མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
མཚོ་སྔོན་གསར་འགྱུར་དྲ་བའི་འཕྲིན། ཟླ8པའི་ཚེས28ཉིན། རང་ཞིང་གི2024ལོའི“ནུབ་རྒྱུད་ཀྱི་འོད་སྣང”ཞེས་པའི་ཤེས་ཡོན་པ་སློབ་གཉེར་ཞིབ་འཇུག་ལས་དོན་ལ་སྤྱི་བསྡོམས་དང2025ལོའི“ནུབ་རྒྱུད་ཀྱི་འོད་སྣང”ཞེས་པའི་སློབ་གཉེར་ཞིབ་འཇུག་སྔོན་གྱི་སློབ་གསོ་གསོ་སྦྱོང་ཚོགས་འདུ་མཚོ་སྔོན་ཞིང་ཆེན་ཟི་ལིང་གྲོང་ཁྱེར་དུ་འཚོགས་པ་དང་། ཚོགས་ཐོག་ནས2024ལོར་སློབ་སྦྱོང་ཞིབ་འཇུག་བྱས་པའི་ལས་དོན་གྱི་ཕན་འབྲས་ལ་སྤྱི་བསྡོམས་བྱས་པར་མ་ཟད། 2025ལོའི་ཤེས་ཡོན་པ་སློབ་གཉེར་ཞིབ་འཇུག་པ་རྣམས་ལ་ལམ་ལ་མ་ཆས་སྔོན་གྱི་གསོ་སྦྱོང་སྤེལ་བ་རེད།
“ནུབ་རྒྱུད་ཀྱི་འོད་སྣང”ཞེས་པའི་ཤེས་ལྡན་པ་སློབ་གཉེར་ཞིབ་འཇུག་གསོ་སྐྱོང་ལས་དོན་ནི་ཀྲུང་དབྱང་རྩ་འཛུགས་པུའུ་དང་སློབ་གསོ་པུའུ། ཚན་རྩལ་པུའུ། ཀྲུང་གོ་ཚན་རིག་གླིང་བཅས་ཀྱིས་རྩ་འཛུགས་ལག་བསྟར་བྱེད་པའི་འཇོན་མི་གལ་ཆེན་གསོ་སྐྱོང་གི་ལས་གཞི་ཞིག་ཡིན། ལོ་རེར་ནུབ་རྒྱུད་ས་ཁུལ་ནས་ཚན་རིག་ཞིབ་འཇུག་གི་རྐང་འཛིན་ན་གཞོན་ཁག་ཅིག་བདམས་ཏེ། ཀྲུང་དབྱང་རྒྱལ་ཁབ་ལས་ཁུངས་ཁོངས་གཏོགས་ཀྱི་མཐོ་རིམ་སློབ་ཆེན་དང་ཚན་རིག་ཞིབ་འཇུག་ཁང་དུ་མངགས་ནས། ལོ་གཅིག་རིང་ལ་སློབ་སྦྱོང་དང་ཞིབ་འཇུག་བྱེད་བཞིན་ཡོད། 2003ལོར་ལས་གཞི་འདི་དངོས་སུ་མགོ་བརྩམས་པ་ནས་བཟུང་། རང་ཞིང་གིས་ཁྱོན་བསྡོམས་སྐོར་ཁག21གི་སློབ་གཉེར་དང་ཞིབ་འཇུག་ཤེས་ལྡན་པ500ཕྱི་ཕྱོགས་སུ་ཟབ་སྦྱོང་ལ་མངགས་ཏེ། “དམིགས་འབེན་ཡོད་པའི་གསོ་སྐྱོང“དང“ལག་ལེན་དངོས་ཀྱི་ཁྲོད་འཇུག་པའི“ཟུང་འབྲེལ་བྱེད་ཐབས་བརྒྱུད་དེ། འཇོན་མིའི་འཚར་ལོངས་དང་ས་གནས་འཕེལ་རྒྱས་མཉམ་འདྲེས་གཏིང་ཟབ་ཡོང་བར་སྐུལ་འདེད་བཏང་ནས། འཇོན་མིའི་ནུས་པར་བརྟེན་ནས་མཐོ་སྒང་གི་གསར་གཏོད་ལམ་བུ་གསལ་བར་བྱས།
ཤེས་གསལ་ལྟར་ན། སློབ་གཉེར་དང་ཞིབ་འཇུག་གི་ལས་འགན་མཇུག་སྒྲིལ་མ་ཐག་པའི་སྐོར21པའི་ཤེས་ཡོན་པ27ཡིས་སློབ་སྦྱོང་ཞིབ་འཇུག་བྱེད་པའི་ཁྲོད་ཚན་རིག་ཞིབ་འཇུག་གི་རྣམ་གྲངས་ཁག57དང་། གཙོ་སྒྲིག་ཆེད་རྩོམ་ཁག3ནང་ཞུགས་པ་དང་། SCIདངEIསོགས་དཔྱད་རྩོམ་ཁག19སྤེལ། ཆེད་ཁེ་གསར་གཏོད་དང་གོ་ཆོད་དཔེ་གསར་གྱི་ཆེད་ཁེ་ཁག8རེ་ཞུ་བྱས་པ་དང་། ལས་རིགས་ཀྱི་ཚད་གཞི་ཁག5བཟོ་བའི་ནང་ཞུགས། མངགས་གཏོང་ལས་ཁུངས་དང་ཞིབ་འཇུག་སྦྱོང་བརྡར་ལས་ཁུངས་གཉིས་ཀྱིས་ཚན་རིག་ཞིབ་འཇུག་རྣམ་གྲངས་ཁག16མཉམ་ལས་བྱ་བར་སྐུལ་འདེད་བཏང་སྟེ་གྲུབ་འབྲས་ཕུན་སུམ་ཚོགས་པ་བླངས། ཐེངས་འདིར་གསར་དུ་བདམས་པའི་ཤེས་ཡོན་པ27གྱིས་མགྲིན་གཅིག་ཏུ་འདི་སྐད། ང་ཚོས་གོ་སྐབས་རྩ་ཆེན་པོ་འདི་ལ་གཅེས་སྤྲས་དང་། སྒྲིག་ཁྲིམས་ནན་སྲུང་། བློ་སེམས་རྩེ་གཅིག་ཏུ་སློབ་སྦྱོང་། ལག་ལེན་ལ་འབད་འབུངས་བཅས་ཟམ་པ་དང་འབྲེལ་ཐག་གི་ནུས་པ་འདོན་སྤེལ་གང་ལེགས་བྱས་ཏེ། “གནད་དོན་གྱི་གསལ་ཐོ”ཐོགས་ཤིང་“ཐག་གཅོད་ཇུས་གཞི”བསྣམས་ནས་ཕྱིར་ལོག་རྒྱུ་ཡིན་ཞིང་། དེང་རབས་ཅན་གྱི་མཚོ་སྔོན་གསར་པ་འཛུགས་སྐྲུན་བྱེད་པར་སྟོབས་ཤུགས་སྔར་ལས་ཆེ་བ་ལེགས་སྐྱེས་སུ་འབུལ་རྒྱུ་ཡིན་ཟེར།
