རླབས་ཆེན་འཇར་འགོག་དམག་འཁྲུག་གི་སྙིང་སྟོབས་དར་སྤེལ་བཏང་ནས་མི་རིགས་བསྐྱར་དར་གྱི་སྟོབས་ཤུགས་གཅིག་ཏུ་བསྒྲིལ།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“རླབས་ཆེན་གྱི་འཇར་འགོག་དམག་འཁྲུག་གི་སྙིང་སྟོབས་ནི་ཀྲུང་གོའི་མི་དམངས་ཀྱི་བསམ་པའི་རྒྱུ་ནོར་རྩ་ཆེན་ཡིན་སྟབས། ཀྲུང་གོའི་མི་དམངས་ཀྱིས་དཀའ་ངལ་དང་ཉེན་ཁ་མཐའ་དག་ཁྱད་གསོད་དང་། ཀྲུང་ཧྭ་མི་རིགས་ཀྱི་རླབས་ཆེན་བསྐྱར་དར་མངོན་འགྱུར་ལ་འབད་འཐབ་བྱེད་པར་མཐའ་གཅིག་ཏུ་སྐུལ་མ་གཏོང་ངེས་ཡིན”ཞེས་བསྟན། 　རྒྱལ་ཁབ་སྟོབས་ལྡན་འཛུགས་སྐྲུན་དང་མི་རིགས་བསྐྱར་དར་གྱི་འཐབ་ལམ་གསར་པའི་སྟེང་། ཀྲུང་ཧྭའི་བུ་བུ་མོ་ཐེར་འབུམ་གཅིག་དང་དུང་ཕྱུར་བཞི་ལྷག་གིས་ལོ་རྒྱུས་བློ་ལ་བརྟན་པོར་བཅངས་ནས་སྔོན་གཤེགས་དཔའ་བོར་དྲན་གསོ་ཞུས་ཤིང་། 　 རླབས་ཆེན་འཇར་འགོག་དམག་འཁྲུག་གི་སྙིང་སྟོབས་དར་སྤེལ་བཏང་སྟེ། བྲག་རྡོ་བཞིན་བརྟན་པའི་ཆོད་སེམས་དང་། དུས་ཚོད་སྐར་ཆ་རེ་ཡང་བརྩོན་ལེན་བྱེད་པའི་ངར་ཤུགས། བློ་བརྟན་འགྱུར་མེད་ཀྱི་སྙིང་རུས་བཅས་ལ་བརྟེན་ནས། ཀྲུང་ཧྭ་མི་རིགས་རླབས་ཆེན་བསྐྱར་དར་གྱི་ཕྱོགས་སུ་འབད་འབུངས་མདུན་སྐྱོད་བྱས།

དགུ་གསུམ་རྒྱལ་ཁའི་ཉིན་མོ་ཐོན་ལ་ཉེ་བའི་སྐབས་འདིར། བྱང་ཤར་ས་ཁུལ་ནས་ལུའུ་ཀོའུ་ཟམ་པའི་བར་དང་། པའོ་ཐ་རི་བོ་ནས་ཐའེ་ཧང་རི་བོའི་རྩེ་མོའི་བར།　 མི་རྣམས་འཇར་འགོག་དམག་འཁྲུག་རྗེས་དྲན་ཁང་དུ་ཕྱིན་ནས་ལོ་ངོ་བཅུ་བཞིའི་རིང་ཁྲག་འདོན་དམར་འཛིང་དང་སྤོབས་པ་ཆེར་བསྐྱེད་བྱས་པའི་འཇར་འགོག་དམག་འཁྲུག་གི་ལོ་ཟླར་ཕྱིར་དྲན་བྱས། འདས་སོང་ལ་ཕྱིར་དྲན་བྱས་ན། རྒྱལ་ཁའི་གླུ་དབྱངས་ད་ལྟའང་རྣ་ལམ་དུ་རྒྱུ་བཞིན་ཡོད་ཅིང་།　རླབས་ཆེན་འཇར་འགོག་དམག་འཁྲུག་སྙིང་སྟོབས་ཀྱི་གཟི་འོད་འཚེར་བཞིན་མཆིས། ཏང་གི་ཚོགས་ཆེན་བཅོ་བརྒྱད་པའི་ཚུན་ལ། སྤྱི་ཁྱབ་ཧྲུའུ་ཅི་ཞི་ཅིན་ཕིང་འཇར་འགོག་དམག་འཁྲུག་ལ་རྗེས་དྲན་ཞུ་བའི་གནད་འགག་གི་དུས་མཚམས་སུ་མི་རིགས་ཡོངས་ཀྱིས་འཇར་འགོག་དམག་འཁྲུག་བསླངས་པར་རྗེས་དྲན་ཞུ་བ་དང་འཇར་འགོག་དམག་འཁྲུག་ལ་རྒྱལ་ཁ་ཐོབ་པར་རྗེས་དྲན་ཞུ་བ་སོགས་ཀྱི་བྱེད་སྒོར་ཐེངས་མང་ཞུགས། འཇར་འགོག་དམག་འཁྲུག་གི་རྗེས་དྲན་སྒྲིག་བཀོད་དང་རྗེས་ཤུལ་དུ་ཐེངས་མང་ཕྱིན་ནས་སྔོན་གཤེགས་དཔའ་བོར་རྗེས་དྲན་ཞུས།　ཏང་ཡོངས་དང་སྤྱི་ཚོགས་ཡོངས་ཀྱིས་འཇར་འགོག་དམག་འཁྲུག་གི་སྙིང་སྟོབས་རླབས་པོ་ཆེ་དར་སྤེལ་གཏོང་བར་སྣེ་ཁྲིད་གནང་།

