མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
མཚོ་སྔོན་གསར་འགྱུར་དྲ་བའི་འཕྲིན། ཟླ8ཚེས25ཉིན། གསར་འགོད་པས་དུས་ཡུན་རིང་བོར་མཚོ་སྔོན་རྨ་འབྲི་རྫ་གསུམ་འབྱུང་ཡུལ་གྱི་ཁོངས་སུ་སྐྱེ་ཁམས་སྲུང་སྐྱོབ་ལ་ཞིབ་འཇུག་བྱེད་བཞིན་པའི་པེ་ཅིང་རི་ཆུ་རང་བྱུང་སྲུང་སྐྱོབ་ལྟེ་གནས་ཀྱི་ལས་བྱེད་ཁྲུའུ་ནས་རྒྱུས་ལོན་པ་ལྟར་ན། ཚན་ཞིབ་པས་མཚོ་སྔོན་ཞིང་ཆེན་ཡུལ་ཤུལ་བོད་རིགས་རང་སྐྱོང་ཁུལ་གྱི་ཁོངས་སུ་གསའ་ལྟ་ཞིབ་ཚད་ལེན་དང་ཞིབ་འཇུག་གི་ལས་ཀ་སྤེལ། ད་སྔའི་བར་དུ། རྫ་ཆུ་འབབ་ཁོངས་སུ་ཆགས་པའི་ནང་ཆེན་རྫོང་དུ་གཟིག26དང་། རྫ་སྟོད་རྫོང་རྣམ་སྲས་གྲོག་རོང་དུ་སྔ་རྗེས་སུ་གཟིག17བཅས་ལྟ་ཞིབ་བརྙན་མིག་ལས་མཐོང་། དུས་མགོའི་དུས་སུ་རྒྱལ་ཡོངས་ཀྱི་ས་གནས་ཁག་ནས་ཡོང་བའི་རང་བྱུང་ལྟ་ཞིབ་པ60ལྷག“ལམ་ཧྲིལ་བོ་སྤང་གི་རི། སྐྱེ་མཚར་བའི་ནགས་ཀྱི་ཀློང་”ཞེས་པའི་ལས་གཞིར་ཞུགས་ཏེ། མཚོ་འཕགས་སྨི4000ལྷག་གི་ནང་ཆེན་རྫོང་གི་སྤྲེལ་ཚྭ་ནགས་རར་ས་མཐོའི་གྲང་ལྷགས་ཆེ་སའི་ནགས་ཚལ་དང་སྐྱེ་དངོས་སྣ་མང་རང་བཞིན་སྲུང་སྐྱོབ་ཀྱི་གསང་བ་འཚོལ་ཞིབ་བྱས།
ནམ་མཁའ་སྔོ་ཞིང་དྭངས་ཤིང་། སྤང་ལྗོངས་སྔོན་མོས་རི་ངོས་ཡོངས་སུ་བརྒྱན་པ་དང་། གཙང་ཆབ་སྔོན་མོ་རི་ཚོགས་ཀྱི་བར་བར་ན་འཁྱིལ་ཞིང་འབབ། རྫ་ཆུ་འབབ་ཁོངས་ན་གསོམ་ཤིང་དང་། ཤུག་སྡོང་ལ་སོགས་པའི་ཤིང་སྣ་རིགས་ཡོད་ལ་ནགས་ཚལ་ཧ་ཅང་སྟུག
ནགས་ཚལ་དེར་བྱི་ལ་རིགས་ཚན་གྱི་སྲོག་ཆགས་ཆེ་ཤོས་གཉིས་ཏེ་གཟིག་དང་གསའ་གཉིས་ཀྱི་ས་ཁོངས་ཡོད། ང་ཚོ་རྫ་ཆུ་གྲོང་རོང་ཆེན་མོ་རུ་མདུན་ནས་མདུན་དུ་བསྐྱོད་སྐབས་སྣེ་ཁྲིད་པ་རིན་ཆེན་གྱིས་རང་བྱུང་ལྟ་ཞིབ་པར་དེ་ལྟར་ངོ་སྤྲོད་བྱས། རིན་ཆེན་གྱིས་འདི་སྐད། རྫ་ཆུའི་འགོ་ཁུངས་ས་ཁུལ་ནི་སྤྲེལ་ཚྭ་ནགས་རས་མཚོན་པའི་ནགས་ཀློང་ཞིག་སྟེ། གསོམ་སྡོང་དང་ཤུག་རིལ་ལ་སོགས་མང་ས་ཞིག་ཡིན་ལ། བྱ་གོང་མོ་དང་། གོ་བོ། གཉན། གླ་བ། ཤ་སྐྱ་སོགས་རི་དྭགས་རྩ་ཆེན་མང་པོ་གནས་ཡོད་ཟེར།
