མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
མཚོ་སྔོན་གསར་འགྱུར་གསར་འགྱུར་བའི་འཕྲིན། ཟླ9པའི་ཚེས16ཉིན་གསར་འགོད་པས་མཚོ་སྔོན་ཞིང་ཆེན་བསྡོམས་རྩིས་ཅུའུ་ནས་རྒྱུས་ལོན་པ་ལྟར་ན། མཚོ་སྔོན་ཞིང་ཆེན་གྱི2025ལོའི་རྒྱལ་ཡོངས་མི་འབོར་ལས1%གི་དཔེ་འཐེན་བརྟག་དཔྱད་དེ་ཟླ་11པའི་ཚེས1ཉིན་གྱི་དགོང་མོའི་ཆུ་ཚོད12སྟེང་ནས་དངོས་སུ་འགོ་བརྩམ་རྒྱུ་རེད། ཐེངས་འདིའི་བརྟག་དཔྱད་དུས་ཚོད་ནི་ཟླ11པའི་ཚེས1ཉིན་ནས་ཟླ11པའི་ཚེས15ཉིན་བར་ཡིན་པ་དང་བརྟག་དཔྱད་པས་དཔེ་འཐེན་ཁྲོད་ཀྱི་ཁྱིམ་ཚང་ནས་མགོ་བརྩམས་ཏེ་ཐོ་འགོད་བྱ་རྒྱུ་རེད།
རྒྱལ་ཡོངས་ཀྱི་མི་འབོར1%གི་དཔེ་འཐེན་བརྟག་དཔྱད་ནི་ བརྟག་དཔྱད་ཀྱི་མ་དཔེ་གྲངས་འབོར་དེ་རྒྱལ་ཡོངས་ཀྱི་སྤྱིའི་མི་འབོར་གྱི1%ཙམ་ཟིན་པས་ན། རྒྱུན་དུ“མི་འབོར་ཡོངས་ཁྱབ་ཞིབ་བཤེར་ཆུང་བ་”ཞེས་ཟེར། བརྟག་དཔྱད་དེ་ནི་སྤྱིར་བཏང་མི་འབོར་ཡོངས་ཁྱབ་ཞིབ་བཤེར་ཐེངས་གཉིས་བྱེད་པའི་བར་གྱི་ལོ་སྟེ། སྤྱིར་བཏང་ལོ་ལྔ་པར་སྤེལ་གྱི་ཡོད། 1987ལོ་ནས་བཟུང་རང་རྒྱལ་གྱིས་རྒྱལ་ཡོངས་ཀྱི་མི་འབོར་ལས1%ཡི་དཔེ་འཐེན་བརྟག་དཔྱད་དེ་ཐེངས4ལེགས་འགྲུབ་སྤེལ་མྱོང་བ་སྟེ། 1987ལོ་དང་། 1995ལོ། 2005ལོ། 2015ལོ་བཅས་ཡིན་པ་དང་། ད་ལོ་ནི་བརྟག་དཔྱད་ཐེངས་ལྔ་པ་རེད། ཐེངས་འདིའི་བརྟག་དཔྱད་ནི་རང་རྒྱལ་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་ཁྱོན་ཡོངས་ནས་འཛུགས་སྐྲུན་བྱེད་པའི་འགྲུལ་བཞུད་གསར་པར་བསླེབས་པ་དང་། མི་འབོར་འཕེལ་རྒྱས་དེ་དུས་རིམ་གསར་པའི་ནང་བསླེབས་རྗེས་སུ་་རྒྱལ་ཁབ་ཀྱི་གནས་ཚུལ་དང་རྒྱལ་ཁབ་ཀྱི་སྟོབས་ཤུགས་ལ་བརྟག་དཔྱད་བྱེད་པའི་ལས་གལ་ཆེན་ཞིག་ཡིན་པས། མི་འབོར་འཕེལ་རྒྱས་ལ་རྒྱབ་སྐྱོར་དང་ཞབས་ཞུའི་མ་ལག་འཐུས་ཚང་དང་། དུས་རབས་གསར་པའི་མི་འབོར་འཕེལ་རྒྱས་འཐབ་ཇུས་འཐུས་ཚང་། མི་འབོར་རྒན་རྒོན་ཅན་ལ་ཁ་གཏད་ཧུར་ཐག་བྱེད་པ། སྤུས་ཚད་མཐོ་བའི་མི་འབོར་འཕེལ་རྒྱས་ལ་སྐུལ་འདེད་བཅས་ལ་དོན་སྙིང་གལ་ཆེན་ལྡན།
