མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
མཚོ་སྔོན་གསར་འགྱུར་དྲ་བའི་འཕྲིན། ཉེ་ཆར་མཚོ་སྔོན་ཞིང་ཆེན་མཚོ་བྱང་བོད་རིགས་རང་སྐྱོང་ཁུལ་མདོ་ལ་རྫོང་གི་ཁྱད་ཆོས་ལྡན་པའི་ཞིང་ཕྱུགས་ཐོན་རྫས་སྟེ་མདོ་ལའི་ལུག་ཤ་དང་སྐམས་ཤ་གཉིས་ལ་ཞང་ཀང་གི་ཚད་གཞི་དང་ཞིབ་བཤེར་གཏན་འཁེལ་ལྟེ་གནས(STC)ཀྱིས་སྤུས་ལེགས་ཁས་ལེན་བརྒྱུད་ར་སྤྲོད་དཔང་རྟགས་གནང་བ་དང་། དེས་ས་གནས་དེའི་མཐོ་སྒང་གི་ཕྱུགས་རིགས་དངོས་སུ་རྒྱལ་སྤྱིའི་ཁྲོམ་རར་བསྐྱོད་ནས་སྤུས་རྟགས་དར་སྤེལ་ཐད་ཀྱི་འགག་སྒོ་བརྒལ་བའི་ལམ་ཚད་རྡོ་རིང་ཡིན་པ་མཚོན།
མདོ་ལ་རྫོང་གིས་མདོ་ལ་རི་བོ་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་གྱི་ལྟེ་བའི་ས་ཁོངས་ཀྱི་སྐྱེ་ཁམས་ཁོར་ཡུག་དྭངས་གཙང་དང་ས་བབ་མཐོ་ལ་གྲང་ངར་ཆེ་བའི་གནམ་གཤིས་འོག་གི་སྐྱེ་འཚར་ཆ་རྐྱེན་ལ་བརྟེན་ནས། ཤང་ཀང་གི་ཚད་གཞི་དང་ཞིབ་བཤེར་ལྟེ་གནས་བར་རང་འགུལ་གྱིས་འབྲེལ་བ་བྱས་ཏེ་མི་སྣ་སྒྲིག་འཛུགས་ཐོག་རྒྱལ་སྤྱིའི་ཚད་གཞིའི་ཞིབ་སྲོལ་མ་ལག་ལ་ཞིབ་འཇུག་དང་སློབ་སྦྱོང་བྱས་ཏེ། ནོར་ལུག་གི་རྒྱུན་ལྡན་གསོ་སྤེལ་ཟིན་ཐོ་དང་རིམས་ནད་འགོག་ཟོན་གྱི་ཡིག་ཚགས་བཟོ་བ་ནས་བཤས་གསོད་དང་དུམ་བགོས་གོ་རིམ་ལ་འཕྲོད་བསྟེན་གྱི་ཚད་གཞི་ལག་བསྟར་བྱེད་པའི་བར་དང་། ཞིབ་དཔྱད་བྱས་པའི་མ་དཔེ་དག་འཁྱགས་པོར་ཐུམ་སྒྲིལ་ཚད་ལྡན་བྱས་པའི་བར་གྱི་བརྒྱུད་རིམ་ཧྲིལ་པོར་ཚད་གཞི་མཐོ་བའི་སྒོ་ནས་ཚད་ལྡན་ཅན་དུ་འགྱུར་བར་སྐུལ་འདེད་བཏང་། དེ་དང་ཆབས་ཅིག་ས་གནས་དེའི་ཆེད་དོན་མ་དངུལ་རོགས་སྐྱོར་དང་། སྣེ་ཁྲིད་ཁེ་ལས་གསོ་སྐྱོང་། ཐོན་སློབ་ཞིབ་གསུམ་མཉམ་ལས་སོགས་ཀྱི་བྱེད་ཐབས་བརྒྱུད་སྣ་རིགས་ཇེ་ལེགས་དང་། ལས་སྣོན་ཞིབ་ཕྲ། འཁྱགས་བཟོས་ཟོག་འགྲེམས་སོགས་ལག་རྩལ་ལག་བསྟར་ཕྱོགས་ལ་སྐུལ་འདེད་བཏང་བ་མ་ཟད། ད་དུང་སྦྲེལ་ཐག་ཡོངས་ཀྱི་སྤུས་ཚད་ལ་དོ་དམ་ཚོད་འཛིན་མུ་མཐུད་ཤུགས་བསྣན་པ་སོགས་མཐར་མདོ་ལའི་ལུག་ཤ་དང་སྐམས་ཤའི་དམིགས་ཚད་ཁག་ཚང་མ་ཚད་གཞིར་སླེབས་པས་རྒྱལ་སྤྱིའི་སྟེང་ཁས་ལེན་པའི་དཔང་རྟགས་ཀྱི་གྲུབ་འབྲས་དེ་ཐོབ་པ་རེད།
ཐེངས་འདིའི་ཁས་ལེན་ར་སྤྲོད་ལ་གྲོས་འཆམ་བྱུང་བ་དེ་ནི་མདོ་ལའི་ལུག་ཤ་དང་སྐམས་ཤའི་རང་བྱུང་གི་ཕུལ་དུ་བྱུང་བའི་སྤུས་ཚད་དང་དེ་བཞིན་ལྗང་མདོག་བདེ་འཇགས་ཐོན་སྐྱེད་མ་ལག་གི་དབང་གྲགས་ཁས་ལེན་བྱས་པ་ཞིག་ཡིན་པ་མ་ཟད།ཐོན་རྫས་ཀྱི་རྒྱལ་སྤྱིའི་ཁྲོམ་རའི་འགྲན་རྩོད་ནུས་པ་དང་སྤུས་རྟགས་རིན་གོང་འཕར་བའི་ནུས་པ་མངོན་གསལ་དོད་པོས་ཆེ་རུ་ཕྱིན་ནས་དེ་ལ་རྩེར་སོན་ཁྲོམ་རར་ཞུགས་པའི“གསེར་གྱི་ལྡེ་མིག་”ཐོབ་པ་ཞིག་རེད། དེ་དང་ཆབས་ཅིག་མདོ་ལ་རྫོང་གི་ཕྱུགས་ལས་ཚད་ལྡན་ཅན་དང་། སྤུས་རྟགས་ཅན། རྒྱལ་སྤྱི་ཅན་བཅས་སུ་བསྒྱུར་རྒྱུར་སྐུལ་འདེད་ཇེ་མགྱོགས་སུ་གཏོང་བ་དང་། ཐོན་ལས་འབྲེལ་ཐག་ཡོངས་ཀྱི་རིན་ཐང་ཇེ་མཐོར་གཏོང་རྒྱུར་རོགས་རམ་བྱེད་པ། འབྲོག་པ་རྣམས་ཀྱི་ཡོང་འབབ་འཕར་རྒྱུར་སྐུལ་ཁྲིད་བྱེད་པ།“མདོ་ལ”ས་ཁོངས་ཀྱི་སྤྱི་སྤྱོད་སྤུས་རྟགས་ཀྱི་སྐད་གྲགས་ཆོད་ཚད་དང་མཚན་སྙན་སྔར་བས་ཆེ་རུ་གཏོང་རྒྱུ་རེད།
