《ཞི་ཅིན་ཕིང་གི་རིག་གནས་ཀྱི་བརྩེ་བ》ཞེས་པ་ཧྲང་ཧའེ་མཉམ་ལས་རྩ་འཛུགས་རྒྱལ་ཁབ་ཀྱི་སྨྱན་སྦྱོར་གཙོ་བོ་ལས་གཏོང་འགོ་བརྩམས།

2025ལོའི་ཧྲང་ཧའེ་མཉམ་ལས་རྩ་འཛུགས་ཀྱི་རྩེ་ཚོགས་འཚོགས་ལ་ཉེ་བའི་སྐབས་འདིར། ཀྲུང་དབྱང་རྒྱང་སྒྲོག་བརྙན་འཕྲིན་སྤྱི་ཁྱབ་ལས་ཁུངས་ཀྱིས་སྒྲིག་སྦྱོར་བྱས་པའི་ཆེད་དོན་བརྙན་འཕྲིན《ཞི་ཅིན་ཕིང་གི་རིག་གནས་ཀྱི་བརྩེ་བ》ཞེས་པ་ཧྲང་ཧའེ་མཉམ་ལས་རྩ་འཛུགས་རྒྱལ་ཁབ་ཀྱི་སྨྱན་སྦྱོར་གཙོ་བོ་ལས་གཏོང་འགོ་རྩོམ་པའི་བྱེད་སྒོ་ཟླ8པའི་ཚེས25ཉིན་པེ་ཅིང་དུ་སྤེལ། ཅིར་ཅི་སི་ཐན་གྱི་སྲིད་འཛིན་ཀྲ་ཕཱ་ལའོ་ཧྥུའུ་དང་ཕ་ཁི་སི་ཐན་གྱི་ཙུང་ལི་ཞཱ་པ་ཙི་ཡིས་རྟེན་འབྲེལ་འཕྲིན་ཡིག་བསྐུར་ནས། ལེ་ཚན་གཏོང་འགོ་བརྩམས་པར་སྤྲོ་སེམས་འཁོལ་བའི་རྟེན་འབྲེལ་ཞུས།

《ཞི་ཅིན་ཕིང་གི་རིག་གནས་ཀྱི་བརྩེ་བ》ཞེས་པར་ཀྲུའུ་ཞི་ཞི་ཅིན་ཕིང་གི་ཐུགས་ལ་རིག་གནས་རྒྱུན་འཛིན་དར་སྤེལ་བྱ་རྒྱུ་བཟུང་ཡོད་པའི་གསོན་ཉམས་དོད་པའི་གཏམ་རྒྱུད་ཞིབ་ཏུ་བདམས་ཏེ། རྒྱལ་སྤྱིའི་མང་ཚོགས་ལ་ཞི་ཅིན་ཕིང་གི་རིག་གནས་དགོངས་པའི་སྙིང་པོ་དང་ཀྲུའུ་ཞི་ཞི་ཅིན་ཕིང་གི་རྒྱལ་སྲིད་སྐྱོང་ལུགས་འདུ་ཤེས་ཀྱི་རིག་གནས་ཀྱི་རྨང་གཞི་ཟབ་མོ་རྒྱས་བཤད་གནང་ནས། “རིག་གནས་དར་ན་རྒྱལ་ཁབ་དར་བ་དང་། རིག་གནས་སྟོབས་ན་མི་རིགས་སྟོབས་པའི”རིན་ཐང་འདུ་ཤེས་གསོན་ཉམས་དོད་པའི་སྒོ་ནས་གསལ་འགྲེལ་བྱས་ཡོད། ལེ་ཚན་ལས་ཞི་ཅིན་ཕིང་གི་ཕྱག་ལས་གནང་སའི་ཡུལ་དང་རྟོག་ཞིབ་གནང་མྱོང་བའི་ས་ཆར་བཅར་འདྲིར་ཕྱིན་ཏེ།　 ཁོང་དང་ལྷན་དུ་བྱ་བ་སྒྲུབ་མྱོང་བའི་མི་ལ་བཅར་འདྲི་ཞིབ་མོ་བྱས་པ་དང་། དོན་དངོས་དཔེ་མཚོན་བཏུས་ཏེ། དུས་རབས་གསར་པའི་ཀྲུང་གོས་དཔལ་ཡོན་གྱི་འབྱུང་ཁུངས་འཚོལ་ཞིབ་དང་ཤུལ་བཞག་རིག་གནས་སྲུང་སྐྱོབ་སོགས་ཐད་ཀྱི་འབད་པའི་ལག་ལེན་མཐའ་དག་ལངས་གཟིགས་ཀྱི་རྣམ་པས་མངོན་ཞིང་། ཀྲུང་ཧྭའི་རིག་གནས་ཀྱི་ཡུན་རིང་ལོ་རྒྱུས་དང་། རྒྱ་ཆེ་གཏིང་ཟབ་ཀྱི་ནང་དོན་ཁྱད་ཆོས། མཉམ་སྡུད་མཉམ་གསོག་གི་སྒོ་འབྱེད་བློ་རྒྱ་བཅས་མངོན་པར་མཚོན་ཡོད།

ཚེས25ཉིན་ནས་བཟུང་། ལེ་ཚན་འདི་ཨུ་རུ་སུ་དང་། ཧ་སག་སི་ཐན། ཅིར་ཅི་སི་ཐན། ཕ་ཁི་སི་ཐན། དབྱི་ལང། ཨུ་རུ་སུ་དཀར་པོ་སོགས་ཧྲང་ཧའེ་མཉམ་ལས་རྩ་འཛུགས་རྒྱལ་ཁབ་ཀྱི་སྨྱན་སྦྱོར་གཙོ་བོ་ལས་གཏོང་རྒྱུ་རེད།