མཐོ་སྒང་གི་སྐྱེ་ཁམས་མ་ལག་ཁྲོད་དུ། གཟིག་དང་གསའ་ནི་གཅན་གཟན་ཆེ་ཤོས་གཉིས་ཡིན་པས། གཉན་ལ་སོགས་པའི་རི་དྭགས་ཀྱི་གྲངས་ཀ་ཚོད་འཛིན་བྱེད་ཀྱི་ཡོད་ལ། མཐོ་སྒང་འདིའི་ཤ་གཟན་གཞན་དག་གནས་ས་ལ་ཡང་ཤུགས་རྐྱེན་བཟོ་བཞིན་ཡོད། དེ་དག་གི་རི་དྭགས་རྔོན་སྟངས་ཀྱིས་སྐྱེ་ཁམས་མ་ལག་གི་སྣ་མང་རང་བཞིན་ལ་འགན་ལེན་བྱས་ཡོད་པ་ཟད། རིགས་མི་འདྲ་བའི་རི་དྭགས་དབར་གྱི་འགྲན་རྩོད་དང་མཉམ་གནས་ལ་སྐུལ་འདེད་གཏང་བཞིན་ཡོད་པས། ཡུལ་དེའི་སྐྱེ་ཁམས་མ་ལག་ལ་སྲུང་སྐྱོབ་བྱེད་བཞིན་ཡོད།
རིན་ཆེན་གྱིས་འདི་སྐད། པེ་ཅིང་རི་ཆུ་རང་བྱུང་སྲུང་སྐྱོབ་ལྟེ་གནས་ཀྱི་ལས་བྱེད་པས་ལོ་དུ་མའི་རིང་ལ་ལྟ་ཞིབ་ཚད་འཇལ་བྱས་པ་ན། རྫ་ཆུ་འགོ་ཁུངས་ཀྱི་ནགས་ཚལ་ཁྲོད་ན་གཟིག་དང་གསའ། གཡུ་སོགས་བྱི་ལ་རིགས་ཚན་གྱི་སྲོག་ཆགས་གནས་འདུག་པས། རྒྱལ་ནང་གི་རི་ཐང་རང་བྱུང་ལ་ལྟ་ཞིབ་བྱེད་སའི་གནས་མཆོག་ཏུ་གྱུར་བ་ཞིག་རེད་ཟེར།
ངོ་སྤྲོད་ལྟར་ན། 2025ལོ་ནས་བཟུང་། ཀྲུང་གོའི་ལྟང་སྒྱུར་ཐེབས་རྩ་དང་རྨ་འབྲི་རྫ་གསུམ་རྒྱལ་ཁབ་སྤྱི་གླིང་དོ་དམ་ཅུས་ཀྱི་སློབ་སྟོན་འོག ཀོང་ཆི་ཧྥེང་ཐིན(广汽丰田)ལ་ཡོད་པའི་ནགས་ཚལ་སྐྱེ་ཁམས་མ་ལག་ཆ་ཚང་སྟེ་རྨ་འབྲི་རྫ་གསུམ་འབྱུང་ཡུལ(རྒྱལ་ཁབ་རིམ་པ)རང་བྱུང་སྲུང་སྐྱོབ་ཁུལ་སྤྲེལ་ཚྭ་སྲུང་སྐྱོབ་ཡན་ལག་ཁུལ་དང་སྟོན་འབྲོང་སྲུང་སྐྱོབ་ཡན་ལག་ཁུལ་དུ“ལམ་ཧྲིལ་བོ་སྤང་གི་རི། སྐྱེ་མཚར་བའི་ནགས་ཀྱི་ཀློང་”ཞེས་པའི་ལས་གཞི་སྤེལ་ཏེ། རྨུག་ཅན་རིགས་ཀྱི་སྲོག་ཆགས་དང་གཟིག་ལ་ཞིབ་འཇུག་སྲུང་སྐྱོབ། མ་ལག་རང་བཞིན་གྱི་དམར་ཕྱིའི་པར་ཆས་ཀྱི་ལྟ་ཞིབ་ཚད་ལེན་སོགས་བྱས་པས། ས་ཁོངས་ཀྱི་སྐྱེ་ཁམས་མ་ལག་གི་གཏན་འཇགས་རང་བཞིན་དང་རྒྱུད་མཐུད་རང་བཞིན་མཐོར་འདེགས་དང་སྤྱི་དམངས་ཀྱི་སྐྱེ་ཁམས་སྲུང་སྐྱོབ་ཀྱི་འདུ་ཤེས་ཇེ་དྲག་ཏུ་བཏང་།
