ་དང་བློ་མཐུན་རྒན་པ། སྔོན་གཤེགས་དཔའ་བོའི་ཁྱིམ་མི། ཀྲུང་གོ་ལོ་ཆུང་གདོང་ལེན་རུ་ཁག་གི་མིང་ཐོག་ནས་ཕུལ་བའི་མེ་ཏོག་ཕྲེང་བ་ཆེན་མོ9ཡི་ཡིག་འབྲུ་རེ་རེ་བཞིན་སྒྲིག་པ་དང་། མེ་ཏོག་ཕྲེང་བ་དམར་པོའི་དར་སྐུད་སྟེང་བྲིས་པའི“མི་དམངས་ཀྱི་དཔའ་བོ་ནམ་ཡང་མི་ནུབ་པར་གནས”ཞེས་པའི་ཡིག་འབྲུ་ཧ་ཅང་གསལ། ཀྲུང་གོ་མི་དམངས་བཅིངས་འགྲོལ་དམག་དམག་མིའི་རོལ་དབྱངས་ཚོགས་པའི་དུང་བརྡ་གཏོང་མཁན་གྱིས《སྔོན་གཤེགས་དཔའ་བོའི་རྗེས་དྲན་ཉིན་མོའི་དུང་བརྡ》ཞེས་པ་བཏང་། གུས་དམག་གིས་གྲ་སྒྲིག་བྱས་ཞེས་བཀའ་ཕབ་པ་དང་བསྟུན་ནས། དམག་གསུམ་གཟབ་སྦྲེང་དམག་གིས་གོམ་སྟབས་བརྟན་པོའི་ངང་རྗེས་དྲན་རྡོ་རིང་མདུན་དུ་བསྐྱོད་དེ་མེ་མདའ་བཟུང་སྟེ་ཀྲོང་ངེར་ལངས།
        དག་དག་དུས་ཚོད་བཅུའི་སྟེང་། མི་དམངས་དཔའ་བོར་མེ་ཏོག་གི་ཕྲེང་བ་འབུལ་བའི་མཛད་སྒོ་དངོས་སུ་འགོ་བརྩམས། དམག་མིའི་རོལ་ཆའི་རུ་ཁག་གིས《བློས་བླངས་དམག་གི་མདུན་སྐྱོད་གླུ》དཀྲོལ་གཏོང་བྱས་པ་དང་། ཚོགས་ར་ཡོངས་ཀྱིས་སྐད་གསེང་མཐོན་པོས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་གླུ་བླངས། རྒྱལ་གླུ་བླངས་རྗེས་ཚོགས་ར་ཡོངས་སུ་གུས་སྟབས་ཀྱིས་ལངས་ཏེ། ཀྲུང་གོ་མི་དམངས་ཀྱི་བཅིངས་འགྲོལ་ལས་དོན་དང་སྤྱི་མཐུན་རྒྱལ་ཁབ་འཛུགས་སྐྲུན་གྱི་ལས་དན་ཐད་དཔའ་ངར་ཆེན་པོས་རང་སྲོག་བློས་བཏང་བའི་སྔོན་གཤེགས་དཔའ་བོར་ངག་བསྡམས་མྱ་ངན་ཞུས། ངག་བསྡམས་མྱ་ངན་ཞུས་རྗེས། ལག་ཏུ་མེ་ཏོག་བཟུང་བའི་བྱིས་པ་ཚོས་མི་དམངས་དཔའ་བོའི་རྗེས་དྲན་རྡོ་རིང་ལ་ཕྱོགས་ཏེ《ང་ཚོ་ནི་གུང་ཁྲན་རིང་ལུགས་ཀྱི་རྒྱུན་འཛིན་པ་ཡིན》ཞེས་པའི་གླུ་དབྱངས་སྐད་གསེང་མཐོན་པོས་བླངས་པ་མ་ཟད། ལོ་ཆུང་གདོང་ལེན་རུ་ཁག་གི་རུ་མིར་གུས་འདུད་ཞུས། དམག་དཔུང་རོལ་ཆའི་རུ་ཁག་གིས་བརྩེ་བ་ཟབ་མོའི《མེ་ཏོག