ཡོངས་ཁྱབ་ཞིབ་བཤེར་ལས་དོན་བདེ་བླག་ངང་སྤེལ་ཆེད། ཞིང་ཆེན་བསྡོམས་རྩིས་ཅུའུ་ཡིས་འབྲེལ་ཡོད་ལས་ཁུངས་དང་མཉམ་དུ་མཚོ་སྔོན་ཞིང་ཆེན་གྱི2025ལོའི་རྒྱལ་ཡོངས་མི་འབོར་གྱི1%ཡི་དཔེ་འཐེན་བརྟག་དཔྱད་ལས་དོན་མཐུན་སྦྱོར་ཚོ་ཆུང་བཙུགས་ནས་མཉམ་དུ་ལས་དོན་ཁག་ལ་སྐུལ་འདེད་བཏང་། ཞིང་ཆེན་ཡོངས་ཀྱི་བརྟག་དཔྱད་ལས་ཁུངས་རིམ་པ་ཁག་གིས་སྒྲིག་འཛུགས་དྲིལ་སྒྲོག་ནས་ཁྱིམ་ཚང་དུ་སོང་ནས་ཐོ་འགོད་བྱེད་པའི་བར་གྱི་བརྒྱུད་རིམ་ཧྲིལ་པོའི་འགག་སྒོ་དམ་འཛིན་བྱས་ཏེ། བརྟག་དཔྱད་མཛུབ་ཁྲིད་པ་དང་བརྟག་དཔྱད་པར་བསྡོམས་རྩིས་བཅའ་ཁྲིམས་དང་ཁྲིམས་སྲོལ་དང་། བསྡོམས་རྩིས་ལས་རིགས་ཀུན་སྤྱོད། གསང་རྒྱ་དམ་སྲུང་གི་གཏན་འབེབས་བཅས་ཀྱི་སློབ་གསོ་གསོ་སྦྱོང་ལ་ཤུགས་བསྣན་པ་དང་། “ཁོངས་མི་གཉིས”ཀྱིས《2025ལོའི་རྒྱལ་ཡོངས་མི་འབོར་གྱི1%ཡི་དཔེ་འཐེན་བརྟག་དཔྱད་ཇུས་གཞི》དང་། འབྲེལ་ཡོད་བྱ་བའི་ཞིབ་སྲོལ། བརྟག་དཔྱད་ཀྱི་བྱ་བའི་རྩལ་ནུས་ཁག་བཅས་ཁོང་དུ་ཆུད་པར་འགན་སྲུང་བྱས། གཞི་གྲངས་འཚོལ་བསྡུ་ཐག་གཅོད་བྱེད་པའི་བརྒྱུད་རིམ་ནང་ཞིང་ཆེན་ཡོངས་ཀྱིས་འཐུས་སྒོ་ཚང་བའི་བདེ་འཇགས་དོ་དམ་ལམ་སྲོལ་དང་། བདེ་འཇགས་འགོག་སྲུང་མ་ལག བདེ་འཇགས་རྩིས་བཤེར་ལམ་སྲོལ་བཅས་བཙུགས་ནས་བདེ་འཇགས་ལག་རྩལ་དང་བྱེད་ཐབས་སྣ་ཚོགས་སྤྱད་དེ་གཞི་གྲངས་ཀྱི་བདེ་འཇགས་རང་བཞིན་ལ་འགན་སྲུང་བྱེད་ཀྱི་ཡོད། རིམ་པ་ཁག་གི་བརྟག་དཔྱད་ལས་ཁུངས་དང་དེའི་ལས་དོན་པས《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་བསྡོམས་རྩིས་བཅའ་ཁྲིམས》ཀྱི་འབྲེལ་ཡོད་གཏན་འབེབས་གཞིར་བཟུང་སྟེ། ཁྲིམས་ལྟར་ཚན་རིག་དང་མཐུན་པའི་བརྟག་དཔྱད་བྱས་ནས་བརྒྱུད་རིམ་ཧྲིལ་པོར་སྤྱི་དམངས་མི་སྒེར་གྱི་ཆ་འཕྲིན་སྲུང་སྐྱོང་ལ་ཤུགས་བསྣན།
མིག་སྔར་ཞིང་ཆེན་ཡོངས་ཀྱི་མི་འབོར་ལས1%ཡི་དཔེ་འཐེན་བརྟག་དཔྱད་ལས་འཛུགས་སྐྲུན་དངོས་པོའི་རྟགས་རིས་དང་གཞིས་ཁུལ་དབྱེ་ཚུལ་གྱི་བརྟག་དཔྱད་ཀྱི་དུས་རིམ་དང་པོའི་ལས་དོན་བདེ་བླག་ངང་ལེགས་འགྲུབ་བྱུང་བ་དང་། བརྟག་དཔྱད་ཁྱོན་ཡོངས་ནས་གཞི་རིམ་གྲོང་ཚོ(སྡོད་ཁང་)ཨུ་ལྷན་དུ་སྤེལ་ནས་འགག་རྩའི་ཁྱིམ་ཚང་ཐོ་འགོད་ཀྱི་དུས་མཚམས་སུ་བསླེབས། བརྟག་དཔྱད་པས་རྫོང་རིམ་པའི་བསྡོམས་རྩིས་ལས་ཁུངས་ཀྱིས་གཅིག་གྱུར་ཐོག་སྤྲད་པའི་ལག་ཁྱེར་འཁྱེར་ནས་སྡོད་ཁང་ཞིབ་དཔྱད་དང་ཁྱིམ་ཚང་རེ་རེར་འཛུལ་ནས་་བརྟག་དཔྱད་ཐོ་འགོད་ཀྱི་ལས་དོན་ཡག་པོ་སྒྲུབ་བཞིན་ཡོད།