དུས་ཡུན་ཉིན3གྱི་རིང་གི་རང་བྱུང་ལྟ་ཞིབ་བྱེད་སྒོའི་ཁྲོད། ལས་ཞུགས་པ60ལྷག་སྤྲེལ་ཚྭ་ནགས་ར་དང་སྟོན་འབྲོང་ནགས་རའི་གྲོག་རོང་གི་ཕུགས་སུ་སྐྱོད་དེ། གཟིག་གི་ཁ་ཟས་གཉན་དང་ཤ་སྐྱ། གླ་བ་སོགས་རི་དྭགས་མཐོང་བ་མ་ཟད། དམར་ཕྱིའི་པར་ཆས་བཙུགས་ཏེ་གཟིག་དང་གསའ་ཡི་འགྲོ་སྡོད་ལ་ལྟ་ཞིབ་ཚད་ལེན་བྱས།
པེ་ཅིང་རི་ཆུ་རང་བྱུང་སྲུང་སྐྱོབ་ལྟེ་གནས་ལས་གཞིའི་འགན་འཁུར་བ་ཁྲེན་ཞིར་ཡིས་འདི་སྐད། རྨ་འབྲི་རྫ་གསུམ་འབྱུང་ཡུལ་ས་ཁུལ་དུ་དཔེ་མཚོན་ཅན་གྱི་མཐོ་སྒང་གི་ནགས་ཚལ་སྐྱེ་ཁམས་མ་ལག་ཆ་ཚང་ཤིག་ཡོད་ཅིང་། གཟིག་དང་གསའ། ཤ་སྐྱ་སོགས་རི་དྭགས་རྩ་ཆེན་མང་པོ་ཞིག་གི་འཚོ་གནས་གལ་ཆེན་ཡིན། ཉེ་བའི་ལོ་རིང་ལ། མཚོ་སྔོན་ཞིང་ཆེན་ནགས་ལས་དང་རྩྭ་ཐང་ཅུས་སོགས་ལས་ཁུངས་ཀྱི་སློབ་སྟོན་འོག ཚན་ཞིབ་པས་རྨ་འབྲི་རྫ་གསུམ་འབྱུང་ཁུལ་དུ་གསའ་ལ་ལྟ་ཞིབ་ཚད་ལེན་བྱེད་དུས། རྫ་སྟོད་རྫོང་དང་ནང་ཆེན་རྫོང་དའང་དུ་གཟིག་ལ་ཆེད་དོན་ཞིབ་འཇུག་བྱས། ད་སྔ་ལྟ་ཞིབ་ཚད་ལེན་གྱི་གཞི་གྲངས་ལྟར་ན། ནང་ཆེན་རྫོང་ཁོངས་སུ་སྔ་གཞུག་ཏུ་གཟིག26ལྟ་ཞིབ་ཚད་ལེན་ཐུབ་ཡོད། དེ་ལས་རྫ་སྟོད་རྫོང་རྣམ་སྲས་གྲོག་རོང་གི་ཁོངས་སུ་སྔ་གཞུག་ཏུ་གཟིག17ལྟ་ཞིབ་ཚད་ལེན་ཐུབ་པ་དང་། གྲུབ་འབྲས་དེ་དག་གིས་རྨ་འབྲི་རྫ་གསུམ་འབྱུང་ཁུལ་སྤྱི་དང་ནང་སྒོས་རྫ་ཆུ་འབབ་ཁུལ་དུ་གདོད་མའི་ནགས་ཚལ་གྱི་སྐྱེ་ཁམས་མ་ལག་གི་རྒྱུན་བསྐྱངས་ཡོད་པར་མ་ཟད། མཐོ་སྒང་གི་མཚོན་བྱེད་སྲོག་ཆགས་གཟིག་འཚོ་གནས་བྱེད་ས་ཡིན་པས། སྲོག་ཆགས་དེ་རིགས་ནི་བྱི་ལའི་རིགས་ཀྱི་སྲོག་ཆགས་ཆེ་རིགས་སྲུང་སྐྱོབ་ལ་སྐྱེ་ཁམས་ཀྱི་ཕྱོགས་ནས་དོན་སྙིང་གལ་ཆེན་ལྡན་པ་མཚོན་ནོ། །