་འབུལ་བའི་རོལ་དབྱངས》དཀྲོལ་གཏོང་བྱས། གུས་དམག18ཀྱིས་གོམ་སྟབས་བརྟན་པོས་མེ་ཏོག་གི་ཕྲེང་བ་བཏེགས་ནས་མི་དམངས་དཔའ་བོའི་རྗེས་དྲན་རྡོ་རིང་ཕྱོགས་སུ་དལ་གྱིས་བསྐྱོད། གུས་དམག་གིས་མེ་ཏོག་གི་ཕྲེང་བ་རྗེས་དྲན་རྡོ་རིང་གི་མདུན་དུ་བཞག
        ཞི་ཅིན་ཕིང་སོགས་ཏང་དང་རྒྱལ་ཁབ་ཀྱི་འགོ་ཁྲིད་རྗེས་དྲན་རྡོ་རིང་གི་མདུན་དུ་ཕེབས་ནས་མེ་ཏོག་གི་ཕྲེང་བའི་མདུན་དུ་ལངས་ཏེ་མདུན་ཕྱོགས་ལ་གཟིགས། དམར་མདངས་བཀྲ་བའི་མེ་ཏོག་དང་། ལུག་མཉེ་མེ་ཏོག་དང་དྲི་ཞིམ་འཐུལ་བའི་མེ་ཏོག་ཝུན་ཞིན་ལན་བཅས་ཀྱིས། མི་དམངས་ཀྱི་དཔའ་བོར་སེམས་གཏིང་ནས་རྗེས་དྲན་ཞུ་བ་དང་བླ་ན་མེད་པའི་གུས་འདུད་མཚོན། ཞི་ཅིན་ཕིང་མདུན་དུ་ཕེབས་ཏེ། མེ་ཏོག་ཕྲེང་བ་དང་དར་སྐུད་ལེགས་སྒྲིག་བྱས་ཤིང་། དེའི་རྗེས་ཞི་ཅིན་ཕིང་སོགས་ཏང་དང་རྒྱལ་ཁབ་ཀྱི་འགོ་ཁྲིད་དལ་གྱིས་བསྐོར་བ་བརྒྱབ་ནས་མི་དམངས་དཔའ་བོའི་རྗེས་དྲན་རྡོ་རིང་ལ་མཇལ། 
        ད་ལོ་ནི་ཀྲུང་གོ་མི་དམངས་ཀྱིས་འཇར་འགོག་དམག་འཁྲུག་དང་འཛམ་གླིང་གི་ཧྥ་ཞི་སིར་ངོ་རྒོལ་བྱེད་པའི་དམག་འཁྲུག་ལ་རྒྱལ་ཁ་བླངས་ནས་ལོ80འཁོར་བའི་ལོ་ཡིན། ལོ་ངོ80སྔོན་ལ། ཀྲུང་གོའི་མི་དམངས་ཀྱིས་དཀའ་སྤྱད་ཚད་མེད་ཀྱིས་ཁྲག་བཏོན་དམར་འཛིང་བྱས་ཏེ། ཐེངས་དང་པོར་ཉེ་རབས་ནས་བཟུང་ཕྱི་དགྲའི་བཙན་འཛུལ་ལ་འགོག་རྒོལ་བྱེད་པའི་རྒྱལ་ཁ་བླངས་ནས། ཀྲུང་ཧྭ་མི་རིགས་ཀྱི་རླབས་ཆེན་བསྐྱར་དར་གྱི་འོད་སྟོང་འབར་བའི་མདུན་ལྗོངས་བཏོད་པ་རེད། དེ་རིང་བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གི་འགོ་ཁྲིད་བརྟན་པོའི་འོག