ཧྲན་ཞི་ཡི་སྟོང་དཔུང་བརྒྱའི་དམག་འཐབ་ཆེན་མོའི་རྗེས་དྲན་ཁང་དུ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སྟོང་དཔུང་བརྒྱའི་དམག་འཐབ་ཆེན་མོའི་ལོ་རྒྱུས་མཛད་རྗེས་རླབས་ཆེན་གྱིས་ང་ཚོའི་ཏང་གིས་མི་རིགས་ཡོངས་ཀྱི་འཇར་འགོག་དམག་འཁྲུག་ཁྲོད་ཐོན་པའི་ནུས་པ་གལ་ཆེན་མཚོན་ཡོད་པ་དང་། ཏང་གིས་འགོ་ཁྲིད་གནང་བའི་མི་དམངས་དམག་འཁྲུག་གི་སྟོབས་ཤུགས་ཆེན་པོ་གང་ལེགས་སྒོས་མཚོན་ཡོད་ཅེས་ནན་གྱིས་གསུངས། ཅི་ལིན་དུ་རྟོག་ཞིབ་གནང་སྐབས། ཁོང་གིས་དམག་དཔོན་དབྱང་ཅིན་ཡུའུ་ཡི་མི་སེམས་འགུལ་བའི་དཔའ་བོའི་མཛད་རྗེས་བརྩེ་བ་ཟབ་མོས་ཞིབ་བརྗོད་གནང་།　སེམས་པ་གང་ལ་ཐོགས་ན་ལུས་པོ་དེ་རུ་ཐོན་པ་བཞིན། 　སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་དཔའ་བོར་བཅངས་པའི་བླ་མེད་གུས་འདུད་དང་རླབས་ཆེན་ལོ་རྒྱུས་ཀྱི་དྲན་འཛིན་ཟབ་མོ་གཅིག་ཏུ་འགྲིལ་ཡོད། 

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“ཀྲུང་གོའི་མི་དམངས་ཀྱིས་འཇར་འགོག་དམག་འཁྲུག་གི་བརྒྱུད་རིམ་རླབས་ཆེན་ཁྲོད་འཇར་འགོག་དམག་འཁྲུག་གི་སྙིང་སྟོབས་རླབས་ཆེན་ཐོན་ཞིང་།　 འཛམ་གླིང་ལ་རྒྱལ་ཁབ་དར་རྒུད་ཅི་ཡོང་སྐྱེ་བོ་ཀུན་ལ་འགན་འཁྲི་ཡོད་པའི་རྒྱལ་གཅེས་བརྩེ་བ་དང་།　འཆི་རྒྱུར་མི་སྐྲག་པ་དང་འཆི་ཡང་མགོ་མི་སྒུར་བའི་མི་རིགས་ཀྱི་ལ་རྒྱ། གཏུམ་སྤྱོད་ལ་མི་སྐྲག་པ་དང་མཐའ་གཅིག་ཏུ་དམར་འཛིང་བྱེད་པའི་དཔའ་བོའི་བློ་སྤོབས། ལན་བརྒྱར་ཕམ་རུང་དཔའ་མི་ཞུམ་པ་དང་རྒྱལ་ཁ་ཐོབ་ངེས་ཀྱི་དད་མོས་བརྟན་པོ་མངོན་ཡོད་ཅེས་བསྟན།

