མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ8པའི་ཚེས26ཉིན་གྱི་ཕྱི་དྲོར། སྲིད་གྲོས་རྒྱལ་ཡོངས་ཨུ་ཡོན་ལྷན་ཁང་རྒྱུན་ལས་ཨུ་ཡོན་ལྷན་ཁང་གི་སྐབས་བཅུ་བཞི་པའི་གྲོས་ཚོགས་ཐེངས་བཅུ་གསུམ་པ་པེ་ཅིང་དུ་མཇུག་བསྒྲིལ། གྲོས་ཚོགས་ལས“རྒྱལ་དམངས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི‘ལོ་ལྔའི་འཆར་འགོད་བཅོ་ལྔ་པའི’འཆར་འགོད་གཏན་འབེབས་བཟོ་རྒྱུ”གྲོས་གཞིར་བྱས་ཏེ་གྲོས་མོལ་སྲིད་གླེང་བྱས། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ཨུ། རྒྱལ་ཡོངས་སྲིད་གྲོས་ཀྱི་ཀྲུའུ་ཞི་ཝང་ཧུའུ་ཉིང་གིས་མཇུག་སྒྲིལ་གྲོས་ཚོགས་ལ་འགོ་འཛིན་མཛད་པར་མ་ཟད་གསུང་བཤད་གནང་།
སྲིད་གྲོས་རྒྱལ་ཡོངས་ཨུ་ཡོན་ལྷན་ཁང་རྒྱུན་ལས་ཨུ་ཡོན་ལྷན་ཁང་གི་སྐབས་བཅུ་བཞི་པའི་གྲོས་ཚོགས་ཐེངས་བཅུ་གསུམ་པ་ཚེས26ཉིན་གྱི་ཕྱི་དྲོར་པེ་ཅིང་དུ་མཇུག་བསྒྲིལ། གྲོས་ཚོགས་ལས“རྒྱལ་དམངས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི‘ལོ་ལྔའི་འཆར་འགོད་བཅོ་ལྔ་པའི’འཆར་འགོད་གཏན་འབེབས་བཟོ་རྒྱུ”གྲོས་གཞིར་བྱས་ཏེ་གྲོས་མོལ་སྲིད་གླེང་བྱས། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ཨུ། རྒྱལ་ཡོངས་སྲིད་གྲོས་ཀྱི་ཀྲུའུ་ཞི་ཝང་ཧུའུ་ཉིང་གིས་མཇུག་སྒྲིལ་གྲོས་ཚོགས་ལ་འགོ་འཛིན་མཛད་པར་མ་ཟད་གསུང་བཤད་གནང་། ཁོང་གིས་བསྟན་དོན། ལོ་ལྔའི་འཆར་འགོད་བཅུ་བཞི་པའི་ཚུན་ལ། བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཀྲུང་གུང་ཀྲུང་དབྱང་གི་འགོ་ཁྲིད་སྟོབས་ལྡན་འོག རང་རྒྱལ་གྱི་དཔལ་འབྱོར་སྤྱི་ཚོགས་འཕེལ་རྒྱས་ཐད་གསར་གཏོད་རང་བཞིན་གྱི་འཕེལ་རིམ་གསར་པ་དང་ཐོད་བརྒལ་རང་བཞིན་གྱི་འཕོ་འགྱུར། ལོ་རྒྱུས་རང་བཞིན་གྱི་གྲུབ་འབྲས་བཅས་བླངས་ཡོད། ང་ཚོས“གཏན་ཕབ་གཉིས”ཀྱི་ཐག་གཅོད་རང་བཞིན་གྱི་དོན་སྙིང་ལ་གོ་བ་ཟབ་མོ་ལེན་པ་དང་། “སྲུང་སྐྱོང་གཉིས”མཐའ་གཅིག་ཏུ་ལེགས་པོར་བསྒྲུབ་ནས། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་ཕྱོགས་ཡོངས་ནས་ལག་བསྟར་བྱེད་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་འཕེལ་རྒྱས་འཐབ་ཇུས་དང་འཆར་འགོད་སྐོར་གྱི་རྒྱས་བཤད་གལ་ཆེན་ལ་སློབ་སྦྱོང་དང་གོ་བ་ཟབ་མོ་ལེན་དགོས་ཤིང་། ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བར་གཞིགས་ཏེ་སྲིད་གླེང་ཇུས་འདོན་བྱས་ནས། ལོ་ལྔའི་འཆར་འགོད་བཅོ་ལྔ་པའི་འཆར་འགོད་སྒྲིག་བཟོ་དང་ལག་བསྟར་བྱེད་པར་མི་སེམས་གཅིག་སྡུད་དང་ངོས་འཛིན་གཅིག་སྡུད། བློ་གྲོས་གཅིག་སྡུད། སྟོབས་ཤུགས་གཅིག་སྡུད་བཅས་བྱེད་དགོས།
ཝང་ཧུའུ་ཉིང་གིས་བསྟན་དོན། མི་དམངས་སྲིད་གྲོས་ཀྱིས་ལོ་ལྔའི་འཆར་འགོད་བཅོ་ལྔ་པའི་དུས་སྐབས་ཀྱི་འཕེལ་རྒྱས་གནས་བབ་དང་ལས་འགན་ཡང་དག་གིས་ཁོང་དུ་ཆུད་པར་བྱེད་དགོས་པ་དང་། 2035ལོའི་སྤྱི་ཚོགས་རིང་ལུགས་དེང་རབས་ཅན་གྱི་དམིགས་འབེན་གཞི་རྩའི་ཆ་ནས་མངོན་འགྱུར་ཡོང་བར་དམ་པོར་དམིགས་ནས། ལོ་ལྔའི་འཆར་འགོད་བཅོ་ལྔ་པའི་དུས་སྐབས་ཀྱི་དཔལ་འབྱོར་སྤྱི་ཚོགས་གོང་འཕེལ་གྱི་དམིགས་འབེན་དང་འཐབ་ཇུས་ཀྱི་ལས་འགན་གལ་ཆེན། བཅོས་བསྒྱུར་བྱེད་ཐབས་གལ་ཆེན། བཟོ་སྐྲུན་རྣམ་གྲངས་གལ་ཆེན་སོགས་ལ་དམིགས་ཏེ། སྤུས་ཚད་མཐོ་བའི་འཕེལ་རྒྱས་ལ་ཁྱོན་ཡོངས་ནས་སྐུལ་འདེད་གཏོང་བ་དང་ཆུ་ཚད་མཐོ་བའི་ཕྱི་ཕྱོགས་སྒོ་འབྱེད་ལ་སྐུལ་འདེད་གཏོང་བ། དམངས་ཡོངས་ཐུན་མོང་ཕྱུག་འགྱུར་ཡོང་བར་སྐུལ་འདེད་གཏོང་བ་སོགས་ལ་ཐབས་ཇུས་ཡག་པོ་འདོན་པ་དང་རྒྱབ་སྐྱོར་ཤུགས་ཆེན་བྱེད་དགོས། ལོ་འཁོར་གྱི་གྲོས་མོལ་འཆར་གཞི་གཏན་འབེབས་དང་དོན་འཁྱོལ་བྱེད་པ་སོགས་ལ་ཟུང་འབྲེལ་བྱས་ཏེ། ལོ་ལྔའི་འཆར་འགོད་བཅོ་ལྔ་པའི་འཆར་འགོད་གཏན་འབེབས་དང་ལག་བསྟར་བྱེད་པའི་འབྲེལ་ཡོད་གནད་དོན་གལ་ཆེན་དག་ལྟ་ཞིབ་རྟོག་ཞིབ་དང་གྲོས་མོལ་སྲིད་གླེང་། དམངས་གཙོའི་ལྟ་སྐུལ། སྤྱི་ཚོགས་གནས་ཚུལ་དང་དམངས་ཀྱི་འདོད་བློའི་ཆ་འཕྲིན་སོགས་ཀྱི་བྱ་བའི་བཀོད་སྒྲིག་ཁྲོད་བཞག་ནས། སྤུས་ཚད་མཐོ་བའི་ཞིབ་འཇུག་གྲུབ་འབྲས་དང་ཐབས་ཇུས་གྲོས་གཞི་གྲུབ་པར་བྱེད་དགོས། རྒྱལ་ཡོངས་སྲིད་གྲོས་ཀྱི་བྱ་བ་སོ་སོ་སྤུས་ཚད་མཐོ་བའི་སྒོ་ནས་ལེགས་པར་བསྒྲུབ་དགོས་ལ། ཀྲུང་གུང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དགོངས་དོན་སློབ་སྦྱོང་དང་དྲིལ་སྒྲོག