ཏང་ཡོངས་དང་དམག་ཡོངས། རྒྱལ་ཡོངས་ཀྱི་རིགས་སོ་སོའི་མི་དམངས་ཀྱིས་རླབས་ཆེ་བའི་འཇར་འགོག་དམག་འཁྲུག་གི་སྙིང་སྟོབས་རྒྱུན་འཛིན་དང་དར་སྤེལ་བཏང་བ་དང་། དཔའ་ངར་ཆེན་པོས་མདུན་དུ་བསྐྱོད་དེ། ཀྲུང་གོའི་ལུགས་ཀྱི་དེང་རབས་ཅན་གྱིས་རྒྱལ་ཁབ་སྟོབས་ལྡན་འཛུགས་སྐྲུན་དང་མི་རིགས་བསྐྱར་དར་གྱི་རླབས་ཆེན་བྱ་གཞག་ལ་ཕྱོགས་ཡོངས་ནས་སྐུལ་འདེད་གཏོང་བར་མཐུན་སྒྲིལ་འབད་འཐབ་བྱས། ལོ་ཆུང་བྱིས་པ་དང་ལས་རིགས་སོ་སོའི་འཐུས་མིས་ཀྱང་རིམ་པ་བཞིན་རྗེས་དྲན་རྡོ་རིང་གི་མདུན་དུ་བསྐྱོད་དེ་མེ་ཏོག་ཕྲེང་བ་ཕུལ་བ་མ་ཟད་རྗེས་དྲན་རྡོ་རིང་ལ་མཇལ། 

མེ་ཏོག་གི་ཕྲེང་བ་འབུལ་བའི་མཛད་སྒོ་ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་ཨུ་ཡོན། པེ་ཅིང་གྲོང་ཁྱེར་གྱི་ཏང་ཨུའི་ཧྲུའུ་ཅི་དབྱི་ལི་ཡིས་འགོ་འཛིན་བྱས། པེ་ཅིང་དུ་ཡོད་པའི་ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་ཨུ་ཡོན་དང་། ཀྲུང་དབྱང་ཧྲུའུ་ཅི་ཁྲུའུ་ཡི་ཧྲུའུ་ཅི། རྒྱལ་ཡོངས་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་གཞོན་པ་ཁ་ཤས་དང་། རྒྱལ་སྲིད་ཨུ་ཡོན། ཆེས་མཐོའི་མི་དམངས་ཁྲིམས་ཁང་གི་འགོ་གཙོ། ཆེས་མཐོའི་མི་དམངས་ཞིབ་དཔྱོད་ཁང་གི་འགོ་གཙོ། རྒྱལ་ཡོངས་སྲིད་གྲོས་ཀྱི་ཀྲུའུ་ཞི་གཞོན་པ་དང་ཀྲུང་དབྱང་དམག་དོན་ཨུ་ཡོན་ལྷན་ཁང་གི་ཨུ་ཡོན་ཁ་ཤས་མཛད་སྒོར་ཞུགས། ཀྲུང་དབྱང་ཏང་སྲིད་དམག་དམངས་བཅས་ཀྱི་འབྲེལ་ཡོད་སྡེ་ཁག་དང་པེ་ཅིང་གྲོང་ཁྱེར་གྱི་འགན་ཁུར་བློ་མཐུན་གཙོ་བོ། དམངས་གཙོའི་ཏང་ཁག་སོ་སོའི་ཀྲུང་དབྱང་དང་། རྒྱལ་ཡོངས་བཟོ་ཚོང་མཉམ་འབྲེལ་ལྷན་ཚོགས་ཀྱི་འགན་ཁུར་བ། ཏང་ཁག་གང་ལའང་མི་གཏོགས་པའི་མི་སྣའི་འཐུས་མི། པེ་ཅིང་དུ་ཡོད་པའི་འཐབ་མོ་བ་རྒན་པ་དང་། བློ་མཐུན་རྒན་པ། སྔོན་གཤེགས་དཔའ་བོའི་ཁྱིམ་མི་བཅས་ཀྱི་འཐུས་མི། པེ་ཅིང་དུ་ཡོད་པའི་བྱས་རྗེས་མཚན་སྙན་གཟེངས་བསྟོད་བྱ་དགའ་ཐོབ་མཁན་གྱི་འཐུས་མི་དང་། རྒྱལ་སའི་ལས་རིགས་སོ་སོའི་མང་ཚོགས་ཀྱི་འཐུས་མི་སོགས་མཛད་སྒོར་ཞུགས།