“རྒྱལ་ཁབ་དང་མི་རིགས། ཞི་བདེ་བཅས་ཀྱི་ཆེད་དུ་ཚེ་སྲོག་བློས་བཏང་བའི་མི་ཡོད་ཚད་ལ། དུས་རབས་ལ་འགྱུར་ལྡོག་ཇི་འདྲ་བྱུང་རུང་། ང་ཚོས་ནམ་ཡང་ཁོང་ཚོའི་གཏོང་ཕོད་ཆེན་པོ་དང་བྱས་རྗེས་ཡོད་ཚད་སེམས་སུ་དྲན་དགོས། དེ་ནི་སྔོན་གྱི་བསླབ་བྱ་མ་བརྗེད་ན། རྗེས་མའི་ཉམས་མྱོང་དུ་འགྱུར་ངེས་ཞེས་པ་ནང་བཞིན་ཡིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་སྐུ་དངོས་ཀྱི་སྐུལ་སློང་འོག　 རང་རྒྱལ་གྱིས་ཟླ9ཚེས3ཉིན་དེ་ཀྲུང་གོའི་མི་དམངས་ཀྱིས་འཇར་འགོག་དམག་འཁྲུག་ལ་རྒྱལ་ཁ་བླངས་པའི་རྗེས་དྲན་ཉིན་མོར་གཏན་འཁེལ་བྱས་ཤིང་།  ཟླ9པའི་ཚེས30ཉིན་དེ་སྔོན་གཤེགས་དཔའ་བོའི་རྗེས་དྲན་ཉིན་མོར་གཏན་འཁེལ་བྱས་པ་དང་། ཟླ12པའི་ཚེས13ཉིན་དེ་ནན་ཅིན་དམར་གསོད་ཆེན་མོའི་འདས་པོ་རྣམས་ཀྱི་རྒྱལ་ཁབ་སྤྱི་མཆོད་ཉིན་མོར་གཏན་འཁེལ་བྱས་ནས། ལམ་ལུགས་ཀྱི་རྣམ་པས་ལོ་རྒྱུས་ཀྱི་དྲན་ཤིང་མི་རིགས་ཀྱི་བསམ་པའི་རྒྱུ་ནོར་དུ་བསྒྱུར་ཏེ།　 ལོ་རྒྱུས་ཀྱི་གཟི་འོད་མ་འོངས་པར་འཕྲོ་རུ་བཅུག་པ་དང་།  དད་མོས་ཀྱི་སྟོབས་ཤུགས་ཀྱིས་ལོ་རྒྱུས་ཀྱི་རྡོ་རིང་བསྐྲུན། 