ལག་བསྟར་བཅས་ཡག་པོ་བྱས་ནས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཀྲུང་གོ་མི་དམངས་ཆབ་སྲིད་གྲོས་མོལ་ཚོགས་འདུ་དབུ་བརྙེས་ནས་ལོ་ངོ75འཁོར་བར་རྟེན་འབྲེལ་ཞུ་བའི་ཚོགས་ཆེན་སྟེང་གི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་ཟབ་མོ་བྱེད་པར་སྐུལ་འདེད་བཏང་སྟེ། ལོ་འཁོར་གྱི་འགན་སྒྲུབ་ལས་འགན་ལེགས་འགྲུབ་བྱེད་དགོས།
གྲོས་ཚོགས་ལས་བཟོ་བཅོས་བྱས་རྗེས་ཀྱི《ཀྲུང་གོ་མི་དམངས་ཆབ་སྲིད་གྲོས་མོལ་ཚོགས་འདུ་རྒྱལ་ཡོངས་ཨུ་ཡོན་ལྷན་ཁང་གི་གྲོས་གཞིའི་བྱ་བའི་སྲོལ་ཡིག》ལ་གྲོས་འཆམ་བྱུང་།
གྲོས་ཚོགས་ལས་བརྡས་ཐག་བཅད་པ་བརྒྱུད། བློ་མཐུན་ཧུང་ལེང་རྒྱལ་ཡོངས་སྲིད་གྲོས་སྐབས་བཅུ་བཞི་པའི་དྲུང་ཡིག་ཆེན་མོ་གཞོན་པར་བསྐོས་པ་དང་། བློ་མཐུན་ཕཱན་ཡུའེ་རྒྱལ་ཡོངས་སྲིད་གྲོས་སྐབས་བཅུ་བཞི་པའི་ཨུ་ཡོན་དང་། རིག་གནས་ལོ་རྒྱུས་དང་སློབ་སྦྱོང་ཨུ་ཡོན་ལྷན་ཁང་གི་ཀྲུའུ་རིན་གཞོན་པར་གསབ་སྣོན་བྱས། བློ་མཐུན་ཀྲང་མའོ་ཡུས་ཀྱིསརྒྱལ་ཡོངས་སྲིད་གྲོས་སྐབས་བཅུ་བཞི་པའི་དྲུང་ཡིག་ཆེན་མོ་གཞོན་པའི་འགན་འཁུར་རྒྱུ་མིན། གྲོས་ཚོགས་ལས་བློ་མཐུན་ཙོའུ་ཅཱ་དབྱི་ཡི་རྒྱལ་ཡོངས་སྲིད་གྲོས་སྐབས་བཅུ་བཞི་པའི་དྲུང་ཡིག་ཆེན་མོ་གཞོན་པའི་གོ་གནས་འཐེན་པར་གྲོས་འཆམ་བྱུང་བ་མ་ཟད། དེའི་རྒྱུན་ཨུ་དང་ཨུ་ཡོན་ལས་དགོངས་ཞུ་བྱེད་པའི་ཐག་གཅོད་དང་ལེན་བྱས། བློ་མཐུན་ཁྲིན་ཞཱའོ་ཅང་གིས་རྒྱལ་ཡོངས་སྲིད་གྲོས་སྐབས་བཅུ་བཞི་པའི་རྒྱུན་ཨུའི་གོ་གནས་འཁུར་རྒྱུ་མིན་པར་གྲོས་འཆམ་བྱུང་བ་མ་ཟད་དེའི་ཨུ་ཡོན་ལས་འཁུར་དགོངས་ཞུ་བྱེད་པའི་ཐག་གཅོད་དང་ལེན་བྱས།
གྲོས་ཚོགས་ལས་ཀྲོའུ་ཞན་ཝང་གི་རྒྱལ་ཡོངས་སྲིད་གྲོས་སྐབས་བཅུ་བཞི་པའི་ཨུ་ཡོན་གྱི་ཐོབ་ཐང་རྩིས་མེད་དུ་གཏོང་རྒྱུའི་སྐོར་གྱི་ཐག་གཅོད་ལ་རྗེས་འདེད་ཁས་ལེན་བྱས།
མཇུག་སྒྲིལ་ཚོགས་འདུའི་རྗེས་སུ། རང་བྱུང་ཐོན་ཁུངས་པུའུ་ཡི་པུའུ་ཀྲང་གཞོན་པ། རྒྱལ་ཁབ་རྒྱ་མཚོ་ཅུའུ་ཡི་ཅུའུ་ཀྲང་སུང་ཧྲུའུ་ཞཱན་གྱིས་གདན་ཞུས་ལྟར་ཁ་བྱང་ལ་རྒྱ་མཚོའི་ཚན་རྩལ་གསར་གཏོད་ཇེ་མགྱོགས་སུ་གཏོང་བ་ཞེས་པའི་སློབ་སྦྱོང་འཆད་ཁྲིད་བྱས།