བྱ་གཞག་རླབས་ཆེན་གྱིས་སྙིང་སྟོབས་རླབས་ཆེན་སྐྱོང་བ་དང་། སྙིང་སྟོབས་རླབས་ཆེན་གྱིས་བྱ་གཞག་རླབས་ཆེན་ལ་སྣེ་ཁྲིད་བྱེད།　 ཀྲུང་གོ་མི་དམངས་ཀྱི་འཇར་འགོག་དམག་འཁྲུག་ལ་རྒྱལ་ཁ་ཐོབ་ནས་ལོ་ངོ80འགོར་བའི་རིང་། སྒོས་སུ་ཏང་གི་ཚོགས་ཆེན་བཅོ་བརྒྱད་པའི་ཚུན་ལ། ཀྲུང་ཧྭའི་ས་གཞི་ཆེན་མོར་གནམ་ས་བླ་འོག་བསྒྱུར་བ་ལྟ་བུའི་འགྱུར་ལྡོག་བྱུང་། ཀྲུང་གོ་གུང་ཁྲན་ཏང་གིས་རྒྱལ་ཡོངས་ཀྱི་རིགས་སོ་སོའི་མི་དམངས་ལ་མཐུན་སྒྲིལ་སྣེ་ཁྲིད་བྱས་ཏེ་བརྒྱ་ལོ་དང་པོའི་འབད་འཐབ་དམིགས་འབེན་མངོན་འགྱུར་བྱས་པ་དང་། 　འབྱོར་འབྲིང་སྤྱི་ཚོགས་ཕྱོགས་ཡོངས་ནས་བཙུགས་ལ། ཀྲུང་ཧྭ་མི་རིགས་ཀྱི་ལོ་ངོ་སྟོང་གི་ཕུགས་འདུན་མངོན་འགྱུར་བྱུང་།　 གཅེས་སུ་འོས་པའི་ཀྲུང་གོའི་གང་ས་གང་དུ་གསར་སྐྲུན་གྱི་རྣམ་པས་ཁེངས་ཤིང་། གང་ས་གང་དུ་ཡར་ངོ་ཟླ་བཞིན་འཕེལ་བའི་ཡར་ཐོན་གྱི་རྣམ་པས་ཁེངས་འདུག མཐའ་ཡས་པའི་འཇིག་རྟེན་དང་ལྷ་གྲུ་ཁྱིམ་རྒྱུད་བར་སྣང་ནས་སྦྲེལ་མཐུད་བྱས་ལ། ཀྲུང་གོའི་བར་སྣང་ས་ཚིགས་ཕྱོགས་ཡོངས་ནས་གྲུབ། ཟླ་བའི་ལྷ་མོ་རྟགས་ཅན་གྱིས་ཟླ་བ་འཚོལ་ཞིབ་བྱས་ནས་མཁའ་དབྱིངས་སུ་ཕུགས་འདུན་མངོན་འགྱུར་བྱས་པ་དང་།　 འཕྲུལ་ཆས་ཅན་ནས་ཆ་འཕྲིན་ཅན་དང་རིག་ནུས་ཅན་བར། ཞིང་ལས་དེང་རབས་ཅན་མགྱོགས་མྱུར་སྒོས་སྤེལ་བ་དང་། མཐའ་ཡས་པའི་ས་གཞི་གཤིན་པོར་དྲི་ཞིམ་གྱིས་གཡོགས་ཤིང་མཛོད་ཁང་འབྲུ་རིགས་ཀྱིས་བྱུར་བུར་གཏམས་པས།　 ཀྲུང་གོ་བའི་ལྟོ་ཕོར་རང་ཉིད་ཀྱི་ལག་ཏུ་དམ་པོར་བཟུང་ཡོད། ནུས་ཁུངས་གཙང་མ་དང་ལྗང་མདོག་འཕེལ་རྒྱས་ཀྱིས་གོ་ལ་ཧྲིལ་པོའི་རྒྱུན་མཐུད་འཕེལ་རྒྱས་ལ་སྒུལ་ཤུགས་ཆེན་པོ་བསྩལ། དུས་རབས་གསར་པའི་ཀྲུང་གོའི་གང་ས་ཀུན་ཏུ་སྙན་པའི་གྲགས་པ་འབར་བའི་འཕེལ་རྒྱས་ཀྱི་གྲུབ་འབྲས་ནི་རླབས་ཆེན་འཇར་འགོག་དམག་འཁྲུག་གི་སྙིང་སྟོབས་རྒྱུན་འཛིན་དང་དར་སྤེལ་བཟང་བོ་བྱས་པ་རེད།

དགུང་ལོ་གོ་དྲུག་སོན་པའི་འཇར་འགོག་དམག་འཁྲུག་གི་དམག་མི་རྒན་པ་ཝུན་ཡོན་ཧྥུའུ་ཡིས་བཤད་རྒྱུར། འཇར་འགོག་དམག་འཁྲུག་ལ་རྒྱལ་ཁ་ཐོབ་ནས་ལོ80འཁོར་བའི་དུས་འདི་ནི་ང་རང་ཏང་ནང་ལ་ཞུགས་ནས་ལོ80འཁོར་བའི་ལོའང་ཡིན། ལོ་ངོ80རིང་། ཀྲུང་གོའི་གསར་བརྗེ་དེ་མི་སེར་སྤེལ་ཡུལ་ཕྱེད་ཙམ་དང་བཀས་བཀོད་རྒྱུད་འཛིན་ཕྱེད་ཙམ་སྤྱི་ཚོགས་ཀྱི་དབུལ་ཕོངས་རྗེས་ལུས་ནས་ད་ལྟའི་བར་བརྒྱུད་པ་རེད། ང་ཚོའི་རྒྱལ་ཁབ་ཀྱང་འདི་ལྟ་བུའི་སྟོབས་འབྱོར་རྒྱས་ཡོད་པ་རེད། དུས་རབས་གསར་པར། ང་ཚོའི་སྤྱི་ཁྱབ་ཧྲུའུ་ཅིས་ང་ཚོར་མཐུན་སྒྲིལ་སྣེ་ཁྲིད་གནང་ནས་སྔར་ལས་ལྷག་པའི་རྒྱལ་ཁ་གསར་པ་བླངས། ང་ཚོས་ལོ་རྒྱུས་ཡིད་ལ་བརྟན་པོར་བཅངས་ནས་མུ་མཐུད་དུ་འབད་བརྩོན་བྱ་དགོས་ཤིང་། ང་ཚོའི་རྒྱལ་ཁབ་ཀྱང་འཛམ་གླིང་སྟེང་ནས་སྔར་བས་སྟོབས་འབྱོར་མངའ་ཐང་རྒྱས་ངེས་རེད་ཟེར།

ཝང་ཧོན་ཡུས་ཀྱི་ཚ་མོ་ཡུས་ཨའེ་མའེ་ཡིས་བཤད་རྒྱུར། ངའི་རྨོ་བོ་ལགས་ཀྱི་ལོ་རབས་དེའི་མི་རྣམས་དམག་དཔུང་དུ་འཚང་ཁ་ཤིག་ཤིག་ངང་ཞུགས་ཏེ། གཡུལ་སར་རྒྱབ་སྐྱོར་བྱས་པ་དང་མཐུན་སྒྲིལ་རྡོག་རྩ་གཅིག་སྒྲིལ་གྱིས་ང་ཚོར་རླབས་ཆེན་གྱི་རྒྱལ་ཁ་ཐོབ་པ་རེད། ད་ལྟ་ང་ཚོས་རླབས་ཆེན་གྱི་འཇར་འགོག་དམག་འཁྲུག་གི་སྙིང་སྟོབས་མུ་མཐུད་དུ་དར་སྤེལ་བཏང་ནས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་སྣེ་ཁྲིད་འོག རྡོག་རྩ་གཅིག་སྒྲིལ་གྱིས་ཀྲུང་ཧྭ་མི་རིགས་རླབས་ཆེན་བསྐྱར་དར་གྱི་ཕྱོགས་སུ་ཧུར་ཐག་འབད་འཐབ་བྱེད་དགོས།

འདས་སོང་ལ་ཕྱིར་མིག་བལྟས་ཚེ། འཇར་འགོག་དམག་འཁྲུག་སྔ་མོ་ནས་མཇུག་སྒྲིལ་བ་རེད།　 མ་འོངས་པར་ཁ་ཕྱོགས་ན། རླབས་ཆེན་གྱི་འཇར་འགོག་དམག་འཁྲུག་གི་སྙིང་སྟོབས་ལ་འོད་སྟོང་འབར་ཡོད། དེ་ནི་ཀྲུང་གོའི་མི་དམངས་ཀྱི་བསམ་པའི་རྒྱུ་ནོར་ཧ་ཅང་རྩ་ཆེན་ཞིག་ཡིན་ཞིང་། ཀྲུང་ཧྭའི་བུ་དང་བུ་མོའི་སེམས་ཁོང་དུ་སིམ་ཡོད། 

ཧྲན་ཞི་ཞིང་ཆེན་དབྱང་ཆོན་གྲོང་ཁྱེར་གྱི་མཐོ་རིམ་སློབ་འབྲིང་གི་སློབ་མ་ཁྲེན་མིང་ཡའེ་ཡིས་བཤད་རྒྱུར།　 ང་ཚོ་ཆུང་དུས་ནས་འཇར་འགོག་སྔོན་གཤེགས་དཔའ་བོ་ཚོའི་དཔའ་བོའི་གཏམ་རྒྱུད་ཀྱི་ཤུགས་རྐྱེན་འོག་ནར་སོན་པ་ཡིན། དུས་རབས་གསར་པའི་གཞོན་ནུ་ཞིག་ཡིན་པའི་ཆ་ནས། ང་ཚོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མངགས་བཅོལ་ཟབ་མོ་ཡིད་ལ་བརྟན་པོར་བཅངས་དགོས་པར་མ་ཟད། ལོ་རྒྱུས་བློ་ལ་བརྟན་པོར་ངེས་དགོས་ལ། སློབ་སྦྱོང་ལ་འབད་པ་བྱས་ཏེ།　 རྒྱལ་གཅེས་ཀྱི་བརྩེ་སེམས་དེ་རྒྱལ་ཁབ་ལ་དྲིན་ལན་འཇལ་བའི་ཕུགས་འདུན་དུ་བསྒྱུར་ནས་ཀྲུང་ཧྭ་མི་རིགས་རླབས་ཆེན་བསྐྱར་དར་གྱི་ཀྲུང་གོའི་ཕུགས་འདུན་མངོན་འགྱུར་ཡོང་ཆེད་འབད་འཐབ་ལྷོད་མེད་བྱེད་དགོས།

སྐམ་དམག་འབུམ་སྡེ་ཆེན་མོ73པའི“དམག་དཔུང་སྟོབས་ལྡན་དྲག་རྩལ་དམར་དམག་བརྒྱ་ཤོག་བཞི་པའི”ཏང་ཝེ་ཐའོ་ཡིས་བཤད་རྒྱུར། ཀྲུའུ་ཞི་ཞི་ཅིན་ཕིང་གིས“རླབས་ཆེན་འཇར་འགོག་དམག་འཁྲུག་གི་སྙིང་སྟོབས་ཀྱིས་ཀྲུང་གོའི་མི་དམངས་ལ་དཀའ་ངལ་དང་ཉེན་ཁ་མཐའ་དག་ཁྱད་བསད་བྱས་ནས། ཀྲུང་ཧྭ་མི་རིགས་རླབས་ཆེན་བསྐྱར་དར་མངོན་འགྱུར་བྱ་ཆེད་འབད་འཐབ་བྱ་རྒྱུར་ནམ་ཡང་སྐུལ་མ་གཏོང་ངེས”ཞེས་གསུངས་པ་རེད། དུས་རབས་གསར་པའི་གསར་བརྗེའི་དམག་མི་ཞིག་ཡིན་པའི་ཆ་ནས། ང་ཚོས་ངེས་པར་དུ་གཙོ་འཛིན་གྱི་མངགས་བཅོལ་ཡིད་ལ་བརྟན་པོར་བཅངས་ཏེ། ཕུགས་བསམ་དང་དད་སེམས་ཇེ་བརྟན་དུ་གཏོང་དགོས་ལ། དམར་འཛིང་མཐར་ཕྱིན་བྱེད་པའི་དཔའ་བོའི་བློ་སྟོབས་དར་སྤེལ་གཏོང་དགོས་ཤིང་། དམག་དཔུང་འཛུགས་སྐྱོང་གི་ལོ་བརྒྱའི་འབད་འཐབ་དམིགས་ཚད་མངོན་འགྱུར་བྱེད་པའི་ལམ་བུ་རུ་དཔའ་ངར་ཆེན་པོས་མདུན་སྐྱོད་བྱས་ནས།  ཁྱིམ་སྲུང་རྒྱལ་སྲུང་གི་འགན་འཁྲི་ལྕི་མོ་ཕྲག་ཏུ་ལེན་དགོས།

མིག་སྔར། རྙོག་འཛིང་ཆེ་བའི་རྒྱལ་སྤྱི་དང་རྒྱལ་ནང་གི་གནས་བབ་དང་། དཀའ་ཚེགས་ཆེ་བའི་བཅོས་བསྒྱུར་གོང་སྤེལ་བརྟན་ལྷིང་གི་ལས་འགན། གཏན་འཁེལ་མིན་པ་དང་སྔོན་དཔག་དཀའ་བའི་ཉེན་ཁ་དང་འགྲན་རྩོད་སྣ་ཚོགས་བཅས་ལ་འཕྲད་ཡོད་པས། ང་ཚོས་འཇར་འགོག་དམག་འཁྲུག་གི་སྙིང་སྟོབས་རླབས་པོ་ཆེ་དར་སྤེལ་གཏོང་དགོས་ལ། དཀའ་ངལ་མཐའ་དག་ཟིལ་གྱིས་གནོན་པའི་ཆོད་སེམས་དང་བློ་སྟོབས་ཀྱིས་འཐབ་རྩོད་བྱེད་ཕོད་པ་དང་གསར་སྐྲུན་བྱེད་མཁས་པར་བྱས་ནས། ཀྲུང་ཧྭ་མི་རིགས་རླབས་ཆེན་བསྐྱར་དར་མངོན་འགྱུར་བྱེད་ཆེད་སྙིང་རུས་ལྷོད་མེད་ཀྱིས་འབད་འཐབ་བྱས་ཏེ། མཐར་ཐུག་གི་རྒྱལ་ཁ་ལེན་རག་བར་རྒྱུན་འཁྱོངས་བྱེད་དགོས།